Matthieu 19
19
Meekédu maJésus gôébégô éeyôha yômba
(Bono na Marc 10:1–12)
1Vamamana Jésus éongô ndongi nene, amanôtôga gô Galilée amakea na gô dipo tsényé yambéne ééndô mbe Jourdain, gôébuéa gô Judée. 2Géômbé gévôni gémamôaanda. Na amadôngéda mabeea maô.
3Avo Apharisien ahmawesea na vandé Jésus gôémôtambéa pagô na nyivô gôémôkubéda.
Ahngô mbe: ?Gô mige mimakitsô mbe mômôgôô géyôhé yômba gô pati yebégô‐a? 4Jésus amaabéa ahngô gô nyivô mbe: ?Tambô anye madeo nôsitanga éne éndé gô Matendeo MaNzambé‐ma? Ematendu mbe: V’ebandô amuene Môvangi amavanga oma abaé, môvo te mômôgôô, môvo dôta te môgeto. 5Te gô ébégôe éne mômôgôô atsika tétedi na yeedi gôédigaa na môgayedi. Ahngô abaé aka te ôtô ôvo. 6T’ebandô ahngô asabadô abaé, andé ti ôtô ôvo na koo. Tambô môma asatatôa éne émavambéda Nzambé. 7Vane Apharisien ameevôa Jésus mbe: ?Moïse amatsikéa we mbe mômôgôô atenda gésangô seyôha yômba na apatsé môgayedi gôndé? 8Jésus amaabéa mbe: Moïse ameetsa anye môtômee ône te gôpatsanye môgeto na disôba yanyô. Ivô v’ebandô ésibaké nane. 9Jésus amanigôa mbe: Okô mômôgôô akini môgayedi, môgetone gékéé gésasô, na mômôgôône abongo muene môgeto, menyani mbe mômôgôône akeyi te gésasô.
10Aneengie amavovo na Jésus mbe: Okô mbe ébégôe ékegea te nane, va gatse amômôgôô na môgayedi, enyepa mbe oma adigee gébané yômba. 11Jésus amaabéa ahngô mbe: Kaka mbe oma muetso angoongôa ésinga ôgie ône. Ane angoongôa édigaa nane, te ane ameetsô ngudi na Nzambé. 12Gôndéké mabégô matatô madékéda môma gôébaa na gôébaaô. Ebégô évo, oma amabôtu yôtôye gébé kuanakue gôébaa na gôébaaô. Evo ébégô te avo oma amakou n’oma aka ga mivangô. Na évo ébégô te avo oma asabaa na asabaaô te gôébégô éokumu aNzambé. One angoongôa ésinga ôgie ône asingéké.
Jésus ameetsa anéngé mate
(Bono na Marc 10:13–16, Luc 18:15–17)
13Oma amakea n’anaô na gôndé Jésus mbe atsakéga ahngô mogo medi na avovo na Nzambé gôndé ahngô. N’aneengie ahmadékéda ahngô mbe: Nônakea na gôndé Jésus n’anee. 14Jésus amavovo mbe: Tsiikani anee avigéké na gôndé me. Nômbioomba édékéda ahngô. Okumu aNzambé ôndéké gôndé muetso andéké g’anéngé adua. 15Jésus amatsakéga mogo medi gôndé anéngée na vane Jésus amatimôga gône na amakea.
Gékiti gémaviga na gôndé Jésus
(Bono na Marc 10:17–31, Luc 18:18–30)
16Mômôgôô môvo amaviga na gôndé Jésus gôémôévôa nyivô mbe: ?Môékédi, nangeenda éyanza ndé éamôsôba gôédiia monyo amôbô na môbô? 17Jésus amamôaabéa na nyivô mbe: ?Oévôa me gô éne éamôsôba nayee? Gôndéké môvo na koo andé amôsôba, te Nzambé. Okô ônyôngéô éengéa gô monyoe apie, gobeda mige na mitôma miaNzambé. 18Mômôgôô amamôévôa mbe: ?Mige ndé? ?Mitôma ndé? Jésus amamôaabéa mbe: Ombiayôha. Ombiakea gésasô. Ombieesua. Ombiapatéa môma. 19Gobeda yoo na tétoo. Nyôngéô môkoo ganyôngéô éwe ôtô omuene. 20Mômôgôô nône amabaka te madeo asidômbéa, amaabéa Jésus mbe: Migemie mine, na mitômamie mine mietso, me namigobeda. ?Va mbenene vane nangeenda nayee? 21Jésus amavovo n’edi mbe: Okô ônyôngéyiô éba gébé n’oési, kiaka ôkesômbéda éetso éndé n’ewe. Obongo dodeye ôkekabanéa na misuga. N’ewe ôngaba n’okiti g’ôba. Na vane ôviga gôékea nzéepo n’ami. 22Ivô vamookô mônzambu ôgie ône gédimô sedi gémadita na amakea na mônyongo. Môtémedi ômeena panda gôébégô amabaka n’okiti edi ôvôni.
23Jésus amanigôa aneengi edi mbe: Nanôbeenda na gô pie mbe énde ti édagani gôndé gékiti gôéengéa g’ôkumu aNzambé. 24Na me noomba énônigôa édué gô tsava mbe éndé ti édagani nyama épôni gôédugu gô épôdéké èatsôngi na éôtéa ti édagani gôndé gékiti gôéasugéda amuene gôétômu na Nzambé. 25Vamookô aneengie mabégô mema, amatsapéô na amasôbasôbana mbe: ?Akasô gôngaba môma angoobogoni‐a? 26Jésus amabono angô na amaabéa mbe: Gô ngudi yamôma amuene, géndégégé. Ivô amuene Nzambé asadagéô ta n’ebégô évo.
27Pierre amasiia gô nyivô, angô mbe: Aanaka Kumu, we adua tômatsika éetso na tôndé ti gôékea nzéepo n’ewe. ?Gôndé we éngaba nayee? 28Jésus amanigôa mbe: Me nanôbeenda na gô pie mbe vangadigaa me, Muana Amôma gô gédigaa sami sokumaka gô tsenge éamanza, anye nzima n’aneengi abaé nôkea n’ami nzéepo, anye dôta nôngadigaa môma na môma gô sedi gédigaa sokumaka gôétsundéda nzima na mabôta mabaé meongo éaIsraël. 29Menyani mbe muetso ane atsika yeba yaô, n’anayaô, na tétee yaô na iyee yaô, n’anaô, na tsaga yaô, atsika yangô gô inami angootéa édiia gô mbene. Gô éôma éetso ématsikangô, gô gévo angakôndégu môkama, môkama. Na dôta angaba na monyo ôsakôdéakani. 30Ayekani andé gô mbene angaba gô ngima. Na vane gémbene amootu na géngima.
Alliance Biblique du Gabon (Bible Society in Gabon) 1983
