Génesis 14
14
Abramnën Lot buánkankëbi bitëkëan bana
1Usa ꞌain ka a nëtëkaman Amrafel ax Sinar kakë me anu ꞌapu ꞌiakëxa, Arioc axribi ka Elasar kakë me anu ꞌapu ꞌiakëxa, Quedorlaómer axribi ka Elam kakë me anu ꞌapu ꞌiakëxa, ꞌimainun ka Tidal axribi Goím kakë me anu ꞌapu ꞌiakëxa. 2Ënë ꞌapukamax ka ꞌapu Bera, Sodoma kakë ëmanu ꞌikë abë ꞌakanankëxa, abë ꞌianan ka ꞌapu Birsá Gomorra kakë ëmanu ꞌikë abë ꞌianan, ka ꞌapu itsi Sinab Admá kakë ëmanu ꞌikë ꞌapu abë ꞌianan, Seméber kakë ꞌapu Seboím kakë ëmanu ꞌikë ꞌimainun, ꞌapu itsi axa Bela kakë ëmanu ꞌikë abëribi ꞌakanankëxa, a ëmabi ka Sóar kakinribi anëakëxa. 3Ënë mapai achúshi ꞌapukaman ka aín suntárukama Sidim kakë me sapan anu timë́akëxa, anu ka parúmpapa bamakë kakë ax ꞌiakëxa. 4ꞌItsa baritia ꞌinúkë ꞌain ka ꞌapu Quedorlaómer an mapai rabë́ ꞌimainun rabë́ baritia, anun an kuëënkësa okin ñu ꞌanun ꞌamiakëxa, ꞌaínbi ka bari achúshi ꞌirutëkënkë anun mapai achúshi ꞌapu kaman a ꞌapubë ꞌakánanti sinánkëxa. 5Usakin sinántakëx ka baritia itsi ꞌirukëbë, Quedorlaómer ꞌapu ꞌimainun ꞌapu raíri abëa ꞌakianankë kamabë kanankiani anua Astarot Carnaim me ꞌikë anu kuankëxa, kuanxun ka anu ꞌixun refaítakama a pain ꞌatankëxun; zuzita kamaribi, Ham kakë menuxun ꞌanan emitas kamaribi, Savé-quiriataim menuxun ꞌakëxa, 6ꞌanan ka ꞌakánanti ꞌunairakëkamaribi abë ꞌakanankin abámikin Seír me anu ꞌikë bashikama anubi nuibiankin ꞌakëxa, usakian ꞌakëxa kuania ka me anua El-Parán ꞌikë anubi, nuibiankin ꞌakëxa, ax ka anu uni ꞌikëma me a rapasu ꞌiakëxa. 7Usokin ꞌatankëx baitsin amirbishi utëkënkin ka Quedorlaómer ꞌimainun aín suntárukama, ꞌimainun abëa kuankë ꞌapu raíri akamabë En-Mispat, ꞌikëbia Cadés kakë anu bëbakëxa, bëbakiani kuankin ka añu kara bainua mëraia abi ꞌatimonan këñuakëxa, usokin ꞌanan ka kuankinshi anu ꞌikë amalecita aribi ꞌakëxa, ꞌanan ka amorreokamaribi raíri ëmakama ꞌakësaribi okin ꞌabiani kuankëxa, ax ka Hasesón-tamar me ꞌikë anu ꞌiakëxa.
8Usa ꞌain ka Sodoma, Gomorra, Admá, Seboím, ꞌimainun Belanu ꞌikë ꞌapukama ax me sapan Sidim kakë anuax ꞌakanani kuankëxa. 9Anuax ka ënë mapai achúshi ꞌapukama Quedorlaómer Amrafel ꞌimainun Arioc abë ꞌakanankëxa, ënë rabë́ ꞌimainun rabë́ ꞌapukamax ka Elam, Goím, Sinar ꞌimainun Elasar a ëma kamanu ꞌikë ꞌiakëxa. 10Kamabi Sidim kakë me sapan anu ka chua me pëan pëánkikë anubia unia ꞌiakëxa, usa ꞌain ka Sodoma ꞌimainun Gomorranu ꞌikë ꞌapu ꞌakanankënuax ꞌiakëti kuaníbi anu nanëakëxa. Usai ꞌimainun ka raíri ꞌapukamax ninu abákëxa. 11Usa ꞌain ka rabë́ ꞌimainun rabë́ ꞌapun suntárukaman Sodoma ꞌimainun Gomorra kakë ëma rabë́, anu atsíntankëxun anu ꞌikë unikaman ñu aín piti, ain ñu kupíkë aín ꞌarakakë ñukama këñunbi kamabi bitankëxun aín nëtënu anu ꞌikë unikama këñunbi buánkëxa. 12Usa ꞌain ka Sodoma kakë ëmanu ꞌikë Abramnën, xukënan bëchikë Lot axribi anu ꞌiakëxa, ꞌikëbi ka aribi aín ñukama ꞌimainun an ꞌarakakë ñuinakama këñunbi ñatanbiankin buánkankëxa. 13Usakian ꞌakëbë ka uni achúshi abákëxa, abaxun ka usaía ꞌikë Abram hebreo uni a ñuixuankëxa, ax ka uni achúshi Mamré aín menu tsókë ꞌiakëxa, a unix ka amorreo unibu ꞌiakëxa, Mamré ax ka Escol ꞌimainun Aner aín xukë́n ꞌiakëxa, usa ꞌaish ka a unikamax Abrambë nuibanankë ꞌiakëxa.
14Usakian aín piaka ñatanbiankin buánkë ka Abramnën kuakëxa, kuabiani kuaxun ka aín xubunuax bakëntankëx kanikë unikama a ꞌimainun an ñu mëëxunkë aín unikama amira sinánkë akama timëakëxa, timëkëx ka trescientos dieciocho a unikama ꞌiakëxa, usakin timëtankëx ka Abram ain unikama timëbiantankëx ꞌapukama nui Dan kakë ëma sënë́nkë anu bëbakëxa. 15Anu bëbax ñantabukëbëtan ka Abramnën aín unikamabëtan atun sinánkënumashi ratukinshi anu bukukë ami bëbarukin ꞌakëxa, abë ꞌakanankin ka a ꞌapukama abámikin Hobá anu sënën ꞌakëxa, ax ka Damasco ëma aín tsipumi ꞌikë au ꞌiakëxa, 16usokin ꞌakëxa ꞌapukama abákëbëtan atun buánkë kamabi ñukama biakëxa. Usakin bianan ka Abramnën ꞌain xukënan bëchikë Lot ain ñukama ꞌain ñukamabi biakëxa, bianan ka xanukama bianan raíri unikamaribi biakëxa.
Melquisedecnën ꞌupiokin Abram sinánxuan
17Usokin ꞌatankëx ka Abram amiribishi utëkëankëxa, Quedorlaómer kakë ꞌapu akëñun raíri ꞌapukama abëa ꞌikë akamakëñunbi ꞌabëtsinia ka Sodomanu ꞌikë ꞌapu an upíokin biakëxa, Savé kakë me sapan anuxun biakëxa, a mex ka ꞌapukaman me kakë ꞌiakëxa. 18ꞌImainun ka bëtsi ꞌapu Melquisedec, kakë ꞌapu Salem ëmanu ꞌikë anribi biakëxa, ax ka sacerdote Nukën ꞌIbu Dios an kamabi ñu unio kushiira naí manámi ꞌikë aín uni ꞌiakëxa, an ka pán këñun vino ꞌinánkin.
19Upíokin sinánxunkin Abram ësokin kakëxa:
Mi ka Nukën ꞌIbu Dios naí manámi ꞌikë an naí
ꞌimainun mekama unio an ꞌupiokin sinánxunti ꞌikën;
20ꞌianan ka Nukën ꞌIbu Dios kamabi kushiñu an mi, abëmi ꞌakanankë unikama ꞌanun ꞌamikë ax ꞌupiokin rabikë ꞌiti ꞌikën.
Usakian Melquisedecnën kakëxun ka Abramnën an bibiankin buánkë ñukama raíri ꞌinánkëxa. 21ꞌInánkëxunbi ka Sodomanu ꞌikë ꞌapun Abram kakëxa:
—Unikama ashi ꞌë ꞌinánan kamina min bikë raíri ñukamabi buánti ꞌain.
22Usokin kakëxunbi ka Abramnën ësokin kakëxa:
—ꞌËn kana ësokin kana ꞌanuxun ꞌai kixun Nukën ꞌIbu kushiira an naíkëñun me unio a kan, 23ꞌën kana uisa min ñubi bikin ñuman chamarabi bianan, anúnmi tsitëkërëkikë abi anun ꞌën taxaka tëkërëkati bitsiman, mixmi uínsaranbi min ismina ꞌë ñuñuira ꞌimian kiax kitima kupín. 24ꞌËn kana añu ñubi ꞌënan ꞌiti bitsiman, usa ꞌain ka ꞌëx abë kuankë unikama atun pikë ax kuni ꞌásabi ꞌiti ꞌikën. Usa ꞌain ka ax ꞌëbë kuankë unikama Aner, Escol ꞌimainun Manré, akaman ainan ꞌinun ñu biti ꞌikën, ësakin ka Abramnën Sodomanu ꞌikë ꞌapu kakëxa.
© 1978, 1995, 2008, 2022 Wycliffe Bible Translators, Inc. All rights reserved.
