Tʋma Labʋ 8
8
1Ɛlɛ́, Etiyɛɛnɩ sɩm ḿbʋ́, pɩkɛdɩnɩ Sɔɔlɩ.
Yeruusalɛm Krɩstʋ ŋgbɛyɛ sʋ kʋñɔŋ sɔsɔʋ taa
Puwiye ńɖɩ́, Yeruusalɛm Krɩstʋ ŋgbɛyɛ sʋ kʋñɔŋ sɔsɔʋ taa. Lidaʋ tayaa tɩŋa se nɛ pɛɖɛɛnɩ Yudee nɛ Samarɩɩ ageeta taa. Yesu tiyiyaa ɖeke pɩɩkazaa. 2Lidaʋ tayaa kpaɣ Etiyɛɛnɩ powona pebi nɛ pewii-i sakɩyɛ. 3Sɔɔlɩ ñakaɣ pana se eɖezi Krɩstʋ ŋgbɛyɛ: ɛsʋwaɣ ɖɩsɩ taa nɛ ɛkpaɣ halaa nɛ abalaa nɛ ɛɖʋʋ-wɛ salaka.
Filiipu susi Laŋhɛzɩyɛ Tɔm Samaarɩɩ tɛtʋ taa
4Mbá paamɩzɩ ɖama yɔ, pɔcɔwaɣ ɛjaɖɛ taa nɛ posusuu Laŋhɛzɩyɛ Tɔm. 5Filiipu ñaawobi Samaarɩɩ tɛtʋ sɔsɔtʋ taa nɛ eheyiɣ ɛyáa Weyi Ɛsɔ Lɩzaa Yɔ ɛ-tɔm. 6Ɛyɔɔdaɣ ḿbʋ́ lɛ, ɛlakɩ hama lakasɩ nɛ ɛyáa samaɣ tɩŋa payɩ naɣ-sɩ nɛ pewelesiɣni-i siŋŋ. 7Mbʋ́ pʋyɔɔ yɔ, aleewaa makaɣ kubusi ɖoŋ nɛ peseɣ kʋdɔndɩnaa sakɩyɛ wayɩ nɛ kalɩkalasɩ sakɩyɛ nɛ taladɩnaa sakɩyɛ pɔ-yɔɔ cɛkɩ. 8Pʋ-yɔɔ tɛtʋ ńdʋ́ tɩ-taa ñɩma laŋa hʋlʋmaa siŋŋ.
9Abalʋ nɔɔyʋ kɛwɛ tɛtʋ ńdʋ́ tɩ-taa ɖooo lɔŋ, payaɣ-ɩ se Siimɔɔ. Ɛlakaɣ hama lakasɩ nɛ pɩɖɩɣzɩɣ Samaarɩɩ ñɩma nɛ ɛmaɣzɩɣ se ɛkɛ sɔsɔ nɔɔyʋ siŋŋ. 10Ɛyáa tɩŋa payɩ, kpaɣ piya nɛ puwolo pɩsɩɩnɩ sɔsaa, pewelesaɣnɩ-ɩ nɛ pɔtɔŋ se: «Ɛnɛ lɛ Ɛsɔ ɖoŋ weyi payaɣ se: ‹Đoŋ sɔsɔŋ› yɔ.» 11Pʋ-yɔɔ pɛtɛzaɣ-ɩ welesinaʋ, mbʋ́ pʋyɔɔ yɔ, ɛwɛɛ ɛlakɩ hama lakasɩ nɛ pɩɖɩɣzɩɣ-wɛ nɛ sɩ. 12Ɛlɛ́, Filiipu kɔm esusi Ɛsɔ Kewiyaɣ nɛ Yesu Krɩstʋ pa-Laŋhɛzɩyɛ tɔm lɛ, halaa nɛ abalaa petisi-tʋ nɛ palabɩ-wɛ lɩm sɔʋ sɔnzɩ. 13Halɩ Siimɔɔ maɣmaɣ ñetisi nɛ palabɩ-ɩ-sɩ ɖɔɖɔ. Ɛɛwɛɛ ɛtɩŋɩɣ Filiipu nɛ pɩlakɩ-ɩ piti nɛ hama lakasɩ sɔsɔsɩ nzɩ́ ɛ́lɛ́ lakaɣnɩ Ɛsɔ ɖoŋ yɔ nɛ kawɩlɩsɩ nzɩ́ ɛwɩlaɣnɩ ɖoŋ ɛnʋ nɛ ɛnaɣ yɔ.
14Yesu tiyiyaa mbá paawɛ Yeruusalɛm yɔ, panɩwa se Samaarɩɩ ñɩma tisi Ɛsɔtɔm lɛ, pakʋsɩ Pɩyɛ nɛ Yohanɛɛsɩ nɛ petiyi-wɛ pɔ-cɔlɔ. 15Paba talaa lɛ, petendi Ɛsɔ Samaarɩɩ ñɩma ḿbá pɔ-yɔɔ se ɛha-wɛ e-Fezuu Kiɖeɖeu. 16Mbʋ́ pʋyɔɔ yɔ, Fezuu Kiɖeɖeu tetibidi pa-taa nɔɔyʋ yɔɔ. Ɛlɛ́, lɩm sɔʋ sɔnzɩ ɖeke paalabɩ-wɛ Kɩpaɣlʋ Yesu hɩɖɛ taa. 17Peeɖe Pɩyɛ nɛ Yohanɛɛsɩ patɩnɩ pɔ-yɔɔ nesi nɛ petendi Ɛsɔ nɛ ɛ́lɛ́ ha-wɛ e-Fezuu Kiɖeɖeu.
18Patɩnɩ ɛyáa yɔɔ nesi nɛ Ɛsɔ ha-wɛ e-Fezuu Kiɖeɖeu ḿbʋ́ lɛ, Siimɔɔ na. Peeɖe ɛlɩzɩ liidiye se ɛcɛlɩɣ Pɩyɛ nɛ Yohanɛɛsɩ 19nɛ etendi-wɛ se: «Ɩha-m ɖoŋ ɛnʋ ɖɔɖɔ nɛ yee mantɩnɩ nɔɔyʋ yɔɔ nesi lɛ, Ɛsɔ ha-ɩ e-Fezuu Kiɖeɖeu.» 20Ɛlɛ́, Pɩyɛ pɩsɩnɩ-ɩ se: «Ña nɛ ñe-liidiye ɩla asayʋʋ! Mbʋ́ pʋyɔɔ yɔ, ŋmaɣzɩɣ se papɩzɩɣ paya Ɛsɔ kʋjɔʋ nɛ liidiye. 21Ŋfɛyɩnɩ natʋyʋ yaa waɖɛ naɖɩyɛ tɔm tʋnɛ tɩ-taa, ŋtatʋʋzɩ Ɛsɔ ɛsɩndaa. 22Pʋ-yɔɔ lɛ, yele ña-lɩmaɣza kɩdɛkɛdɛɛ nɛ ŋtendi Kɩpaɣlʋ nɛ pʋwɛɛ yɔ, eekpeɣ-ŋ ña-lɩmaɣza ana. 23Mbʋ́ pʋyɔɔ yɔ, manawa se kañatʋ kadadaɣyaɣ suni ña-taa ɖo nɛ kɩwɛɛkɩm pɩsɩ-ŋ pu-yom.» 24Peeɖe Siimɔɔ heyi Pɩyɛ nɛ Yohanɛɛsɩ se: «Mɩ-maɣmaɣ itendi Kɩpaɣlʋ mɔ-yɔɔ nɛ ndʋ́ ɩyɔɔdaa yɔ, tɩ-taa natʋyʋ ɛtaatalɩ-m.»
25Pɛtɛma lɛ, palɩzɩ Kɩpaɣlʋ aseɣɖe nɛ posusi ɛ-tɔm nɛ pakʋyɩ pɔɖɔŋnɩ susuu Laŋhɛzɩyɛ Tɔm Samaarɩɩ tɛtʋ cikpetu sakɩyɛ taa nɛ papɩsɩ Yeruusalɛm.
Filiipu katɩ Etiyoopii karɩka nakɛyɛ
26Nakʋyʋ wiye Ɛsɔ tiyiyu nɔɔyʋ heyi Filiipu se: «Kʋyɩ ŋkpaɣ hadɛ kiŋ habɩyɛ nɖɩ́ ɖɩlɩɣnɩ Yeruusalɛm nɛ ɖitiki Gaazaa yɔ.» Habɩyɛ ńɖɩ́, nɔɔyʋ fɛyɩ ɖɩ-yɔɔ. 27Peeɖe ɛ́lɛ́ tɩkʋyaa ɛkpaɣ nʋmɔʋ. Ɛɖɛɣaɣ lɛ, ɛkatɩ Etiyoopii abalʋ nɔɔyʋ, ɛkɛ eleɣye. Ɛnʋ lɛ karɩka sɔsɔɔ ŋgá kɔcɔŋnɩ Etiyoopii abiɖe Kandaasɩ ñɩm yɔɔ yɔ. Eewobi Yeruusalɛm se eluŋ Ɛsɔ tɛɛ 28nɛ ɛpɩsɩɣ kpem. Ɛɛcaɣ lɔɔɖɩyɛ nɖɩ́ kpaŋnaŋ hɔŋ yɔ ɖɩ-taa nɛ ɛkalɩɣ náyʋ Ezaayii takayaɣ taa. 29Peeɖe Fezuu Kiɖeɖeu heyi Filiipu se: «Tuzi ña-tɩ nɛ ŋñɔtɩnɩ abalʋ ɛnʋ.» 30Ɛ́lɛ́ ñese ɛñɔtɩnɩ-ɩ nɛ ɛnɩɣ ɛkalɩɣ náyʋ Ezaayii takayaɣ taa. Peeɖe ɛpɔzɩ-ɩ se: «Ŋnɩɣ ndʋ́ ŋkalɩɣ yɔ tɩ-tɔbʋʋ naa we?» 31Ɛ́lɛ́ cosi-i se: «Yee nɔɔyʋ ɛtalɩzɩ-m tɩ-tɔbʋʋ lɛ, malakɩ ɛzɩma nɛ manɩɩ?» Peeɖe ɛya Filiipu nɛ ɛ́lɛ́ kpa ɛcaɣ ɛ-cɔlɔ lɔɔɖɩyɛ taa nɛ pɛɖɛɣ. 32Tɔm ndʋ́ Etiyoopii tʋ ɛnʋ ɛkalaɣ náyʋ Ezaayii takayaɣ taa yɔ, ńdʋ́ lɛ se:
«Pakpa-ɩ nɛ powoni-i ɛzɩ alikizaŋnaa kpaʋ heu se
powokini kʋʋ yɔ.
Ɛwɛ ɖɔɖɔ ɛzɩ heɣa ŋgá kaawiliɣ
alɩwaatʋ ndʋ́ pɛsɛtɩɣ kɛ-kpɛm yɔ.
Etokuli ɛ-nɔɔ.
33Pɛpɛŋ-ɩ tɛtɛ nɛ pakʋ ɛ-tɔm.
Atɩɩcazɩɣ ɛ-sayɩnaa tɔm yɔɔdʋʋ?
Nɔɔyʋ ɛɛyɔɔdʋʋ.
Mbʋ́ pʋyɔɔ yɔ, palɩzɩ e-wezuu kedeŋa yɔɔ.»
34Etiyoopii tʋ ɛnʋ ɛtɛm kalʋʋ lɛ, ɛpɔzɩ Filiipu se: «Mentendi-ŋ, heyi-m weyi ɛ-tɔm náyʋ yɔɔdʋʋ ḿbʋ́ yɔ. Ɛ-maɣmaɣ ɛ-tɔm naa nɔɔyʋ ñɩndʋ ɛyɔɔdʋʋ?»
35Peeɖe Filiipu tɩŋnɩ tɔm ndʋ́ ɛkalaɣ yɔ tɩ-yɔɔ nɛ esusi-i Yesu Laŋhɛzɩyɛ Tɔm. 36Pɔɖɔŋaɣ ḿbʋ́ lɛ, patalɩ ɖoli nɔɔyʋ nɛ pamaɣnɩ lɩm nɛ kaɖɩka ŋ́gá kɔpɔzɩ-ɩ se: «Lɩm yɔ! Ɛbɛ ɖɩkɩ-m nʋmɔʋ se pataalabɩ-m lɩm sɔʋ sɔnzɩ?» [ 37Filiipu cosi-i se: «Yee ŋtisi tɔm ńdʋ́ nɛ ña-laŋɩyɛ tɩŋa pilim yɔ, papɩzɩɣ palabɩ-ŋ-sɩ.» Ɛlɛ́, abalʋ ɛnʋ ecosi-i se: «Mentisaa se Yesu Krɩstʋ lɛ Ɛsɔ Pɩyalʋ.»]
38Kpaagbaa ḿbʋ́ lɛ, ɛha nɔɔ se pasɩzɩ lɔɔɖɩyɛ. Peeɖe pa-naalɛ petibi lɩm taa nɛ Filiipu labɩ-ɩ lɩm sɔʋ sɔnzɩ. 39Palɩnɩ lɩm taa lɛ, Kɩpaɣlʋ Fezuu kpaɣ Filiipu yem nɛ kaɖɩka ŋ́gá katatasɩ-ɩ naʋ. Ɛlɛ́, kɛtɛzɩ ɖɛʋ nɛ laŋhʋlʋmɩyɛ 40nɛ Filiipu ñatɩnaʋ ɛ-tɩ yem Azɔɔtɩ tɛtʋ taa. Peeɖe ɛpazɩ susuu Laŋhɛzɩyɛ Tɔm nɛ pɩkpɛndɩnɩ tɛtʋ ndʋ́ tɩtɩŋa payɩ ɛtɩŋaɣnɩ tɩ-taa yɔ tɩ-taa nɛ ɛkɔɔ ɛtalɩ Sezaaree.
