Keriekitho 39
39
Josef mu Potifar Kimia
1Siro mia Josef ze Ijipt nu tsuta, mu Potifar, Faro khro kezha puo, mia kepfheko kezhau mu Ijiptmia puo, Ishmaelko puo ze sünu ketsurko kinu puo khrülie. 2Jihovae Josef ze tuo, sidi puo lhou khriekeliemia puo chüta; mu puoe puo niepuu Ijipt-u kinu tuoya. 3Siro puo niepuu rei Jihovae puo ze ketuo, tsiu puo dzie mhatho pete nu puo bu lhou khriekelie ngushü. 4Sidi Josef-e puo mhodzünu puo neipfülie di puo bu puo lie chülie, sidi puo chüpie puo kinu mha pete kemeho-u chüwa. 5Siro puo chüpie kinu kemeho-u mu puo vie pete kemeho-u chükewa sie Jihovae Josef la japie Ijipt-u ki nu shü, sidi Jihova thejau puo vie ki nu mu lie nu rei mha pete gei vorlie. 6Süla puo puo vie pete pie Josef dzie nu shüwa; sidi puo thuo puo kecü niekhrüdau rübei sie mha kekrei puo la rei puo nounyüya mota.
Siro Josef-e puolhe puolhou vi mu zivi. 7Puotei huo sie puo niepuu kimia mhi-e Josef gei bata, sidi puo sie, “A zezhücie.” 8Derei puo mvüta mu puo niepuu kimia ki, “Harie, a bakecü la a niepuu puo kinu mhapuorei dze le puo nounyüya mo, sidi puo vie ketuo pete kha a dzie nu shüwate. 9Ki hau nu puoe a ki zha mote, siro no zo kemosie mhapuorei a kinu khase keba jü, noe puo kimiacü la; siliro kedipuo mhie di a mha kesuo kezha hau chü di Ukepenuopfü gei phoumatuo ga?” 10Siro süpfü teisonhie Josef ki pu baya zo ürei puoe süpfü ze zhü mvü morei puo rübei süpfü ze ba rei mvüta. 11Derei khunhie puo, puo mhatho chütuoü kinu le, mu themiako puorei kinu ba mo. 12Sitse, süpfü puo pfhe teshülie di sie, “A zezhücie.” Derei puoe puo pfhe khapie süpfü dzie nu shüwa di ta kitie vota. 13Mu süpfüe puo pfhe rhuopie puo dzie nu shüwa di ki nunu taketa ngukeshü ki, 14puoe puo kinu themiako kie di süko ki, “Harie a nupfu Ibrimia puo ze vorkecüu puo u zhaseketuo la ze; puo a zezhütuoü vor mu a melie petoshü. 15Mu puoe a melie petokeshü si tse, puo pfhe khawa di tate.” 16Sidi puo niepuu vor kemochie, süpfüe puo pfheu khapie zhü tso, 17mu hapfüe puo ki rei sükemhie tou di thedzeu pu la di, “Kituo Ibriu, no puo ze hieko donu vorkeshüu, a zhasetuo üdi a ki vorwe, 18derei a a pfhephra petoshü mumetha, puo puo pfhe vapie a tsüwa di ki nunu tate.”
19Siro puo niepuue puo kimia puo ki pu di, “N kituou haicü chüpie a gei shüte,” icü sikeshü ki, puo nou meyie seta. 20Sidi Josef niepuue puo telie di puo khapie kedieki nu shüwa, kediu diemiako bayakezhau nu, sidi puo sünu kedie chü bata. 21Derei Jihovae Josef ze tuo zo, mu puo khrie mota mo zo, sidi puo chüpie puo bu kedieki kepfhekezhau khriepfülie. 22Sidi kedieki kepfhekezhau kedieko pete khapie Josef dzie nu shüwa; mu sünu mhakechü pete puo thuo chü phreta. 23Kedieki kepfheu mha pie Josef pelekewa puo la rei puo nou kemezhie mota, kekreilamonyü Jihova puo ze ketuo la; mu puo mhakechü pete nu Jihovae puo bu süu chükhrielieyakezha la.
The Bible Society of India
© 2023, Used by permission. All rights reserved. More
