Tʋma Labʋ 7

Tɔm ndʋ́ Etiyɛɛnɩ yɔɔdaa yɔ

1Pɔyɔɔdɩ ḿbʋ́ lɛ, cɔjɔnaa ñʋʋdʋ pɔzɩ Etiyɛɛnɩ se: «Toovenim ḿbʋ́ pɩlaba?» 2Ɛ́lɛ́ cosi-i se: «Man-caanaa nɛ man-taabalaa mɩ! Ɩma nɩŋgbaaŋ nɛ ɩnɩɩ. Ɛsɔ koboyaɣ tʋ kalɩzɩ ɛ-tɩ nɛ ɛwɩlɩ ɖɔ-cɔzɔ Abraham alɩwaatʋ ndʋ́ ɛɛwɛ Mezoopotamii yɔ nɛ pʋcɔ ɛ́lɛ́ kʋyɩ ewolo Haraɣ. 3Eeheyi-i se: ‹Kʋyɩ ñɛ-ɛjaɖɛ taa nɛ ŋyele ña-ñɩma nɛ ŋwolo ɛjaɖɛ nɖɩ́ mawɩlɩɣ-ŋ yɔ ɖɩ-taa.› 4Peeɖe Abraham kʋyɩ Babilooni ñɩma ɛjaɖɛ taa nɛ ewolo ɛcaɣ Haraɣ. Ɛ-caa sɩm wayɩ Ɛsɔ kʋsɩ-ɩ Haraɣ peeɖe nɛ ɛkɔnɩ-ɩ ɖɛ-tɛ Izrɛɛlɩ cɩnɛ. 5Ɛtaaha-ɩ paa tɛtʋ hɔɔlaɣ maɣmaɣ se esobi. Ɛlɛ́, ɛɖʋwa se ɛhaɣ-ɩ ɛjaɖɛ ɖɩnɛ ɖɩtɩŋa payɩ nɛ ɛ-sɩm wayɩ lɛ, ɛ-sayɩnaa tɩɣyɩ-ɖɩ. Ŋgʋ́, alɩwaatʋ ńdʋ́ tɩ-taa lɛ, Abraham taawɛnɩ pɩɣa. 6Tɔm ndʋ́ Ɛsɔ keheyi-i yɔ, ńdʋ́ lɛ se: ‹Ña-sayɩnaa kɔŋ caɣʋ ɛjaɖɛ naɖɩyɛ taa, papɩsɩɣ-wɛ yomaa nɛ panazɩ-wɛ pɩnzɩ nasɩnaza. 7Ɛlɛ́, mɔnkɔŋ hɔm mbá papɩsɩɣ ña-sayɩnaa ḿbá yomaa yɔ pa-nɩŋgbaaŋ. Pʋwayɩ lɛ, ña-sayɩnaa ḿbá, pakʋyʋʋ ɛjaɖɛ ńɖɩ́ ɖɩ-taa nɛ papɩsɩ cɩnɛ nɛ poluŋ mɛn-tɛɛ.› 8Ɛsɔ kaha Abraham nɔɔ. Pɛlʋʋ sɔnzɩ wɩlɩɣnɩ se ɛha-ɩ-kɛ. Ḿbʋ́ labɩna nɛ ɛlʋlɩ ɛ-pɩyalʋ Izaakɩ lɛ, ɛpɛlɩ-ɩ kɩyakʋ lutozo ñɩŋgʋ wiye, Izaakɩ ñɛpɛlɩ ɛ́lɛ́ pɩyalʋ Yakɔɔbʋ ḿbʋ́ ɖɔɖɔ nɛ Yakɔɔbʋ ñɛpɛlɩ ɛ-pɩyalaa hiu nɛ naalɛ mbá pɛkɛ Izrɛɛlɩ ñɩma cɔzɔnaa yɔ.

9Cɔzɔnaa ḿbá palabɩnɩ ɛsɩsɛmɩyɛ pa-taa lɛlʋ weyi payaɣ se Yozɛɛfʋ yɔ ɛ-yɔɔ nɛ pɛpɛdɩ-ɩ nɛ nabɛyɛ nɛ paba woni-i Ejiptɩ nɛ papɩsɩ-ɩ yom. Ɛlɛ́, Ɛsɔ taalɔ-ɩ kaʋ. 10Ɛlɩzaɣ-ɩ ɛ-kʋñɔmɩŋ tɩŋa taa. Patanɩ-ɩ wiyaʋ sɔsɔ Faraɔɔ ɛsɩndaa lɛ, Ɛsɔ kʋɖʋm ɛnʋ eyele nɛ ɛ́lɛ́ laŋɩyɛ hɛɛnɩ ɛ-lɔŋsɩnɖɛ. Peeɖe ɛ́lɛ́ cɛlɩ-ɩ kewiyaɣ se ɛcɔnɩ Ejiptɩ ɛjaɖɛ yɔɔ nɛ pɩkpɛndɩnɩ ɛ-ɖɩɣa tɩŋa. 11Alɩwaatʋ ńdʋ́ tɩ-taa ñɔɔsɩ nasɩyɩ lɩ Ejiptɩ nɛ Kanaanɩ pa-ajɛya hɔɔlɩŋ tɩŋa. Sɩlɩwa lɛ, ɖɔ-cɔzɔnaa wɛɛ kʋñɔŋ sɔsɔʋ nakʋyʋ taa nɛ paanaɣ pʋyʋ se pɔtɔɔ. 12Pɩkɛdaa lɛ, pa-caa Yakɔɔbʋ nɩɩ se tɔɔnaɣ wɛ Ejiptɩ. Pʋ-yɔɔ ɛkʋsɩ-wɛ nɛ etiyi-wɛ. 13Etiyi-wɛ nabʋlɛ ɖeɖe lɛ, Yozɛɛfʋ yele se ɛ-ɖalaa ɛsɩm-ɩ. Peeɖe wiyaʋ sɔsɔ Faraɔɔ ɛnʋ, ɛtɩlɩ Yozɛɛfʋ ñɩma. 14Ḿbʋ́ hanɩ Yozɛɛfʋ waɖɛ nɛ etiyi se powolo pɔkɔnɩ ɛ-caa Yakɔɔbʋ nɛ ɛ-hɔʋ taa ñɩma tɩŋa. Paakpɛndɩ ɛyáa nɩɩnʋwa nɛ nɩɩlɛ nɛ kagbaanzɩ. 15Pʋ-yɔɔ Yakɔɔbʋ woba Ejiptɩ ɛcaɣ nɛ pʋkɔɔ pɩsɩɩnɩ ɛ-sɩm. Peeɖe ɖɔɖɔ ɖɔ-cɔzɔnaa sɩba. 16Pasɩba lɛ, pepim-wɛ. Pʋwayɩ pakʋyaɣ peeɖe lɛ, pokuli pɔ-mɔɔ nɛ powoni Siicem nɛ pepi pɩlaʋ ŋgʋ́ Abraham kayabɩ Aamɔɔrɩ pɩyalaa cɔlɔ yɔ kɩ-taa.

17Tɔm ndʋ́ Ɛsɔ kaɖʋwa nɛ eheyi Abraham yɔ, tɩ-alɩwaatʋ wɩzaa. Ɖa-ñɩma mbá paawɛ Ejiptɩ yɔ, pɛtɛzɩɣ ɖɔʋ kʋɖɔʋ. 18Tɩ-taa ɖɔɖɔ awiya sakɩyɛ kɔtɔɔ kewiyaɣ nɛ pɩɖɛɛ. Pʋwayɩ lɛ, wiyaʋ sɔsɔ lɛlʋ ñakpa kpelaɣ yɔɔ Ejiptɩ. Ɛlɛ́, ɛtaatɩlɩ Yozɛɛfʋ. 19Ɛnʋ kɛcɛtɩnɩ ɖɛ-tɛ ñɩma nɛ ɛnazɩ ɖɔ-cɔzɔnaa nɛ halɩ ɛcɛyɩ-wɛ se pɔlɔ pe-piya cikpesi nɛ sɩsɩ. 20Alɩwaatʋ ńdʋ́ tɩ-taa ɖɔɖɔ palʋlɩ pɩɣa ŋgá payaɣ se Mooyiizi yɔ, kaaɖe Ɛsɔ ɛsɩndaa pɩŋŋ. Ka-ñɩma kɔɖɔkɩ-kɛ fenasɩ naadozo nɛ pʋcɔ pɔlɔ-kɛ. 21Pɔlɔ-kɛ lɛ, wiyaʋ sɔsɔ pɛlɛ hii-kɛ nɛ ɛɖɔkɩ-kɛ ɛzɩ ɛ-maɣmaɣ ɛ-pɩyalʋ yɔ. 22Ḿbʋ́ hanɩ Mooyiizi waɖɛ nɛ ɛkpɛlɩkɩ mbʋ́ Ejiptɩ ñɩma sɩma yɔ pɩtɩŋa payɩ nɛ ɛyɔɔdʋʋ tɔm nɛ ɛlakɩ tʋma nɛ abalɩtʋ.

23Ɛkɔm ɛwɛnɩ pɩnzɩ nɩɩnaza lɛ, ɛɖʋ ɛ-taa se ewoki ɛna ɛ-tɛ Izrɛɛlɩ ñɩma. 24Ewokaɣ lɛ, ɛna Ejiptɩ tʋ nɔɔyʋ makaɣ Izrɛɛlɩ tʋ nɔɔyʋ. Peeɖe ɛtɩnɩ weyi pamakaɣ-ɩ yɔ ɛ-yɔɔ nɛ ɛma Ejiptɩ tʋ nɛ ɛ́lɛ́ sɩ. 25Mooyiizi kɛwɛ yem se ɛ-tɛ Izrɛɛlɩ ñɩma ɖiɣzinaa se ɛ-yɔɔ pɩtɩŋɩɣna nɛ Ɛsɔ lɩzɩ-wɛ yomiye taa. Naze lɛ, paba tanɩɩ pɩ-taa ḿbʋ́. 26Kifema lɛ, Mooyiizi tasɩ katʋʋ Izrɛɛlɩ ñɩma naalɛ nabɛyɛ, poyowaɣ. Peeɖe ewobi se eloluu-wɛ, ɛlɛ́ ɛpɔzɩ-wɛ se: ‹Man-taabalaa! Ɩkɛ ɛyáa kʋɖʋmaa lɛ, ɛbɛ laba nɛ ɩmakɩ ɖama ḿbʋ́?› 27Ɛlɛ́, weyi ɛnazaɣ lɛlʋ yɔ, ɛpɩsɩ etuzi Mooyiizi nɛ ɛpɔzɩ-ɩ se: ‹Asɩ-ŋ wiyaʋ se ŋhʋʋ ɖɔ-tɔm? 28Ŋcaɣ se ŋkʋ-m ɛzɩ ɖeɖe ŋkʋʋ Ejiptɩ tʋ yɔ yaa we?› 29Ɛyɔɔdɩ ḿbʋ́ lɛ, Mooyiizi se nɛ ewolo ɛcaɣ Maadiyaɣ ɛjaɖɛ taa. Peeɖe ɛkɔm ɛwɛnɩ abalɩbiya naalɛ.

30Ɛcaɣ peeɖe pɩnzɩ nɩɩnaza lɛ, nakʋyʋ wiye ewolo lakʋ taa Sinayii pʋʋ cɔlɔ nɛ Ɛsɔ tiyiyu nɔɔyʋ lɩzɩ ɛ-tɩ nɛ hɔɖaɣ miŋ taa nɛ ɛwɩlɩ-ɩ. 31Ɛna ḿbʋ́ lɛ, pɩlabɩ-ɩ piti. Ɛlɛ́, etuzi ɛ-tɩ pʋ-cɔlɔ se ɛcɔna. Peeɖe ɛnɩɣ Kɩpaɣlʋ yɔɔdʋʋnɩ-ɩ se: 32‹Ma lɛ ñɔ-cɔzɔnaa Ɛsɔ. Ma lɛ Abraham nɛ Izaakɩ nɛ Yakɔɔbʋ pɛ-Ɛsɔ.› Mooyiizi nɩ ḿbʋ́ lɛ, sɔɔndʋ kpa-ɩ pɩŋŋ nɛ eseliɣ, halɩ ɛtacazɩ cɔnaʋ. 33Ɛlɛ́, Kɩpaɣlʋ heyi-i se: ‹Đenɖe ŋsɩŋ ḿbʋ́ yɔ, pɩkɛ tɛtʋ kaɖɛ ñɩndʋ. Hɔzɩ ña-naataŋgbala. 34Mana mɛ-ɛyáa mbá pɛwɛ Ejiptɩ yɔ pa-kʋñɔŋ nɛ manɩɩ pa-atɩma nɛ mentii se moholi-wɛ. Pʋ-yɔɔ lɛ, kɔɔ mentiyi-ŋ Ejiptɩ peeɖe.›

35Ḿbʋ́ Ɛsɔ tiyi Mooyiizi. Ŋgʋ́, Izrɛɛlɩ ñɩma kekizi-i nɛ pɔpɔzɩ-ɩ se: ‹Asɩ-ŋ wiyaʋ se ŋhʋʋ ɖɔ-tɔm?› Ɛlɛ́, Ɛsɔ tiyi-i se ewolo ɛkɛ pe-wiyaʋ nɛ ɛlɩzɩ-wɛ yomiye taa. Ɛsɔ tiyiyu weyi ɛɛlɩzɩ ɛ-tɩ nɛ hɔɖaɣ miŋ taa nɛ ɛwɩlɩ-ɩ yɔ, e-ɖoŋ yɔɔ ɛtɩŋnaa. 36Mooyiizi ɛnʋ ɛlabɩnɩ Ɛsɔ hama lakasɩ nɛ ɛwɩlɩ kawɩlɩsɩ Ejiptɩ ɛjaɖɛ taa nɛ ɛlɩzɩ Izrɛɛlɩ ñɩma yomiye taa. Ɛɛlabɩ-sɩ Teŋgu Kɩsɛmʋʋ nɛ lakʋ pa-taa pɩnzɩ nɩɩnaza nzɩ́ pɔɖɔma yɔ. 37Ɛnʋ ɖɔɖɔ heyini Izrɛɛlɩ ñɩma se: ‹Ɛsɔ kɔŋ-mɩ tiyinaʋ náyʋ nɔɔyʋ ɛzɩ ma yɔ, ɛkɛɣ mɩ-ñɩma taa nɔɔyʋ.› 38Ɛnʋ kɛwɛnɩ Izrɛɛlɩ ñɩma mbá paakpeɣli lakʋ taa yɔ pɔ-cɔlɔ: ɛ nɛ ɖɔ-cɔzɔnaa nɛ Ɛsɔ tiyiyu weyi ɛyɔɔdaɣnɩ-ɩ nɛ Sinayii pʋʋ yɔɔ yɔ paawɛna. Ɛnʋ mʋnɩ wezuu tɔm nɛ ɛcɛlɩ-ɖʋ.

39Ɛlɛ́, ɖɔ-cɔzɔnaa taacaɣ se pañam-ɩ. Pekizaɣ ɛ-tɔm nɛ pañɩnɩɣ se papɩsɩ Ejiptɩ ɛjaɖɛ taa. 40Pʋ-yɔɔ peheyi Aarɔɔnɩ se: ‹Ma-ɖʋ sɩʋ kpelisi nɛ sɩɖɛɛ-ɖʋ nɔɔ. Mbʋ́ pʋyɔɔ yɔ, ɖɩtana mbʋ́ pɩtɛmnɩ ɖo-Mooyiizi weyi ɛlɩzɩ-ɖʋ Ejiptɩ ɛjaɖɛ taa yɔ.› 41Peeɖe pama neɣye nɛ palaa ɖɩ-yɔɔ nɛ pa-taa hʋlʋmɩnɩ mbʋ́ pa-maɣmaɣ pamanɩ pe-nesi yɔ. 42Ɛlɛ́, Ɛsɔ ha-wɛ siɣ́ye. Eyebi-wɛ nɛ poluŋuu wɩsɩ nɛ fenaɣ nɛ tɩɩnzɩ pɛ-tɛɛ ɛzɩ náyaa maʋ pa-takayɩsɩ taa yɔ. Pamawa se:

‹Izrɛɛlɩ ñɩma mɩ!

Ma ɩla

kpɩna nɛ kɩlaŋ lɛɛŋ ḿbʋ́,

lakʋ taa pɩnzɩ nɩɩnaza yaa we?

43Pɩtɛkɛ ma. Ɛlɛ́, ɩsɩɣlɩ ɛgɔlɩmɩyɛ Moolɔkɩ sɩʋ kɩɖanɖʋʋ.

Ɩsɩɣlɩ ɛgɔlɩmɩyɛ Refaɣ sɩʋ kpelaɣ.

Sɩʋ kpelisi ńzɩ́ ɩɩlaba

nɛ iluŋuu sɩ-tɛɛ!

Pʋ-yɔɔ mɛnkɛzɩɣ-mɩ tɛtʋ,

nɛ ɖooo Babilooni ɛjaɖɛ wayɩ!› »

44Etiyɛɛnɩ tasɩ yɔɔdʋʋ ɖɔɖɔ se: «Đɔ-cɔzɔnaa kesiɣ kɩɖanɖʋʋ lakʋ taa nɛ kɩwɩlɩɣ se pa nɛ Ɛsɔ pɛwɛna. Pesiɣ-kʋ ɛzɩ ɛ́lɛ́ keheyuu Mooyiizi yɔ: eeheyi-i se esiɣ-kʋ ɛzɩ ŋgʋ́ ɛwɩlɩ-ɩ yɔ. 45Đɔ-cɔzɔnaa ḿbá, paayebi kɩɖanɖʋʋ ŋ́gʋ́ nɛ pa-wayɩ ñɩma. Paakpɛndɩnɩ-kʋ alɩwaatʋ ndʋ́ Yozuwee ketaɣ-wɛ nɛ pɛlɛɣ ɛjaɖɛ nɖɩ́ ɖɩwɛ pɛ-ɛsɩndaa nɛ Ɛsɔ ɖɔɔnɩ ɖɩ-taa ñɩma yɔ. Kʋwɛ ḿbʋ́ nɛ pɩtalɩ wiyaʋ sɔsɔ Daaviidi alɩwaatʋ. 46Yakɔɔbʋ Ɛsɔ kalabɩ-ɩ lootiye nɛ etendi-i se ɛ́lɛ́ ɛha-ɩ waɖɛ nɛ ɛma-ɩ ɖɩɣa. 47Ɛlɛ́, ɛ-pɩyalʋ Salomɔɔ manɩ Ɛsɔ ɖɩɣa.

48Ŋgʋ́, Ɛsɔ Caabiyuu ɛɛsʋʋ kuduyiŋ weyi ɛyáa manɩ pa-maɣmaɣ pe-nesi yɔ ɩ-tɛɛ. Pʋwɛ ɛzɩ tɔm ndʋ́ náyʋ kɔyɔɔdaa yɔ. Ńdʋ́ lɛ se:

49‹Kɩpaɣlʋ yɔɔdaa se ɛsɔdaa lɛ men-kewiyaɣ kpelaɣ nɛ

tɛtʋ lɛ kpeɖe nɖɩ́ mantɩnɩɣ ma-naŋgbanzɩ ɖɩ-yɔɔ yɔ.

Đɩɣa ŋgá ɖɔɖɔ ɩmaɣ-m yɔ?

Le manpɩzɩɣ mancaɣ nɛ mɛhɛzɩ?

50Pɩtɛkɛ ma-maɣmaɣ malabɩnɩ pɩtɩŋa payɩ yaa we?› »

51Etiyɛɛnɩ tɛm yɔɔdʋʋ ḿbʋ́ lɛ, ɛtɔ se: «Laŋkpɩzɩyɛ tɩnaa mbá mɩ mɩ-laŋa nɛ mɩ-nɩŋgbaaŋ pɛwɛ ɖoŋ yɔ! Ɩwɛɛ ikiziɣ Fezuu Kiɖeɖeu tɔm ɛzɩ mɩ-cɔzɔnaa yɔ! 52Náyʋ weyi ɛ-wayɩ mɩ-cɔzɔnaa keyebi wɛʋ kaŋ kaŋ? Halɩ pakʋ mbá patɩŋa payɩ paayɔɔdaa se pɔkɔŋ lʋlʋʋ Weyi Ɛtʋʋzaa yɔ. Lɛɛlɛɛyɔ, ɛnʋ ɩɖʋzɩ koyindinaa nesi taa nɛ pakʋ-ɩ. 53Mbá mɩ Ɛsɔ tɩŋnɩ e-tiyiyaa yɔɔ nɛ ɛcɛlɩ-mɩ ɛ-paɣtʋ yɔ, ɩtɔɖɔ tɩ-yɔɔ!»

Etiyɛɛnɩ sɩm tɔm

54Mbá patɩŋa paawɛ tɔm ɖɩhʋyɛ peeɖe yɔ, panɩ Etiyɛɛnɩ tɔm ńdʋ́ ḿbʋ́ lɛ, pa-pana kpa pɩŋŋ nɛ pɔtɔkɩ po-ndoma yem. 55Ɛlɛ́, Fezuu Kiɖeɖeu kɛwɛ Etiyɛɛnɩ yɔɔ. Pɔtɔkaɣ po-ndoma ḿbʋ́ lɛ, ɛcɔnɩ ɛsɔdaa nɛ ɛna Ɛsɔ e-koboyaɣ taa, Yesu ñasɩŋ ɛ-cɔlɔ lone kɩbanɖɛ taa. 56Peeɖe eheyi-wɛ se: «Iwelesi nɛ ɩnɩɩ: ɛsɔdaa tʋlaa nɛ manaɣ Ɛyʋ Pɩyalʋ sɩŋ Ɛsɔ cɔlɔ lone kɩbanɖɛ taa.»

57Ɛyɔɔdɩ ḿbʋ́ lɛ, papazɩ kou nɛ paɖɩɣ pa-nɩŋgbaaŋ! Peeɖe pakʋyɩ patɩŋa pekpibi-i 58nɛ pɔhɔm-ɩ nɛ palɩnɩ tɛtʋ wayɩ nɛ payakɩ-ɩ pɛɛ se ɛsɩ. Aseɣɖe tɩnaa kɔhɔzɩ po-tokonaa nɛ pasɩɩ evebu weyi payaɣ se Sɔɔlɩ yɔ ɛ-cɔlɔ se ɛcɔnɩ tɩ-yɔɔ. 59Payakaɣ-ɩ pɛɛ ḿbʋ́ lɛ, etendi Kɩpaɣlʋ se: «Kɩpaɣlʋ Yesu! Mʋ man-kalɩzaɣ!» 60Peeɖe eluŋ ɛ-nɩmbɔla yɔɔ nɛ ɛma kubuka ɖoŋ se: «Kɩpaɣlʋ! Taakpaɣ pa-kɩwɛɛkɩm nɛ ŋlabɩnɩ tʋmɩyɛ!» Ɛtɛm yɔɔdʋʋ ḿbʋ́ lɛ, ɛhɛɛ.

選択箇所:

Tʋma Labʋ 7: KABI

ハイライト

コピー