کارَل رسولَل 3

3
شِفا حُاسکَر شَل
1یِه روژ پطرس ئو یوحنا اِ سات سه نیمَرو گه موقَع دوعا بی، داشدو مَچیان اِرَه معبد خداون. 2هَراَ حِنَ بِری، پیای گه شَل مادرزا بیونَ ماوِرد. اونَل کُلِ روژی اوئنَ مَنیا اَر وَر دروازَه معبد خداون گه ’دروازَه رنگین‘ نُم بیتی تاگَه اژ مردِمی گه ماهاتِن اِنوم معبد، حُاس کِ. 3وخدی اَ پیا، پطرس ئو یوحنا گه مِهِستو بان اِنوم معبد، دیتی حُاس اَژی کِردِنی. 4پطرس ئو یوحنا گِزو کِرد اَری؛ پطرس وِتی: «سِیل ایمَه کَ بوئینِم!» 5اَسَه اَ پیا چیَم آوشدی اَرینو ئو اِ تَما بی چیئی‌ئون دَنی.
6مِنتائای پطرس وِتون: «مِه نه طِلا دیرِم نه نُخِرَه، مِنتائای اژ چیئی گه دیرِم میَم‌ئونِت! وَه نُم عیسی مسیحِ ناصری هیزگِر بِچُ اَرئیا!» 7ئو دس راس پیاهَه گِرتی ئو هیزدا. جاوارجا پال ئو ساق پالی قویَتو گِرت 8ئو اژ جا پَری ئو هوسیا، ئو چی اَرئیا. اَسَه هُنَ گه هَلپَرکیَ مَهَردی ئو شگِر خداءَ مَهَردی، وَه‌گَردو چیَ نوم معبدا. 9کُل مردِم اوُ دی گه مَچیا اَرئیا ئو شگِر خداءَ مَهَردی، 10ئو شناسیو گه هَر اَوَه‌‌سَ گه وِرِکار اَرِه حُاس کِردِن مَنیشتِ وَر ’دروازَه رنگین‘ معبد؛ اَسَه اژ اَ چیئَه گه اتفاق کَتوئیتی اَرِه، واقونِ دَم پَری ئو بِلُجوئیو هات.
تیَلیم پطرس اِنوم طارِمی سلیمان
11هَرهُنَ گه اَ پیا چسبوئیَ پطرس ئو یوحناآ ئو اَژینو جیاآ نِموئیا، کُل مردِم هُنَ گه واقونِ دَم پَروئی، اِنوم ’طارِمی سلیمان‘ وَه‌گَرد یَک ویرِ اونَل رَمین. 12وخدی پطرس یَه دیتی، ویر کِردی اَر جیَمیَت وِتی: «اِاِ پیال اسرائیلی، اَرِه‌چَه اَژی کارَ بِلُجوئیتونَ مای؟ اَرِه‌چَه گِزتو کِردیَس اَر ایمَه، مَری وَه قویَت ئو دینداری ووژمو، کارمونی کِردیَ تاگَه ایی پیا بتونی بِچو اَرئیا؟ 13خداءِ ابراهیم، خداءِ اسحاق، خداءِ یعقوب، خداءِ باوَه‌ل ایمَه، خادمِ ووژ عیسی جِلال داتی، او گه هُمَه داتونَ قاپا ئو اَرتَک پیلاتُس حاشاتو کِرد، وَه‌یاآگه پیلاتُس قَص یَه بیتیَ گه آزاد کِیتی. 14مِنتائای هُمَه اَ قدوس ئو اَ آم عادلتونَ حاشا کِرد ئو هِستِتو گه اِجال او قاتلی بَشخیا بوئونتو. 15هُمَه سِرآو ژییاینتو کُشت، مِنتائای خدا او اژ مِردیَل زِنیا کِردی ئو ایمَه شات یِئیمَ. 16وَه‌سونگَ ایمون اَر نُم عیسی، نُم عیسی قدِرت داسیَ ایی پیا گه موئینینون ئو مَشتاسینونی. اَاَ، ایمونی گه وَه‌سونگَ عیسیَ، ایی پیا اِوَر چیَمَل کُل هُمَه آزاآ کِردیَسی.
17«ئو اِسگَه اِاِ بِرال، مَذانِم گه کار هُمَه چُی کَلِنگَلتو اژ نایونی بیَ. 18مِنتائای خدا هِر اژ ایی رئیَ، اَ چیئَه گه وَه زوئو کُل پِخَمَرَل پیشگوئی کِردوئیتی، وَه اَنجوم رَسونی: یَگه مسیحِ او عذاوَ مَکیشی. 19اِسگَه توئَه کَن ئو گِلارِن ویرِ خدا، تاگَه گنائَلتو پاکا بو تاگَه روژَل تازه‌آ بیئِن، اژ حضور خدا اَرِنتو برَسی، 20تاگَه عیسی یانی هَراَ مسیحَ گه باس بای ئو وِرِکار اَرِنتو دیاری کِردیِ، کِل‌کِ، 21گه آسمو باس قبول کِیتی تا وخدی گه کُل چی اژ نوو دُریس بو، هَرهُنَ گه خدا اژ قدیم وَه زوئو کُل پِخَمَرَل مقدّس ووژ وِتی. 22موسی وِتیِ: ”خداون خداءِ هُمَه، اِنوم بِرالتو، پِخَمَری چُی مِنتون اَرِه کِلَ‌مِهِه؛ ئو هُمَه باس گوش بِگِرینونَ اَ چیئَه گه موشی‌ئونتو. 23هر کی گوش نَگِریَ اَ پِخَمَرَ، اِنوم قوم نابودَ ماو.“
24«کُل پِخَمَرَل‌یش اژ سموئیل پِخَمَر گِرتیِ تاگَه پِخَمَرَلی گه دُما او هاتِنَ، اِبارَه ایی روژِلونَ وِتیَ. 25هُمَه آیلَل پِخَمَرَلینو ئو وارثَل عَتی گه خدا وَه‌گَرد باوَه‌لتو بَسدیِ. او وِتیَ ابراهیم: ”اژ نسِل تو کُل قومَل زَمی بِرَکتَ مَگِرِن.“ 26وخدی گه خدا خادم ووژ دیاری کِردی، اول‌بار او کِل‌کِردی اِرَه تک هُمَه تاگَه بِرَکتتو دِ، وَه یَگه هر کُم اژ هُمَل اژ رئیَل شرتو گِلادِ.»

ハイライト

シェア

コピー

None

すべてのデバイスで、ハイライト箇所を保存したいですか? サインアップまたはサインインしてください。

کارَل رسولَل 3のビデオ