Génesis 12
12
Nukën ꞌIbu Diosan Abram kakë uni kaisa
1Usa ꞌain ka Nukën ꞌIbun achúshi nëtë ꞌikëbëtan Abram kakëxa: min menuax ka kuantan, min aintsikama ëbiani kamina ënë menuax kuanti ꞌain, bëtsi menu kamina kuanti ꞌain, ꞌën mi ismimainun. 2Min rëbúnki kamabëtan kana achúshi ëma chaiira ꞌanuxun ꞌain; ꞌanan kana upíokin sinánxunti ꞌain, usakin ꞌaia iskin ka bëtsi unikaman a unikamax ka sinánñuira ꞌianan kushiirabu ꞌikë kiax kiti ꞌikën, mi kupín kana kamabi menu ꞌikë unikama upitax bukunun upíokin sinánxunti ꞌain. 3Uin kara mi upíokin ꞌakinia aribi kana ꞌën upíokin sinánxunti ꞌain, ꞌimainun kana uin kara mi ꞌatima oia aribi ꞌënribi ꞌatima oti ꞌain; mi kupí kana kamabi menu ꞌikë unikama upíokin sinánxunti ꞌain.
4Ësokian kakëx ka Abram Nukën ꞌIbun kakësabi oi Harán kakë me anuax kuankëxa. Setenta ꞌimainun cinco baritiañu ꞌaish ka anuax chikíakëxa Canaán kakë me anu kuani. 5Kuankin ka aín xanu Sarai këñun aín piaka Lot buánkëxa, ꞌimainun ka aín ñuina aín ñukama ꞌimainun aín ñumëmikë unikama Harán kakë me anuxuan bikë akama buánkëxa. Buani kuanx ka Canaán menu bëbakëxa, 6bëbakiani kuani ka Abram a mekama inubiani kuanx Siquem, anua i chaiira nikë Moré kakë anu bëbakëxa. A menu ka cananeo unikamax tsóakëxa. 7A menuax ami mërakin ka Nukën ꞌIbun Abram kakëxa: Ënë me kana min rëbúnkikama ꞌinánti ꞌain. Usakian kakëxun ka Abramnën achúshi anuxun Nukën ꞌIbu asábi ka kixun kati maxax bukunrukin ꞌakëxa, anuaxa ami mërakë kupí.
8Usai ꞌitankëx ka anuax chikíkiani kuanxun amiaxa bari urukë Betel kakë ëma au ꞌikë niñu me anu xubusa okin aín chupa këxtú pëniankëxa. Betel kakë ëma ax ka amia bari kuabúkë au ꞌikë ꞌiakëxa, ꞌimainun ka achúshi ëma. Ai kakë axribi amiaxa bari urukë au ꞌikë ꞌiakëxa. A menuxunribi ka Abramnën anuxun Nukën ꞌIbu rabiti ꞌatankëxun rabiakëxa. 9Usakin ꞌatankëx anu pain ꞌitankëx ka munu ꞌikiani kuani, Négueb kakë me ami kikiani kuankëxa.
Abram Egipto kakë menu tsóti kuan
10Usa ꞌain ka anua Abram tsótanbi a menu a piti ñu ꞌaimaira ꞌiakëxa, usa ꞌain ka Abram a menuax ꞌitsama baritia ishi, Egipto menu anua a piti ñu ꞌain anu tsóti kuankëxa, anua ꞌikë me anua a piti ñu a nëtënu ꞌaimaira ꞌain. 11Usai kuani ka Egipto menu bëbai kuankin, ain xanu Sarai Abramnën kakëxa, ësokin: mi kamainun Ka kuat, mix kamina achúshi xanu upíira ꞌën iskëx ꞌain, 12usa ꞌain ka egipcio unikamax mi isi kiti ꞌikën: Ënë xanux ka ënë unin xanu ꞌikën. Ësai kikin ka ꞌë minun kuëënkin mi binxun ꞌakánti ꞌikën. 13Usa ꞌain kamina, ꞌëx upí ꞌinun mix ismina ꞌën chirabakë ꞌai kixun kati ꞌain.
14Usokin kabiani kuanx ka Abram Egipto menu bëbakëxa, bëbaia ka anu ꞌikë unikaman aín xanu Sarai axa upíira xanu ꞌikë isakëxa. 15Ismainun ka Egiptonu ꞌikë ꞌapu faraón an ñu mëëxunkë unikamanribi isakëxa, isiani ka anu ka achúshi xanu upíira uaxa kixun kai rikiankëxa. Kakëxun ka aín unikama aín ꞌikënu bëtánun kixun kakëxa kakëxun ka aín ꞌikënu. 16Usa iskin ka faraónën Sarai kupí, Abram upíokin ꞌakinkin ꞌinaishiakëxa oveja, vaca ꞌimainun uni an ñu mëëxunti ꞌimainun xanu an ñu ꞌaxúnti akama ꞌinánkin asno, ꞌimainun camello akamaribi ꞌinánkëxa. 17ꞌAínbi ka Sarai kupí, Nukën ꞌIbun faraón ꞌatimokin tëmëramiakëxa aín aintsikama këñunbi ꞌanan kamabi unikamaribi ꞌinsínmiakëxa. 18Usai ꞌikin ka faraónën Abram kamiakëxa, kamikëxa aia ka kakëxa: ¿Uisa kupín karamina ësokin ꞌën ꞌan? ¿Uisa kupín karamina min xanu ꞌaínbi ax ka ꞌën xanuma ꞌikë kixun ꞌë kakëma ꞌain? 19Mix kamina min chirabakë isa ax ꞌikë kiax kian, kikëbëtan kana ꞌën xanu ꞌiti bian. Biaxi kana abë ꞌikëma ꞌain usa ꞌain kamina buánti ꞌain. ¡Mi ꞌinantëkënmainun kamina bëríbi buánti ꞌain! 20Usakin Abram katankëxun ka faraónën aín unikama kakëxa, kamina Egipto me ënua Abram aín xanu ꞌimainun aín ñukama këñunbi kuantanun xuti ꞌain.
© 1978, 1995, 2008, 2022 Wycliffe Bible Translators, Inc. All rights reserved.
