युहान्ना 18
18
येसु ओलाबुना
(मात्ति २६:४७-५६; मारकुस १४:४३-५०; लुका २२:४७-५३)
1येसुङा बिन्टि ठाङ्मा हिडुङ् उन् ओचेलाचिलोक् किरदोन होङ् याहाँपारा खाडे॥ हिट्नि ठिक् बाकेंचा डाना, हिट्नि डोक् येसु ओचेलाचिलोक् लिगे॥ 2येसु धोका कापिबा याहुदाङा चा हिट्ना डेन् ठाहा टोगुएसुना डाना, पोङ्भोने येसु ओचेलाचिलोक् हिट्नि याप्मा गाड्डे खाडायाक्टाना डाना॥ 3हिट्ना बेला आम्टेप्मा टिलिङ्गाचि, गाडुवाडाङ्बाचि हिट्नुङ् फारिसि याप्मिचि ओपाङ्सुचिगा माङ्ठाना काकोबाचि आप्टुचिउङ् याहुदा हिट्नि होन्डाडाए॥ हिट्नागाँ कुपि, राँको हिट्नुङ् ढाबे, चुप्फि उखुयुएसुगा॥
4येसुङा उन्ङि लियुगेट्ना रिङ् सोब्बे ठाहा टोगुङ् ओटोक्माङ्ङि आबाउङ् हिट्नागा सिलाप्टुचे, “खानिङा साक् आकोलुएट्टुम्ना?”
5हिट्नागाँ ओलोडुए, “नासारातङिना येसु॥”
येसुङा लोडुचे, “आङा उन् डोक् ए॥” (येसु धोका कापिबा याहुदा चा हिट्नागालोक् येबाइसाना॥) 6जब येसुङा हिट्नागा “आङा उन् डोक्” लोडुचे, टब हिट्नागा एङ्स्वा ओसोन्डे हिट्नुङ् खाम्ङि ओकोसे॥
7उन्ङा फेरि हिट्नागा सिलाप्टुचे, “खानिङा साक् आकोलुएट्टुम्ना?”
हिट्नागाँ ओलोडुए, “नासारातङिना येसु॥”
8येसुङा लोडुचे, “आङा हाले डोक् आङा उन् डोक् नुङ् लोनाने टे॥ खानिङा आङा आकोलिङागा भोने नागा याप्मिचिम्बाक् खाप्मा पिडानुम्चिम्॥” 9हिट्नुङ् “खान्ङा आङा याङ्आपिडाङ्ना माड्डेङि ठिबाङ् चा आङा मानेएट्निङ्चिङ्”#युहान्ना ६:३९; १७:१२ नुङ् उन्ङा माट्टुना रिङ् उयुयाक् नुङ् नाड्डे लिसे॥
10हिट्नुङ् सिमोन पाटरुसङा फिम्सुएसुना चेप्सा साडुङ् सानिङ्डाङ्बाङाना ओचाकारङाना उछुप्टाङ् उनुभेक् खोक्टुबिडुए॥ हिट्ना चाकारङाना उनिङ् माल्खास डाना॥ 11टरो येसुङा पाटरुस लोडुए, “काचेप्सा उसुप्ङि युङ्सु॥ पाक् आङाना माङ्हाङ् पाबाङा आङा याङ्पिडाना हिट्ना याङ्छामाङाना खोरे आङा मिठुङ्मानि टे?”#मात्ति २६:३९; मारकुस १४:३६; लुका २२:४२
येसु सानिङ्डाङ्बाङाना ओपाङ्ङि
12हिट्नुङ्ना रोमिचिगा टिलिङ्गाचि हिट्नुङ् उन्चि काप्तान, याहुदिचिगा माङ्ठाना काकोबाचिङा येसु ओलाबुङ् ओरेक्टुए॥ 13हिट्नुङ् हिट्नागाँ येसु पाइला हान्नास सोरि ओखाट्टुए॥ हान्नासउम्बाक् हिट्ना सालङाना सानिङ्डाङ्बा कैयाफाङाना ओनाम्बा डाना॥ 14ना कैयाफाङा डोक् “याप्मिचि लोङ्सा ठिबाङ् सिमा डोक् ओचेट्नुना लियुक्” नुङ् याहुदि ओठेडोङ्चि साल्लाह पिडुचिगा डागा॥#युहान्ना ११:४९-५०
पाटरुसङा येसु इन्कार चोगुना
(मात्ति २६:६९-७०; मारकुस १४:६६-६८; लुका २२:५५-५७)
15सिमोन पाटरुस हिट्नुङ् आरको ठिबाङ् चेला येसु ओएङ्-ओएङ् खाडाचे॥ हिट्ना आरको चेलाम्बाक् सानिङ्डाङ्बाङाना उमिसेन् याप्मि डाना, हिट्नाड्डेउङ् उन् येसुलोक् सानिङ्डाङ्बाङाना ओटेल्लाङ्ङि लिगे॥ 16पाटरुसउम्बाक् टेल्लाङ्ङि लिग्माना ढुवारि भारा येबाइसाना॥ सानिङ्डाङ्बाङाना उमिसेन् हिट्ना चेला भारा होन्डाउङ् ढुवारिङि पाले युङाना कायेप्मा लोडुङ् पाटरुस भिट्रा आप्टुए॥ 17हिट्नुङ् हिट्नि ढुवारि सोरि युङाना हिट्ना कायेप्माङा पाटरुस सिलाप्टुए, “पाक् खान् चा हिट्ना याप्मिङाना ओचेलाचि माड्डे ठिबाङ् माखाइ टे?”
पाटरुसङा लोडुए, “आङाउम्टे माखाक् हाउ॥”
18चुङ्ग्वामा लिसानाँ चाकारचि हिट्नुङ् माङ्ठाना काकोबाचिङा मि उटुप्टुङ् हुङ्सा हिट्नागा याम्बा-नायाम्बा ओयेबाइसागा॥ हिट्नुङ् पाटरुस चा हिट्नागालोक् येबाउङ् मि हुङ्मा ठालाँ चोगुए॥
सानिङ्डाङ्बाङा येसु सिलाप्टुना
(मात्ति २६:५९-६६; मारकुस १४:५५-६४; लुका २२:६६-७१)
19सानिङ्डाङ्बाङा येसुलाउङ्सा ओचेलाचि हिट्नुङ् उन्ङा हिट्नागा हिसिक्टुचिगा बारेङि सिलाप्टुए॥ 20येसुङा लोडुए, “आङा नाराङिगा याप्मिचि पारचिन्दा पाक्चा मिठोप्मे सिकाँ चोगुएसुङ्चिङे॥ आङा ख्वाप्पा याहुदिचि उछुम्गा उन्चि छुम्मापाङ्ङि लोक् माङ्ठानाङि सोरोक् हिसिक्टुङ्चिङे॥ आङा सोगोप् पाक्चा माट्निङ्गेट्निङ्ना॥ 21पोङ् खान्ङा आङा याङ्आसिलाप्ङाना टे? आङा हिट्नागा पाक् लोडुङ्चिङेगा हिट्ना रिङ् काखेम्बाचि डोक् सिलाप्टुचि॥ आङा माट्टुङ्ना रिङ् हिट्नागालाउङ्सा ठाहा युङ्ग्वा॥” 22येसुङा ना रिङ् माट्टुनाङा नेहेट्टाङ्ङि येबाना पालेचि माड्डे ठिबाङ्ङा नाड्डे पिक्सा येसु ओकाकालाङि लेम्सुए, “पाक् सानिङ्डाङ्बालोक् चेक्मा पारा ना डोक् इ?”
23येसुङा हिट्ना लोडुए, “आङा ओचाफेन्लोक् माट्टुङ्ना भोने पाक् मिलिमा लिसेना याङ्निमेट्टा, टरो आङा माहामा डोक् माट्टुङ्ना भोने, पोङ् आङा याङ्आलेम्मानाँ?” 24हिट्नुङ् हान्नासङा येसु ओरेक्टुङ् डोक् सानिङ्डाङ्बा कैयाफा सोरि पाङ्सुए॥
पाटरुसङा फेरि येसु इन्कार चोगुना
(मात्ति २६:७१-७५; मारकुस १४:६९-७२; लुका २२:५८-६२)
25हिट्ना बेला सिमोन पाटरुस येबाउङ् मि हुङेट्टाना॥ हिट्नि उलिसागा आरु कोइङा उन् उसिलाप्टुए, “खान् चा हिट्ना याप्मिङाना ओचेला माखाइ टे?”
पाटरुसङा इन्कार चोगुङ् माट्टुए, “आङा माखाक्॥”
26हिट्नि पाटरुसङा उनुभेक् खोक्टुबिडुना सानिङ्डाङ्बा ओचाकारङाना ठिबाङ् ओनातेदार याप्मि डाना, हिट्नाङाना उनुभेक् पाटरुसङा खोक्टुबिडुना डाना, हिट्नाँ सिलाप्टुए, “आङा खान् हिट्ना याप्मिलोक् बाकेंचाङि निनाना टे?” 27पाटरुसङा फेरि चा इन्कार चोगुए॥ हिट्नुङ् हिट्ना बेला डोक् कोक्साबा ओक्टे॥
येसु पिलातास सोरि ओखाट्टुना
(मात्ति २७:१-२,११-३१; मारकुस १५:१-२०; लुका २३:१-५,१३-२५)
28एका भ्यानिक् हिट्नागाँ येसु कैयाफा ओपाङ्लाम्मा रोमि हाकिम पिलातास युङ्ना पाङ्ङि ओखाट्टुए॥ टरो उन् फाट्टुर कालाप्चि भिट्रा उलिक्नियाट्नि, पोङ्भोने छुट्कारा चाडाङाना भातेर चामालाउङ्सा हिट्नागाँ आप्पेलोङ्सा चोखो युङ्माना निङ्ग्वा ओचोगुए॥#१८:२८ पिलातास याहुदि याप्मि माखाक्॥ हिट्डेउङ् याहुदिचि उन् युङ्ना पाङ्ङि उलिग्नेयाट्नि॥ हिट्डे ओचोगाना बे उन्चि चालान्ङि आसुद्दो उलिसे बे॥ 29हिट्नाड्डेउङ् रोमि हाकिम पिलातास भारा होन्डाउङ् हिट्नागा लोडुचे, “खानिङा ना याप्मिङाना बिरुद्दाङि पाक्ङाना फाट्टुर आलाबुम्टुम्ना?”
30हिट्नागाँ ओलोडुए, “ना याप्मि भेन्ना टोॽवा काचोक्बा माखाक्नाम्बे आन्याँ खान् सोरि आप्नेयाट्निम्मा॥”
31पिलातासङा हिट्नागा लोडुचे, “ना याप्मि खानिङा आप्पे खाट्टानुम् हिट्नुङ् खानिगा धारमाबिधि गाड्डे नाङाना न्याए चोगानुम्॥”
याहुदिचिङा ओलोडुए, “खोना याप्मि चा सेप्माना आधिकार आन्याँलोक् वाइना॥” 32येसु आप्पेङा उन् खोड्डे पारिक् सिमा कोन्युक् नुङ् माट्टुना रिङ् युमा नाड्डे लिसे॥#युहान्ना ३:१४; १२:३२
33पिलातास फेरि भिट्रा लिगे, हिट्नुङ् येसु छेम्डुङ् लोडुए, “पाक् खान् याहुदिचिगा हाङ्बा इ?”
34येसुङा लोडुए, “पाक् खान् आप्पेङा कानिङ्ग्वाङा ना रिङ् याङ्आसिलाप्टाँना इ आरुङा आङाना बारेङि खान् मालोडेनि?”
35पिलातासङा लोडुए, “पाक् आङा याहुदि नुङ् खान् आमिट्युक्नि? खान्ङाना आप्पे काछोङ्बाचि हिट्नुङ् गाडुवाडाङ्बाचिङा खान् आमुक्ङि याङ्उपिडाङे॥ खान्ङा पाक् भेन्ना टोॽवा आचोगुएना?”
36येसुङा लोडुए, “आङाना मुलुक् ना नाराङिना माखाक्॥ आमुलुक् ना नाराङिना लिसानाम्बे आङा रोक् कारिक्बाचि आङालोङ्सा याहुदि ओठेडोङ्चिगा मुक्ङि ठामालाम्मा जोगाँ चोक्ङा उचुङे बे॥ टरो आमुलुक् ना नाराङिना माखाक्॥”
37पिलातासङा येसु सिलाप्टुए, “हिट्नाडे भोने खान् हाङ्बा डोक् इ?”
येसुङा लोडुए, “आङा हाङ्बा नुङ् खान् आप्पेङा आमाट्टुएट्टु॥ ना लोङ्सा डोक् आङा पोङ्साङ्ना, हिट्नुङ् छेम्बाना रिङ्ङाना साँचि पिमाउङ्सा नाराङि टायाङ्ना ए॥ छेम्बाना रिङ् निङ्ग्वा ओटासुगा सोब्बेङा आरिङ् ओखेम्सुटु॥”
38पिलातासङा सिलाप्टुए, “छेम्बाना रिङ् पाइना?”
नाट्टेप्मा रिङ् सिलाप्मा हिडुङ् पिलातास भारा होन्डाउङ् याहुदिचि लोडुचे, “साजाए पिमा लोङ्सा ना याप्मिङि आङा पाक्चा फाट्टुर टुब्नेट्निङ्॥ 39छुट्कारा चाडाङि ठिबाङ् कैदि खानि लोङ्सा आङा लेप्माना खानि चालान् चाल्ति युङ्ग्वा॥ नाड्डेउङ् पाक् नाबाजि आङा याहुदिचिगा हाङ्बा लेडुङ्नि नुङ् खानि आमिट्टिटिगि?”
40टरो फेरि हिट्नागा “हिट्ना माखाक्, टरो बारब्बा याप्मिलेडाबिडा” पिक्सा टुक्लोक् ओराट्टे॥ (बारब्बाम्बाक् रोमि सारकारङाना बिरोध काचोक्बा याप्मि डाना॥)
© 2023, Wycliffe Bible Translators, Inc. and Nepal Bible Society
