Tʋma Labʋ 9
9
Kɩpaɣlʋ Yesu ya Sɔɔlɩ
(Tʋma 22.6-16; 26.12-18)
1Sɔɔlɩ ñataanaɣ Kɩpaɣlʋ wayɩ tɩŋɩyaa nɛ ɛsɩyɛ nɛ ɛcaɣ se ɛkʋ-wɛ. Pʋ-yɔɔ ewobi cɔjɔnaa ñʋʋdʋ cɔlɔ 2se ɛ́lɛ́ ɛha-ɩ takayaɣ ŋgá kahaɣ-ɩ waɖɛ se ewolo Damaasɩ Yuda ñɩma Ɛsɔ ɖɩsɛyɛ ndɩ ndɩ taa nɛ yee ɛna halaa yaa abalaa nabɛyɛ patɩŋɩɣ Kɩpaɣlʋ nʋmɔʋ yɔ, ɛkpa-wɛ ɛhɔkɩ-wɛ nɛ ewoni Yeruusalɛm.
3Ɛkpaɣ nʋmɔʋ nɛ ɛñɔtɩnɩ Damaasɩ lɛ, ñalɩmɩyɛ naɖɩyɛ tɩlɩʋnɩ ɛsɔdaa yem nɛ ɖitii ɛ-yɔɔ. 4Peeɖe etibi ɛfalɩ tataa nɛ ɛnɩɣ pʋyɔɔdʋʋnɩ-ɩ se: «Sɔɔlɩ! Sɔɔlɩ! Pɩlabɩ ɛzɩma nɛ ŋwɛɛ ma-wayɩ kaŋ kaŋ ḿbʋ́?» 5Ɛlɛ́, Sɔɔlɩ pɔzɩ se: «Kɩpaɣlʋ! Ña anɩ?» Pucosi-i se: «Ma Yesu weyi ŋwɛ ɛ-wayɩ kaŋ kaŋ yɔ. 6Kʋyɩ ŋwolo tɛtʋ taa nɛ peheyi-ŋ mbʋ́ pʋwɛɛ se ŋla yɔ.»
7Mbá ɛ nɛ wɛ pɔɖɔŋaɣ yɔ, pasɩŋ pe-ɖeɖe yem, paanaɣ pɔyɔɔdɩ se we: panɩɣ pʋyɔɔdʋʋ, ɛlɛ́, paanaɣ weyi ɛyɔɔdʋʋ yɔ. 8Sɔɔlɩ kʋyɩ tataa peeɖe nɛ ɛcɔŋna lɛ, ɛɛnaɣ. Peeɖe pɔ́ɖɔ́kɩ e-nesi taa nɛ pɔhɔm-ɩ nɛ powoni Damaasɩ. 9Ɛlabɩ kɩyakɩŋ naadozo, ɛtana, ɛtɔtɔɔ, ɛtɔñɔɔ.
10Krɩstʋ wayɩ tɩŋɩyʋ nɔɔyʋ kɛwɛ Damaasɩ peeɖe, payaɣ-ɩ se Anaanɩyaasɩ. Pɩkɛdaa lɛ, Kɩpaɣlʋ lɩzɩ ɛ-tɩ nɛ ɛwɩlɩ-ɩ ɖoziye taa nɛ ɛ́yáa-ɩ se: «Anaanɩyaasɩ!» Ɛlɛ́, ɛsɛɛ se: «Kɩpaɣlʋ! Ma yɔ.» 11Peeɖe Kɩpaɣlʋ heyi-i se: «Kʋyɩ kpaka nɛ ŋkpaɣ nʋmɔʋ ŋgʋ́ payaɣ se Kʋtʋʋzʋʋ yɔ nɛ ŋwolo Yudaasɩ ɖɩɣa taa nɛ ŋpɔzɩ Taarsɩ tʋ weyi payaɣ se Sɔɔlɩ yɔ ɛ-yɔɔ, ɛɖɔŋ sɛʋ Ɛsɔ. 12Ɛsɛɣaɣ ḿbʋ́ lɛ, pɩwɩlɩ-ɩ ɖoziye taa abalʋ nɔɔyʋ, payaɣ-ɩ se Anaanɩyaasɩ, ɛsʋwa ɛtɩnɩ ɛ-yɔɔ nesi se ɛ-ɛsɛ ekuli.» 13Anaanɩyaasɩ cosi-i se: «Kɩpaɣlʋ! Ɛyáa sakɩyɛ heyi-m abalʋ ɛnʋ ɛ-tɔm nɛ pɛkɛdɩ-m ɛzaɣ́tʋ ndʋ́ ɛlabɩ ña-ñɩma mbá pɛwɛ Yeruusalɛm yɔ. 14Ɛkɔm cɩnɛ yɔ, cɔjɔnaa sɔsaa hanɩ-ɩ waɖɛ se ɛkɔɔ ɛkpa mbá patɩŋa payɩ poluŋuu ñɛ-tɛɛ yɔ nɛ ɛhɔkɩ-wɛ.» 15Ɛlɛ́, Kɩpaɣlʋ heyi-i se: «Kʋyɩ ŋwolo, mbʋ́ pʋyɔɔ yɔ, malɩzɩnɩ-ɩ se pɩtɩŋnɩ ɛ-yɔɔ nɛ ajɛya lɛɛna taa ñɩma nɛ pa-awiya sɔsɔna nɛ Izrɛɛlɩ ñɩma pasɩm-m. 16Ma-maɣmaɣ mɔnkɔŋ-ɩ wɩlʋʋ ɛzɩma mbʋ́ pʋwɛɛ se ɛtɔɔ kʋñɔŋ mɔ-yɔɔ yɔ.»
17Peeɖe Anaanɩyaasɩ kpaɣ nʋmɔʋ nɛ ɛkɔɔ ɛtalɩ Yudaasɩ tɛ. Ɛsʋ ɖɩɣa lɛ, ɛmaɣnɩ Sɔɔlɩ ɛnʋ nɛ ɛtɩnɩ ɛ-yɔɔ nesi nɛ eheyi-i se: «Man-taabalʋ Sɔɔlɩ! Kɩpaɣlʋ Yesu weyi ɛlɩzɩ ɛ-tɩ nɛ ɛwɩlɩ-ŋ alɩwaatʋ ndʋ́ ŋkɔŋaɣ yɔ, etiyini-m se mɔnkɔɔ mala nɛ ñɛ-ɛsɛ kuli nɛ Fezuu Kiɖeɖeu tii ñɔ-yɔɔ.» 18Kpaagbaa ḿbʋ́ lɛ, nabʋyʋ lɩɩnɩ Sɔɔlɩ ɛsɛ taa ɛzɩ kpakpayaɣ pɔɔya yɔ nɛ pʋtɔlɩ. Peeɖe ɛpazɩ naʋ nɛ ɛkʋyɩ nɛ palabɩ-ɩ lɩm sɔʋ sɔnzɩ. 19Pʋwayɩ lɛ, ɛtɔɔ tɔɔnaɣ nɛ ɛkpa ɖoŋ.
Sɔɔlɩ heyi ɛyáa Ɛsɔtɔm Damaasɩ
Sɔɔlɩ kacaɣ Krɩstʋ wayɩ tɩŋɩyaa mbá pɛwɛ Damaasɩ yɔ pɔ-cɔlɔ kɩyakɩŋ cabɩ. 20Pʋwayɩ ɛtɩpazɩ susuu Yuda ñɩma Ɛsɔ ɖɩsɛyɛ ndɩ ndɩ taa se Yesu lɛ Ɛsɔ Pɩyalʋ. 21Pɩɩɖɩɣzɩ mbá patɩŋa panɩ ɛ-tɔm ńdʋ́ yɔ nɛ pɔpɔzʋʋ pa-tɩ se: «Pɩtɛkɛ abalʋ ɛnɛ ɛɛwɛnɩ mbá poluŋuu Yesu tɛɛ yɔ pa-wayɩ kaŋ kaŋ Yeruusalɛm yaa we? Pɩtɛkɛ ɛnʋ kɔmnɩ cɩnɛ faŋŋ se ɛkpa-wɛ nɛ ɛhɔkɩ-wɛ nɛ ewoni cɔjɔnaa sɔsaa cɔlɔ yaa we?»
22Paa ḿbʋ́ yɔ, Sɔɔlɩ tɛzaɣ kpaʋ ɖoŋ ɛ-tɔm susuu taa: ɛwɩlaɣ Yuda ñɩma mbá paawɛ Damaasɩ yɔ se Yesu lɛ Weyi Ɛsɔ Lɩzaa Yɔ nɛ paba ɛɛtasɩɣ naʋ ndʋ́ paacosi-i yɔ.
23Pɩlabɩ kɩyakɩŋ cabɩ lɛ, Yuda ñɩma la lɩmaɣza se pakʋ Sɔɔlɩ ɛnʋ. 24Peeɖe papazɩ ɖaŋʋʋ tɛtʋ nɔnɔsɩ taa wɩsɩ nɛ ɖoó se ɛlɩɣ lɛ, pakpa-ɩ pakʋ-ɩ. Ŋgʋ́, Sɔɔlɩ ñaatɛm nɩʋ se patam ɛ-yɔɔ nɔɔ. 25Pʋ-yɔɔ Krɩstʋ wayɩ tɩŋɩyaa kpaɣ-ɩ nɛ ɖoó nɛ paɖʋ ɖɔkʋ taa nɛ powoni-i petisi tɛtʋ kámaɣ́ koloŋa wayɩ.
Sɔɔlɩ woba Yeruusalɛm
26Petisi Sɔɔlɩ ḿbʋ́ lɛ, ewolo Yeruusalɛm nɛ ɛcaɣ se ɛsɔzɩ Krɩstʋ wayɩ tɩŋɩyaa lɛlaa yɔɔ, ɛlɛ́, paba sɔɔndʋʋ-ɩ patɩŋa. Mbʋ́ pʋyɔɔ yɔ, pataatisi se toovenim ɛnʋ ɖɔɖɔ ɛpɩsɩ Krɩstʋ wayɩ tɩŋɩyʋ. 27Peeɖe Barnaabaasɩ kpaɣ-ɩ nɛ ɛ nɛ ɩ powolo Yesu tiyiyaa cɔlɔ nɛ ɛkɛdɩ-wɛ ɛzɩma mbʋ́ Kɩpaɣlʋ kalɩzɩ ɛ-tɩ nɛ ɛwɩlɩ Sɔɔlɩ nʋmɔʋ taa nɛ ɛyɔɔdɩnɩ-ɩ yɔ. Ɛkɛdɩ-wɛ ɖɔɖɔ ɛzɩma mbʋ́ eesusi tɔm nɛ Yesu nɔɔ kaalɛyɩtʋ Damaasɩ yɔ. 28Pɩkpaɣnɩ alɩwaatʋ ńdʋ́ lɛ, Sɔɔlɩ wɛɛ pɔ-cɔlɔ nɛ esusuu tɔm nɛ Kɩpaɣlʋ nɔɔ kaalɛyɩtʋ Yeruusalɛm. 29Ɛyɔɔdaɣnɩ ɖɔɖɔ Yuda ñɩma mbá pɔyɔɔdʋʋ Grɛɛkɩ yɔ nɛ ɛ nɛ wɛ pɔhɔŋnɩ ɖama tɔm nɛ paba ñɩnɩɣ se pakʋ-ɩ. 30Taabalaa lɛlaa nɩ ḿbʋ́ lɛ, pakpaɣ-ɩ nɛ powoni Sezaaree tɛtʋ taa nɛ ɛɖɛɛ Taarsɩ.
31Krɩstʋ ŋgbɛyɛ taa ñɩma kɛwɛ laŋhɛzɩyɛ taa Yudee nɛ Galilee nɛ Samaarɩɩ pa-ageeta hɔɔlɩŋ tɩŋa taa. Pɛtɛzaɣ pɩʋ nɛ pañaŋ Kɩpaɣlʋ nɛ Fezuu Kiɖeɖeu sɩŋnɩ-wɛ nɛ pɛtɛzɩɣ ɖɔʋ.
Pɩyɛ laba nɛ Enee yɔɔ cɛ
32Alɩwaatʋ ńdʋ́ lɛ, Pɩyɛ cɔwaɣ paa le nɛ esusuu Ɛsɔtɔm. Nakʋyʋ wiye lɛ, ɛkʋyɩ ewolo tɛtʋ ndʋ́ payaɣ se Liidaa yɔ tɩ-taa Ɛsɔ ñɩma cɔlɔ. 33Ɛtalaa lɛ, ɛmaɣnɩ abalʋ weyi payaɣ se Enee yɔ, pɩlabɩ pɩnzɩ lutozo yɔ ɛ́lɛ́ wɛʋ ñalʋʋ yɔɔ yɔ, mbʋ́ pʋyɔɔ yɔ, ɛkɛ kalɩkalaɣ. 34Ɛlɛ́, eheyi-i se: «Enee! Yesu Krɩstʋ yeki nɛ ña-kʋdɔŋ cɛ, kʋyɩ ŋkpiyi ña-ñalʋʋ.»
Kpaagbaa ḿbʋ́ lɛ, Enee kʋyɩ. 35Liidaa ñɩma nɛ Sarɔɔ ñɩma ḿbá, patɩŋa pana Enee ḿbʋ́ lɛ, pɛlɛɣzɩ wɛtʋ nɛ papɩsɩ Kɩpaɣlʋ ñɩma.
Pɩyɛ fezi Tabɩɩta nɛ sɩm taa
36Halʋ nɔɔyʋ kɛwɛ Yopee tɛtʋ taa, payaɣ-ɩ se Tabɩɩta. Pɛɖɛzɩɣ hɩɖɛ ńɖɩ́ nɛ Grɛɛkɩ ñɩma kʋnʋŋ taa se: «Dɔɔrkaasɩ.» Pʋ-tɔbʋʋ se nɛnzɛm. Ɛɛkɛ Krɩstʋ wayɩ tɩŋɩyʋ nɛ ɛlakɩ camɩyɛ pɩtɩɩfɛyɩ nɛ ɛsɩŋnɩ kʋñɔndɩnaa. 37Pɩyɛ wɛ Liidaa ḿbʋ́ lɛ, halʋ ɛnʋ ɛhɛnɩ kʋdɔŋ nɛ ɛsɩ. Ɛsɩba lɛ, pɔsɔ-ɩ lɩm nɛ pɔñɔɔzɩ-ɩ nɛ powoni pɛhɛzɩ ɛsɔdaa kuduyuu nakʋyʋ taa. 38Liidaa taawɛɛ poliŋ nɛ Yopee. Krɩstʋ wayɩ tɩŋɩyaa nɩwa se Pɩyɛ wɛ peeɖe lɛ, pakʋsɩ pa-taa ɛyáa naalɛ nɛ petiyi-wɛ ɛ-cɔlɔ se peheyi-i se: «Đitendi-ŋ, kɔɔ ɖɛ-tɛ kpɩɩɩ.» 39Powobi peheyi-i lɛ, ɛkʋyɩ kpaka nɛ ɛ nɛ wɛ pakpaɣ nʋmɔʋ. Patalaa lɛ, pakpanɩ-ɩ ɛsɔdaa kuduyuu ŋ́gʋ́ kɩ-taa nɛ lelaa tɩŋa wolo pɔ-cɔlɔ nɛ wiluu nɛ pawɩlɩɣ-ɩ tokonaa sɔsaa nɛ lɛlaa mbá Dɔɔrkaasɩ kɛñɛyɩ alɩwaatʋ ndʋ́ ɛɛwɛnɩ ɛ-ɛsɛ yɔ patɩŋa. 40Ɛlɛ́, Pɩyɛ ɖɔɔnɩ ɛyáa tɩŋa nɛ palɩɩnɩ awayɩ nɛ pɩsɛɣ e-ɖeke nɛ eluŋ ɛ-nɩmbɔla yɔɔ nɛ etendi Ɛsɔ. Pʋwayɩ lɛ, etuzi ɛ-tɩ sɩɖʋ ɛnʋ ɛ-cɔlɔ nɛ ɛyɔɔdɩ se: «Tabɩɩta! Kʋyɩ!» Peeɖe ɛ́lɛ́ kuli ɛ-ɛsɛ. Ɛna Pɩyɛ lɛ, ɛkʋyɩ ɛcaɣ. 41Ɛlɛ́, Pɩyɛ sezi ɛ́ɖɔ́kɩ e-nesi taa nɛ ɛkʋsɩ-ɩ. Ɛkʋsɩ-ɩ lɛ, ɛ́yáa Ɛsɔ ñɩma lɛlaa nɛ lelaa nɛ ɛwɩlɩ-wɛ-ɩ, ɛ nɛ ɛ-ɛsɛ. 42Peeɖe tɔm ńdʋ́ tɩcɔ Yopee tɛtʋ tɩŋa taa payɩ nɛ ɛyáa sakɩyɛ wɛnɩ lidaʋ Kɩpaɣlʋ yɔɔ. 43Pʋwayɩ lɛ, Pɩyɛ caɣ Yopee peeɖe kɩyakɩŋ cabɩ naataŋgbala kanɖʋ weyi payaɣ se Siimɔɔ yɔ ɛ-tɛ.
