کارَل رسولَل 4
4
پطرس ئو یوحنا اِبِرُوَر شورا یهود
1پطرس ئو یوحنا هَنی داشدونَ گَرد مردِم قصه‌ئونَ مَهَرد گه کاهنَل ئو فرموندَه قِلااورَل معبد ئو شیخَل فرقَه صَدّوقی هاتِن اِرَه تَکو. 2اونَل اژ یَگه رسولَل تیَلیم مردِمونَ ما ئو اِلومونَ مَهَرد گه عیسی اژ مِردیَل زِنیا بیَ، ویشتِر آگِرون اژ سر چی. 3اَسَه اونَلو گِرت ئو اَرِیَگه نزیک ایوارَه بی، تاگَه صو هُیشتِنون اِنوم زندو. 4مِنتائای بِری اژ اونَلی گه پِغومو شنَفتوئی، ایمونو آوِرد ئو شِمار پیالو رَسیَ نزیک اَر پنج هزار نفر.
5وَه صوایکا، کَلِنگَل قوم ئو شیخَل ئو مَلِمَل تورات اِنوم اورشلیم جیَم بینَ دور یَکا. 6حَنّا کاهن اعظم ئو قیافا ئو یوحناءِ کاهن ئو اسکندر ئو کُل کسِ‌کارَل کاهن اعظم اِنوم ایی مِجِلیسَ بینَ. 7اونَل پطرس ئو یوحنائو نا اَر نومجا، اَژینو پِرسین: «وَه چه قدِرتی ئو وَه چه نُمی ایی کارتونَ کِردیَ؟»
8اَسَه پطرس پِرا بی اژ روح‌القدس، ئو جوواوا دانی: «اِاِ کَلِنگَل قوم ئو اِاِ شیخَل، 9اَرّ ایمِرو وَه خاطر خوئی کِردِن اَر حخ پیا شَلی ایمَه مَنینونِ بازخواس، ئو مَپِرسینو چطور اَ پیا شِفا گِرتیِ، 10اِسَه کُل هُمَه ئو کُل قوم اسرائیل بِذانِن گه وَه نُم عیسی مسیحِ ناصریَ گه ایی پیا ساق هوسیاس اَر وَر چیَمَلتو، وَه نُم هَراَ کسَ گه هُمَه کیشیتون اَر صلیب، مِنتائای خدا او اژ مِردیَل زِنیا کِردی. 11ایی عیسی هَراَ بَردَسَ گه هُمَه مِمارَل رَدتو کِرد ئو اِسگَه بیَسَ بَرد بِنچین ساخدِمو. 12اِنوم هُیچ کسِ‌تِر بِخِر اژ عیسی نجاد نیَ، اَرِیَگه اِژیر آسمو نُمی‌‌تِرونَ آمَل ناءَ تاگَه وَه‌سونگَ اَوا نجاد بِگِریم.»
13وخدی جورَت پطرس ئو یوحنائو دی ئو ذِناسدو گه آمَل بی‌سَوات ئو معمولی‌ای کِن، بِلُجوئیو هات ئو فیَمین گه یوئنَ هَراَ کسَلِنَ گه وَه‌گَرد عیسی بینَ. 14مِنتائای اَرِیَگه اَ پیا گه شِفا گِرتوئیتی هوسیائی اَرتَک اَ دو نفرَ، نتونستو چیئی بوشِن. 15اَسَه فِربونو دا گه اژ مِجِلیس بِچنَ دِریر ئو ووژو نیشتِنَ شور. 16وِتونَ یَکتِری: «ایی پیالَ چِه‌اِر کِیم؟ اَرِیَگه کُل کسَلی گه هانَ اورشلیم‌اِر مَذانِن گه مُجِزَه آشگاری وَه دس اونَل اَنجوم گِرتیِ ئو نِمَتونیم حاشا کِیمی. 17مِنتائای تاگَه ویشتِر اژ یَه چاو نَکُوء اِنوم قوم، باس هُشتار بِیمَ ایی پیالَ گه دیَر وَه‌گَرد اَحدی، وَه ایی نُمَ قصَه نَهَن.»
18اَسَه اِدوارَه اونَلو هِنا کِرد ئو فِربونو دائونو گه هرگِس وَه نُم عیسی چیئی نوشِن ئو تیَلیمی نیَن. 19مِنتائای پطرس ئو یوحنا جوواوُ دا: «هُمَه ووژتو قضاوت کَن، اِ چیَم خدااِر کُماین دُریسَ، اطاعت اژ هُمَه یاگَه اطاعت اژ خدا؟ 20اَرِیَگه ایمَه نِمَتونیم اَ چیئَه گه دیمونَ ئو شنَفتِمونَ، تیَریف نِهِیم.»
21اَسَه اَ دو نفرونَ دُما یَگه سیَم‌سی فِرِه‌ئونی اَری کِردِن، وِل دا، اَرِیَگه رئیونی اَرِه مِجازات کِردِنو نَهَردَ دی، اَرِیَگه کُل مردِم خدائون اَرِه اَ چیئَه گه اتفاق کَتوئی، شگِرَ مَهَرد. 22اَرِیَگه اَ پیای گه وَه مُجِزَه شِفا گِرتوئیتی، چِل سال ویشتِر بیتی.
دوعا ایمودارَل
23وخدی پطرس ئو یوحنا آزاد بین، گِلوناهُارد اِرَه تک رِقیفَلو ئو اَ چیئَه گه رِئیسَل کاهنَل ئو شیخَل وِتوئیون‌ئونو، تیَریفو کِرد. 24اَسَه اونَل، وخدی یِئونَ شنَفت، وَه‌گَرد یَک اِ درگا خدا دوعائو کِرد، وِتو: «اِاِ خداون تو هَراَ خداینَ گه آسمون ئو زمین ئو دریا ئو کُل چیئَلی گه ها نومون‌اِر، خَلکِت کِردیَ، 25تو ووژِت وَه‌سونگَ روح‌القدس اژ زوئو باوَه ایمَه داوود گه خادم تو بی، وِتِت:
«”اَرِه‌چَه، ملتَل مَرِشِنِ یَک،
ئو قومَل هَراَ وِل نشقَه مَکیشِن؟
26پاتِشائَل زَمی هیزَمَگِرِن
ئو حکِمرونَل جیَمَ موئنَ دور یَکا،
اَرضد خداون
ئو هَمیش اَرضد مسیحِ او.“
27اَرِیَگه اِراسی گه هِرِ ایی شیَرَ، هیرودیس ئو پُنتیوس پیلاتُس وَه‌گَرد خِرِیهودیَل ئو قوم اسرائیل اَرضد خادم مقدّسِت عیسی گه اوئِت مسح کِرد، هُم‌دَس بینَ، 28تا اَ چیئَه گه دس تون ئو نشقَه تو اژ وِرِکار مقدّر کِردوئیتی، اَنجوم دَن. 29اِسگَه، اِاِ خداون، سِیل کَ اَر سیَم‌سی کِردِنَلو ئو بوئَشخَ خِلمتکارَلِت تاگَه کلوم تونَ دلِ‌جورَت ویشتِریکا بوشِن، 30هَمیش دس ووژت اَرِه شِفا دِریژاِرا کَ ئو نشونَه‌ل ئو مُجِزَه‌لی وَه نُم خادم قدوسِت عیسی، آشگارا کَ.»
31ئو دُما دوعا کِردِنو، اَ جاءَ گه جیَم بوئینی اَری، هاتِ رِکَه ئو کُلو پِرا بین اژ روح‌القدس، ئو کلوم خدائونَ دلِ‌جورَتا موئِت.
ایمودارَل اِ دارِندار یَکتِری هُم‌بیَرا موئن
32کُل ایمودارَل اژ دل ئو گیو یَکی بین ئو هُیچ کس چیئی اژ دارِنداری هِن ووژ نِمَذِناسدی، بلکِم اِ کُل چی وَه‌گَرد یَک هُم‌بیَر بین. 33رسولَل وَه قدِرت فِرِه شاتیونَ ما اَر زِنیابیئِن خداون عیسی ئو فیضِ کَلِنگی اَررُی کُلو بی. 34هُیچ کس اِنومو میتاج نوئی، اَرِیَگه هر کی زَمی یاگَه مالی داشدی، مَفِروتی ئو پیلَ 35مَنیا اَر وَر پا رسولَل تا وَه اَخَ گه هر کس اِ کَلَسی، اِنومو بیَرا بو. 36یوسف‌یش گه اژ طائفَه لاوی ئو اژ مردِم وِلات قبرس بی ئو رسولَل نُمو نائی اَر برنابا یانی ’کُر دلگرمی‘، 37زَمی کِشتی گه داشدی، فِروتی ئو پیل آوِرد نا اَر وَر پا رسولَل.
@ 2024 Korpu Company
