युहान्ना 7
7
येसु लोक् उम्भु-उन्झाचि
1हिट्नुङ्ना येसु गालिल छेट्राङि याम्बा-नायाम्बा वासे, टरो उन् याहुदिया छेट्राङि खाप्मा निङ्ग्वा चोग्वाट्टुन्, पोङ्भोने याहुदि ओठेडोङ्चिङा उन् सेप्मा ओकोलुएट्टुना॥ 2हिट्ना बेला याहुदिचिङा छाइरि ओचोगुङ् मानाँ चोक्माना चाडा टाया लाबाना डाना॥#लेबि २३:३४; धारमाबिधि १६:१३ 3हिड्नाड्डेउङ् येसु उम्भु-उन्झाचिङा उन् ओलोडुए, “ना ठोङ् नाडुङ् याहुदियाङि खाडा, हिट्नुङ् खान्ङा आचोगुएट्टुगा टोॽवाचि काचेलाचिङा चा उनिसुवाक्॥ 4जुन् याप्मिङा उनिङ्ला मुक्ना निङ्ग्वा चोगुटु, हिट्नाङा सोगोप् टोॽवा चोगुन्ना॥ हिट्डेउङ् खान्ङा आचोगुना टोॽवा नाराङि सोब्बेङा ठाहा ओटोगुवाक्॥” 5पोङ्भोने आप्पे उन्झाचिङा चा उन् बिस्वास ओचोग्वाट्टुन्ना डाना॥
6येसुङा हिट्नागा लोडुचे, “आङा लाउङ्सा हाट्ले चा हिट्नि खाप्मा ठिक्का बेला टानिगेट्निना, टरो खानिलाउङ्सा जुन्सुके बेला खाप्मा ठिक्का डोक् लियुक्॥ 7नाराङिगा याप्मिचिङा खानि चिम्मा फुट्मा माहिडिन्गा, टरो आङाउम्टे चिम्मा याङ्उफुट्गा, पोङ्भोने उन्चिङा ओचोगुगा टोॽवा ओभेन्गा नुङ् आङा माट्टुङ्टुङ्॥ 8खानि चाडा मानाँ चोक्ङा खाडानि, आङाम्बाक् ना चाडाङि खाट्निङ्ना, पोङ्भोने आङाना बेला आझै चा टानिगेट्निना॥” 9येसुङा हिट्नाड्डे लोडुचिउङ् उन् गालिलङि डोक् युङे॥
येसुङा छाइरि ओचोगुङ् मानाँ चोक्माना चाडाङि हिसिक्टुचिचि
10टरो उन्झाचि चाडाङि ओखाडाउङ् उन् चा खोनाँ चा ठाहा मिटोक्ङे सोगोप् खाडे॥ 11चाडाङि याहुदि ओठेडोङ्चिङा उन् ओकोलुएट्टुना डाना, हिट्नुङ् “उन् खोनि वाहेट्ना?” पिक्सा याप्मिचि उसिलाप्टुएट्टुचिगा॥ 12याप्मिचिगा खिमेयाङ्मेङि याप्माङा उन्ङाना बारेङि फोसो फोसो ओचोगेट्टागा॥ कोइ “उन् नुना याप्मि” उपिगेट्टागा॥ आरुम्बाक् “माखाक्, नाङा याप्मिचि बान्डुएट्टुचि” उपिगेट्टागा॥ 13टरो याहुदि ओठेडोङ्चिलोक् उकिट्टाउङ् साङा चा उन्ङाना बारेङि सोब्बे सोरि माप्मा उहिडुवाट्टुन्गा डागा॥
14हिट्नुङ् ना चाडा ओफारा लिसाना बेला येसु माङ्ठानाङि खाडाउङ् याप्मिचि हिसिक्मा ठालाँ चोगुचे॥ 15याहुदिचि डोङ् ओठोङ्डाउङ् ओमाट्टुए, “ना याप्मि धारमाछाप्ला हिसिक्मा खोना चा काहिसिक्बा वानेट्निना डाना, खोड्डेउङ् आम्टेप्मा जोम् कानिबा लिसेना?”
16येसुङा हिट्नागा नाड्डे लोडुचे, “आङा हिसिक्नानिगा रिङ् आङाना माखाक्, टरो आङा कापाङ्बा माङ्हाङ्लाम्माना ए॥ 17नाड्डेउङ् कोइ याप्मिङा माङ्हाङ्ङाना उनिङ्ग्वा गाड्डे चोक्मा इट्टुए भोने, आङाना हिसिक्मा आङाना माखाक्, माङ्हाङ्लाम्माना नुङ् हिट्नाङा ठाहा टोगुटु॥ 18जुन् आप्पेलाम्मा चेक्युक्, हिट्नाङा आप्पे लाउङ्सा मान् कोलुटु, टरो आङा कापाङ्बालोङ्सा आङा मान् चोक्मा निङ्ग्वा चोगुङ्टुङ्॥ हिट्डेउङ् आङा छेम्बाना रिङ् माट्टुङ्टुङ् हिट्नुङ् माङ्जो माट्निङ्ना॥ 19पाक् मोसाङा खानि धारमाबिधि मापिडेएट्टिन्गि टे? टरो खानि खोनाङा चा हिट्ना धारमाबिधि पालान् आचोक्निम्ना॥ खानिङा आङा पोङ् सेट्मा याङ्आकोलेट्टिङागा?”
20याप्मिचिगा खिमेयाङ्मेङा ओलोडुए, “खान् टोन्डेबाङा मायाङ्साइसे॥ खान् खोनाङा सेट्मा माकोन्येट्ना?”
21येसुङा हिट्नागा लोडुचे, “आङा ठिक् छाक्का लिसिना टोॽवा चोगुङ्नाँ खानि सोब्बे डोङ् आठोङ्डिगा॥#७:२१ ठिबाङ् याप्मि नुमानिङ् चोगुना रिङ्॥ युहान्ना ५:१-१८ 22हाट्ले खेम्सानुम्, मोसाङा खानि आग्याँ मापिडिए, खानि येम्बिछा छाचिगा खाताना चोक्मा कोन्युक्, टरो चा खानि युङ्माना लेम्बा टोॽवा आचोगिगा॥ (छेम्बा डोक्, ना टोॽवा मोसाङा उटुम् चोगुना माखाक्, टरो नाम्टे खानि टुबाठेबाचिङा डोक् उटुम् ओचोगुना डाना॥)#उत्पति १७:१०; लेबि १२:३ 23हाट्ले कोइ याप्मिङा मोसाङाना धारमाबिधि पालान् चोक्मा युङ्माना लेम्बा खाताना चोगुटु भोने, आङा युङ्माना लेम्बा ठिबाङ् याप्मिङाना ख्वाप्पा ओयेम् नुमानिङ् चोगुङ्नाँ पोङ् खानि याक्लेट्युक्ना? 24याप्मिचिगा नाभाक् मिपुङे छेम्बाना न्याए चोगानुम्॥”
पाक् येसु डोक् खिरिस्ट इ?
25हिट्ना बेला यरुसलेम खालाङ्गाङिगा आम्टेप्मा याप्मिचिङा ओमाट्टुए, “याहुदि ओठेडोङ्चिङा सेट्मा ओकोलुना याप्मि ना डोक् माखाइ टे? 26पुयानुम्, नाउम्टे आँटि लिसाउङ् सोब्बे सोरि चेक्येट्, टरो हिट्नागाँ उन् पाक्चा ओलोडुन्ना॥ पाक् ना डोक् खिरिस्ट नुङ् आनि ओठेडोङ्चिङा बिस्वास ओचोगुएनि पाइना? 27टरो ना याप्मि खोनिलाम्मा टायाना नुङ् आनि ठाहा युङ्ग्वा॥ टरो जब खिरिस्ट टायुक् टब उन् खोनिलाम्मा टाएना नुङ् खोनाङा चा ठाहा ओटोगुन्ना॥”
28टब येसुङा माङ्ठानाङि हिसिक्टुचिना बेला सोब्बेङा ओखेम्सुलोक् लोडुचे, “छेम्बा डोक्, पाक् खानिङा आङा मिसेन् आनिसिटिङागि हिट्नुङ् खोनिलाम्मा टायाङ्ना हिट्ना चा ठाहा आटोगुम्टुम्नि टे? आङाम्टे आप्पे टायाङ्ना माखाक्, टरो आङा याङ्कापाङ्बा उन्बाक् छेम्बाना ए॥ हिट्नुङ् उन् खानिङा मिसेन् आनिनिम्ना॥ 29टरो आङा उन् मिसेन् निसुङ्टुङ्, पोङ्भोने आङा उन्लाम्मा डोक् टायाङ्ना, हिट्नुङ् उन्ङा आङा याङ्पाङ्साना ए॥”
30ना रिङ् ओखेम्सुङ् हिट्नागाँ येसु लाब्मा ओकोलुए, टरो खोनाङा चा उन् लाब्मा उहिडुवाट्टुन्, पोङ्भोने उन्ङाना ओबेला आझै टानिगेट्निना डाना॥ 31टरो हिट्ना खिमेयाङ्मेङि उलिसागा याप्मा याप्मिचिङा उन्ङि बिस्वास ओचोगुए॥ हिट्नुङ् हिट्नागा उपिगे, “जब खिरिस्ट टायुक्, टब पाक् उन्ङा ना याप्मिङा नुङ्ना चा याप्मा डोङ् ठोङ्डिगा टोॽवा चोगुटुनि टे?”
येसु लाब्मा माङ्ठाना काकोचि ओपाङ्सुचिगा
32खिमेयाङ्मेङि उलिसागा याप्मिचिङा येसुङाना बारेङि फोसो फोसो ओचोगागा फारिसि याप्मिचिङा ओखेम्सुए॥ हिट्नुङ् गाडुवाडाङ्बाचि लोक् फारिसि याप्मिचिङा उन् लाब्मा माङ्ठाना काकोबा टिलिङ्गाचि ओपाङ्सुचे॥
33येसुङा हिट्नागा लोडुचे, “हाट्ले होप्मो बेला सोम्मा एडोक् आङा खानिलोक् लिङा, हिट्नुङ्ना आङा याङ्कापाङ्बा सोरि खाट्नाँ॥ 34खानिङा आङा आकोलिटिङा, टरो याङ्आटुबिन्नागा, हिट्नुङ् आङा खाट्ङाना डेन्ङि खानि खाप्मा आहिडिन्गा॥”
35ना रिङ् ओखेम्सुङ् याहुदि ओठेडोङ्चि उन्चि उन्चि उपिगे, “ना याप्मि खोनि खाप्मा इट्टुएना, हिट्नुङ् खानिङा आङा याङ्आटुबिन्नागा पिक्युक्ना? पाक् ना याप्मि गिरिक् याप्मिचिगा छेट्राङि चेम्बेलेङ् उलिसाउङ् उयुङागा आनि याहुदिचिङि खाट्युङ् हिट्नागा गिरिक् याप्मिचि हिसिक्मा निङ्ग्वा चोगुएनि पाइना? 36‘खानिङा आङा आकोलिटिङा, टरो आटुबिन्नागा, हिट्नुङ् आङा खाट्ङाना डेन्ङि खानि खाप्मा आहिडिन्गा’ नुङ् नाङा पाक् माप्मा कोलुना?”
चोला आपिना चुवा बारे
37चाडाङाना लाट्ना लेम्बा, नाउम्बाक् आड्डिक् मुलि लेम्बा डाना, येसुङा येबाउङ् सोब्बेङा ओखेम्सुलोक् नाड्डे लोडुचे, “खानि माड्डे कोइङाना वेॽमा काडे भोने, हिट्ना आङा सोरि ओटायाक् हिट्नुङ् उठुङुवाक्॥ 38जुन्ङा आङि बिस्वास चोगुटु, धारमाछाप्लाङि छेप्टेसे, ‘हिट्नाङाना उनिङ्ग्वालाम्मा चोला आपिना जोम् चुवा होन्युयाक्युक्॥’”#इजिकिएल ४७:१; जाकारिया १४:८ 39ना रिङ् येसुङा उन्ङि बिस्वास काचोक्चिङा ओटोगु लाबुना सेङ्सेङ्ना हाङ्साङाना बारेङि माट्टुना डाना॥ टरो हिट्ना बेला सोम्मा माङ्हाङ्ङा सेङ्सेङ्ना हाङ्सा हिट्नागा पिडुन्गेट्टुन्चिन्गा डागा, पोङ्भोने उन्ङा येसुङाना माहिमा पारकाट् चोगुन्गेट्टुन्ना डाना॥
याप्मिचि ओसाम्डागा
40येसुङाना उरिङ् ओखेम्सुङ् कोइ-कोइ याप्मिचिङा ओमाट्टुए, “ना याप्मिउम् छेम्बा डोक् आन्याँ हाङ्सुएट्टुम्माना माङ्काटा डोक् ए॥”
41आरुङा ओमाट्टुए, “नाम्टे खिरिस्ट ए॥”
टरो आम्टेप्माङाम्बाक् ओमाट्टुए, “पाक् खिरिस्ट गालिललाम्मा टायुक्नि टे? 42खिरिस्ट दाउद पुङ्लालाम्मा हिट्नुङ् उन् पोङ्साना युक्टाम् बेथलेहेमलाम्मा टायुक् नुङ् पाक् धारमाछाप्लाङि छेप्निगेट्निना इ टे?”#७:४२ जोम् याहुदिचिङा येसु बेथलेहेमङि पोङ्साना नुङ् ठाहा ओटोगुन्ना॥ हिट्नागाँ पोयाना ठोङ् गालिलङि पोङ्साना नुङ् उमिट्टे॥ मिका ५:२; २ सामुएल ७:१२ 43नाड्डेउङ् येसुङाना बारेङि याप्मिचिगा निङ्ग्वा टोङ्नेएट्निउङ् ओसाम्डे॥ 44हिट्नागा माड्डेङि आम्टेप्माङा उन् लाब्मा निङ्ग्वा ओचोगुए, टरो खोनाङा चा ओलाबुवाट्टुन्॥
याहुदि ओठेडोङ्चिगा आबिस्वास
45येसु लाब्माउङ्सा ओपाङ्सुचिगा माङ्ठाना काकोबा टिलिङ्गाचि गाडुवाडाङ्बाचि हिट्नुङ् फारिसि याप्मिचि सोरि ओनोक्टा ओखाडे॥ हिट्नुङ् हिट्नागाँ उसिलाप्टुचे, “खानिङा येसु आलाबुमुङ् पोङ् आटाट्नेट्निम्ना?” 46हिट्नागा टिलिङ्गाचिङा ओलोडुए, “ना याप्मि गाड्डे खोना याप्मि चा ओचेक्टागा आन्याँ खेम्नेएट्निम्मा॥”
47फारिसि याप्मिचिङा हिट्नागा ओलोडुचे, “खानि चा हिट्नाँ ठागाँ माचोगेइगि, पाइना? 48पाक् आनिगा ओठेडोङ्चि आथाबा फारिसि याप्मिचि माड्डेङि कोइङा हिट्ना बिस्वास ओचोगुएसुएनि? 49ना खिमेयाङ्मेङि उलिसागा उन् रोक् कारिग्बा याप्मिचिङा मोसाङा छेप्टुना धारमाबिधि उनिसुन्गा, हिड्डेउङ् हिट्नागा उठुङ्ङि माङ्हाङ्ङाना साराप ठाइसे॥”
50हिट्नागा माड्डे पाइले एक् खेप् येसु टुब्मा खाडाना ठिबाङ् निकोदेमासङा नाड्डे माट्टुए, 51“पाक् आनि धारमाबिधिङा पाइला उरिङ् मिखेम्मे, हिट्नुङ् उन्ङा चोगुना टोॽवा बारेङि ठाहा मिटोक्ङे हिट्ना न्याए चोगुटुनि टे?”
52हिट्नागाँ हिट्ना ओलोडुए, “पाक् खान् चा गालिलङिना याप्मि इ पाइना? धारमाछाप्ला नुलोक् पोढाँ चोगु, हिट्नुङ् खोना माङ्काटा चा गालिललाम्मा टानिना नुङ् खान्ङा ठाहा आटोगुटु॥”
53हिट्नुङ्ना सोब्बे उन्चि आप्पे-आप्पे पाङ्लेङ् ओखाडे॥
© 2023, Wycliffe Bible Translators, Inc. and Nepal Bible Society
