Génesis 13
13
Abram ꞌimainun Lot ënanan
1Usa ꞌain ka Abramnën Egiptonuax chikíkin aín xanu, ꞌimainun kamabi aín ñu buani kuankëxa, kuanika amiribishi rikiani Négueb me ꞌikë anubi kuantëkëankëxa. Kuankëbë ka aín piaka Lot axribi atubë kuankëxa. 2Abram ax ka ꞌiakëxa uni ñuñuira, usa ꞌaish ka kuri ꞌimainun manë uxua kuríkiñu ꞌianan, ꞌitsaira aín ñuina ꞌarakakëñu ꞌiakëxa. 3Néguebnuax amiribishi munu ꞌikiani kuantankëx ka Betel kakë ëma ꞌurama anu paian ꞌikian Betelbëtan Ainën nëbë́tsionkë anu ꞌiakëxa. 4A mex ka anu paian anuxun Nukën ꞌIbu Dios rabiti maxá bukunrukin ꞌakë a ꞌiakëxa, anuxun ka Nukën ꞌIbu rabiakëxa. 5Usa ꞌain ka Lot axribi ñuñuira uni ꞌi aín kuku Abramsaribi ꞌaish, an ñu ꞌaxúnti xanu xuntakukama, ovejakama ꞌimainun vacakama ꞌianan, an ñu mëëxunkë unikamabëbi anu ꞌiakëxa; 6ꞌaínbi ka anua atux ꞌikë anu aín ñuina ꞌitsaira ꞌain ñuinakaman pasto piti sënë́nma ꞌiakëxa. Usa ꞌain ka a rabëtax anu ꞌisama ꞌain, 7an Abramnën vacakama bërúankë unikamabë Lotnën vaca an bërúankë unikama nishanani ubionankëxa. Usa ꞌain ka a nëtëkaman, cananeo ꞌimainun ferezeo unikamax pain anu tsókë ꞌiakëxa.
8Usa ꞌain ka Abramnën achúshi nëtën aín xukë́nan bëchikë Lot ësokin kakëxa: Mix kamina ꞌën ꞌaintsi ꞌibu ꞌain, usa ꞌain kananuna nu rabë́ upiti nuibananti ꞌain, usaribiti ka an nun ñuina bërúankë unikama nishananima nuibananti ꞌikën. 9Usa ꞌain kamina min kuëënxun uimiu karamina ꞌiti ꞌain kixun me bariti ꞌain. Usa ꞌain kamina ꞌëbë ꞌima amo kuanti ꞌain. Mixmi aín tsipumi kuankëbë kana ꞌëx aín rëbumi kuanti ꞌain, mixmi aín rëbumi kuankëbë kana ꞌëx aín tsipumi kuanti ꞌain. 10Usakian Abramnën kakëxun ka Lotnën me upí anu ꞌiisa Jordán kakë baka ꞌurama anua ꞌumpax ꞌitsaira ꞌikë a isakëxa, iskin ka Sóar ꞌurama ꞌikë ëma chukúma aribi isakëxa, usa ꞌain ka a menu ꞌitsaira ꞌumpax ꞌimainun naësa me chaiira ꞌikë isakëxa. Ax ka Egipto me iskësa ꞌiakëxa. (Ënëx ka Nukën ꞌIbun Sodoma ꞌimainun Gomorra ëma këñutisama pain ꞌain ꞌiakëxa.) 11Usa ꞌain ka Lotnën kamabi Jordán kakë baka anu ꞌikë me sapan kaisakëxa, anuax ka anua ꞌikë anuax amiaxa bari urukë ami kikiani kuankëxa. Usai ꞌika Abram ꞌimainun Lot ënanankëxa. 12Usa ꞌain ka Abram axa Canaán kakë me anubi bërúmainun, Lot ax me sapan amia ꞌikë ëmakama Sodoma ꞌimainun Gomorra a ꞌurama tsóti kuankëxa, 13anuxun ka kamabi unin ꞌatima ꞌixun ꞌaisamairai Nukën ꞌIbumi ꞌuchakin bëtsi bëtsi ñu akëxa.
14Usaia anuax Lot kuankë ꞌain ka a basikëbëtan Nukën ꞌIbun Abram kakëxa: Anumi ꞌikë ënuxunbi kamina upíokin aín tsipumia isanan aín rëbumiokin isti ꞌain, isanan kamina amiaxa bari urukë amia isanan amia bari kuabúkë amiaribi isti ꞌain; 15ꞌën kana kamabi me min iskë ënëkama mi ꞌinánti ꞌain, ax ka minan ꞌianan xënibua ꞌaínbi min rëbúnki kamanan ꞌiti ꞌikën. 16ꞌËn kana min rëbúnkikama ꞌaisamaira menu ꞌikë masin bërusa ꞌinun ꞌimiti ꞌain. Usa ꞌaish ka masi bëru tupuntisama usaribi ꞌiti ꞌikën, ꞌianan ka tupuntisamaira min rëbúnkikama ꞌiti ꞌikën. 17¡Usa ꞌain kamina bërí nirukiani kuanxun ꞌën mi ꞌinánuxun kakë me a pain isi kuanti ꞌain, iskin kamina aín chaxkë́ ꞌimainun aín pampa, akama pain isikuanti ꞌain akama kana mi ꞌinánti ꞌain! 18Usa ꞌain ka Abram anua ꞌikë anuax aín ñukama mëniobiani niñu me Mamré kakë uni ainan ꞌain Hebrón kakë ëma ꞌurama ꞌikë anu ꞌi kuankëxa. Anuxun maxax bukunrukin ꞌatankëxun Nukën ꞌIbu rabiakëxa.
© 1978, 1995, 2008, 2022 Wycliffe Bible Translators, Inc. All rights reserved.
