Génesis 15
15
Nukën ꞌIbu Diosan Abram achúshi ain bëchikë ꞌinánuxun ka bana
1Ënë ñukama ꞌatankëxa ꞌinúkë ꞌain ka Nukën ꞌIbun Abram namákin iskësokian isia kakëxa:
—Kamina rakuë́tima ꞌain Abram, ꞌëx kana an mi bërúankë a ꞌain. Min biti ñu ax ka chaiira ꞌinuxun ꞌaia. 2-3ꞌAínbi ka Abramnën kakëxa:
—ꞌËn ꞌIbu ꞌimainun ꞌën Dios, ¿uisa karana minmi ñu ꞌinánkëxun, ñankáishibi bixun ꞌati ꞌain, minbi kamina ꞌëx kana achúshi bëchikëñumabi ꞌai kixun ꞌunanin minbi kamina achúshi bëchikëbi ꞌë ꞌinankëma ꞌain? Usa ꞌain ka kamabi ꞌën ñukama an biti Eliézer Damasconu ꞌikë uni ꞌën kaniokë, an ꞌëx ñukëbëtan ꞌën kasunania ñukama biti ꞌikën. 4Ësokin kakëxun ka Nukën ꞌIbun kakëxa:
—Ësakin min bëchikënënbi ka mix ñukëbëtan min ñukamabi biti ꞌikën, bëtsi unin ka min ñu bitima ꞌikën.
5Usokin katankëxun ka Nukën ꞌIbun Abram ëman, buánxun ësokin kakëxa:
—Upiokin ka naí manámia ꞌispakama is, iskin kamina min tupuntisa ꞌikë tupunti ꞌain. Usaribi ka min rëbúnkinëx tupuntisamaira ꞌitsaira ꞌiti ꞌikë kixun kakëxa.
6Usakian kakëxun ka Abramnën usa ka asérabi Nukën ꞌIbu ꞌikë kixun sinánkëxa, sinánkëbë ka ax ꞌëx kikësabiokin ka ꞌaia kiax ami sinánkëxa.
7Ësakinribi ka kakëxa:
—ꞌËx kana min ꞌIbu ꞌain; usa ꞌixun kana ꞌën mi Ur kakë me anua caldeo unibu tsókë anua chikiankën, ënë me xënibua ꞌaínbi minanbi ꞌinun ꞌinánuxun.
8—Kakëxunbi, ka Abramnën ësokin kakëxa, ꞌën ꞌIbu ꞌimainun ꞌën Dios ¿Uisakin karana asérabi ka ꞌënan ënë me ꞌikë kixun ꞌën ꞌunánti ꞌain? —kixun ka Abramnën kakëxa.
9ꞌImainun ka Nukën ꞌIbu Diosan kakëxa:
—ꞌË kamina vaca xanu bërí kanikë achúshi bëxúnti ꞌain, bëanan kamina achúshi cabra ꞌimainun achúshi carnero, rabë́ ꞌimainun achúshi baritiañu kaísun bëti ꞌain, achúshi achúshi ꞌimainun kamina ñumakuru bërí kanikë achúshiribi bëanan rabëtax nikë numakuru bëti ꞌain.
10Usakian kakëxun ka Abramnën a ñuinakama Dios bëxúankëxa, bëxun ka panárabë okin tukaxun amo rabëbi bëtsi bëmánon buküankëxa; ꞌanan ka ñuina pëchiñu rabë́ a tukakinma usabi nankëxa. 11Usakin ꞌatankëxuan buküanbi ka an bamakë ñuina pikë xëtëkama ñuinanën nami pikatsi kiax manánux ubakëxa, ubax anu këñubutia ka Abramnën ꞌibiankëxa.
12Usakian a ñukama ꞌakëbëa ñantabuan ka a imë́ Abram ꞌaimai rëti ꞌuxakëxa. Usai ꞌuxkënkëbi ka achúshi chaiira bëánkibukë an bëararákëxa usakin ꞌakëx ka ꞌaisamairai rakuë́akëxa. 13Usai rakuë́tia ka Nukën ꞌIbun kakëxa:
—Min kamina ꞌunánti ꞌain, min rëbúnkikamax ka aín menu tsótima bëtsi menu tsónuxun ꞌaia, ꞌimainun ka anuxun ꞌaisamaira okin ñumëmikë ꞌinuxun ꞌaia, ꞌimainun ka ꞌaisamaira okin ꞌatima okë ꞌiti ꞌikën, cuatrocientos baritia sënë́ntamainun. 14ꞌAínbi kana ꞌënribi a ëmanu ꞌikë unikama an atu bëtsi bëtsi okin tëmëramikë aribi ꞌatima okin tëraminuxun ꞌain, usakin ꞌakë ꞌain ka min rëbúnki kamax ꞌaisamaira ñuñu ꞌaish chikinuxun ꞌaia. 15Mix kamina ꞌitsa baritia tsóti kuëënnuxun ꞌain, usai ꞌitankëx kamina xënira ꞌaish ñuti ꞌain, ñutankëx kamina min rara kamabë timë́ti kuanti ꞌain. 16Usai cuatrocientos baritia tsótankëx ka min bëchikënën bëchikë min xuta aín bëchikënën bëchikë akamax ka min rëbúnki ꞌaish amiribishi ënë menu utëkënuxun ꞌaia, usa ꞌaínbi ka anun ꞌën amorreo unikama aín ꞌucha kupín ꞌatima oti nëtë ꞌisama pain ꞌikën.
17Usai ñantabukë a imë́ ka Abramnën isakëxa, achúshi ñute chaiira xanuxuan me ꞌakë usa anuaxa ꞌaisamaira kuin chikitia isanan ka achúshi tsi rëkirukësa axa ñuina nami tukapaxun nankë nëbë́tsinën inutia isakëxa. 18Usa ꞌain ka a nëtënbi Nukën ꞌIbun Abrambëtan achúshi ñu ꞌakin kakëxa:
—Ënë mekama kana min rëbúnkikama ꞌinánti ꞌain, Egipto bakamiaxa ukë me anuax ꞌimainun baka chaiira Éufrates kakë anu sënë́nbi kana ꞌinánti ꞌain. 19Ax ka quenitakaman me ꞌikën, ꞌimainun ka quenizitakama, cadmoneokama, 20hititakama, ferezeokama, refaítakaman me, 21amorreokama, cananeokama, gergeseokama ꞌimainun jebuseokama ënë unikaman me kana mi ꞌinánti ꞌain.
© 1978, 1995, 2008, 2022 Wycliffe Bible Translators, Inc. All rights reserved.
