युहान्ना 8
8
इम्मेप्माजामा टोॽवा चोगाना मेन्झेमाङाना बारे
1येसु जैतुन झोन्झोबाङि खाडे॥
2हान्डेङ्लेङ् एका भ्यानिक् उन् फेरि माङ्ठानाङि खाडे, हिट्नुङ् सोब्बे याप्मिचि उन् सोरि ओटाए, हिट्नुङ् उन् युङाउङ् हिट्नागा हिसिक्टुचे॥
3धारमाबिधि काहिसिक्बाचि हिट्नुङ् फारिसि याप्मिचिङा इम्मेप्माजामा टोॽवा चोगुना बेला उटुबुना ठिबाङ् मेन्झेमा ओटाडुए, हिट्नुङ् हिट्ना मेन्झेमा सोब्बेङाना माझाङि येप्मा ओमेट्टुए॥ 4हिट्नागाँ येसु ओलोडुए, “काहिसिक्बा, ना मेन्झेमा इम्मेप्माजामा टोॽवा चोगुनाँ आन्याँ लाबुम्मे॥ 5धारमाबिधिङि मोसाङा नाड्डे पारिक्ना मेन्झेमा लिङ्गेॽवाङा लेप्माउङ् सेप्मा कोन्युक् नुङ् आग्याँ आपिडाइसे॥ खान्बाक् पाक् आपिक्युक्ना?”#लेबि २०:१०; धारमाबिधि २२:२२-२४ 6टरो हिट्नागाँ उन् फाट्टुरङि ठेम्मा हियुक्नि नुङ् वारिक्ङि ठेम्मा लोङ्सा हिट्नाड्डे ओलोडुना डाना॥ येसुङा गुङ् चोगाउङ् खाम्ङि ओआङ्गुलिक्ङा छेप्टुए॥ 7हिट्नागाँ उन् उसिलाप्टुना उसिलाप्टुना डोक् ओचोगुए, हिड्डेउङ् येसु कोबाउङ् हिट्नागा लोडुचे, “खानि माड्डे साङाउम्बाक् पाप चोगुन्गेट्टुन्ना हिट्नाङा डोक् पाइले ना मेन्झेमा लिङ्गेॽवाङा ओलेप्टुवाक्॥” 8हिट्नुङ् फेरि गुङ् चोगाउङ् उन्ङा खाम्ङि छेप्टुए॥ 9जब हिट्नागाँ ना रिङ् ओखेम्सुए, हिट्नुङ् हिट्नागा पाइले ओठेगालाम्मा ओखाट्टिगा उलिसाउङ् ठिबाङ् ठिबाङ् ओखाडे॥ येसुम्बाक् हिट्ना मेन्झेमालोक् ओएकेले ओपोक्टुढोए, हिट्नुङ् हिट्ना मेन्झेमाम्बाक् ओटोकानाङि येबायाक्टे॥ 10येसु कोबाउङ् हिट्ना मेन्झेमा लोडुए, “हाउ झान्झा, हिट्नागा खोनाइ ओखाडेगा? पाक् खोनाङा चा खान् फाट्टुर मालाप्नेएट्निनि?”
11हिट्ना मेन्झेमाङा लोडुए, “काहिसिक्बा, साङा चा माइना॥”
येसुङा लोडुए, “आङा चा खान् फाट्टुर लाब्नेन्ना॥ हाट्ले खाडा, हिट्नुङ् फेरि पाप चोगुन्॥”#८:११७:५३–८:११ सोम्मा पाइले छेप्बालाक् छाप्लाङि टोग्निना॥
येसु नाराङिना व्हाङ्
12येसुङा फेरि हिट्नागा लोडुचे, “आङा नाराङिना व्हाङ् ए॥ आङालोक् ओलाम्टिगा डुम्ङि लाम्टिमा कोन्निना, टरो हिट्नाङा चोला आपिना व्हाङ् टोगुटु॥”#मात्ति ५:१४; युहान्ना ९:५
13ना रिङ् ओखेम्सुङ् फारिसि याप्मिचिङा उन् ओलोडुए, “खान्ङा खान्ङाना बारेङि आप्पे आमाट्टुएट्टु, हिट्नाड्डेउङ् खान्ङा आमाट्टुना साँचि छेम्बाना माखाक्॥”#युहान्ना ५:३१
14येसुङा लोडुचे, “आङा आप्पे आङाना बारेङि साँचि पिनाँनि, हिट्नुङ् चा आङाना साँचि छेम्बाना ए॥ हिट्नुङ् आङा खोनिलाम्मा टायाङेना, हिट्नुङ् खोनालेङ् खाड्नागेट्ना, हिट्ना रिङ् आङा ठाहा टोगुएसुङे॥ टरो आङा खोनिलाम्मा टाङाना, हिट्नुङ् खोनि खाट्नागेट्नाँ हिट्ना खानिङाम्बाक् ठाहा आटोक्निम्ना॥ 15खानिङाम्टे याप्मिङा उमिट्टु गाड्डे न्याए आचोगुम्गा॥ आङा खोना चा न्याए चोक्निङ्चिङ्गा॥ 16आङा न्याए चोगुङे भोने चा, आङा चोगुङ्ना न्याए छेम्बाना लियुक्, पोङ्भोने न्याए काचोक्बा आङा आएकेलेना माखाक्, टरो आङा कापाङ्बा माङ्हाङ् पाबा आङालोक् वाहेट्॥ 17खानि धारमाबिधिङा चा इप्पाङ् याप्मिङाना साँचि टोङे भोने, हिट्ना रिङ् छेम्बाना लियुक् नुङ् माट्टुटु॥ 18हाट्ले आङाना बारेङि साँचि आङा आप्पे डोक् पिडुङ्टुङ्, हिट्नुङ् आङा याङ्पाङ्साना माङ्हाङ् पाबाङा आङाना बारेङि साँचि पिडुटु॥”
19हिट्नागाँ उन् उसिलाप्टुए, “खान्ङाना कापाबा खोनाइ वाहेट्ना?”
येसुङा लोडुचे, “खानिङा आङा चा मिसेन् आनिसिन्नागा हिट्नुङ् आङाना पाबा मिसेन् आनिनिम्ना॥ खानिङा आङा मिसेन् आनिसिङे भोने, आङाना पाबा चा मिसेन् आनिसुम्टुम्॥”
20ना सोब्बे रिङ् येसुङा माङ्ठानाङि भेटि छुम्माना याङ्ढाङ्चि उयुङ्सुना डेन्ङि हिसिक्टुचिनाँ लोडुचिगा डागा॥ हिट्नुङ् चा खोनाङा चा उन् ओलाबुवाट्टुन्, पोङ्भोने उन्ङाना बेला आझै टानिगेट्नेट्निना डाना॥
येसुङा बिस्वास ओचोगुन्गा लाउङ्सा चेतावानि पिडुचिगा
21येसुङा फेरि हिट्नागा लोडुचे, “आङा नाहिलाम्मा खाट्नायेट्नाँ, हिट्नुङ् खानिङा आङा याङ्आकोलिटिङा, टरो खानि आप्पे खानि पापङि आसिइटि॥ हिट्नुङ् आङा खाट्ङाना डेन्ङि खानि खाप्मा आहिडिन्गा॥”
22ना रिङ् ओखेम्सुङ् याहुदिचि उन्चि उन्चि उपिगे, “नाङाम्टे आप्पे सेप्मालाउङ्सा निङ्ग्वा चोगुएनि पाइना? नाङा ‘आङा खाड्ङाना डेन्ङि खानि खाप्मा आहिडिन्गा’ नुङ् पाक् माट्टुटुना?”
23हिट्नुङ् येसुङा हिट्नागा लोडुचे, “खानिम्टे नाहि यो नाराङिगा, आङाम्बाक् टोनालोग्ङिना॥ खानि ना नाराङिगा, टरो आङाम्बाक् ना नाराङिना माखाक्॥ 24हिड्डेउङ् ‘खानि आप्पे खानि पापङि आसिइटि’ नुङ् आङा लोनानिगा ए॥ खानिङा ‘आङा उन् डोक्’ नुङ् बिस्वास आचोगेट्टिन्ना भोने, खानि आप्पे खानि पापङि डोक् आसिइटि॥”#८:२४ याहुदिचिगा माङ्हाङ्ङाना सेङ्सेङ्ना उनिङ्उम्बाक् “याहोबे”, नाङाना उटुप् “आङा उन् डोक्” लियुक्॥ युहान्नाङा छेप्टुना छाप्लाङि येसुङा उन् साइना नुङ् निमेट्मा लोङ्सा “आङा उन् डोक्” नुङ् याप्मा खेप् माट्टुटु॥ पारस्थान ३:१४-१५
25हिट्नागाँ उन् उसिलाप्टुए, “हिड्डे भोने खान् साइना टे?”
येसुङा हिट्नागा लोडुचे, “हिट्नाउम्टे आङा उटुम्लाम्मा डोक् लोनेट्नाँनि॥ 26खानि बारेङि आङा माप्मा कोन्ना हिट्नुङ् फाट्टुरङि ठेम्माना रिङ् याप्मा युङ्ग्वा॥ टरो आङा कापाङ्बा छेम्बाना ए, हिट्नुङ् उन्लाम्मा आङा जे खेम्सुङ्टुङ् हिट्ना एडोक् नाराङिगा याप्मिचि लोडुङ्चिङ्चिङ्॥”
27येसुङा उन्ङाना माङ्हाङ् पाबाङाना बारेङि माट्टुना नुङ् हिट्नागाँ बुजा ओचोग्वाट्टुन्॥ 28हिड्नाड्डेउङ् येसुङा हिट्नागा लोडुचे, “जब खानिङा याप्मि छा टो खाप्चेङि आफोगुम्टुम्, हिट्नुङ् खानिङा ‘आङा उन् डोक्’ नुङ् ठाहा आटोगुम्टुम्, हिट्नुङ् आङा आप्पे आनिङ्ग्वालाम्मा पाक्चा चोक्निङ्ना, टरो माङ्हाङ् पाबाङा याङ्हिसिक्टागा रिङ्चि एडोक् चेक्ङाना नुङ् खानिङा ठाहा आटोगुम्टुम्॥ 29आङा याङ्कापाङ्बा आङालोक् वाहेट्॥ उन्ङा आङा आएकेले याङ्नानिगेट्निना, पोङ्भोने आङा सोरोक् उन् हारका लिना टोॽवा एडोक् चोगुङ्टुङ्॥” 30उन्ङा माट्टुगा नागा रिङ् ओखेम्सुङ् याप्मा याप्मिचिङा उन् बिस्वास ओचोगुए॥
येसु लोक् आब्राहाम
31येसुङा उन्ङि बिस्वास काचोक्बा याहुदिचि लोडुचे, “आङा हिसिक्नानिगा रिङ् पालान् आचोगुम्टुम् भोने, खानि छेम्बारोक् आचेलाचि ए॥ 32हिट्नुङ् खानिङा छेम्बा पाइना नुङ् ठाहा आटोगुम्टुम्, हिट्नुङ् हिट्ना छेम्बाना रिङ्ङा खानि छुट्कारा मापिडिटि॥”
33हिट्नागाँ उन् ओलोडुए, “आन्याँ आब्राहामङाना छालेट्चि, हिट्नुङ् आन्याँ काइले चा खोनाङाना चा चाकार लिसिन्गेट्टिन्नागा॥ हिट्नुङ् खोड्डेउङ् आन्याँ छुट्कारा टोगुम्टुम्मा नुङ् खान् आपिक्युक्ना?”#मात्ति ३:९; लुका ३:८
34येसुङा हिट्नागा लोडुचे, “छेम्बा डोक्, आङा खानि लोनाँनि, पाप काचोक्बा ख्वाप्पा पापङाना चाकार लियुक्॥ 35चाकारउम् खोना बेला चा पाङ्ङिना सादास्से लिनिना, टरो छाउम् सोरोक् पाङ्ङिना डोक् याप्मि लियुक्॥ 36हिड्नाड्डेउङ् छाङा खानि छुट्कारा मापिडिटि भोने, खानिङा छेम्बारोक् छुट्कारा आटोगुम्टुम्॥ 37खानि आब्राहामङाना छालेट्चि नुङ् आङा लाउङ्सा ठाहा युङ्ग्वा॥ टरो खानिङा आङा सेप्मा आकोलेट्टिङा, पोङ्भोने आङा माट्टुङ्गा रिङ् खानिङा बिस्वास चोक्मा आटेन्डिन्गा॥ 38आङाम्बाक् आङाना पाबालोक् युङाङ्ना बेला जे जे रिङ् निसुएसुङे, हिट्ना रिङ् डोक् माट्टुङ्टुङ्॥ हिट्नुङ् खानिङा चा खानि पाबालाम्मा जे जे आखेम्सुएसुम्मे, हिट्ना रिङ् डोक् आचोगुम्टुम्॥”
39हिट्नागाँ उन् ओलोडुए, “आन्याँ पाबाम्टे आब्राहाम डोक् ए॥”
येसुङा हिट्नागा लोडुचे, “खानि आब्राहामङाना ओछालेट्चि आलिसिनाँ बे खानिङा आब्राहामङा चोगुना गाड्डे डोक् टोॽवा आचोगुम्मे बे॥ 40टरो आङा माङ्हाङ्लाम्मा खेम्सुङ्ना छेम्बाना रिङ् खानि लोनाने, हिट्डेउङ् खानिङा आङा सेट्मा आकोलेट्टिङा॥ आब्राहामङा नाड्डेना टोॽवाउम् चोग्वाट्टुन्॥ 41खानि पाबाङा जे चोगुए खानिङा चा हिट्ना टोॽवा डोक् आचोगुएट्टुम्॥”
हिट्नागाँ उन् ओलोडुए, “आन्याँ इम्मेप्माजामा टोॽवा काचोक् मेन्झेमालाम्मा पोङ्सिङागा माखाक्, माङ्हाङ् डोक् आन्याँना ठिबाङ् एना पाबा ए॥”
42येसुङा हिट्नागा लोडुचे, “माङ्हाङ् खानि पाबा लिसाना बे खानिङा आङा माया याङ्आचोगिङे बे, पोङ्भोने आङा माङ्हाङ्लाम्मा टायाङ्ना॥ आङा आप्पे आनिङ्ग्वाङा टायाङ्ना माखाक्, माङ्हाङ्ङा डोक् आङा याङ्पाङ्साना॥ 43आङा लोनानिगा रिङ् खानिङा पोङ् बुजा आचोक्निम्ना? पोङ्भोने आङा माट्टुङ्ना रिङ् खानिङा खेम्मा आहिनिम्ना॥ 44खानि आप्पे खानि पाबा सैतानङाना ओछालेट्चि ए, हिट्नुङ् खानि पाबाङाना उनिङ्ग्वा गाड्डे चोक्मा डोक् खानिङा निङ्ग्वा आचोगुएसुम्मे॥ हिट्नाउम्टे उटुम्लाम्मा डोक् याप्मि कासेट् डाना, हिट्नुङ् हिट्नाङा छेम्बाना रिङ् सोरोक् चिम्मा फुट्टुना, पोङ्भोने हिट्नालोक् छेम्बाना रिङ् डोक् वाइना॥ हिट्नाउम्टे ओचाट्ला गाड्डे डोक् माङ्जो चेक्युक्॥ हिड्डेउङ् हिट्ना माङ्जो काचेक् हिट्नुङ् माङ्जो काचेक्बाचिगा पाबा ए॥ 45आङा छेम्बाना रिङ् चेक्ङा, हिट्डेउङ् खानिङा आङा बिस्वास याङ्आचोगिन्नागा॥ 46खानि माड्डे खोनाङा आङा पापङाना बारेङि फाट्टुर लाब्मा उहिङागा? आङा छेम्बाना रिङ् खानि लोनेट्नानि भोने, पोङ् खानिङा आङा बिस्वास आचोगिन्नागा? 47माङ्हाङ् ओछालेट्चिङा माङ्हाङ्ङाना उरिङ् ओखेम्सुटु॥ टरो खानिङा माङ्हाङ् उरिङ् आखेम्निम्गा, पोङ्भोने खानि माङ्हाङ् ओछालेट्चि माखाक्॥”
आब्राहाम नुङ्ना येसु ठेना
48याहुदि ओठेडाङ्चिङा उन् ओलोडुए, “आन्याँ माट्टुम्माना छेम्बा डोक्, खान् सामारि याप्मि हिट्नुङ् खान् टोन्डेबाङा माखोट्टाइसे॥”
49येसुङा हिट्नागा लोडुचे, “आङा टोन्डेबाङा याङ्खोट्निगेट्निना॥ आङा आङाना माङ्हाङ् पाबा मान् चोगुङ्टुङ्, टरो खानिङा भोने आङा ओचाफेन्लोक् याङ्आमेट्टिङागा॥ 50आङा याप्मिचिङा मान् याङ्ओचोक्याक् नुङ् कोन्निङ्ना, टरो आङा मान् चोक्मा निङ्ग्वा काचोक्बा ठिबाङ् वाहेट् हिट्नुङ् उन्ङा डोक् न्याए चोगुटु॥ 51छेम्बा डोक्, आङा खानि लोनाँनि, जुन्ङा आङा माट्टुङ्ना रिङ् पालान् चोगुटु, हिट्ना खोना बेला चा सिमा कोन्निना॥”
52याहुदिचिङा ओलोडुए, “हाट्ले छेम्बा डोक् खान् टोन्डेबाङा माखोट्टेना रैछो नुङ् आन्याँ ठाहा टोगुम्मे॥ आब्राहाम सियाडे, माङ्काटाचि चा उसिए, टरो खान्उम्बाक् ‘कोइङा आङा माट्टुङ्ना रिङ् पालान् चोगुटु भोने, हिट्ना खोना बेला चा सिनिना’ नुङ् आपिग्ना॥ 53पाक् खान् आन्याँ टुबाठेबा आब्राहाम नुङ्ना चा आठेना इ? उन् सिए, हिट्नुङ् माङ्काटाचि चा उसिए॥ खान् आप्पेलाउङ्सा साइना नुङ् आपिक्युक्ना?”
54येसुङा हिट्नागा लोडुचे, “आङा आप्पे लाउङ्सा मान् कोलुङ्टुङ् भोने, हिट्ना मान् बिथाँना लियुक्॥ टरो आङा मान् काचोक्बा आङाना पाबा वाहेट्, उन् डोक् खानिङा ‘आन्याँ माङ्हाङ्’ नुङ् आलोडुम्ना॥ 55टरो खानिङा उन् मिसेन् आनिनिम्गेट्निम्ना, आङाम्बाक् उन् मिसेन् निसुङ्टुङ्॥ आङा उन् मिसेन् निनिङ्ना नुङ् माट्टुङ्टुङ् भोने, आङा चा खानि गाड्डे डोक् माङ्जो काचेक्बा लिङा॥ टरो आङा उन् मिसेन् निसुङ्टुङ्, हिट्नुङ् उरिङ् पालान् चोगुङ्टुङ्॥ 56खानि टुबाठेबा आब्राहामङा आङा उङ्ङाना लेम्बा पुमा औधि उनिङ्ग्वा चोगुएसुना, हिट्नुङ् उन्ङा निसुङ् आड्डिक् हारका लिसे॥”#८:५६ आब्राहामबाक् ख्वाप्पा याहुदिचिगा टुबाठेबा ए॥ उन् येसु खिरिस्ट नुङ्ना इप्पोक् हाजार बारखा पाइले वासाना डाना॥
57याहुदि ओठेडोङ्चिङा उन् ओलोडुए, “खान्ङा पाचास बारखा टेप्मा चा आटासुन्गेट्टुन्ना, टब खोड्डेउङ् खान्ङा आन्याँ टुबाठेबा आब्राहाम आनिसुएना?”
58येसुङा हिट्नागा लोडुचे, “छेम्बा आङा खानि लोनाँनि, आब्राहाम पोङ्मा नुङ्ना पाइलेलाम्मा डोक् आङा वाङेट्ना॥”
59हिट्नुङ् हिट्नागाँ उन् लिङ्गेॽवाङा लेप्मा नुङ् लिङ्गेॽवा ओकोबुए,#८:५९येसुङा आप्पेलाउङ्सा माङ्हाङ् नुङ् माट्टुनाँ याप्मिचिङा उन् सेप्मा ओकोलुए॥ हिट्नागाँ माङ्हाङ् बिरुद्दाङि चेक्माउम्बाक् उन् लोमाजामा नुङ् ओमाट्टुए॥ टरो येसु हिट्नागालाम्मा ठोबे हिट्नुङ् माङ्ठानालाम्मा भारा होन्डाखाडे॥
© 2023, Wycliffe Bible Translators, Inc. and Nepal Bible Society
