Matthieu 6
6
Inyanginy’a Jésus o bokoli. Bokiela matoma manyongo o micho ma bato phencha edi ebè. Bato bachenize Nzambi, tachenizake mbongo.
1”Bokiekaka n’ikièngu ta beni bokiela matoma ma beni o michò ma bato phencha, ta bwe mòchi bango bachèchè beni, mo beni bokiele kobona, beni tidwe iwuta ma Chango a beni ikolo.
2Mo k’òphe bato beka b’elumba, towulake ilimba o muna ma kò, ko bato ba manya bakiele o mandako ma Nzambe bona n’o manè, mòchi bwe bato batoche bango, nga lobe na beni nènè: Bango babiyamba iwut’a bango.
3Ko, o k’òphe bato beka b’elumba, tika ebòkò ewèchè a kò edyale oyeba matoma, mango k’òkiele o ebòkò èlomi a kò ka.
4Kobona ophèke bato beka ba kò b’elumba o yiche, na Chango a kò ayènè beka ba yiche, wango tawuta kò.
5Okomo k’òchambele, todyalake ko bato ba manya bona, tonga bango badinge botèmè chu o mandako m’ibondima n’o chonge a manè, mòchi bwe, bato bayènè bango, nga lobe na beni nènè: Bango babiyamba iwut’a bango.
6Ko, o k’òchambele, kola ndako a kò, odiphe ekuki a kò na chambela Chango a kò o yiche, na Chango a kò ayènè o yiche tawuta kò.
7O beni bochambele, todyalake na mawò makama ko bato boyeba Nzambe ka bona, tonga bango bachingane bwe, Nzambe tawoka bango tonga na mawò makama.
8Kobona towulake bango, Chango a beni ayebe beka bichò, byango beni bodi na phocha, beni boch’oyonga wango bocho ka.
9Echoko beni toyonga kobona yango: Chango a banga adi ikolo. Tika kombo a kò etochibe.
10Tika bokonchi ba kò boye. Tika bodingo ba kò bwango bakiele ikolo, bokielibe n’ò che kobona.
11Phè na banga bekidya ba banga ba lebo.
12Phè na banga bomichele ba machuma, owana banga tophè bango bakiele èbè na banga pardon.
13Tophincholake banga bokondo o maphèphi, ko phakola banga o beka bibè, tonga na bokonchi ba kò, na nguli a kò, na landand’a kò, byango tidyala beka ba kò ba biteneli, Amen.
14Tonga mo beni bophè bato ba matoma mabè pardon, nà Chango a beni ikolo taphè beni pardon dyòko.
15Ko, mo beni ophè bato ba matoma mabe pardon ka, nà Chango a beni ikolo tiphè na beni pardon.
16Iwò akbwi dyòkò. O beni bochabole bekidya, toyimbake monginda ko bato ba manya bona, bango bayenche bocho ba bango o michò ma bato, tonga mochi bato balobe bwe, bango bachabolaki bekidya. Nga lobe na beni nènè: Bango babiyamba iwut’a bango.
17Ko, o k’òchabole bekidya, chinga mayita o mutu ma kò, na chocha bocho ba kò,
18kobona bato oyènè bwe, k’òchabole bekidya ka, ko, Chango a kò adi o yiche ayènè kò, na Chango a kò adi o yiche, wango tawuta kò.
19Tokonginyake beka ba beni o che woni, tonga banyama na kokoti bichumbize beka, na bayibi babate mandako ma beni, na bayibe beka.
20Ko, bokonginya beka ba beni ikolo, ondo nyò banyama nyò kokoti dy’ochumbiza beka ba beni ka, dyò bayibi obata mandako ma beni ka.
21Echoko yango edi beka ba beni, nà mitema ma beni midi yango.
22Dichò idi mwenda ma nchoto, mo dichò a kò idi inyòngò, nchoto a kò ichò idyale phololo.
23Ko, mo dichò a kò idi na bokono, nchoto a kò ichò idyale o boyi. Mo phololo, yango edi o ch’a mwe ma kò echekwe boyi, owana boyi, bwango bolèki bokama.
24Moto mò oyicha bochale mindele mibale elòngò yò ka, ta wango ayina wona na tadinga wona, ta wango alèngiza muna, na tadyanchola muna. Beni oyicha bochale mochalo ma Nzambe na ma mbongo elòngò yò ka.
25Bokieka nga lobe na beni: Todyalake n’iphanu tonga na bomwè ba beni: Banga todya na banga tonywa nde? Tolèkake bochimunye tonga na manchoto ma beni bwe: Banga tochwa bilamba biphe? Bomwè olèka bekidya ka? na nchoto olèka bilamba ka?
26Bokieka banyoli b’ikolo, bango omwaka mpoto a bango ka, n’otolo makièlè ka, n’okonginya mango o ndako ikonginya beka ka, ko, Chango a beni ikolo adyèze bango, na motuya ma beni olèka bango ka?
27Moto otete a beni elèki bochimunye iphanu a wango na wango amèke bokatize machu ma bomwè ba wango centimètres mako matano, eyiche nda?
28Na beni bodi n’iphanu a bilamba, mbekende? Bokieka biphuncha ba kuba, byango bikate bwabona, byango okiela mochalo ka, n’obètè bilamba ka,
29ko, nga lobe na beni bwe: Salomon abèki na botochibe ba wango bokama, ko, bilamba, byango wango achwaki bibokoka n’ephuncha nyò yò ka.
30Byèmbu ba kuba bidi lebo, lobi tabwaka byango o ibembeke, beni bato b’echingane eki, mo Nzambe achwechwe byèmbu binyòngò kobona, wango tilèki bochwechwe beni?
31Woka dyò: Todyalake n’iphanu na tolobake bwe: Banga todya nde, na banga tonywa nde, na banga tochwa bilamba biphe?
32Bato, oyeba Nzambe ka, bayenge beka bichò bi, Chango a beni ikolo adi ayebe, beni bodi na phocha beka bi bichò.
33Ko, boyenga bokonchi ba Nzambe bocho na bonyòngò ba bwango, owana beni toyamba beka bi bichò.
34Todyalake na kièlèlè tonga na lobi: tonga lobi tedyala n’iphanu a yango koncha. Kièlèlè a machu machò ekoke.”
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).
