Medhetethi 19
19
Soodomenne Gamoora Dhayuwa
1Nam7u kiitanchoti omarsishin Soodome katamaa gakidosona. He wode Looxey he katamaa pengen uttis. Looxey enta be7idi mokanaw dendidi entako bis. Ba som7uwa sa7a gathidi entaw ziggis. 2I entako, “Ta godato, hinte aylliya soo gelerketi, hinte tohuwa meecetidi qamma haysan aqite; wonta guura hinte biya bessi biite” yaagis.
Enti, “Akay, nuuni ha katamaa dabaaban aqana” yaagidi zaaridosona.
3Shin I enta minthi woossida gisho bidi iya soo gelidosona. I entaw uythi uukidi aathin midosona. 4Enti zin7ana hanishin Soodome katama adde asa ubbay na7atethinne dondzi issoyka attona yidi keethaa yuuyi aadhidosona. 5Enti Looxe xeegidi, “Hachi omarsi ne soo gelida adde asati awun de7oona? Nuuni entara gahetana mela enta nuuko kare kessa” yaagidosona. 6Yaatin Looxey entara odetanaw kare keyishe pengiya guyera gordidi, 7entako, “Ta dabboto, hayyana ha iita oosuwa oothopite. 8Taw adde eronna nam7u geela7oti de7oosona. Taani enta hintew kare kessiko hinte koydaba oothite. Shin haysati ta imathe gidiya gisho ta kaarape garsan de7oosona; ha asata bolla aybibaaka oothopite” yaagis.
9Asati, “Nu sinthafe gede kicha” yaagidosona. Qassi, “Ha addey baw bete asi shin, nu bolla pirdanaw koyees? Nuuni enta bolla oothanaw koyida iitaape aathidi ne bolla oothana” yaagidosona. Enti Looxe guye sugi yeggidi pengiya menthanaw shiiqidosona. 10Shin nam7u asati banta kushiya kare yeddidi Looxe soo goochi gelsidi pengiya gordidosona. 11Hessafe guye, enti keetha pengey de7iyasuwa demmona mela guuthafe gita gakanaw qooqisidosona.
12He nam7u asati Looxeko, “New haysan adde na7i woyko macca na7i, ne macca nayta oychiday woyko hara dabboy ha kataman de7ii? De7iko entana haysafe kessa. 13Ayis giiko, nu ha katama dhaysanaw hanoos. Enta bolla waassiya waasoy Godaa sinthan gita gidiya gisho ha katama dhaysana mela Goday nuna kiittis” yaagidosona.
14Yaatin Looxey ba macca nayta oychidaysatako bidi, “Goday, ha katama dhaysana haniya gisho ellessidi ha bessaafe keyte” yaagis. Shin iya macca nayta oychidaysati I qelqisees gidi qopidosona.
15Sa7i wontanaw gontey zo77iya wode he kiitanchoti Looxeko, “Denda, ne machiwnne haysan de7iya ne nam7u nayta ekada ellesada keya. Akay giiko, ha katamay pirdetiya wode neka dhayasa” yaagi dirgisidosona. 16Shin Looxey keyanaw gam7in, Goday iyaw qadhetida gisho, he kiitanchoti iya kushiya, iya mache kushiyanne nam7u nayta kushiya oykidi he katamaape kessidosona. 17Kiitanchoti enta kessida mela he kiitanchotape issoy, “Hinte shempuwa ekidi baqatite! Guye xeellofite! Ha heeran awunka eqofite! Hinte dhayona mela zamaako baqatite” yaagis.
18Shin Looxey entako, “Hay ta godato, yaagopite. 19Taani hinte aylley hinte sinthan saba demmida gisho tana ashshanaw taw daro qadhetideta. Shin taani zumako baqatanaw danda7ike; ha dhayoy gakidi tana dhaysana. 20Heko, haysan issi katami de7ees; yaa woxidi baanaw matanne guutha katama. Ta shempuwa ashshanaw ta yaa baqato? I daro guutha katama gidennee?” yaagis.
21Kiitanchoy, “Lo77o! Taani ne woosa ekas; he ne odida katamaa dhaysike. 22He katamaako ellesada baqata; ne yaa gakanaw ta aybibaaka oothike” yaagis. Hessa gisho, he katamaa sunthay Zo7aare#19:22 Zo7aare: Guussay “Guutha” guussu. geetetis.
23Looxey Zo7aare gakiya wode buroo xalqey caares. 24Goday he wode salope tamanne xuuggiya diine Soodome bollanne Gamoora bolla bukisis. 25Hessada oothidi Goday he katamata, heera ubba, katamatan de7iyaba ubbaa he biittan de7iya mithaanne maata dhaysis. 26Shin Looxe machiya guye simma xeellada maxine shuchu gidasu.
27Wontetha gallas wonta guura Abrahaamey dendidi kase I Godaa sinthan eqida bessaa bis. 28I Soodomenne Gamoora, he heeran de7iya biitta ubbaa duge xeelliya wode xuussa tamada cuyay biittafe dendeysa be7is.
29Xoossay he heeran de7iya katamata dhaysiya wode Abrahaame qopidi, Looxey de7iya katamata dhaysidi, Looxe dhayope ashshis.
Looxenne Iya Macca Nayta
30Looxey Zo7aaren daanaw yashetida gisho, yaape dendidi ba macca nayta nam7atara zuma bolla keyis. Yan gongolo giddon ba nam7u macca naytara de7is. 31Issi gallas bayra na7iya ba kaalo micheko, “Nu aaway cimis, biitta ubban de7iya wogaatho nuura aqanaw issi addey haysan baawa. 32Yaaniya gisho, haaya! Nu aawa ushshu ushshidi, iyara aqidi, nu aawape nuus koche ashshos” yaagasu.
33He wode qamma banta aawa ushshu ushshidosona. Bayra na7iya gelada iyara aqasu. Iya iyara aqiya wodenne dendiya wode I eribeenna.
34Wontetha wode bayriya kaaliw, “Zine qamma taani ta aawara aqas; hachi qammaka iya ushshu ushshiko, neka gelada iyara aqa. Yaatidi nuuni nu aawape koche ashshos” yaagasu. 35He wode qamma banta aawa ushshu ushshidosona. Kaalo na7iya gelada iyara aqasu. Ha77ika iya iyara aqiya wodenne dendiya wode I eribeenna.
36Yaatidi Looxe macca nayti nam7ay banta aawape qanthatidosona. 37Bayriya adde na7a yelasu; iya sunthaa Moo7abe#19:37 Moo7abe: Ibraawetho doonan ha sunthaa birshethay “Ta aawape” guussu. gada sunthasu. I hachi gakanaw Moo7abeta mayza. 38Kaaliyaka adde na7a yelasu; iya sunthaa Beni7aama#19:38 Beni7aama: Ha sunthay “Ta asata woyko ta dabbota na7aa” guussu. gada sunthasu. I hachi gakanaw Amooneta mayza.
The Word for the World International and The Word for the World Ethiopia
