Matthieu 12
12
Jésus na nyee edunda
(Bono na Marc 2:23–28, Luc 6:1–5)
1Va mbene vane gô nyee edunda Jésus amakitsangana tsaga éapôtô.#12:1 Ajuif amabaka na mivo mibie mimagaabôkôni. Aneengi edi amookô nzaa. Ahmakea ahkudua éduka pôtô gôéaa yangô. 2Vameena Apharisien nane amavovo na Jésus mbe: Bonoko geenda aneengie woo éne émakitsô môge mbe gééndô nyee edunda. 3Jésus amaabéa ahngô mbe: Anye madeo nôsitanga éne émeenda David. Angô n’ane amabaka n’edi ahmookô nzaa ahmabuta môyakô. 4David ameengéa na gô eba aNzambé gôébongo mipemba. Ameetsa akedi na muetso ahmaa mipemba miamôge mine misaaka oma muetso, buétsé te anguene adeekedi adigondoku. 5Mavooe anye madeo nôsitanga gô miganda miaMoïse gamayanza adeekedi adigondoku gô eba aNzambé nyee edunda. Gômayanzahngô asigobede mige mianyee edunda. Buéyé vane asibé n’oesi. 6Tambô nanônigôa mbe deo noo tôka na éne éôtéa buéyé n’eba aNzambé. 7Bangôani gatôtanga gô Matendeo MaNzambé mbe: Me nanyôngéô te asi ngeba, tsabuta eetsi adigondoku yanyama. Anye mbe nônigôgéô gakegea ébégôe éne, anye mbe nôseeséda omeaa asaba n’oési. 8Menyani mbe me Muana Amôma nandé kumu anyee edunda.
Môma amabaka n’ogogo ômasombegani
(Bono na Marc 3:1–6, Luc 6:6–11)
9Jésus amatimôga gô tungu nene gôékea na gô ôvo eba agéwanyéô. 10Amadenga wangô mômôgôô andé n’ogogo ômasombegani. Ane amadenganô vangô amasingégéda Jésus gôéena éne éngeendangô mbe ahmôeséda. T’ebandô ahmeevôa Jésus mbe: ?Gô mige mimatsikéô we mitôsingéa gôédôngéda môma nyee edunda‐a? 11Jésus amaabéa ahngô mbe: Ewe môma ôndé na éndombo évo na koo, na éangô ékea ékékuyaméa gô éduku étibani nyee edunda ?éwe kumu éango ôsangakea gôéekuséda gô édukue‐a? 12?Na môma, na na éndombo, éne éôtéa na tsoongo va mbene aNzambé yéni? Te môma. T’ebandô mige mimatsikéô we mitôsinga gôsinga gôéénda mane mamisôba gô nyee edunda. 13Vane Jésus amavovo na gékonzoge mbe: Konyoko ôgogoe woo. Amookonyo na ômadônga na ômaba ga ôvo ôgogo. 14Apharisien amakusa gô eba aNzambé na amadigaa gétungu gôévanga gépangô gôéyôha Jésus.
Môyanzi amasevou na Nzambé
15Vamookô Jésus mbe omeaa andé gô gétungu amanôtôga tungu nene na oma ayekani amamôaanda va ngima. Amadôngéda abeeyie muetso. 16Na amadékéda ahngô mbe: Nômbiayeega ébeenda oma ône anôdôngédini. 17Emabaka nane gômbe mane mamavovo Esaïe, môpandôédi amatasa maNzambé mangeenanô.
18Nzambé amavovo mbe: Bononi môyanzine amasevoa me.
Angô te ône wami amôtôma amiso.
Me namônyôngéô na nzoo na gô môtéma.
Gédidi sami géndé n’edi.
Angeevéda asi tsengeye yetso mônongoe ôngatsundéda me ahngô.
19Asangatsumana paga na môma.
Asangavovo n’ogi akangégangé.
Asangookanô anigôa mabégô gô nzéa yagô misenge.
20Vangeenangô makôkôkôkô mamakotomoni asangabôkôa mangô.
Asangeeméda dambi ébandôa éémani.
Angayanza gô mônongoe wedi gôéétsa mitayi gôndé ane andé na mitayi.
21Asi tsengeye yetso yagô tsina angaténdéda te ango.
Jésus amaabéa atsundédi
(Bono na Marc 3:22–30, Luc 11:14–23)
22Oma amaviga na môma na gôndé Jésus. Môma nône amabaka na pogu na ôbôbô gôébégô amabaka na gédidi gébévani. Jésus amadôngéda môma nône na angô amavovo na ameena. 23Géômbége setso gémasôbasôbana na gémeevôana anguene mbe: ?Odôô ka te Muana aDavid‐ma? 24Ivô vamookô Apharisien nane, amasupua géômbége mbe: One akuséda édidi ébévani gôndé oma te gôéétsô angô ngudi na Béelzébul, môtômine edidi ébévani. 25Jésus amamenya matasa maô, na amaabéa angô mbe: Okô asi tsenge épo asaba n’evambevo, tsengene ésangadinga n’ebundangana. Na asi mbôkepo, asaganédana eembe na mbôkane épanzangani. Na eba te nane. Okô asi ebovo asaganédana eembe na mbumune étatôani. 26?Okô Satan agenya gô mane maamuene ôkumue wedi ôngadôôkanô nayee? 27Anye nôénda mbe Jésus akuséda édidi ébévani gôndé oma te gômeetsô angô ngudi na Béelzébul. Tambô akanyô, asi tsengepo n’anyô ?vo ngudiye dikusédahngô édidi ébévani yandaa? Akanyô anôétsi ôési ôvôni. 28Me nanôbeenda mbe nakuséda édidi ébévani te gô ngudi yaGédidi SaNzambé. Tambô kôngédani mbe ôkumu aNzambé ômasuma na gôndé anye.
29Eba agengaa ôseesuégéaka amuene aboni nani buétsé nôpanga émôkata gésengo. Vane nôeesuaka.
30One asaba évambevo n’ami te môvingi ami. Na ône asayanza n’ami gôékôkéga, andé gôépanza. 31T’ebandô nanôevéda mbe oma muetso ahngasingéô kokoo gô mabégô maô metso mabévani na buéyé na dienza yamavovia maô. Ivô Nzambé asasinga kokoo gôndé ône eenza Gédidi Samuene Nzambé. 32One eenza me, Muana Amôma, andé na ngudi yesingéô kokoo. Géé, ône eenza Gédidi SaNzambé asangasingéô kokoo buéyé bandôa ndéô nedué ngu na gô ndéô évigani.
Géétété na miôndamie miedi
(Bono na Luc 6:43–45)
33Okô ônyôngéô édiia miônda miamisôba ôkenea te géétété samôsôba. Okô ôkenea géétété gébévani ôngaba na miônda mibévani. Géétété gémenyanganô te gô mônongoe amiôndamie mibôta sangô. 34Anye nôndé ga mbigé. Nôndé na mavovia mamisôba tambô nôndé ti oma abévani. Menyani mbe éne éndé gô môtéma ékusa te gô mônya. 35Môma amôsôba akuséda mane mamisôba masuégangô ga ôkiti gô môtéma. Môma môbévani dôta akuséda mane mabévani masuégangô ga ôkiti gô môtéma. 36Nanôevéda mbe gô nyaa amôtsundu oma muetso anganigôa va mbene aNzambé metso mamavovo angô mabobo. 37Menyani mbe môma angeetsô ôési na angeetsô mitayi te gô mavovia medi.
Oma ahbuta éena ngudi yaNzambé
(Bono na Marc 8:11–12, Luc 11:29–32)
38Avo anigôi amige miaNzambé na avo Apharisien amavovo na Jésus mbe: Môékédi, we tônyôngéô éena gémbégéa gésoongôa môma ésupua gétubéda ôtômue ôndé n’ewe. 39Jésus amaabéa ahngô mbe: Oma apitsi yedi, abéva na anôtôga gôndé Nzambé gôémôviia ngima, ahbuta éena gémbégéa sangudi yami. Ivô asangeena gémbégéage gésoongôa môma ésupua, buétsé te géne gémeenanô gôndé Jonas, môpandôédi amatasa maNzambé. 40Mônongovo gamadigaa Jonas miôsa mitatô na pitsi ditatô gô ébuyi éanyama éagô mbéyi, te mônongovo me Muana Amôma nangamana miôsa mitatô na pitsi ditatô gô gatse atsinane. 41Gô nyaa amôtsundu asi Ninive angasemba oma apitsi yedi na angatubéda ahngô misongosongo mbe: buéyé we asi Ninive tômeeséda wéene na tômakoa mitémamie vameevédu we na Jonas, géé ti anye. Nômabaka na muene ootéa Jonas ameevéda anye. 42Gô nyaa amôtsundu môgetone, môtômi atsengene édôngu angasemba oma apitsi yedi na angatubéda ahngô misongosongo mbe: Me namatimôga gô tsenge éami éagôdagôda gôébuéa na gôndé Salomon gôéôkô éodo émabaka n’edi, géé ti anye nômabaka mbôkepo na môvo môékédi ootéa Salomon.
Gédidi gébévani génikani
(Bono na Luc 11:24–26)
43Vakusédu gédidi gébévani gôndé môma, gékea gékénga sagôsagô gô tungu disadigaa môma gôébuta tungu énganyôngéô sangô édigaa. Okô gésiena tungu éedigaa 44géngavanga gô matasa medi mbe nanganika na gô ebee ômakusédu me. Na sangô génika. Gédenga ebee ômagoombou na ômanyepédu, wangô gébé môma. 45Vane gédidige géne gékea gôéwanyéda évo édidi tsambué éôtéa ébéva na géne samapanga. Eviga muetso géômbé na éengéa gôédigaa wangô. T’ebandô ébévee éamôma nône éôtéa n’ebévee éedi éamapanga. Endé te nane gôndé asi pitsi yedi oma abévani.
Iyee n’adimi aJésus ahmamôbuta
(Bono na Marc 3:31–35, Luc 8:19–21)
46Jésus agévovoko na géômbége, yeedi n’adimi edi amaviga. Ahmabaka môtie va môkii gôémôenéa gôévovo n’edi. 47Môvo amabeenda Jésus mbe: Oôkiô, yoo n’anayoo andé v’ombaa. Ahnyôngéô évovo n’ewe. 48Jésus amaabéa môma nône mbe: ?Iyee ndaa? ?Aneya yandaa? 49Amatubéda n’ogogo edi aneengie amabaka n’edi, na amavovo mbe: Nôeni iya, nôeni n’aneya, te adua. 50Menyani mbe aneya vo iya te ane eenda éne ényôngéô Téta, ône andé g’ôba.
Alliance Biblique du Gabon (Bible Society in Gabon) 1983
