Lukasa O Lukasa ai buku ma hitararono
O Lukasa ai buku ma hitararono
Una wotuli-tulihi: O Lukasa
O Lukasa ai buku ma dumutu: O nauru womatengoika abe ai romanga o Teofilusu, de marai ona mata-mataika abe ko o Yahudi ma nyawaua.
Ma oraha wotulihi: O taongo 60
Ma buku ma titi abe ka enangohi ikurutiye: O Lukasa wohitulihuku ai buku naa la ka idadi o nyawa duru yongaku abe o Yesusu ai ade-ade gea duru igou-goungu.
Ma hitararono utuoli: O buku naa idadi ma buku ma hange abe gea mata-mata ma titi imakokadaene, de gea ma titi o Yesusu ai wowango ma ade-ade. De ngaro ma titi ma amoko gea imakokadaene, masara ma buku amomoiika imakohowono ma dumutu de yomakohowono abe yotulihi. De ma buku naa o Lukasa wotulihi, abe una gea ko o Yahudi ma nyawaua. De abe ona mata-mata yotulihi o buku eko o hurata abe o Behehongo ma Hungioka, masara o Lukasa una ka womatengo dika abe ko o Yahudi ma nyawaua.
De nako o Lukasa una gea o dotere, de ma dihiraino de una wadodiawo o Paulusu de o Silasa ma oraha yotagi-tagi de yahingahu-ngahu o Abari ma Rorahai o nyawaika. De ipahaino de una wotulihi o buku moiohi, de gea wotulihi o Hidingoto ma Nyawa Manga Ade-ade ma buku. Ho ai buku ihira-hira gea ma titi o Yesusu ai wowango ma ade-ade, de ai buku ituru gea ma titi ma ade-ade abe hokokia idadi ma oraha o Gareja ahao idadi de hokokia o Abari ma Rorahai imahora-hora o nyawa yowoe-woeika.
De o Lukasa ai buku ma demo naa de wahidumutu ona ko o Yahudi ma nyawaikaua. Ho ngone abe ko o Yahudi ma nyawaua hatoli igapanga hataoko ai demo ma titi, angamoi ikuranga wafetongo ma titi o Yahudi ma nyawa manga hirahi de manga demo. De o Lukasa duru woigo la onagona dika yobasa ai demoino de duru ihioriki itararono abe o Abari ma Rorahai gea ka idadi yaduhunu o nyawa mata-mataika, la ufa yataoko gea ma dumutu o Yahudi ma nyawaika dika.
De o Lukasa ai bukuoka naa de naga o Yesusu ai romanga moi abe o Lukasa ma ngoe wapake la wihiromanga o Yesusika. De gea o Lukasa wihiromanga abe o Yesusu Una wodadi o Nyawa ma Ngofaka. Abe gea ma titi o Yesusu Una o Horogaka de wauku woboa. De ngaro Una o Horogaka, masara womaboa o nyawaino ho wodadi o nyawa ma gou-goungu. De o Lukasa ai bukuoka de nagali ma ade-ade muruono naga abe ko hamakeua ma buku utuino abe ngaro o Matiusu eko o Maruku eko o Yohanese manga buku masara ma ade-ade gea ko iwa genangoka.
O Lukasa ai buku ma titi ma hiaturu
O Lukasa ai demo ihira-hira 1:1-4
O Nyawa ma Ngofaka o Yesusu womaboa de wolamoko 1:5—2:52
1:5-25 Ma Jou ai malaekata wohingahu abe ahao o Yohanese womaboa
1:26-38 Ma Jou ai hingahu ma titi o Yesusu womaboa
1:39-56 O ngo Maria momitutumu o ngo Elisabete
1:57-66 O Yohanese Wotobaohi-ohiki womaboa
1:67-80 O Sakaria Ma Jou wihiakunu la wotemo hoka ai uru ma dodofanga
2:1-20 O Yesusu womaboa o Beteleheeme ma kotaka
2:21-40 O Yesusu ai gogilauohi de iwiao Ma Jou ai Tauika
2:41-52 O Yesusu de ona yotobadoto-dotoko o Musa ai Paretaino yomakoketemo
O Yesusu iwihidiai la womulaenge waleleani o nyawaika 3:1—4:13
3:1-20 O Yohanese Wotobaohi-ohiki wadotoko de waohiki o nyawaika
3:21-22 O Yesusu iwiohiki
3:23-38 O Yesusu ai totofora manga roma-romanga de manga lape-lapeuku
4:1-13 O Ibilihi ma haeke iwitaili o Yesusika
O Yesusu waleleani o Galilea ma tonakoka 4:14—9:50
4:14-30 O Nasarete ma kapongo ma nyawa iwioluku o Yesusika
4:31-41 O Yesusu o nyawa manga ngoe wahitogumu de abe ihikitokata wahikiditoko
4:42-44 O Yesusu o Abari ma Rorahai wogila-gila wohingahu-ngahu
5:1-11 O Yesusu wahoko ona abe ahao iwinii-niiki Unangika
5:12-16 O Yesusu wihitogumu womatengo iwipado
5:17-26 Womatengo wolugu-lugu o Yesusu wihitogumu
5:27-32 O Yesusu wiahoko o Matiusu la witobaniiki
5:33-39 O Yesusika iwileha ma titi yopuaha
6:1-5 O Hiaini ma wangeoka de iwinii-niiki youtuku o redi ma hofokino
6:6-11 O Yesusu wohitogumu o Hiaini ma wangeoka
6:12-16 Abe iwinii-niikino o Yesusu wairiki yangimoi de yahinooto la yodadi o hidingoto ma nyawa
6:17-49 O Yesusu o tonaka ma dolaka de wadotoko o nyawaika
7:1-10 Abe ma titi o Roma ma tentara manga haeke womatengo ai ngongaku
7:11-17 O Yesusu wihimomiki o ngo bao ami ngofaka
7:18-35 O Yohanese Wotobaohi-ohiki ai leleha o Yesusu wopaluhu
7:36-50 Momatengo ami datoro itotorou moboaino de mihituagi
8:1-3 Abe ma titi o ngo-ngofeka abe iwinii-niiki o Yesusika
8:4-15 O Yesusu ai hiketero ma ade-ade abe womatengo o bibiti wohibarihi
8:16-18 O posi ma hiketero
8:19-21 Abe ma titi o Yesusu ngoi meme de ai doo-dodoto idodutu
8:22-25 O rato o Yesusu wohitogumu
8:26-39 Womatengo iwikitokata de o Yesusu wihititoko
8:40-56 O Yesusu wahitogumu o ngofeka yahinooto
9:1-6 O Yesusu wahidingoto ona yangimoi de yahinooto o Yahudi ma nyawaika
9:7-9 O Herodese una wopusingi ai hiningaka ma titi o Yesusu ai heheranga
9:10-17 O Yesusu wahiolomo o nyawa yasana motoa yofoloi
9:18-21 O Peturusu womahingahu ai hininga wato o Yesusu Una Ma Jou ai Mesia
9:22-27 O Yesusu wahingahuohi abe ahao kiani iwihikangela de iwitoma
9:28-36 O Yesusu womahimatoko ai medebini ma dararono
9:37-43 O ngofaka iwikokitokata de o Yesusu wohititoko ma tokata unangoka de aino
9:43-45 O Yesusu wahingahuoli abe ahao kiani iwihikangela de iwitoma
9:46-48 Ka onagonahi de duru yokurutiye?
9:49-50 Womatengo o tokata wohitito-titoko o nyawaino
O Yesusu ai dodagi o Yerusaleeme ma kotaika 9:51—19:27
9:51-56 O kapongo moi o Samaria ma tonakoka ona iwioluku o Yesusika
9:57-62 Abe ma titi o nyawa manga wowango ma kangela hokokia nako o Yesusu iwinii-niiki
10:1-24 O Yesusu wahidingoto iwinii-niikino yamoritumidi
10:25-37 Ma Jou ai Pareta abe duru ikurutiye de o hiketero moi
10:38-42 O Yesusu watutumu o ngo Marata de o ngo Maria
11:1-13 O Yesusu wadotoko onangika abe ma titi hokokia yomaniata
11:14-28 Ka o Yesusohi ai kuaha ilamoko nako de o Ibilihi ma haeke
11:29-32 O nyawa yogahoko o Yesusika la wahimatoko o heheranga ma dodunguu
11:33-36 Abe ma titi o dararono ma gou-goungu
11:37-54 O Yesusu wahitiari o nyawaika ma titi o Farisi ma nyawa de abe yotobadotoko o Musa ai Paretaino
12:1-12 O Yesusu wahitiari iwinii-niikika ma titi o Farisi ma nyawa
12:13-21 O hiketero abe ma titi womatengo wokaya abe duru wobodo
12:22-34 Abe ufa hopusingi ma titi o kiahonanga
12:35-48 Kiani nimahidiaioka ma titi nanga Baluhu idodutu ahao woboali
12:49-59 O Yesusu wahingahu abe ahao o nyawa yomaketeribuutu ma titi Una
13:1-5 O Yesusu wadotoko abe ma titi kiani o nyawa yotoba
13:6-9 O gogilioro ma gota ko ihofo-hofokua ma hiketero
13:10-17 O Hiaini ma wangeoka de o Yesusu womihitogumu momatengo mofugu
13:18-19 O Yesusu ai hiketero ma ade-ade abe ma titi Ma Jou wahikoano ai nyawa
13:20-21 O Yesusu ai hiketero ma ade-ade moioli abe ma titi Ma Jou wahikoano ai nyawa
13:22-30 O Yesusu ai dodotoko abe ma titi o ngorana ma eteteke
13:31-35 O Yesusu ai hininga ma dora ma hiokoo itagi o Yerusaleeme ma nyawaika
14:1-6 O Yesusu ma moioli wahitogumu o Hiaini ma wangeoka
14:7-14 O Yesusu wadotoko ma titi o hininga ma dodipokouku
14:15-24 O ngolo-ngolomo ma amoko ma hiketero ma ade-ade
14:25-35 Nako o nyawa ato iwinii-niiki o Yesusika, gea ko igapangua
15:1-7 O domba o dutu moi ihihanga ma ade-ade
15:8-10 Momatengo ami tiwi ihihanga ma ade-ade
15:11-32 O baba ai ngofaka womatengo iwihihanga ma ade-ade
16:1-18 O Yesusu wadotoko abe ma titi hokokia hapake o tiwi
16:19-31 Wokaya-kaya de o Lasarusu manga ade-ade
17:1-10 O Yesusu wadotoko ma titi o hiatara, de o ngongaku, de o tagongo
17:11-19 O Yesusu wahitogumu o nyawa yangimoi yapado-pado
17:20-37 Muruonoka de ahao Ma Jou duru wahikoano ai nyawaika?
18:1-8 Abe ma titi kiani ka ihikaika homaniata
18:9-14 Abe ma titi kiani homaniata de nanga hininga ma dodipokouku
18:15-17 Abe ma titi nanga ngongaku kiani imaketero hoka o ngofa-ngofaka manga ngongaku
18:18-30 Womatengo wokaya-kaya woleha ma titi o wowango ma ngango
18:31-34 O Yesusu wahingahuoli yangimoi de yahinootoika abe ahao iwihohonenge
18:35-43 Womatengo worafi-rafioka de o Yesusu wihitogumu
19:1-10 O Yesusu de o Sakeusu yomakamake
19:11-27 O hiketero ma titi o huhuloko abe manga dutu wosoboka ai dodagioka
O Yesusu waleleani o Yerusaleemoka 19:28—21:38
19:28-40 O Yesusu iwidafongo irahai o Yerusaleeme ma kotaino
19:41-44 O Yesusu woari ma titi o Yerusaleeme ma nyawa
19:45-48 Abe yotobafuku-fukunu Ma Jou ai Tauoka o Yesusu waduhu
20:1-8 O Yerusaleemoka manga hohidimono iwileha o Yesusika ma titi ai kuaha o kiaino iboa
20:9-19 Abe yotobaredi-redi o angguru ma redioka ma hiketero
20:20-26 O Yesusu iwileha ma titi o pajaka ma tiwi
20:27-40 O Yesusu iwileha ma titi o momomiki
20:41-44 O Yesusu ai leleha ma titi o Dautu de o Mesia
20:45-47 O Yesusu wahitiari o nyawaika ma titi ona yotobadotoko o Musa ai Paretaino
21:1-4 Momatengo o huha ma nyawa ami hidoaka
21:5-38 O Yesusu wahingahuohi abe ahao dokengika de idadi
O Nyawa ma Ngofaka o Yesusu wohonenge de womomikoli 22:1—24:53
22:1-6 O Yudasa wihidee la o Yesusu wihidoaka o nyawaika
22:7-30 O Totilakuru ma rame-rame ma ngolo-ngolomoka
22:31-34 O Yesusu wahingahuohi abe o Peturusu ahao wioluku
22:35-38 Abe iwinii-niiki ona kiani yomahidiaioka ma oraha yotagi-tagi
22:39-46 O Yesusu womaniata o Saitunu ma lokuoka
22:47-53 O Yesusu iwihidoaka o nyawaika la iwitaoko
22:54-62 O Peturusu womahipongono abe o Yesusika wioluku
22:63-65 O tentara ma nyawa iwihohedu de iwipoha-poha o Yesusika
22:66-71 O Yahudi ma Nyawa manga hohidimono abe yotobauru-urusu o nyawa gea o Yesusu wahimanga
23:1-25 O Yesusu iwiurusu o Pilatusu de o Herodese manga borihimangoka
23:26-43 O Yesusu iwihidapakuika o gota isosalioaika
23:44-49 O Yesusu wohonenge
23:50-56 O Yesusu ai honenge iwikelengaika o aruku ma goronaka
24:1-12 O Yesusu womomiki ai honengino
24:13-35 O Yesusu womahimatoko o ngekomoka
24:36-49 O Yesusu womahimatoko iwitobanii-niikika
24:50-53 O Yesusu wogoraka daku o Horogaiye
ハイライト
シェア
コピー
すべてのデバイスで、ハイライト箇所を保存したいですか？ サインアップまたはサインインしてください。
Gereja Firman Allah, Yayasan Misi Masyarakat di Pedalaman