Mataayo 9
9
ɄYeesu ali ni‑ikhone ɨlya‑akhobhoshele ɨmbiibhi
(Maalʉko 2:1-12; Luuka 5:17-26)
1ɄYeesu ahatʉʉha mu waato, ahalobhoha ɨnsʉmbi ɨyɨ Galilaaya. Ahaweela hwi‑ibooma lyakwe ɨlyɨ Kapelenawumu. 2Ɨpo abhantu bhamo bhahanʼneetela ʉmʼminu ʉyo wa‑ahafwiye hundwɨmo, agonile mu shɨlɨlɨ. ɄYeesu lwa waalola zya bhabhomba abhantu bhaala, ahamanya huje bhali nʉ lwɨtɨho. Ahamʼmʉʉzya ʉmʼminu ʉyo ahaga, “Wee mwana waanɨ, ʉhwipeele ʉmwoyo! Ɨmbiibhi zyaho zikhobhosheliilwe.” 3Ɨpo bhamo mu bhamanyizyi abhɨ ndajizyo zya Moose bha bhahali paala, bhahahwisɨbhɨɨlɨla mu mooyo gaabho bhahaga, “Enya, ʉmuntu ʉnʉ ahunʼniga yʉ Ngʉlʉbhɨ!” 4Leelo ʉYeesu ahazimanya zyonti zya bhahazisɨbhɨlɨlaga, ahabhabhʉʉzya ahaga, “Hu nongwa yeenu musɨɨbha ɨmbiibhi mu mooyo geenyu? 5Ɨshi lilihu lya lili lipʉpʉʉsu tee, humʼmʉʉzye ʉmuntu huje, ‘Ɨmbiibhi zyaho zikhobhosheliilwe,’ awe humʼmʉʉzye huje, ‘Ɨmɨɨlɨla, bhalaga’? 6Ɨshi leelo, mumanye huje anɨ nɨMwana wa Muntu ɨndi ni‑ikhone ɨlya hubhakhobhoshele ɨmbiibhi mu nsi.” Ɨpo ʉYeesu ahamʼmʉʉzya ʉmuntu ʉla wa‑ahafwiye hundwɨmo huje, “Ɨhubhʉʉzya ɨnjiga, ɨmɨɨlɨla, ega ɨshɨlɨlɨ shaaho, bhalaga hu khaaya!” 7Ɨpo ʉmuntu ʉla ahɨmɨɨlɨla, ahabhala hu khaaya yaakwe. 8Ɨmpʉga ɨya bhantu hu habhaazyo lwa yazilola ɨzyo, yahabha nʉ wooga tee. Bhahamʼmwamiha ʉNgʉlʉbhɨ ʉyo abhapiiye abhantu ikhone nanshi ɨlyo.
ɄYeesu ayɨnzɨle hubhafyʉle abhabhomba mbiibhi
(Maalʉko 2:13-17; Luuka 5:27-32)
9Hu habhaazyo ɨho ʉYeesu lwa‑ashila afume ʉhwo, ahanʼnola ʉnʼsomvya sonko ʉmo ʉyo itaawa lyakwe yʉ Mataayo, akhɨɨye pa‑ahasomvezyaga ɨsonko. ɄYeesu ahamʼmʉʉzya ahaga, “Wee Mataayo, ɨnzaga, ʉmbɨnjɨlɨzyaje anɨ, ʉbhe nʼsundwe waanɨ.” ɄMataayo ahɨmɨɨlɨla, ahanda humʼmɨnjɨɨlɨle. 10Ɨpo ʉYeesu ahabhala alye ɨshalye hwa Mataayo. Hu habhaazyo ɨho lwa bhali mu nyumba, bhahatʉʉha abhasomvya sonko bhabhinji na bhabhomba mbiibhi, bhahakhala peeka nʉ Yeesu na bhasundwe bhaakwe. 11ABhafalisaayo lwa bhahazilola ɨzyo, bhahabhabhʉzɨɨlɨzya abhasundwe bha Yeesu bhahaga, “Yeenu ʉMʼmanyizyi weenyu asangaana na‑alye peeka na bhasomvya sonko na bhabhomba mbiibhi?”#9:11 ABhafalisaayo bhahazikhɨɨte haani ɨndajizyo zya Moose. Bhaala bha saga bhahazikhataga ɨndajizyo na miiho gaabho ga bhonjezɨɨzye, bhahabhakwizyaga bhabhomba mbiibhi. 12ɄYeesu lwa wʉmvwa ɨzyo, ahabhabhʉʉzya ahaga, “Abhantu bha saga bhabhinile, saga bhahumʼmwanza ʉnʼganga, lyoli abhabhinu bha bhahumʼmwanza ʉnʼganga! 13Ɨshi, bhalaji mumanyile ɨngalulanyo ɨyɨ mazwi ɨga, ‘Ɨhwanza ɨnkʉmbʉ ashile ɨnsangu ɨzya‑alʉngʉlɨzye.’#Bhaazya Hoseya 6:6. Ɨnjanjile ɨsho, pɨpo saga ɨnɨnzɨle hubhakwizye abhantu bha bhahwilola bhagolosu, ndaadi! Lyoli ɨnɨnzɨle hubhakwizye abhabhomba mbiibhi.”
ɄYeesu alɨngaanisya ɨmanyizyo ɨnkʉʉlʉ nɨ njenu
(Maalʉko 2:18-22; Luuka 5:33-39)
14Ɨpo abhasundwe bha Yoohani ʉMwozi bhahabhala hwa Yeesu, bhahamʼmʉzɨɨlɨzya bhahaga, “Atɨ na Bhafalisaayo tihwiyiima alye ɨshalye. Yeenu abhasundwe bhaaho abheene saga bhahwiyiima alye?” 15ɄYeesu ahabhaamula ahaga, “Bha bhaniilwe nʉ mweji bhagazugumila wɨlɨ, lwa bhali peeka nʉ mweji? Leelo hu nsiku zya zihwɨnza, abhalʉgʉ bhaakwe lwa bhahayihumʼmwefwa ʉmweji paahati pa bhaanwa bhaakwe, ɨpo pa pɨɨpo abhaanwa bhahayihwiyiima alye. 16Asangaanye ɨmanyizyo zyanɨ zya zili njenu na miiho geenyu hulɨngaana lwene nanshi apatishe ɨshipatiho ɨshɨ mwenda ʉmʼpya mu mwenda ʉnʼkʉʉlʉ. Ɨshi, nkashele wabhomba ɨsho, ɨshipatiho shiila shibhala‑azembule ʉmwenda ʉnʼkʉʉlʉ, na‑azembushe hwakwe hubhala hwonjeelele tee. 17Nantele, asangaanye ɨmanyizyo zyanɨ zya zili njenu na miiho geenyu hulɨngaana lwene nanshi asulule ɨdivaayi#9:17 Ɨdivaayi shimwelo sha bhalɨngaanya afume mu zabiibu, nantele shahamanyiishe hwa Bhayahuudi. Ɨdivaayi lwa yaalʉla, ɨbha nanshi ɨhombwa shɨ‑ɨli. Bhaazya izwi Divaayi hu Ngalulanyo ɨyɨ Mazwi aMajenu hu malishilo wɨ shitaabu ɨshi. ya saga ndozu mu nyambɨ#9:17 nyambɨ ABhaizilaeeli bhahabhɨɨhaga ɨdivaayi mu nyambɨ. Ɨnyambɨ ɨzyo bhahazigombaga afumilane nɨ nkwembe ɨzyɨ mbuzi. Ɨnkwembe ɨnkʉʉlʉ zyahapwaguhaga zyene, pɨpo zyahapotwaga abʉʉse tee ɨdivaayi yɨ‑ɨli ʉmwo lwɨ‑ɨlʉla. Leelo ɨnyambɨ ɨmpya saga zyahapwaguhaga, pɨpo ɨzyene zyahabʉʉsaga tee. ɨnkʉʉlʉ, pɨpo lwɨ‑ɨlʉla na‑atutubhe, ɨnyambɨ ɨbhala‑akunwe abʉʉse, lyoli ɨnza‑apwagushe. Ɨdivaayi yope ɨnza hwitishe. Ɨdivaayi ya saga ndozu ɨhwanziwa abhɨɨhwe mu nyambɨ ɨmpya. Ɨpo vyonti vibhɨɨlɨ, ɨnyambɨ ɨmpya nɨ divaayi ya saga ndozu vibha shinza!”
ɄYeesu ahumʼponia ʉnʼshɨ ʉmo na hunʼzyʉsye ʉnʼnɨndu
(Maalʉko 5:21-43; Luuka 8:40-56)
18Hu habhaazyo ɨho ʉYeesu lwa‑ali sha‑ayanga na bhasundwe bha Yoohani, lwʉlwo ahɨnza ʉnʼnongozi ʉmo, ahasugamila pitagaalila lyakwe, ahamʼmʉʉzya ahaga, “Wee Mwɨnɨ, ʉmwalɨ waanɨ afwiye shɨɨshi lwene. Ɨshi ɨhulaabha, saali ʉmʼmɨɨshɨle ɨnyoobhe zyaho huje azyʉshe.” 19Ɨpo ʉYeesu ahasogola peeka na bhasundwe bhaakwe, bhahamʼmɨnjɨɨlɨzya ʉnʼnongozi ʉla.
20Enya, ahabhaazyo hahaala, ʉnʼshɨ ʉmo ʉyo ahayɨmbɨle nɨ mpʉngo ɨya‑azwe idanda hu shishɨ#Bhaazya ɨMbombo ɨzya Bhalaawi 15:25-30. hu maaha ishʉmi na gabhɨɨlɨ, ahabhala hwisinda hwa Yeesu, ahapalamansya ʉlupinto lwɨ mwenda gwa Yeesu. 21Ahabhombile ɨsho, pɨpo ahasɨɨbhɨle mu mwoyo gwakwe huje, “Nkashele nagupalamansya lwene ʉmwenda gwakwe, ɨmbala‑apone.” 22Hu habhaazyo lwa wapalamansya, lwʉlwo ʉYeesu ahagaluha hwisinda. Ɨpo hu habhaazyo lwa wanʼnola ʉnʼshɨ ʉla, ahamʼmʉʉzya ahaga, “Wee nʼnɨndu waanɨ, hwipeele ʉmwoyo! Ʉponile, pɨpo ʉli nʉ lwɨtɨho!” Lwʉlwo, ʉnʼshɨ ʉla ahapona.
23ɄYeesu lwa waafiha mu nyumba ya nʼnongozi ʉla, ahabhaaga abhantu abhinji bhabhʉngɨɨne, bhahunʼzonda ʉnʼnɨndu ya‑ahafwiye. Abhamo bhahakhomaga ɨmpeeta. 24ɄYeesu ahabhabhʉʉzya ahaga, “Amwɨ, epi ɨpa! Ʉnʼnɨndu ʉnʉ saga afwiye, leelo agonile tulo lwene!” Abhantu bhaala lwa bhʉmvwa ɨsho, bhahanʼseha ʉYeesu. 25Ɨpo ahayifumya hwʉnzɨ ɨmpʉga ɨya bhantu, ahatʉʉha hu mpanda, ahanʼkhata ʉnʼkhono ʉnʼnɨndu ʉla, wope ahɨmɨɨlɨla. 26Ɨnongwa ɨzyo zyahanyampaana mu nsi yonti ɨla.
ɄYeesu ahubhaponia abhantonko bhabhɨɨlɨ
27ɄYeesu lwa wasogola paala, abhantonko bhabhɨɨlɨ bhahamʼmɨnjɨɨlɨla, bhahanʼkwizya hwi‑izwi igoosi bhahaga, “Wee Yeesu, Mwana wa Daudi,#9:27 Mwana wa Daudi ABhayahuudi bhahasʉbhɨlaga huje, ʉMʼfyʉli ʉKilisiti ahayifumila mu shikholo ɨsha mwɨnɨ ʉDaudi. Bhaazya izwi Mwana wa Daudi hu Ngalulanyo ɨyɨ Mazwi aMajenu hu malishilo wɨ shitaabu ɨshi. Nantele, bhaazya ɨNsalifyo 89:3-37; Yelemiya 23:5-6; Ezekiyeeli 34:23-24. tihulaabha ʉtilolele ɨnkʉmbʉ!” 28Ɨpo ʉYeesu ahatʉʉha mu nyumba, abhantonko bhaala bhope bhahatʉʉha. Ɨpo ahabhabhʉʉzya ahaga, “Wɨlɨ, muhwɨtɨha huje ɨmbajiiye hubhaponie?” Bhahamʼmwamula bhahaga, “Ena Mwɨnɨ! Tihwɨtɨha.” 29Ɨpo ʉYeesu ahabhapalamansya amaaso gaabho, ahabhabhʉʉzya ahaga, “Gabhombeshe huliimwɨ nanshi sha lulɨɨho ʉlwɨtɨho lwenyu.” 30Lwʉlwo, amaaso gaabho gahanda alole. ɄYeesu ahabhasunda hwi‑ikhone ahaga, “Musahasheele humʼmʉʉzye ʉmuntu wowonti ɨnongwa ɨzi!” 31Leelo abheene bhahabhala, bhahanyampaanya ɨnongwa zyakwe mu nsi yonti ɨla.
ɄYeesu ahumʼponia ʉmʼbwibwi
32Abhantu bhaala lwa bhahasogola paala, abhantu abhanjɨ bhahanʼneetela ʉYeesu ʉmuntu ʉmo ʉyo ahali ni‑ipepo lya lyahamʼmɨɨshɨle abhe mʼbwibwi. 33ɄYeesu ahalishɨmbɨzya ipepo liila. Pɨnɨɨpo, ʉmuntu ʉyo ahanda ayanje. Ɨmpʉga ɨya bhantu ya yahali paala yahaswiga tee, yahaga, “Mu nsi yonti ɨyɨ Izilaeeli saga zilɨnjɨle afumile nka lisiku lyeka nanshi ɨzi!” 34Leelo aBhafalisaayo bhahajehanaga bhahagaga, “Enya, ahugadaga amapepo hwi‑ikhone lya nʼgoosi ʉwɨ mapepo gonti!”
Abhavune bhashe
35Ɨshi ʉYeesu ahali azyʉngʉʉla mu mabooma amagoosi gonti na mu vipanga, ahabhamanyizyaga abhantu mu nyumba zyabho ɨzya‑apuutile na‑amanyiilile. Ahabhalʉmbɨlɨlaga ɨNongwa ɨNyinza ɨzyɨ wumwɨnɨ ʉwa hu mwanya na hubhaponie ʉbhinu ʉwɨ waaji wonti. 36Ahabhaazyo lwa‑ahuyilola ɨmpʉga ɨya bhantu, ahayilolela ɨnkʉmbʉ. Bhahayɨmbaga hu nongwa ya‑aje saga bhahali nʉ wa hubhaavwe, bhahali nanshi ɨngoole zya saga zili nʉ nʼdiimi. 37Ɨpo ahabhabhʉʉzya abhasundwe bhaakwe ahaga, “Ɨviyabho vinji tee vyelile mu nʼgʉnda, leelo abhavune bhali bhashe. 38Ɨshi, munʼnaabhe ʉmwanɨɨsho nʼgʉnda, asonteelezye abhavune.”
© 2022, Wycliffe Bible Translators, Inc. All rights reserved.
