Medhetethi 20
20
Abrahaamenne Abimeleke
1Abrahaamey Mamirepe dendidi Negebe mela biitta heera bidi Qaadesapenne Shura biittatas gidduwan de7is. Geraaranka guutha wode gam7is. 2Yan de7ishe Abrahaamey ba machiw Saaro, “Iya ta michiw” yaagida gisho, Geraara kawoy Abimelekey kiittidi Saaro baako efis. 3Shin Xoossay issi qamma amuhon Abimelekeko yidi, “Neeni ehida macaase gaason hayqaasa, iya azinara de7awusu” yaagis.
4Hanoshin, Abimelekey iyo bochibeenna. I, “Godaw, neeni tananne ta derey qohonna de7ishin coo dhaysaneyee? 5I, ‘Iya, ta micho’ gibeennee? Qassi iyaka, ‘I, ta isha’ gabikee? Taani ta wozana xillotethaninne ta kushe geeshshatethan haysa oothas” yaagis.
6Xoossay amuhon iyako, “Ee, neeni ne wozana xillotethan oothidaysa ta erayis. Hessa gisho, neeni iyo bochonaadanne ta sinthan nagara oothonnaada nena taani teqas. 7Ha77i ha addiya machiw zaara. I nabe gidiya gisho, new Xoossa woossiko ne attana. Shin iyo zaarona ixiko, neeninne new de7iyaba ubbay hayqanaysa era” yaagis.
8Abimelekey wontetha gallas daro guura ba moorinnata baako xeegis. He hanidaba ubba entaw odin enti daro babidosona. 9Yaatin Abimelekey Abrahaame xeegidi, “Neeni aybiba nu bolla oothadii? Ne ta bollanne ta kawotetha bolla haysa mela qoho ehanaw ta new ay iitaba oothadina? Neeni ta bolla oosetanaw bessonnaba oothadasa” yaagis. 10Qassi Abimelekey Abrahaame, “Neeni haysa ayis oothadii?” yaagidi oychis.
11Abrahaamey zaaridi, “ ‘Ha bessan Xoossas yashetiya asi bayna gishonne qassi ta mache gaason enti tana wodhana’ gada qopida gishosa. 12Hessa bolla iya tumaka ta micho; iya ta aawa na7ape attishin ta aaye na7a giduku, yaaniya gisho, iya ta macho gidasu. 13Xoossay tana ta aawa keethafe kessida wode taani iiko, ‘Neeni bida biitta ubban ne taw oothana keehatethay haysa; “I ta isha” gada’ oda yaagas” yaagis.
14Hessafe guye, Abimelekey dorse, mehe, macca aylletanne adde aylleta kessidi Abrahaames immis; iya machiw Saaro iyaw zaaris. 15Abimelekey Abrahaameko, “Heko, ta biittay haysish nena lo77oson de7a” yaagis.
16Saariko, “Taani ne ishas issi mukulu bira santime#20:16 Issi mukulu bira santime: Hessi tammanne issinni kilo giraame deexiya walahi bayna bira. immayis. Hessi neera de7iya ubba sinthan neeni xillo gideysanne aybi iitabaka oothonaysa eriseysa gido” yaagis. 17-18Goday Abrahaame mache Saari gaason Abimeleke keetha ubba maynisida gisho Abrahaamey Xoossa woossin, Abimelekey, iya machiyanne iya macca aylleti na7a yelana mela Xoossay enta pathis.
The Word for the World International and The Word for the World Ethiopia
