Matthieu 5
5
Inyanginy’a Jésus o bokoli. Moni ma bato. Bato ba Nzambe badi ko monguta na mwenda bona. Miyeko ma Mois.
1O Jésus ayènèki bibuliki ba bato, wango akondelaki o bokoli, O wango adyaki bwa, bayekoli ba wango bayakaki o ma wango.
2Na Jésus adipholaki muna ma wango n’ayekuzaki bango, alobaki bwe:
3”bango badi bayoko o mitema badi na moni, tonga bokonchi b’ikolo edi bokonchi ba bango.
4Bango badi na kièlèlè o mitema badi na moni, tonga bango tabwangiziba.
5Bango badi na chabo o mitema badi na moni, tonga bango tadwa che.
6Bango badi na phocha echwa badi na moni, tonga bango tawutiba.
7Bango badi n’elumba badi na moni, tonga bango tayamba elumba.
8Bango badi na mitema ma chèchè badi na moni, tonga bango tayènè Nzambe.
9Bango badi na mitema ma ti badi na moni, tonga bango tatangiba bana ba Nzambe.
10Bango badi baluphibe tonga n’echwa badi na moni tonga bokonchi b’ikolo edi bokonchi ba bango.
11Okomo bato babèchè beni na babengachane na beni na bakiele manya machò na beni tonga na nga, beni todyala na moni.
12Bochanga na bodyala na moni mokama, tonga mawuta ma beni madi ikolo makama, tonga bango bachèbizaki mibandi ma Nzambe, myango mibèki beni bocho elènge ko yango.
13Beni bodi monguta ma che, ko, mo monguta muchalwa tawotiza na nde? moya bwabona, babwake mwango na badyate mwango o makolo ma bato.
14Beni bodi mwenda ma che. Mboka edi o chomb’a bokoli oyicha bobombame ka.
15Bato otumba mwenda okana mwango o ch’a muka ka, batike mwango o mecha ma mwenda, tonga bato bachò badi o ndako tayènè.
16Kobona bololiza mwenda ma beni o bocho ba bato, tika bango bayènè matoma manyòngò ma beni, na batoche Chango a beni ikolo.
17Tochimunyake bwe nga biya tonga n’ilota miyeko ma Moise na mawò ma mibandi ma Nzambe, nga boya tonga n’ilota myango ka, ko, tonga n’iwoka myango.
18Nga lobe na beni nènè: kokoko ncho ikolo na che tichila imelo iki, iyo ikièmbo iki a miyeko tichumbani, kokoko ncho mawò machò makòtibaki tatubana.
19Koncha elote moyeko, mwango molèki boki o ch’a miyeko, n’edikize bato kobona, echoko tatanga wango moto elèki boki o bokonchi b’ikolo yango, ko koncha ewoke myango n’edikize bato myango, wango tatangiba moto monè o bokonchi b’ikolo.
20Nga lobe na beni bwe: Mo echw’a beni olèka echw’a bato ba bokièngu ba mikanda na bapharisien ka, beni tikoli bokonchi b’ikolo.
21Beni bowokaki iwò, dyango ilobaki bato ba kale: ”Tobomake moto, koncha ebome wango takiè o ichèbo,”
22ko, nga lobe na beni bwe: Moto wango ebèlè na moninga, wango takiè o botòtè, na koncha elobe: Raca, na moninga, wango tachambiba ibancha, na koncha etange moninga: Ingkè, takiè o meya m’itenela.
23Mo k’òphè matabichi ma kò o maboko, mango matongibaki tonga n’ichambela Nzambe, komoyango k’òbatele beni na moninga bodi n’iwò,
24tika matabichi ma kò o tin’a maboko mango, kiè tèni tonga n’ichiliza iwò na moninga, ta k’òye iphe matabichi ma kò.
25Chiliza na koncha edi na boyino na ko dyolo o bobiko, bwango beni na wango bochaka echiki, mo k’òtoni bokiele kobona, koncha edi boyino na kò takamba ko o mabòkò ma tòtè, na wango tatika kò o mabòkò ma mobateli, na wango takana ko o monyoli.
26Nga lobe na beni nènè: Kò titubi kokoko ncho ko towuta bibembo ba kò bichò, ikota nyò dyò titikani.
27Beni bowokaki iwò akbwi: ”Tokielake bochembi”,
28ko, ngo lobe na beni bwe: Moto wango akieke mwatò tonga n’ibwanga wango, wango abikiela bochembi na wango o ch’a motema ma wango.
29Mo dichò a kò ebòkò èlomi iphèphize kò, tuba dyango na baka dyango, tonga bochumbize ekiètè yò o nchoto a kò mòchi enyòngò, elèki bokuli mo k’òbvake nchoto a kò ichò o meya m’itenela.
30Mo ebòkò a kò èlomi ephèphize kò, kiena yango na bwaka yango, tonga bochumbize ekiètè yò o nchoto a kò mòchi enyòngò, elèki bokuli mo k’òbwake nchoto a kò ichò o meya m’itenela.
31Balobaki dyòkò: ”Moto wango etoni mwachi a wango tika wango aphé mwachi a wango mokanda m’iboma bolònga.”
32Ko, nga lobe na beni bwe: Mo molomi atoni mwachi a wango eyeka akbwi, odyala bechèmbi ka, wango etinde wango bokiele bochèmbi, na koncha elònge mwachi etonibaki wango akiela bochèmbi.
33Beni bowokaki dyòkò iwò ilobibaki na bato ba kale: ”Todyèngake bwabona, ko, phè Nzambe madyènga ma kò”,
34ko, nga lobe na beni bwe: Todyèngake idyènga nyò dyò, nyò ikolo, tonga dyango idi bodiki ba Nzambe
35nyò o che, tonga yango edi eyik’a wango a makolo, nyò a Jérusalem, tonga yango edi mbok’a mokonchi monè.
36Todyèngake na mutu ma kò, tonga k’òyicha bochekole mochwe mò mophumbaki nyò moyindaki ka.
37Bodyalaka n’iwò dyò: He, he, iyò: Twa, twa, iwò abkwi idi ibè.
38Beni bowokaki iwò akbwi ilobibaki: ”Dichò tonga dichò, dino tonga indo.”
39Ko, nga lobe na beni bwe: Tonanake na moto mobè, mo moto aphè kò iphakata itama ebòkò èlomi, ochekolaka n’itama ebòkò èwèchè.
40Mo moto mò adinge bokambe kò o phalaba tonga na chimichi a kò, ophèkè wango kachaka dyòko.
41Mo moto mò atomize kò bokambize wango echiki yò, kambiza wango bichiki bibale.
42Ophekè koncha eyonge na kò, na tobwakake mabèkè na koncha edinge bobèkè na kò.
43Beni bowokaki iwò ilobibaki: ”Dinga moninga na yina ndoli a kò.”
44Ko, nga lobe na beni bwe: Bodinga bandoli ba beni boyonga Nzambe tonga na bango babengachane na beni.
45Kobona beni todyala bana ba Chango a beni, wango adi ikolo, tonga wango atambuze bucha na bato babè na bato banyòngò, na wango anoze mbula na bato babè na bato banyòngò.
46Mo beni bodinge bango badinge beni, beni toyamba iwuta kombo nda? Bato ba machuma badi okiela kobona ka?
47Mo beni bodikize elumba na banyango ba beni phencha, beni bolèki bato bakbwi bonyòngò bwe? Bato badi oyeba Nzambe ka, badi okiela kobona ka?
48Bodyalaka n’echwa ko Chango a beni ikolo adi n’echwa bona.”
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).
