Tʋma Labʋ 5
5
Anaanɩyaasɩ nɛ Safɩɩra pɛ-cɛtɩm tɔm
1Abalʋ nɔɔyʋ nɛ ɛ-halʋ paawɛɛ. Payaɣ-ɩ se Anaanɩyaasɩ nɛ payaɣ ɛ-halʋ se Safɩɩra. Paba ñaayɔɔdaa nɛ pɛpɛdɩ pɛ-tɛtʋ natʋyʋ ɖɔɖɔ. 2Ɛlɛ́, panɩɩnɩ ɖama nɛ patayɩ ti-liidiye taa nɛ abalʋ kpaɣ hɔɔlʋʋ nɛ ewoni ɛcɛlɩ Yesu tiyiyaa se ɖɩtɩŋa lɛ. 3Peeɖe Pɩyɛ pɔzɩ-ɩ se: «Anaanɩyaasɩ! Pɩlabɩ ɛzɩma nɛ ŋyele nɛ Satanɩ peɣzi-ŋ nɛ halɩ ŋcɛtɩnɩ Fezuu Kiɖeɖeu taa nɛ ŋsɩɩ ña-tɩ tɛtʋ ndʋ́ ŋpɛdaa yɔ ti-liidiye hɔɔlʋʋ lɛɛkʋ? 4Pʋcɔ ŋpɛdɩ-tʋ lɛ, tɩɩkɛ ña-ñɩm, pɩtɛkɛ ñatɩnɩ ti-liidiye ɖɔɖɔ yaa we? Ɛbɛ laba nɛ ŋla lɩmaɣza kɩdɛkɛdɛɛ anɛ ḿbʋ́? Tɩlɩ se pɩtɛkɛ ɛyáa ɖeke ŋcɛtaa. Ɛlɛ́, ŋcɛtɩ Ɛsɔ ɖɔɖɔ.»
5Anaanɩyaasɩ nɩ ḿbʋ́ lɛ, ɛtɔlɩ nɛ ɛsɩ. Peeɖe sɔɔndʋ kpa mbá panɩ tɔm ńdʋ́ yɔ patɩŋa siŋŋ. 6Ɛlɛ́, evebiya wolo pakpaɣ sɩɖʋ ɛnʋ nɛ paɖʋ-ɩ pɩsaʋ taa nɛ powoni-i pepi.
7Pɩlabɩ ɛzɩ ñɩɣtʋ naadozo yɔ lɛ, Anaanɩyaasɩ ɛnʋ ɛ-halʋ talɩ. Ɛlɛ́, ɛtaanɩɩ mbʋ́ pɩlaba yɔ. 8Peeɖe Pɩyɛ pɔzɩ-ɩ se: «Heyi-m nɛ mana se liidiye nɖɩ́ ɩpɛdɩ mɩ-tɛtʋ yɔ, ɖɩtɩŋa yɔ yaa we?» Ɛlɛ́, ecosi se: «Ɛɛɛ, ɖɩtɩŋa lɛ.» 9Pɩyɛ ɖaɣnɩ-ɩ pɔzʋʋ se: «Pɩlabɩ ɛzɩma nɛ ña nɛ ña-walʋ ɩla nɔɔ kʋɖʋmaɣ nɛ ɩtakɩ Kɩpaɣlʋ Fezuu ḿbʋ́? Cɔnɩ ŋna! Mbá pepim ña-walʋ yɔ, pɛtɛm talʋʋ nɔnɔɔ taa, pakpakɩɣ-ŋ ɖɔɖɔ nɛ powoni pepi.»
10Kpaagbaa ḿbʋ́ lɛ, halʋ ɛnʋ ɛtɔlɩ Pɩyɛ naŋgbanzɩ tɛɛ nɛ ɛsɩ. Evebiya sʋwa lɛ, pamaɣnɩ ɛtɛm sɩbʋ nɛ pakpaɣ-ɩ powoni pepi ɛ-walʋ cɔlɔ. 11Pʋ-yɔɔ sɔɔndʋ kpa Krɩstʋ ŋgbɛyɛ taa ñɩma tɩŋa nɛ mbá patɩŋa payɩ panɩ tɔm ńdʋ́ yɔ siŋŋ.
Yesu tiyiyaa lakɩ hama lakasɩ sakɩyɛ
12Ɛsɔ tɩŋaɣnɩ Yesu tiyiyaa yɔɔ nɛ ɛlakɩ hama lakasɩ sakɩyɛ nɛ ɛwɩlɩɣ ɛyáa kawɩlɩsɩ. Mbá pɛwɛnɩ lidaʋ yɔ, patɩŋa payɩ panɩɣaɣnɩ ɖama nɛ pekpeɣliɣ Ɛsɔ ɖɩɣa taa ɖenɖe payaɣ se Salomɔɔ Hɔɔlʋʋ yɔ. 13Ɛlɛ́, nɔɔyʋ yem takatɩɣ se ɛsɔzɩ pɔ-yɔɔ. Ŋgʋ́, ɛyáa ñayɩɣyaɣ-wɛ siŋŋ. 14Ɛyáa sakɩyɛ: halaa nɛ abalaa mbá paawɛnɩ lidaʋ Kɩpaɣlʋ yɔɔ yɔ, ḿbá sɔzaɣnɩ pɔ-yɔɔ nɛ pɛtɛzɩɣ ɖɔʋ. 15Đɔɖɔ lɛ, ɛyáa kpakaɣ kʋdɔndɩnaa nɛ palɩɣnɩ pɛhɛzɩɣ-wɛ ñalɩŋ yɔɔ habɛɛ nɔsɩ se Pɩyɛ ɛkɔm ɛɖɛɣ lɛ, paa ɛ-kɩlɛmʋʋ maɣmaɣ yɔ, kiihuuzi pa-taa nabɛyɛ yɔɔ. 16Ɛyáa sakɩyɛ lɩɣaɣnɩ ɖɔɖɔ hɔɔlɩŋ weyi ɩñɔtɩnɩ Yeruusalɛm yɔ ɩ-taa nɛ powokini kʋdɔndɩnaa nɛ mbá aleewaa pɩsaɣ-wɛ kpɛndɛlɩsɩ yɔ nɛ patɩŋa payɩ pɔ-yɔɔ cɛkɩ.
Pakpa Yesu tiyiyaa
17Pɩlakaɣ ḿbʋ́ lɛ, Saduki ŋgbɛyɛ taa ñɩma tɩŋa payɩ wɛ cɔjɔnaa ñʋʋdʋ cɔlɔ. Panɩ ḿbʋ́ lɛ, pala ɛsɩsɛmɩyɛ nɛ paɖʋ se pakpaɣ Yesu tiyiyaa. 18Peeɖe pakpa-wɛ powoni paɖʋ-wɛ salaka sɔsɔʋ taa. 19Đoo yuwa lɛ, Kɩpaɣlʋ Ɛsɔ tiyiyu nɔɔyʋ wolo ɛtʋlɩ salaka kuduyuu nɔnɔsɩ nɛ ɛlɩzɩ-wɛ nɛ eheyi-wɛ se: 20«Iwolo Ɛsɔ ɖɩɣa taa nɛ ɩkɛdɩ ɛyáa samaɣ wezuu caɣʋ kɩfam tɔm tɩŋa.» 21Eheyi-wɛ ḿbʋ́ lɛ, petisi nɛ pakʋyɩ tanaŋ wɩsɩ nɛ powolo Ɛsɔ ɖɩɣa taa nɛ papazɩ ɛyáa wɩlʋʋ.
Ŋgʋ́, cɔjɔnaa ñʋʋdʋ nɛ ɛ-cɔlɔ ñɩma paakpeɣli ɖama nɛ payaa tɔm hʋyaa sɔsaa nɛ ɛjaɖɛ taa sɔsaa tɩŋa kediɣzaɣ. Peeɖe pakʋsɩ sɔɔjanaa se powolo palɩzɩ tiyiyaa ḿbá nɛ pɔkɔna. 22Paba woba patʋlɩ salaka nɔnɔsɩ lɛ, paanaɣ-wɛ. Peeɖe papɩsaa peheyi-wɛ se: 23«Đɩtalaa lɛ, ɖɩmaɣnɩ paɖɩɣ salaka nɔnɔsɩ kpam nɛ ɖaŋɩyaa ñasɩŋ sɩ-yɔɔ nɛ paɖaŋ. Đɩtʋlɩ-sɩ nɛ ɖɩsʋʋ lɛ, ɖɩɩnaɣ nɔɔyʋ.»
24Ɛsɔ ɖɩɣa nɔnɔɔ yɔɔ ɖaŋɩyaa ñʋʋdʋ nɛ cɔjɔnaa sɔsaa panɩ tɔm ńdʋ́ ḿbʋ́ lɛ, paanaɣ se pɔyɔɔdɩ se we nɛ pɛwɛɛ pamaɣzɩɣ mbʋ́ pʋkɔŋ labʋ yɔ pʋ-yɔɔ. 25Peeɖe nɔɔyʋ tɩkɔm yem nɛ eheyi-wɛ se: «Ɩnaɣ! Mbá ɩɖʋ-wɛ salaka yɔ, pɛwɛ Ɛsɔ ɖɩɣa taa nɛ pawɩlɩɣ ɛyáa tɔm.» 26Ɛ́lɛ́ heyi-wɛ ḿbʋ́ lɛ, ɖaŋɩyaa ñʋʋdʋ nɛ ɛ-wayɩ ñɩma powolo pakpa-wɛ nɛ powona. Ɛlɛ́, pototukuni pa-taa nɔɔyʋ yɔɔ, mbʋ́ pʋyɔɔ yɔ, peseɣaɣ se ɛyáa samaɣ kayaɣ-wɛ pɛɛ.
Powoni Yesu tiyiyaa tɔm hʋyaa sɔsaa cɔlɔ
27Patanɩ-wɛ tɔm hʋyaa sɔsaa cɔlɔ lɛ, cɔjɔnaa ñʋʋdʋ pazɩ-wɛ tɔm pɔzʋʋ 28se: «Đikizini-mɩ kpem se ɩtaatasɩ wɩlʋʋ nɛ abalʋ ɛnʋ ɛ-nɔɔ lɛ, ɛbɛ ɩlaba yɔ? Iyeba nɛ ɩtɛzɩɣ mɩ-tɔm wɩlʋʋ Yeruusalɛm tɛtʋ tɩŋa payɩ nɛ ɩcaɣ se ɩkpaɣ ɛ-sɩm nɛ ɩsʋʋ-ɖʋ!» 29Peeɖe Pɩyɛ nɛ ɛ-taabalaa tiyiyaa lɛlaa pocosaa se: «Pʋwɛɛ se ɖɩña Ɛsɔ nɛ pɩkɩlɩ ɛyáa. 30Đɔ-cɔzɔnaa Ɛsɔ fezi Yesu weyi ɩkam kaamaŋkaɣ yɔɔ nɛ ɛsɩ yɔ. 31Efezi-i lɛ, ɛkpazɩ-ɩ nɛ ɛcaɣzɩ lone kɩbanɖɛ taa ɛ-cɔlɔ nɛ ɛpɩsɩ-ɩ Wiyaʋ Sɔsɔ weyi ɛkɛ Ñʋʋ Yaɖʋ yɔ se ɛwɩlɩ Izrɛɛlɩ ñɩma nʋmɔʋ nɛ pɛlɛɣzɩ wɛtʋ nɛ Ɛsɔ kpeɣ-wɛ pa-kɩwɛɛkɩm. 32Đɩkɛ tɔm ńdʋ́ tɩ-aseɣɖe tɩnaa. Pɩtasɩɩnɩ ɖe-ɖeke, ɛlɛ́, Fezuu Kiɖeɖeu ŋgʋ́ Ɛsɔ ha mbá pañaŋ-ɩ yɔ, kɩkɛ tɩ-aseɣɖe tʋ ɖɔɖɔ.»
33Tɔm hʋyaa nɩ ḿbʋ́ lɛ, pamʋ miŋ nɛ pacaɣ se pakʋ-wɛ. 34Ɛlɛ́, Farɩsɩ ŋgbɛyɛ taa tʋ nɔɔyʋ kɛwɛ pɛ-hɛkʋ taa, payaɣ-ɩ se Gamaalɩyɛɛlɩ. Ɛkɛ paɣtʋ wɩlɩyʋ. Ɛyáa tɩŋa ñaŋ-ɩ. Ɛnʋ kʋyɩnɩ ɛsɩŋ pɛ-hɛkʋ taa nɛ ɛyɔɔdɩ se palɩzɩ-wɛ nɛ awayɩ nɛ pʋcɔ. 35Palɩzɩ-wɛ lɛ, eheyi ɛyáa mbá paakpeɣli peeɖe yɔ se: «Izrɛɛlɩ ñɩma mɩ! Ɩkpa mɩ-tɩ nɛ mbʋ́ ɩcaɣ se ɩla ɛyáa panɛ yɔ. 36Pɩtalabɩdɩ pʋyʋ yɔ, Teedaasɩ wɩlaɣ ɛ-tɩ. Abalʋ ɛnʋ, ɛkpazaɣ ɛ-tɩ nɛ ɛyáa tɩŋɩɣ ɛ-wayɩ, paatalɩ ɛzɩ nasɩnaza yɔ. Ɛlɛ́, pakʋ-ɩ nɛ piyele ɛ-ɛyáa mɩzɩ ɖama patɩŋa payɩ nɛ pɩsɩɩ tɩnaɣ yem ḿbʋ́. 37Ɛ́lɛ́ wayɩ lɛ, Galilee tʋ weyi payaɣ se Yudaasɩ yɔ, ɛhɔ ɛyáa samaɣ nakɛyɛ kɩkalʋʋ alɩwaatʋ taa nɛ katɩŋɩɣ ɛ-wayɩ. Pakʋ ɛ́lɛ́ ɖɔɖɔ nɛ piyele ɛyáa ḿbá pamɩzɩ ɖama patɩŋa. 38Pʋ-yɔɔ lɛ, meheyiɣ-mɩ lɛɛlɛɛyɔ se: iyele ɛyáa panɛ ɖiɣ ɖiɣ nɛ pɔ-tɔm. Mbʋ́ palakɩ yɔ, yee ɛyáa cɔlɔ pɩlɩnaa yɔ, pʋkɔŋ sɩʋ tɩnaɣ. 39Ɛlɛ́, yee Ɛsɔ cɔlɔ pɩlɩnaa yɔ, ɩɩpɩzɩɣ ɩɖɩɣ-wɛ nʋmɔʋ. Ɩkpa mɩ-tɩ ɖeu nɛ pɩtaakɔɔ puyozi mɩ nɛ Ɛsɔ!»
Ɛyɔɔdɩ ḿbʋ́ lɛ, tɔm hʋyaa tisi ɛ-tɔm. 40Peeɖe paya tiyiyaa ḿbá nɛ polu-wɛ agbazɛɛ nɛ paka pa-ñʋŋ taa se pataatasɩ Yesu hɩɖɛ yaʋ. Pʋwayɩ lɛ, peyebi-wɛ se pɛɖɛɛ. 41Ɛlɛ́, tiyiyaa ḿbá pakʋyɩ pɔ-cɔlɔ nɛ palɩɩnɩ laŋhʋlʋmɩyɛ. Mbʋ́ pʋyɔɔ yɔ, Ɛsɔ nawa se pamʋnaa se pɔtɔɔ kʋñɔŋ Yesu yɔɔ. 42Pʋwayɩ lɛ, pʋñɔɔzɩ nɛ pɩkɩlɩ. Mbʋ́ pʋyɔɔ yɔ, tiyiyaa ḿbá pawɩlaɣ nɛ posusuu Laŋhɛzɩyɛ Tɔm se Yesu lɛ Weyi Ɛsɔ Lɩzaa Yɔ. Ɛsɔ ɖɩɣa nɛ ɖɩsɩ pa-taa palakaɣ ḿbʋ́ kɩyakɩŋ tɩŋa.
