Tʋma Labʋ 4

Powoni Pɩyɛ nɛ Yohanɛɛsɩ tɔm hʋyaa sɔsaa cɔlɔ

1Pɩyɛ nɛ Yohanɛɛsɩ pɔyɔɔdaɣnɩ ɛyáa samaɣ ḿbʋ́ lɛ, cɔjɔnaa nɛ Ɛsɔ ɖɩɣa yɔɔ ɖaŋɩyaa ñʋndɩnaa nɛ Saduki ŋgbɛyɛ taa ñɩma powolo pɔ-cɔlɔ. 2Patalaa lɛ, panɩɩ pawɩlɩɣ ɛyáa samaɣ nɛ peheyiɣ-kɛ se Yesu sɩba nɛ efe, ḿbʋ́ wɩlɩɣnɩ se sɩɖaa pɩzɩɣ pefe. Pʋ-yɔɔ pa-pana kpanɩ-wɛ siŋŋ 3nɛ pakpa-wɛ paɖʋ salaka nɛ tɛʋ kɔɔ kife. Mbʋ́ pʋyɔɔ yɔ, wɩsɩ kɛtɛm ɖʋʋ. 4Paa ḿbʋ́ yɔ, mbá panɩ tɔm ńdʋ́ yɔ, pa-taa sakɩyɛ tisi-tʋ nɛ pɔsɔzɩ lɛlaa yɔɔ nɛ pɛtɛzɩ ɖɔʋ. Abalaa katalɩ ɛzɩ kutokiŋ kagbaanzɩ yɔ.

5Kifema lɛ, Yuda ñɩma awiya nɛ pɛ-tɛ sɔsaa nɛ paɣtʋ wɩlɩyaa pekpeɣli Yeruusalɛm. 6Cɔjɔnaa ñʋʋdʋ Ana nɛ ɛ-hɔʋ taa ñɩma tɩŋa payɩ nɛ Kayifu nɛ Yohanɛɛsɩ nɛ Alɛksandrɩ paawɛ peeɖe ɖɔɖɔ. 7Peeɖe palɩzɩ Yesu tiyiyaa ḿbá pɛ-hɛkʋ taa nɛ pɔpɔzɩ-wɛ se: «A-ɖoŋ taa yaa a-hɩɖɛ taa ɩlaba nɛ abalʋ ɛnʋ ɛ-yɔɔ cɛ?» 8Fezuu Kiɖeɖeu kɛwɛ Pɩyɛ yɔɔ, peeɖe ɛyɔɔdaa se: «Ɛjaɖɛ taa awiya nɛ sɔsaa mɩ! 9Đɩlabɩ abalʋ ɛnɛ camɩyɛ nɛ ɛ-yɔɔ cɛ. Yee sɔnɔ pɔpɔzʋʋ-ɖʋ pʋ-tɔm yɔ, 10pʋwɛɛ se mɩ nɛ Izrɛɛlɩ ñɩma, mɩtɩŋa payɩ ɩtɩlɩ se: Nazarɛɛtɩ tʋ Yesu Krɩstʋ weyi ɩkam-ɩ kaamaŋkaɣ yɔɔ nɛ ɛsɩ nɛ Ɛsɔ fezi-i nɛ ɛlɩɩnɩ sɩɖaa taa yɔ, e-ɖoŋ taa ɛyʋ ɛnɛ ɛ-yɔɔ cɛba nɛ ɩnaɣ-ɩ mɩ-hɛkʋ taa nɛ ɛ-alaafɩya. 11Yesu ɛnʋ, ɛ-tɔm pama Ɛsɔtɔm Takayaɣ taa se:

‹Pɩyɛ nɖɩ́ kuduyiŋ mayaa mɩ ɩkpaɣaɣ ɩlɔ yɔ,

ńɖɩ́ pɩsɩnɩ ɖɩkɩlɩ wazaɣ atɩŋa payɩ lɛɛlɛɛyɔ.›

Pɩyɛ ńɖɩ́ lɛ Yesu.

12Ñʋʋ yaɖʋ nɔɔyʋ fɛyɩ nɛ pɩtasɩnɩ-ɩ. Mbʋ́ pʋyɔɔ yɔ, Ɛsɔ talɩzɩ nɔɔyʋ kedeŋa yɔɔ cɩnɛ se pɩtɩŋnɩ ɛ́lɛ́ yɔɔ nɛ pɩpɩzɩ pɩya ɖa-ñʋʋ.»

13Tɔm hʋyaa na ɛzɩma mbʋ́ Pɩyɛ nɛ Yohanɛɛsɩ pɔyɔɔdaɣnɩ abalɩtʋ ḿbʋ́ yɔ lɛ, pɩɖɩɣzɩ-wɛ ɖɩɣ ɖɩɣ. Mbʋ́ pʋyɔɔ yɔ, panawa se pɛkɛ ɛyáa yem, pɛ-ɛsɛ tokuli. Ɛlɛ́, paasɩm-wɛ se pa nɛ Yesu paawɛna. 14Ŋgʋ́, panaɣaɣ ɖɔɖɔ weyi ɛ-yɔɔ cɛba yɔ, ɛsɩŋ pɔ-cɔlɔ peeɖe nɛ paanaɣ pɔyɔɔdɩ se we. 15Peeɖe pɔɖɔɔnɩ Pɩyɛ nɛ Yohanɛɛsɩ tɔm ɖɩhʋyɛ se palɩɩnɩ awayɩ. Piyebi pe-ɖeke lɛ, papazɩ ɖama yɔɔdɩnaʋ 16nɛ pɔpɔzʋʋ ɖama se: «Ɛbɛ ɖɩlakɩ ɛyáa panɛ? Mbʋ́ pʋyɔɔ yɔ, Yeruusalɛm ñɩma tɩŋa na keɣlee se ḿbá labɩnɩ hama lakasɩ ńzɩ́. Ŋgʋ́, ɖɩɩpɩzɩɣ ɖɩkpɛzɩ-tʋ. 17Ɛlɛ́, pʋcɔ nɛ ɛyáa panɛ pɔ-tɔm ńdʋ́ tɩtaatɛzɩ cɔʋ ɛjaɖɛ taa lɛ, pʋwɛɛ se ɖikizini-wɛ-tʋ nɛ ɖɩñazɩ-wɛ se pataatasɩ Yesu hɩɖɛ yaʋ nɔɔyʋ cɔlɔ.» 18Peeɖe paya-wɛ nɛ paka pa-ñʋŋ taa se pataatasɩ wɩlʋʋ nɛ Yesu nɔɔ yaa pataatasɩ yaʋ ɛ-hɩɖɛ kaʋ. 19Ɛlɛ́, paba pɩsɩnɩ-wɛ se: «Mɩ-maɣmaɣ ɩmaɣzɩ nɛ ɩna se: pʋwɛ ɖeu ḿbʋ́ Ɛsɔ ɛsɩndaa se pañam-mɩ nɛ piyele Ɛsɔ yaa we? 20Đa lɛ, ɖɩɩpɩzɩɣ ɖiyele yɔɔdʋʋ tɔm ndʋ́ ɖɩna tɩ-yɔɔ nɛ ɖɩnɩɩ-tʋ yɔ.»

21Peeɖe tɔm hʋyaa ḿbá patasɩ-wɛ ñazʋʋ nɛ peyebi-wɛ pɛɖɛɛ. Pataana kawanaɣ ŋgá paahɔmnɩ pa-nɩŋgbaŋʋʋ yɔ. Mbʋ́ pʋyɔɔ yɔ, ɛyáa kpeekpe saŋaɣ Ɛsɔ mbʋ́ pɩlaba yɔ pʋ-yɔɔ. 22Toovenim lɛ, abalʋ weyi palabɩ hama lakasɩ nɛ ɛ-yɔɔ cɛ ḿbʋ́ yɔ, ɛ-pɩnzɩ kɛɖɛ nɩɩnaza yɔɔ.

Krɩstʋ ñɩma sɛɣ Ɛsɔ

23Peyebi Pɩyɛ nɛ Yohanɛɛsɩ lɛ, powolo pɛ-ɛgbaɣdɩnaa cɔlɔ nɛ pɛkɛdɩ-wɛ tɔm ndʋ́ tɩtɩŋa cɔjɔnaa sɔsaa nɛ ɛjaɖɛ taa sɔsaa peheyi-wɛ yɔ. 24Paba nɩ ḿbʋ́ lɛ, pa nɛ wɛ pɛkpɛndɩ patɩŋa nɛ pɛsɛɛ Ɛsɔ se: «Caabiyuu! Ñalabɩnɩ ɛsɔdaa nɛ tɛtʋ nɛ lɩm nɛ mbʋ́ pɩtɩŋa payɩ pʋwɛ kedeŋa yɔɔ cɩnɛ yɔ. 25Ñatɩŋnɩnɩ ñe-Fezuu Kiɖeɖeu yɔɔ nɛ ŋyele ɖɔ-cɔzɔ Daaviidi weyi ɛkɛ ña-tʋmlaɖʋ yɔ, ɛyɔɔdɩ se:

‹Pɩlabɩ ɛzɩma ajɛya taa ñɩma peendiɣ ḿbʋ́?

Pɩlabɩ ɛzɩma a-taa ñɩma taŋ nɔsɩ nzɩ́ sɩɩwazɩɣ pʋyʋ yɔ?

26Kedeŋa yɔɔ awiya tɩŋa ñɔɔzɩ a-tɩ se aɖɛɣ you.

Mbá pɛwɛnɩ ɖoŋ ɛjaɖɛ yɔɔ yɔ, patam nɔɔ

Kɩpaɣlʋ yɔɔ

nɛ Weyi Ɛlɩzaa Yɔ ɛ-yɔɔ.›

27Kɩpaɣlʋ! Pɩkɛ toovenim, mbʋ́ pʋyɔɔ yɔ, wiyaʋ Eroodi nɛ wiyaʋ Pɔɔnsɩ Pilaatɩ nɛ Izrɛɛlɩ ñɩma nɛ mbá pɛtɛkɛ Izrɛɛlɩ ñɩma yɔ, patam nɔɔ ña-tʋmlaɖʋ kɩbanʋ Yesu weyi ŋlɩzaa yɔ ɛ-yɔɔ tɛtʋ tʋnɛ tɩ-taa. 28Ḿbʋ́ palabɩ mbʋ́ ŋmaɣzaa nɛ ŋɖʋ ɖooo lɔŋ nɛ ño-ɖoŋ yɔ. 29Kɩpaɣlʋ! Lɛɛlɛɛyɔ, cɔnɩ ŋna panazʋʋ ña-tʋmlaɖaa. Ha-wɛ ɖoŋ nɛ posusi ñɔ-tɔm kaalɛyɩtʋ. 30Wɩlɩ ño-ɖoŋ nɛ ŋla hama lakasɩ nɛ ŋwɩlɩ kawɩlɩsɩ nɛ kʋdɔndɩnaa yɔɔ cɛ. La ḿbʋ́ nɛ ña-tʋmlaɖʋ Yesu nɔɔ.»

31Pɛtɛm Ɛsɔ sɛʋ lɛ, lone nɖɩ́ ɖɩ-taa paakpeɣlaa yɔ, ɖɩñamsɩ. Peeɖe Fezuu Kiɖeɖeu tibi kɩwɛɛ patɩŋa pɔ-yɔɔ nɛ papazɩ Ɛsɔtɔm susuu kaalɛyɩtʋ.

Krɩstʋ ñɩma kpɛndɩɣ pɩtɩŋa

32Ɛyáa samaɣ ŋgá kaawɛnɩ lidaʋ yɔ, kaalabɩ nɔɔ kʋɖʋmaɣ nɛ kɛwɛnɩ lɩmaɣza kʋɖʋmɛɛ. Ka-taa nɔɔyʋ taamaɣzɩɣ ɛ-ñɩm yɔɔ se e-ɖeke ɛtɩnɩ-pʋ. Ɛlɛ́, mbʋ́ paa weyi ɛwɛna yɔ, pɩɩkɛ patɩŋa pa-ñɩm. 33Ɛsɔ kaha Yesu tiyiyaa ɖoŋ siŋŋ nɛ palɩzɩɣnɩ Kɩpaɣlʋ Yesu sɩm nɛ e-fem pa-aseɣɖe nɛ Ɛsɔ ɛnʋ ɛwazɩɣ samaɣ ŋ́gá katɩŋa kɔ-yɔɔ pɩtɩɩfɛyɩ. 34Ka-taa nɔɔyʋ taatɛɖɩɣ pʋyʋ: mbá patɩŋa paawɛnɩ hayɩm yaa kuduyiŋ yɔ, pɛpɛdaɣ nɛ powokini pi-liidiye 35pɛcɛlɩɣ tiyiyaa nɛ paba maɣzɩɣnɩ mbʋ́ pɩtɛɖɩɣ paa weyi yɔ nɛ patayɩɣ.

36Ḿbʋ́ ɖɔɖɔ Leevi liɖe taa tʋ nɔɔyʋ kɛwɛ Ciiprɩ ɛjaɖɛ taa, payaɣ-ɩ se Yozɛɛfʋ. Tiyiyaa kakʋm-ɩ hɩɖɛ se Barnaabaasɩ. Pʋ-tɔbʋʋ se weyi ɛsazɩɣ lɛlaa yɔ. 37Abalʋ ɛnʋ, ɛpɛdɩ ɛ-hayɩm nɛ ewoni pi-liidiye nɛ ɛcɛlɩ tiyiyaa ḿbá.

選択箇所:

Tʋma Labʋ 4: KABI

ハイライト

コピー