Fúcihum 13
13
Gafanjoor gara Aburam bugo nꞌLoot
1Aburam nan ápur mee nꞌEsípt, naŋar akoñaool nꞌfubajool peepe min ajow bu mꞌmof mara Negeew, yammee nꞌgañen gárib gara Kanaan. Loot, hara atiool Aran, najow ngujawoor. 2Aburam asaanum háamak : ababaj sikoore, síkori, nꞌéwurus. 3Apúpur Negeew, nátitipoor jaram átiiŋ ésuk yara Betel. Najow káŋ bu to tan ayiheneen mee ubaasool, etuhoor Betel son ésuk yara Aay. 4Tin taahu tan ateepeen mee fúsimenum, náciin to Acehériit mee.
5Loot han gujawoor mee nꞌAburam ho may nababaj sísaaja, sijaameen, siyaha, son ubaas wan guyihene mee síguuhiil. 6Tooge gújuhut gulako tin tanur mara mof maamu murehoorehoor. Fubajiil fumemmeeŋ jaram gújuhut gucinoor. 7aMbaj gámuy etuhoor umaha bugara Aburam mꞌbugara Loot. 7b(Nin naanu bugara Kanaan bugo nꞌéperisiit yaayu dó mꞌmof maamu ngucineene.)
8Aburam narok Loot : « Ala fiilola fanur. Mat úmuya, umahaola may mat gúmuy. 9Mof maamu peepe umue fáculi, ala bu gafanjoor. Súumi nuŋar gañen gárib, ínje niŋar gañen gamay, mbil uŋaŋar gañen gamay, ínje niŋar gañen gárib. »
10Loot náraahulo, nañow mara gásilimb gakot mee eraal yara Suruden guboobooj káŋ bu nꞌésuk yara Sowaar. Ngujak naŋ ekunko yara Acehériit mee son gayilen gara Esípt. Tooge Acehériit mee bayiiserut sísuk sara Sodom son Gomoor. 11Ñeer Loot nacaap gásilimb gaagu peepe gara Suruden bu nu ho, nahomenoor be ejow ajooŋoor gápurum tinak. Loot bugo nꞌAburam maa ngufanjoor maa maa. 12Aburam nalako to Kanaan. Loot najow acin cik sísuk sammee nꞌgapana Suruden, nayihen ubaasool jaram ajooŋoor ésuk yara Sodom. 13Tooge bugara Sodom bakaaneriil bujagut bajak, gatoogen Acehériit mee barebare. Ukaana síjunube déhooro.
14Nan Loot ápur mee nꞌguñen Aburam, Acehériit mee narok Aburam : « Uráahulo nuñeer kábiriŋ tan ommee, nꞌgañeni gamay káŋ bu nꞌgañeni gárib, ban bunak búpureul mee son ban bunak bulohe mee. 15Mof maamu peepe man uñow mee mee, ínje be eseni mo aw mꞌbabajeri bu nanoonan. 16Be ekaan babajeri mbumeeeŋ naŋ buruus bara etaam, jaram an mat ájuh apin bo naŋ min abiloot mee éjuh apin buruus bara etaam. 17Ujow ubosoor mof maamu, muwuŋ mo, mꞌmubaak mo, mara nibili mo esen, aw fannai. »
18Ñeer Aburam nápuren ubaasool ayihen cik ununuk wáamak wara Mamure, yammee to nꞌésuk yara Heburon. Nateep to fúsimenum bu nꞌAcehériit mee.
© 2023 (Active), Wycliffe Bible Translators, Inc. All rights reserved.
