Tʋma Labʋ 12
12
Pakʋ Yakubu nɛ paɖʋ Pɩyɛ salaka
1Alɩwaatʋ ńdʋ́ʋ́ wiyaʋ Eroodi kapazɩ Krɩstʋ ŋgbɛyɛ taa ñɩma nabɛyɛ wayɩ wɛʋ kaŋ kaŋ. 2Eyeba nɛ pakʋ Yohanɛɛsɩ ɖalʋ Yakubu nɛ sɩɣa kɩɖaɣlaɣ. 3Ɛlabɩ ḿbʋ́ lɛ, ɛna se pɩkɛdɩnɩ Yuda ñɩma. Pʋ-yɔɔ ɛkpa Pɩyɛ ɖɔɖɔ. Kazandʋ ndʋ́ tɩ-yɔɔ pɔtɔkɩ tindine nɖɩ́ ɖɩ-taa fɛyɩ sɔsɔɔna yɔ tɩ-alɩwaatʋ taa pɩlakaɣ ḿbʋ́. 4Pakpa-ɩ ḿbʋ́ lɛ, eyele paɖʋ-ɩ salaka. Peeɖe ɛca sɔɔjanaa naanza tam naanza taa se paɖaŋ ɛ-yɔɔ nɛ pɛtɛm Paska Kazandʋ tɔɔʋ lɛ, ɛhʋʋnɩ-ɩ tɔm ɛyáa tɩŋa ɛsɩndaa. 5Pɩyɛ wɛ salaka taa ḿbʋ́ lɛ, Krɩstʋ ŋgbɛyɛ taa ñɩma wɛɛ petendiɣ Ɛsɔ ɛ-yɔɔ paa ɖooye.
Ɛsɔ tiyiyu lɩzɩ Pɩyɛ salaka taa
6Đoo wena aɖɛɣaɣ se kife nɛ Eroodi hʋʋnɩ Pɩyɛ tɔm yɔ a-taa lɛ, Pɩyɛ kahɛnaa nɛ eɖou. Sɔɔjanaa naalɛ hɛkʋ taa ɛɛwɛɛ nɛ piyele lɛlaa ñasɩŋ salaka nɔnɔsɩ taa nɛ paɖaŋ. Paahɔkɩ-ɩ yoŋgbasɩ naalɛ. 7Pɩkɛdaa lɛ, Ɛsɔ tiyiyu nɔɔyʋ tɩlɩʋ ɛ-cɔlɔ salaka kuduyuu taa nɛ ñalɩmɩyɛ naɖɩyɛ ñalɩ kɩ-taa yem ñammm. Peeɖe tiyiyu ɛnʋ ɛmabɩ ɛ-hʋyʋʋ taa se: «Kʋyɩ kpaka!» Kpaagbaa ḿbʋ́ lɛ, yoŋgbasɩ nzɩ́ paahɔkɩ e-nesi taa yɔ, sɩyɛɖɩ yem nɛ sɩtɔlɩ
8nɛ tiyiyu ɛnʋ eheyi-i se: «Tɔɔlɩ ña-tambaɖɛ nɛ ŋta ña-naataŋgbala tɔnzɩ.» Pɩyɛ la ḿbʋ́ ɖɔɖɔ, ɛlɛ́ ɛtasɩ-ɩ heyuu se: «Suu ño-toko sɔsɔʋ nɛ ŋtɩŋ-m.»
9Peeɖe ɛ́lɛ́ tɩŋ-ɩ nɛ palɩɩ. Pɛɖɛɣaɣ lɛ, pɩlabɩ-ɩ ɛzɩ eɖozuu kuɖozu yɔ. Ɛtaatisi se pɩkɛ toovenim. 10Pɔkɔm pɛɖɛɛ kajalaɣ nɔnɔɔ nɛ naalɛ ñɩŋga nɛ patalɩ ŋgá palabɩ-kɛ nɛ ñɩɣtʋ nɛ ŋɖɛɣ-kɛ nɛ ŋsʋʋ tɛtʋ taa yɔ ka-taa lɛ, katʋlɩ pɛ-ɛsɩndaa yem waaa nɛ palɩɩ. Palɩ ḿbʋ́ lɛ, pakpaɣ nʋmɔʋ nɛ pɛɖɛɣ. Pɩkɛdaa lɛ, tiyiyu ɛnʋ ɛtɩmʋʋ Pɩyɛ ɛsɩndaa yem. 11Peeɖe ɛhʋ ɛ-taa pɩŋŋ nɛ ɛtɔ se: «Lɛɛlɛɛyɔ, manawa se toovenim Ɛsɔ tiyini e-tiyiyu nɛ ɛkɔɔ ɛlɩzɩ-m Eroodi nesi taa nɛ mbʋ́ pɩtɩŋa Yuda ñɩma caɣaɣnɩ-m yɔ pɩ-taa.»
12Ɛna mbʋ́ pɩ-taa ɛwɛɛ yɔ lɛ, ewolo Yohanɛɛsɩ weyi pakʋm-ɩ hɩɖɛ se Maarkɩ yɔ e-ɖoo Maarɩɩ tɛ. Ɛyáa sakɩyɛ kaakpeɣli peeɖe nɛ pɛsɛɣ Ɛsɔ. 13Ewoba lɛ, ɛma nɔnɔɔ nɛ tʋmlaɖʋ halʋ ñɩnʋ weyi payaɣ se Roodi yɔ, ewolo se ɛna. 14Ɛtalaa lɛ, ɛnɩɩ Pɩyɛ nɔɔ nɛ pɩlabɩ-ɩ leleŋ pɩŋŋ. Đenɖe ɛzɩ ɛɛtʋlaa lɛ, ese ɛpɩsɩ nɛ eheyi se Pɩyɛ kɔma nɛ ɛwɛɛ nɔnɔɔ taa. 15Ɛlɛ́, mbá paawɛ peeɖe yɔ, papɩsɩnɩ-ɩ se: «Ŋsʋ kpaaŋ!» Ɛlɛ́, ɛtasɩ-wɛ heyuu se: «Toovenim mɔyɔɔdʋʋ.» Peeɖe pɔtɔm se: «Yee ḿbʋ́ ɛ-wayɩ tʋ.»
16Pɩyɛ wɛɛ ɛmakɩ nɔnɔɔ ḿbʋ́. Pɩkɛdaa lɛ, powolo pa-maɣmaɣ patʋlɩ nɛ pana-ɩ nɛ pɩlabɩ-wɛ yem yaaa. 17Peeɖe ɛñɩɣ-wɛ nesi se posu. Posuma lɛ, ɛkɛdɩ-wɛ ɛzɩma mbʋ́ Kɩpaɣlʋ lɩzɩ-ɩ salaka taa yɔ. Ɛtɛm-wɛ kɛdʋʋ lɛ, eheyi-wɛ se: «Iwolo iheyi-tʋ Yakubu nɛ taabalaa lɛlaa.» Eheyi-wɛ ḿbʋ́ lɛ, ɛcaŋ ɛɖɛɛ ɖoli lɛɛɖɛ.
18Tɛʋ fema lɛ, sɔɔjanaa peendiɣ nɛ pɔpɔzʋʋ ɖama se: «Pɩyɛ mʋʋ́ʋ we?» 19Peeɖe Eroodi ɖʋ ɛyáa se pañɩnɩ-ɩ nɛ paba ñɩnɩ-ɩ, patana-ɩ. Ɛlɛ́, ɛ́yáa sɔɔjanaa mbá paaɖaŋ ɛ-yɔɔ yɔ nɛ ɛhʋʋnɩ-wɛ tɔm nɛ ɛha nɔɔ se pakʋ-wɛ. Pʋwayɩ lɛ, ɛkʋyɩ Yudee egeetiye taa nɛ ewolo ɛcaɣ Sezaaree tɛtʋ taa alɩwaatʋ cabɩ.
Wiyaʋ Eroodi Agriipaa kajalaɣ ñɩnʋ sɩm tɔm
20Piiyozi Eroodi nɛ Tiiri nɛ Sidɔɔ pɛ-tɛtʋ taa ñɩma. Paba na ḿbʋ́ lɛ, pala nɔɔ kʋɖʋmaɣ nɛ powolo pana Blastuusi. Ɛnʋ lɛ karɩka sɔsɔɔ ŋgá kaɖaŋɩɣ Eroodi ɖɩɣa yɔɔ yɔ. Pana-ɩ se ɛɖɛɛ-wɛ nɔɔ nɛ powolo petendi-i nɛ ɛ nɛ wɛ peceɣ. Mbʋ́ pʋyɔɔ yɔ, ɛ-ɛjaɖɛ taa pɛ-tɛ ñɩma wokaɣ nɛ pañɩnɩɣ tɔɔnaɣ.
21Kɩyakʋ ŋgʋ́ paɖʋwa se peceɣ yɔ kɩtalaa lɛ, Eroodi suu ɛ-awiya toko nɛ ɛcaɣ e-kpelaɣ taa nɛ ɛpazɩ ɛyáa yɔɔdɩnaʋ. 22Peeɖe paba mabɩ kubusi se: «Ɛsɔ yɔɔdʋʋna! Pɩtɛkɛ ɛyʋ!» 23Kpaagbaa ḿbʋ́ lɛ, Ɛsɔ tiyiyu nɔɔyʋ mabɩ-ɩ nɛ sonzoowe tɔɔ-ɩ nɛ ɛsɩ. Mbʋ́ pʋyɔɔ yɔ, eyeba nɛ pasam-ɩ ɛzɩ pasaŋʋʋ Ɛsɔ yɔ.
24Alɩwaatʋ ńdʋ́ʋ́ pɛtɛzaɣ Ɛsɔtɔm susuu paa le nɛ ɛyáa tisiɣ-tʋ.
25Barnaabaasɩ nɛ Sɔɔlɩ pɛtɛm labʋ mbʋ́ pʋ-yɔɔ petiyi-wɛ Yeruusalɛm yɔ lɛ, pa nɛ Yohanɛɛsɩ weyi pakʋm hɩɖɛ se Maarkɩ yɔ papɩsɩ Antɩyɔɔsɩ tɛtʋ taa.
