Fúcihum 12
12
Aburam najam gawook gara Atúuha
1 Acehériit mee narok Aburam : « Púr mꞌmofi, nꞌfiili, nꞌfukeelum fara paayi, min ujow bu mꞌmof man ibil mee eliigi.
2aInjé be ekaan min búbajumi bumeeeŋ,
Injé bu gásoonieni.
2bBan be ekaani min ujamo,
miiya mubil mee ecil nísoonien bugan gaagu.
3aGabili mee gásoonien – be ésoonieniil.
Bare gabili mee gadanka – be edankaiil.
3bMiiya mucile nísoonien fiilóofiil nꞌdúniya. »
4Ñeer Aburam nápur ajow naŋ min Acehériit mee arogool mee, ngujawoor bugo nꞌLoot aleeh hara atiool. Nan Aburam ápur mee Haran, ho min abaje símit gafaŋ gúfaajiir nꞌguñen gaat (75). 5aAburam naŋar akoñaool Saaray bugo nꞌLoot, nguŋar emiigeeliil gan gunoomulo mee Haran nꞌfubajiil peepe min gujow bu Kanaan. 5bGútiiŋ to Kanaan, 6angútip mof maamu 6bkáŋ bu Sisem, to mꞌbununuk báamak baabu bara Moore. 6cNin naanu unu bugara Kanaan gucineene dó nꞌésuk yaayu.
7aAcehériit mee nápurul to Aburam narogool : 7b« Mꞌbúbajumi nibil mee esen mof mee. » 7cÑeer Aburam nateep to fúsimenum bu nꞌAcehériit mee mara nápurulool to. 8aPúr to najow bu Betel ban bunak búpureul mee nꞌgapana gan simontaañ saasu sommee. Naŋar gabaas min ayihen éguut 8betuhoor Betel ban bunak bulohe mee, son ésuk yan guroge mee Aay ban bunak búpureul mee. 8cNabaañ ateep to fúsimenum fucee bu nꞌAcehériit mee min nak áciin to Acehériit mee. 9Púr to, Aburam nátitipoor bu nꞌerampaasa yara Negeew yammee nꞌgañen gárib gara Kanaan.
Atúuha napooy Aburam dó nꞌEsípt
10Nin naanu bacaar mbúlohul mꞌmof maamu. Aburam najow bu nꞌEsípt nalako bo, mara bacaar baabu buruuruuk. 11Najooŋoor búnogen Esípt, narok akoñaool : « Saaray, ínje niñoñow mara aw ejanjaŋ. 12Nan bugara Esípt gubili mee eñow, bugo be erok aw akoñaom, ngumugom min aw uroŋ. 13Icíiniciin mbil urogiil aw áliinom min guwalenom jak mimbil upagenom. »
14Nan átiiŋ mee Esípt, bugara Esípt nguñow maregen, akoñaool najajak pak. 15Unafaan újagaga bugara áyiih aahu nguñeeroorool ngusaloorool gusen áyiih aahu. Ñeer nguŋarool bu ró nꞌepale yaayu yara Firawuna.#12.15 Firawuna let gajaool fannaool bare yo yommee áyiih 16Ayíih aahu nacookoor Aburam jak mara Saaray. Nasenool sísaaja, sijaameen, siyaha, sifalo simaañen, újagaga umaañen nꞌukoña, sifalo sikoña nꞌsiñonkome.
17Bare Acehériit mee nábehul gásomut gáamak nꞌFirawuna bugo mꞌbuganool mara naŋare Saaray, akoña hara Aburam. 18Ñeer áyiih aahu nawook Aburam narogool : « Buu nukaanaam mee mee ? Buu nkaane ugaanutom Saaray akoñai ? 19Buu nkaane nurogeenom áliini jaram iyabool ? Akoñai umue, uŋarool núpur maareer maa ! » 20Ñeer áyiih aahu naboñ újagagaool min gúpuren Aburam nꞌakoñaool son fubajool, mꞌmof maamu.
© 2023 (Active), Wycliffe Bible Translators, Inc. All rights reserved.
