Matthieu 20
20
Ayanzie amaba gô tsaga
1Jésus amavovo mbe: Oôkôni éne égoneda me ôkumu aNzambé. Ogono na kumu atsaga amamenegéa gôébambéa ayanzie mbe aviga aviyanza gô tsagedi éetété ééndô mbe ôvigne. 2Amavangana n’ahngô gôévana abi ôvo adode gô môsaa gavanô môma na môma. Amatôma ahngô gôéyanza gô tsaga. 3Vamatsaanya nyee, kumu atsaga amoomba ékea gôébambéa avo ayanzi. Na amadenga oma gô mbôka ahbuta éyanza. 4Kumu atsaga amatôma ahngô mbe: Anye kiakani nôkedenga akanyô gô tsaga yami. Nanganôvanéa kuanakue. 5Ayanzie amakea. Vamatsakama kômbéne, kumu atsaga amoomba ékôva avo ayanzie na gô tsagedi. Vamatengama kômbéne, kumu atsaga amoomba étôma avo te mônongovo. 6Vamapénda kômbéne, kumu atsaga amayusuméda édenga avo oma gô mbôka gébé n’eyanza. Ameevôa ahngô mbe: ?Anye nôdigaa môsee wetso géyanzé nayee? 7Oma amaabéa angô mbe: We tôsibongu na môma gôéyanza. Kumu atsaga amatôma ahngô mbe: Tambô, kiakani nôkeyanza gô tsagami.
8Vameeda nyee, kumu atsaga amavovo na kotene yedi mbe: Bambéaka ayanzie, ôétsa ahngô dodeye yaô. Opanga eetsa te ane amayusumédu ébonguni. Oyusuméda te ane amapanga ébonguni. 9Ane ameengéa gô éyanzee na dikoo amaviga na ameetsô môma na môma abi ôvo ôvo adode. 10Ane amamenegéa éyanzee amaviga na ameetsô môma na môma abi ôvo ôvo adode. Amamenyaka mbe dine yaô dingootéa éyeka, tambô. 11Vameetsô ahngô dodeye amakambôga na kumu éeyanzee 12mbe: Bonoko. Adua amayusumédu ébonguni ayanzi ti pedu andéô, ivô ôtangôe adode yaô te ôvo na dine yasô tôsiindéyi éyanza g’ômandee môsee amôbongo n’egogoe évôni. 13Vane kumu atsaga amavovo na môma môvo mbe: Wee ami, me tsigôesuéa. Ewe n’ongôngô, ôsingi gôéyanza abi ôvo adode gô môsaa ?kaka nane‐a? 14Bongoko abie woo, kiaka. Na mômane ôdôô amayusumédu ébonguni namôetsi te mônongovo n’ewe. 15Tsagane te yami. Dodeye te yami. ?Me tsayanza na yangô mônongovo ganyôngéô me‐a? ?Ewe ôndé na ngusu gônyepa me‐a? 16Vane Jésus amatimbôanéda mbe: Ane andé gô mbene angaba gô ngima. Ane agô ngima angaviagana gô mbene.
Jésus ameevéda éne éamôtatô ôwedi na gékundugéô sedi
(Bono na Marc 10:32–34, Luc 18:31–34)
17Jésus n’aneengi edi amanika na gô Jérusalem. Gô nzéa Jésus amavovo n’aneengie v’anguene mbe: 18Oôkôni édué. Wa n’anyô tôkea na gô Jérusalem. Te gône gôngakabô me, Muana Amôma na gôndé tsesu yadeekedi adigondoku, n’anigôi amige miaNzambé. Nangeesédu gôéyôhu. 19Nangadeekedu na gôndé oma asavamba na Nzambé. Ahngô angadeta me. Angabita me na mibitô mievongo. Ahngabôkéda me va gésumu sowa. Va mbene apitsi dibaé, éne éamôtatô nangakunduga.
Môduké ayeene aJacques na Jean
(Bono na Marc 10:35–45)
20Yeene aJacques na Jean amaviga na gôndé Jésus n’anedi abaé. Amakotomo va mbene aJésus gôémôneegeda na gôémôduka ébégôe. 21Jésus ameevôa angô mbe: ?Ewe ônyôngéô ndé? Môgetone ône amavovo na Jésus mbe: Vangaba éwe gô ényangee éokumue woo, singéa anee wami abaé‐aa adigaa va kôbangô oo. Môvo gésa gémôgôô, môvo dôta gésa gégeto. 22Jésus amanikéda angô mbe: Ewe ôsamenya éne éduki éwe me. ?Gébunguge gétubéda magugame mangeena me, anye nôngoongôa ényua sangô‐a? N’ahngô amaabéa angô mbe: We tôngoongôa. 23Jésus angô mbe: Ii, na gô pie nônganyua gébunguge géngangyua me. Ivô gôndé me gôénôsevôéa édigaa, vo géeyo gégeto vo géeyo gémôgôô, ésaba gôndé me. Tunguye dindé yane amakônzéô yangô na Nzambé.
24Vamookô avo nzima aneengie mavoviame mane ahmakambôgéa Jacques na Jean. 25Jésus amabambéa ahngô muetso gôébeenda ahngô mbe: Anye nôsabômu mbe ane aneegedu mbe tsesu yatsengene, te ahngô atôma omee waô ga avéga. N’oma avôni atubéda ngudi yaô gô mane matômahngô. 26Ivô gôndé anye ésaba nane. Okô môvo va gatse anyô anyôngéô éba pene abaké môyanzi aakedi. 27Gôndé anye, ône anyôngéô étubéda ényangee éedi abaké môvéga aakedi muetso. 28Béyé me Muana Amôma, vamaviga me tsivutéé mogo mami gôétôma oma. Ivô namatôma na namabanda na mogo mami. Nameetsa memuene monyo ami ngu na g’ôwa, te môvanô gôéoboo oma ayekani.
Jésus amadôngéda asi pogu abaé
(Bono na Marc 10:46–52, Luc 18:35–43)
29Vamamôtôga Jésus gô môsenge ôéndô mbe Jéricho, oma ayekani amakea n’edi. 30Asi pogu abaé amadigaa va kôbangô anzéa amookô mbe Jésus te angô ootani ône. Vane angô abaé amaadôngana mbe: Kumu, éwe Muana aDavid, eena we ngeba. 31Géômbé gémadékéda ahngô mbe: Kôdani. Asi pogu amoomba éadôngana mbe: Kumu, éwe Muana aDavid, eena we ngeba. 32Jésus amasikama na amabambéa ahngô mbe: Vigani. Jésus ameevôa ahngô mbe: ?Nônyôngéô mbe nanôénda nayee? 33Amaabéa angô mbe: Kumu, poeda we miso masô. 34Jésus ameena ahngô ngeba na amabanda miso maô. Tsina na tsina angô abaé ameena. Ahmakea na Jésus nzéepo.
Alliance Biblique du Gabon (Bible Society in Gabon) 1983
