युहान्ना 17
17
येसुङाना बिन्टि
1नागा रिङ् लोमा हिडुचिउङ् येसुङा टोनालोग्लेङ् पुयुङ् माट्टुए, “हाउ आप्पो, हाट्ले बेला टाए॥ काइछाङाना माहिमा चोगु, हिट्नुङ् छाङा खान्ङाना माहिमा ओचोगुवाक्॥ 2पोङ्भोने खान्ङा उन् सोब्बे याप्मिचि उठुङ्ङि आधिकार आपिडुएसुए, हिड्डेउङ् खान्ङा उन् जिम्मा आपिडुचिगा सोब्बे याप्मिचि उन्ङा खोना बेला चा लाट्निना चोला उपिडुचियाक्॥ 3लाट्निना चोला नुङ् खान् ठिबाङ् एडोक् छेम्बाना माङ्हाङ् मिसेन् निमा, हिट्नुङ् खान्ङा आपाङ्सुना येसु खिरिस्ट मिसेन् निमा ए॥ 4खान्ङा आङा जिम्मा आपिडाङ्ना टोॽवा हिट्ना युडुङुङ् आङा कानिङ् नाराङि टो-टो चोगुएसुङे॥ 5हाउ आप्पो, हाट्ले आङा खान्ङाना टोकाना सोरि हिट्ना माहिमा याङ्पिडा, जुन् माहिमा नारा उटुम् लिमा नुङ्ना पाइले खान्लोक् लिसाङ्नाँ आङालोक् डाना॥
6“ना नारालाम्मा आङा खान्ङा याङ्आपिडाना याप्मिचि खान्ङाना कानिङ् मिसेन् निमेट्टुएसुङ्चिङे॥ हिट्नागा खान्ङागा ओडागा, हिट्नुङ् खान्ङा हिट्नागा आङा याङ्आपिडाङे, हिट्नुङ् हिट्नागाँ खान्ङाना कारिङ् पालान् ओचोगुएसुए॥ 7खान्ङा आङा याङ्आपिडाङ्ना सोब्बे रिङ् खान्लाम्मा ओटायागा नुङ् हाट्ले हिट्नागाँ ठाहा ओटोगुएसुए॥ 8पोङ्भोने खान्ङा आङा याङ्आपिडाङ्ना रिङ् डोक् हिट्नागा लोडुङ्चिङे, हिट्नुङ् हिट्नागाँ हिट्ना रिङ् बिस्वास ओचोगुएसुए॥ आङा खान्लाम्मा खाडाङ्ना नुङ् हिट्नागाँ छेम्बा डोक् ठाहा ओटोगुएसुए, हिट्नुङ् खान्ङा आङा याङ्आपाङ्साङ्ना नुङ् हिट्नागाँ बिस्वास ओचोगुएसुए॥
9“आङा हिट्नागा लोङ्सा बिन्टि चोगुङ्टुङ्, नाराङिगा सोब्बे याप्मिचि लाउङ्सा माखाक्, टरो खान्ङा आङा याङ्आपिडाङ्ना याप्मिचि लोङ्सा आङा बिन्टि चोगुङ्बिडुङ्चिङ्चिङ्, पोङ्भोने हिट्नागा खान्ङागा कायाप्मिचि ए॥ 10आङालोक् उलिसागा सोब्बे खान्ङागा डोक्, हिट्नुङ् खान्ङागा सोब्बे आङागा॥ हिट्नुङ् हिट्नागालाम्मा आङाना माहिमा लिसाइसे॥ 11हाटले आङा नाराङि लिनिङ्ना, पोङ्भोने आङाम्बाक् खान्ङि काट्नागेट्नाँ टरो हिट्नागाम् नाराङि डोक् ओवाहेट्॥ हाउ सेङ्सेङ्ना आप्पो, खान्ङा आङा याङ्आपिडाङ्गालोङ्सा कानिङ्ङाना बोल्ङा हिट्नागा जोगाँ चोगुङ् युङ्सुचि, हिट्डेउङ् आनि गाड्डे डोक् हिट्नागा चा एक्केउ उलियाक्॥ 12आङा हिट्नागालोक् लिसाङ्नाँ खान्ङा आङा आपिडाङ्ना कानिङ्ङि हिट्नागा चोप्योक् युङ्सुङ्चिङे॥ हिट्नुङ् जाखाम् लिना छा माले आङा खोना चा जाखाम् लिमा पिनेट्निङ्चिङ्, पोङ्भोने धारमाछाप्लाङि छेप्टाना रिङ् युमा डोक् कोन्डाना डाना॥#छाम्लोमा छाप्ला ४१:९; युहान्ना १३:१८
13“टरो हाट्ले आङा खान् सोरि काट्नागेट्नाँ॥ हिट्नुङ् हिट्नागाँगा उन्चि निङ्ग्वाङि आङाना हारकाङा उइप्टुवाक् नुङ् नागा रिङ् आङा नाराङि लिङाना बेला डोक् खानि लोनाँनि॥ 14आङा हिट्नागा कारिङ् डोक् लोडुङ्चिङे, टरो नाराङा हिट्नागा चिम्मा फुट्टुचे, पोङ्भोने हिट्नागा नाराङिगा माखाक्, हिट्डेडोक् आङा चा नाराङिना माखाक्॥ 15खान्ङा हिट्नागा नारालाम्मा खाट्टुचि नुङ् आङा बिन्टि चोक्निङ्ना, टरो हिट्नागा सैतानलाम्मा जोगाँ चोगुचि नुङ् आङा बिन्टि ठाङ्सुङ्टुङ्॥ 16आङा नाराङिना माखाक्, हिट्नाड्डे डोक् हिट्नागा चा नाराङिगा माखाक्॥ 17खान्ङाना छेम्बाना रिङ्ङा हिट्नागा सेङ्सेङ् चोगुचि, हिट्नुङ् खान्ङाना रिङ्उम्बाक् छेम्बाना ए॥ 18खान्ङा आङा नाराङि याङ्आपाङ्सा गाड्डे डोक् आङा चा हिट्नागा नाराङि पाङ्सुएसुङ्चिङे॥ 19हिट्नागाँ उन्चि चोला खान्ङाना छेम्बाना रिङ्लाम्मा सेङ्सेङ् चोक्मा उहिडु नुङ् हिट्नागा आङा चा आप्पेलोङ्सा खान्ङि सेङ्सेङ् चोगुङ्टुङ्॥
20“आङा नागा लाउङ्सा एडोक् बिन्टि चोग्निङ्ना, टरो नागाँ ओलोडुचिगा खाबोरलाम्मा आङि बिस्वास काचोक्बाचि लोङ्सा चा बिन्टि चोगुङ्टुङ्॥ 21हिट्नागा सोब्बे ठिक्ए उलियाक् नुङ् आङा बिन्टि चोगुङ्टुङ्॥ हाउ आप्पो, खान् आङि, हिट्नुङ् आङा खान्ङि ठिक्ए लिसाचि गाड्डे हिट्नागा चा आन्चिङि उलियाक्, हिट्डेउङ् खान्ङा आङा याङ्आपाङ्साङ्ना नुङ् नाराङिगा याप्मिचिङा बिस्वास ओचोगुवाक्॥ 22आन्चि ठिक्ए लिसाचि गाड्डे डोक् हिट्नागा चा ठिक्ए उलियाक् नुङ् खान्ङा आङा जुन् माहिमा याङ्आपिडाइसाङे, हिट्ना माहिमा डोक् आङा चा हिट्नागा पिडुएसुङ्चिङे॥ 23आङा हिट्नागालोक्, हिट्नुङ् खान् आङि आवाहेट्॥ नाड्डेउङ् हिट्नागा चा ख्वाप्पा ठिक्ए उलियाक्॥ ना रिङ्लाम्मा डोक् खान्ङा आङा याङ्आपाङ्साङ्ना हिट्नुङ् खान्ङा आङा माया याङ्आचोगाङ्ना गाड्डे खान्ङा हिट्नागा माया आचोगुचिगा नुङ् नाराङिगा याप्मिचिङा ठाहा टोक्मा उहिडुवाक्॥
24“हाउ आप्पो, खान्ङा आङा याङ्आपिडाङ्ना याप्मिचि आङालोक् डोक् उलियाक् नुङ् आनिङ्ग्वा युङ्ग्वा॥ हिट्नुङ् खान्ङा आङा याङ्आपिडाङ्ना माहिमा हिट्नागाँ उनिसुवाक्, हिट्ना माहिमा नारा चोक्मा पाइलेलाम्मा डोक् आङा माया याङ्आचोगाङ्नाँ खान्ङा आङा याङ्आपिडाङ्ना डाना॥
25“धारमोति आप्पो, नाराङिगा याप्मिचिङा खान् मिसेन् मानिनिना, टरो आङा खान् मिसेन् निनाँ, हिट्नुङ् खान्ङा आङा याङ्आपाङ्साङ्ना नुङ् नागा चेलाचिङा ठाहा ओटोगुटु॥ 26आङा खान्ङाना बारेङि हिट्नागा हिसिक्टुएसुङ्चिङे, हिट्नुङ् हिट्नागा खान्ङाना बारेङि हिसिक्मा नानिङ्चिङ्गा, हिट्डेउङ् खान्ङा आङा माया याङ्आचोगा गाड्डे डोक्, हिट्नागाँ चा उन्चि उन्चिङि माया चोग्गा चोक् ओचोक्याक्, हिट्नुङ् आङा आप्पे हिट्नागालोक् लिङा॥”
© 2023, Wycliffe Bible Translators, Inc. and Nepal Bible Society
