Matthieu 11
11
Jean‐Baptiste amakudéga oma na gôndé Jésus
(Bono na Luc 7:18–35)
1Vamamana Jésus éongô aneengi edi ndongi, ahngô nzima n’abaé amatimôga amakea atsua tsangô éaJésus gôéékéda gô mbôka yatsenge nene.
2Jean‐Baptiste amadigaa gô eba atsôgôô. Amookô tsangô éamane mamayanza Christ. Amakudégéa Jésus avo aneengi edi 3gôémôévôa mbe: ?One ookiô we mbe angaviga te éwe‐a ¿Vo tôngeenea te muene? 4Jésus amaabéa angô mbe: Nikani na gôndé Jean nôkenigôa mane mookiô anye na mane meeni anye. 5Nigôani angô geeni anye mbe asi pogu eena, na ékonzo akea na makôdô manguene, n’asi ébeea éagega adôngi, na asi ndiba ookô, na ane awakini akundugi, na misuga miikédu Tsangô Eamôsôba. 6Ti gô gényônga géndé n’ewe ômeetsa me môtémoo wetso, na ôsakuéa gékôba gôénika na gô ngima.
7Aneegi aJean amakea. Jésus amanigôa mabégô maJean gôndé géômbége. Jésus amavovo mbe: ?Gô tsenge émagasani anye nômakea gôéena ndaa‐vo? ?Nômeena ésingee épupédu n’opunga‐a? Aé. Nôsiene éne. 8?Tambô nômakea gôéena ndaa‐vo? ?Nômeena môma aata maduani mokumaka‐a? Nôsabômu mbe môma amaduani mokumaka eenanô gô eba ôvôni amôtômi atsenge. 9?Nômakea gôéena ndaa‐vo? ?Nômakea gôéena môpandôédi amatasa maNzambé‐a? Ii, nômeena te angô. Na ône ameenanye ootéa môpandôédi. 10Menyani mbe Jean te ône ameevéda Matendeo MaNzambé mbe: Nzambé amavovo mbe: Me natôma peegi ami gôégôkukuéa nzéane. 11Jésus amanigôa mbe: me nanôbeenda na gô pie mbe: Va gatse amuetso amabôtuni gôsaba môma ootéa môvôni ga Jean‐Baptiste. Eébéyée nane, ône eendô mbe môma abobo g’ôkumu aNzambé, angô ootéa môvôni na Jean‐Baptiste. 12Bandôa gô ndéône émeekéda Jean‐Baptiste ngu na ndéô nedué oma agémbana gôéengéa g’ôkumu aNzambé. Oma angudi dôta anyôngéô éwata ôkumue gôndé anguene. 13Ndongi yaMoïse na apandôédi muetso amatasa maNzambé ameevéda mane mameenahngô mokumu aNzambé ngu na vamaviga Jean. 14Nônatsuma me paga vavovo me mbe Jean ôdôô te Elie, ône amatôevédu mbe, Elie angaviga. 15One andé na matô ka te ookôkô‐ma.
16Jésus mbe: ?Nangagoneda oma apitsi yedi na ndaa? Nagoneda ahngô n’anéngé andé digaa gô môkii. Aamugana anguene n’anguene mbe: 17We tôgobéyi anye ngomo mbe nôgina, n’anye nôsigina. We tômanôtôéa mimbô mowa, n’anye nôsidéa miéngé. 18Endé te nane. Jean amaviga géé môyakô na gényué maduku, na oma amavovo mbe: Jean andé na gédidi gébévani. 19Me, Muana Amôma namaviga. Me naa. Me nanyua. Na oma avovo mbe: Bononi angô. Sedi gémba te aakagane, na sedi gémba te nyuakagane. Angô avamba n’abongi adepu n’oma abévani. Na Jésus angô mbe: Ivô éodo éaNzambé éenanô te gô éne éyanzangô na éodo éne.
Asi dipo mbôka ahmatsuma paga
(Bono na Luc 10:13–15)
20Jésus amabandôa ésemba asi dipo mbôka. Ameetsa oma tsembô ane ameena mayanza medi mamisôba masoongôa môma ésupua na ahngô asiesédé anguene, asikoé mitéma miaô. Jésus amavovo mbe: 21Ti gô maguga mangaba gôndé anye asi Chorazin. Ti gô maguga mangaba gôndé anye asi Bethsaïda. Mayanza mami mamisôba mayanzi me va gatse anyô mbe namayanziki gôndé asi Tyr na asi Sidon ahngô mbe amaata seeda na mbe amoko mioto gô yôtô yaô gôétubéda mbe tôndé oma abévani na tôkoi mitémamie. 22T’ebandô nanôevéda mbe gô nyaa amôtsundu gésisédéôge sanyô géngootéa na géne sasi Tyr n’asi Sidon. 23N’anye asi Capernaüm, tambô anye nôabatéda anyene mbe we tôôtéa oma muetso, we tôsaba oma abévani. Anye nôngasugédu gôésisédu gô mungu asoto. Mayanza mami mamisôba mayanzi me va gatse anyô mbe namayanziki gôndé asi Sodome, ahngô na mbôkane éaô mbe andéké ngu na deo noo. 24T’ebandô nanôevéda mbe gô nyaa amôtsundu gésisédéôge sanyô géngootéa géne sasi Sodome.
Vigani na gôndé me gôédunda
(Bono na Luc 10:21–22)
25Gô ndéô nene Jésus amavovo na Tétedi mbe: Ah Téta, Ewe Kumu atsina n’oba, nagôkuméda. Ewe ômatsutsuéda mabégô mavôni gôndé oma abobo mbe amamenya. Géé gôndé oma éodo, na oma agéneenga gévôni ômasuéga mangô. 26Na gô pie Téta, éndé te nane gôébégô ômuene ômanyôngéô te nane. Nagôkuméda gô éangô.
27Jésus amavovo mbe: Tétami amani édeekeda me mabégô metso. Gôsaba môma angoongôa émenya me, Muana ANzambé, buétsé te amuene Téta. Gôsaba môma angoongôa émenya Téta, buétsé te memuene Muanedi, na dôta ane angatubédu Téta na me.
28Vigani na gôndé me, anye muetso nôgogini na anye muetso nôditéôni. Me te môdundédine wanyô. 29Tôtsuéké égumbee wa n’oo abaé, éwe gévo gésa samôkongo, me dôta gévo gésa. Singa me nagôékéda. Me te môma angeba agébé na nyemo. Ongadenga gédundéô samôtémee woo ganyôngéô éwe. 30Môkongoe wami ôngatsua me n’ewe ôsadaga étsua. Na égumbee éngatôtsuani ésadita.
Alliance Biblique du Gabon (Bible Society in Gabon) 1983
