Matthieu 21
21
Jésus amakea na gô Jérusalem
(Bono na Marc 11:1–11, Luc 19:28–40, Jean 12:12–19)
1Jésus n’aneengie ahmabuéa na gô Bethphagé, te mbôka ésitongonéké na Jérusalem. Ahmatsiga gô môkôdi ôtetu mbe Olivier. Jésus amoobégeda abaé va gatse aneengi edi. 2Amatôma ahngô mbe: Kiakani na gô mbôkane éndé gô mbene anyô. Vangabanye nôka gô buéaga nôngadenga muana anyama ééndô mbe ânon, na yeedi eendô mbe ânesse dindé ditéga. Tsôbôani yangô. Nôviga na yangô. 3Okô môma anôévôi mbe: ?Nôénda ndé vane? Beendani angô mbe: Kumu asô andé n’eyanza gô yangô. Vane anganôtsika mbe: Kiakani na yangô.
4Ebégôe éne éenanô mônongovo gamavovo môpandôédi amatasa maNzambé mbe:
5Beendani asi môsenge aSion mbe:
Bononi Kumu anyô avigi na gôndé anye
Andé môma agébé na nyemo.
Angô aviga digaa gô nyama éagétabé, ânesse.
Adigaa gô ânon, môpaga ânesse.
6Aneengie ahmakea na ameenda éne ématômu ahngô na Jésus. 7Ahmakea na môpagee anyama na yeedi na gôndé Jésus. Ahmatsakéga ngoyi yaô gô ngongo anyamane na Jésus amapeka. 8Géômbége gévôni ahmayaa ngoyi yaô gô nzéa gôégobeda ône avigani. Avo dôta amakitsa mitabé midôngani mieetété gôéyaa miangô gô nzéa. 9Ane amakiaka va mbene aJésus na ane amaviga va ngima edi amaadôngana na gényônga mbe: Tôkumédéni Muana aDavid. Te mbe mate maNzambé mabaké gôndé ône avigi gô ina aKumu. Tôkumédéni Nzambé n’asi g’ôba muetso.
10Vamatsiga Jésus gô Jérusalem, mitéma miasi môsenge ône mimaba gô ngongo, oma ameevôana mbe: ?Odôô vita indaa? 11Avo amaabéa akaô mbe: One te môsi Nazareth, inedi Jésus. Angô te môpandôédi amatasa maNzambé.
Jésus amanyepeda eba aNzambé
(Bono na Marc 11:15–19, Luc 19:45–48, Jean 2:13–22)
12Jésus ameengéa na gô eba aNzambé. Amadenga ayôkô asômba na asômbéda gô eba aNzambé. Jésus amapatsa ahngô. Amatinda tabudéye yapukanédi adode. Amakuéséda na dikôndiye yasômbédi amabémbi. 13Vane Jésus amanigôa ahngô mbe: Matendeo MaNzambé matôbeenda mbe: Ebami ôngamenyanganô mbe eba ôsambédu Nzambé. Ivô anye nôkoyi eba ôdôô ôka gésoméô seesui.
14Asi pogu n’ane avékumani amaviga na gôndé Jésus gô eba aNzambé. Jésus amaadôngéda. 15Tsesu yadeekedi adigondoku n’anigôi amige miaNzambé asinyôngéô vameena ahngô mabégô mamayanza Jésus masoongôa môma énigôa. Anéngé amadenganô gô eba aNzambé amakuméda Nzambé mbe: Tôkumédéni Muana aDavid. 16Peeye ameevôa Jésus mbe: ?Osookô gavovo anéngé‐a? Jésus amaabéa angô mbe: Ii, nookô. Anye madeo nôsitanga gô Matendeo MaNzambé mbe: Ewe ôséngu ôséngue woo ôembéô gô miônya mianéngé na gô miônya miana agô mabene. 17Jésus amakusa gô eba aNzambé na amanôtôga gô Jérusalem amakea na gô Béthanie gômeebogaka angô pitsiye dine.
Jésus amakoko géétété
(Bono na Marc 11:12–14,20–24)
18Ovo énya ône n’ongôngô, Jésus amatimôga gô Béthanie gôébuéa na gô Jérusalem. Amookô nzaa. 19Ameena va kôbangô anzéa géétété samiônda gétetu mbe ôfiguier. Amawesea gôéseta sangô ivô gémabaka te yabi ditévo. Amakoko géététége mbe: Na gô épénde éakômbé ôsavidôbôta miônda. Tsina na tsina ôfiguier ômagoso. 20Aneengi edi ameena éne ébuéyini na amatsapéô. Ameevôa Jésus mbe: ?Nayee géétété gégosi tsina na tsina nane? 21Jésus amanigôa ahngô mbe: Nanôbeenda na gô pie mbe ôkô anye nôétsa mitémamie mietso, gétsumé ngudi yaNzambé paga, nôngeenda éne ééndi me na géététége, na nôngeenda mavo mabégô mootéa mavôni. Nôôngôa évova na môkôdi ôdôô mbe: Môtôga na gô mubu. Na angô ôôngôa énôtôga na gô mubu. 22Okô anye nôétsi mitéma mianyô mietso gô éne édukanye Nzambé g’ôsambô, nôngeena éangô.
?Enyangee éaJésus éviga gôni?
(Bono na Marc 11:27–33, Luc 20:1–8)
23Jésus ameengéa na gô eba aNzambé na ameekéda ome. Tsesu yadeekedi adigondoku na peeye yAjuif amaviga gôéévôa Jésus nyivô mbe: ?Enyangee éyanzewe mabégô mema, éviga gôni? ?One ameetsa éwe ôtômu gôéénda nane indaa? 24Jésus amaabéa ahngô mbe: Me dôta va yami kuka nanôévôa yami nyivô. Okô anye nômiaabéyi, me nanganôbeenda dôta gésa géviga ényangee yami. 25?One amatôma Jean gôébatésa oma indaa? ?Te Nzambé‐a? ?Vo te oma? Beendani me. Ahmatsunda anguene na anguene mbe: Okô tôvovo mbe te Nzambé amatôma Jean, angô angatôévôa mbe: ?Tambô ébégô ndé anye nôsisingé mabégô medi? 26Okô tôvovo mbe te oma amatôma Jean ?ébégôe éngaba nayee? oma asanganyôngéô gôébégô muetso asibômuku mbe Jean te pidi môpandôédi amatasa maNzambé. 27Vane ahngô ahmaabéa Jésus mbe: We tôsamenya. Na Jésus amanikéda ahngô mbe: Na me muetso tsoongôa énôbeenda gésa géviga ényangee yami éyanza me.
Tsava éaneyee abaé
28Jésus amavovo mbe: Vôtanganôni éne énônigôa me. Mômôgôô môvo amabaka n’anedi amôgôô abaé. Amavovo na muana akuua mbe: Muanami, kiaka ôkeyanza deo noo gô tsaga. 29Muanee amakékôa mbe: Tsakea. Tsanyôngéô éyanzee éne. Ivô gô pesu andéô amakoa matasa medi na amakea gôéyanza gô tsaga. 30Vane tétene amavovo na môvo muana te mônongovo. Muanee amamôaabéa mbe: Te nane téta, nakeyi. Ivô angô asikéé. 31Jésus ameevôa adeekedi adigondoku n’anigôi amige mbe: ?Va gatse ana abaé, ône ameenda éne émanyôngéô tétedi indaa? Ahmaabéa Jésus mbe: Te ône amapanga. Na Jésus amanigôa mbe: Nanôbeenda na gô pie mbe anye n’egébuéaka g’ôkumu aNzambé, abongi adepu na akeyi agésasô angapanga ébuéa. 32Gôébégô Jean amaviga na gôndé anye gôénôtévéda nzéane ényôngéô Nzambé, ivô anye môsiitsé mitémamie gô éangô. Géé abongi adepu, n’akeyi agésasô asitsumé paga, ameetsa mitéma miaô. Béyé vameenanye nane, nôsikoé matasa manyô gôéétsa angô mitéma mianyô na gôénôtôga gô paga.
Tsava éayanzi abévani
(Bono na Marc 12:1–12, Luc 20:9–19)
33Jésus amavovo mbe: Oôkôni épo tsava. Gômabaka mômôgôô, kumu éatsaga. Angô amagaaba tsaga edi éetété éamiônda étetu mbe ôvigne. Amamiguga môgômba. Amasaa gépénda na amasaa gédigéô gô ngongongongo samôkenene atsagane. Amavangana n’ayanzie. Amanôtôga gô tsengedi amakea môtôô. 34Va ndéône éômbo miôndamie, kumu éatsaga amatôma ayanzie na gôndé akeneyie atsaga gôéétsô ôkabô edi amiônda. 35Akeneyie ahmatsôpa ane ahmatômukuni. Ahmabômôa môvo. Ahmayôha môvo. One amôtatô amamôtuma na mataé. 36Kumu éatsaga amoomba étôma ene ayanzi ahmootéa éyekani. Na akeneyie ahmeenda ahngô te mônongovo. 37Kumu éatsaga amayusuméda étôma muanedi na gô tsaga gôndé akeneyie. Amamenyaka mbe: akeneyie ahngamekeda muanami. 38Tambô, akeneyie vamamôenahngô aviga, ahmavovo anguene n’anguene mbe: Nôeni ône angaviagana n’enyangee éatsagane vangawa kooko asô. Vigani tômôyôhéni. Na tsagane éngaba éasô n’anyô. 39Ahmamôtsôpa na amakea n’edi na gô piakô atsagane. Gône amamôyôha.
40Jésus angô mbe: ?Vangaviga kumu éatsagane angeenda nayee n’akeneyie? 41Ane amookôni amaabéa Jésus mbe: Kumu éatsagane angayôha akeneyie abévani diôwa yamaguga. Angavangana n’avo akeneyi ahsangakina ékabana n’edi miôndamie. 42Jésus ameevôa ahngô mbe: Anye madeo nôsitanga gô Matendeo MaNzambé mbe:
Etaé émakôngégu n’asaayi eba
Te éangô évumbu v’epandaka gôésipa ébee wetso.
Nôeni éne te éne émayanza Kumu.
Na veena we nane, tôtsôkéa.
43Jésus amoomba évovo mbe: Nanôpandôéda mbe t’ebandô ôkumu aNzambé ôngawatô gôndé anye na ôngeetsô avo oma andé ga géétété gébôta miônda miamisôba minyôngéô kumu éagéétété, te ane angeenda éne ényôngéô môtômine okumue aNzambé. [ 44Menyani mbe ône angatenôga gô étaé éne angakuéa na angookô pievia. Na ôkô étaé éaaga gôndé môma, anganigôô na angakoga tsese.]
45Tsesu yadeekedi adigondoku na Apharisien amookô tsava dimagunya Jésus na asibômu mbe: avovo te na we. 46Amabuta mônongo gôétsôpa Jésus ivô ameena oma gomo, gôébégô muetso amamenya mbe Jésus te môpandôédi amatasa MaNzambé.
Alliance Biblique du Gabon (Bible Society in Gabon) 1983
