Keriekitho 38

Juda mu Tamar Dze

1Siro Judae puo siezedzürieko kinu tuota di vor Adulammia Hira ücü puo khieki lhouta. 2Sünu Kananmia Shua ücüpfü puo ngushü; ru puo süpfü lielie, di puo ki vowata. 3Süpfü nuonipfülie di thepfumia puo penuoshü, ru puo puo za thopie Er chülie. 4Süsie rei süpfü nuonipfü lalie di thepfumia puo penuoshü mu hapfü puo za thopie Onan chülie. 5Süsie rei puo nuonipfü lalie di thepfumia puo penuo lashü, ru hapfü puo za thopie Shela chülie. Puoe hau penuokelie ki Kezib nu ba. 6Sitse Judae puo nuo nuorieu Er la thenu puo lieshü puo tsü, mu süpfü za Tamar. 7Derei Er, Juda nuorieu, Jihova mhodzünu ziezhü mota, süla Jihova puo pesiawa. 8Sitse Juda Onan ki, “No n dzürieu kimia ki vocie, sidi puo nupfu siezeu mhathoko chüpie puo gei shüwalie, sidi n dzürieu tsia pelhoushüliecie.” 9Derei Onan-e puo yieu puo vielie lhokecü si, süla puo puo dzürieu kimia ki vocü ki puo phoudzüu vapie kijü shüwa, puotsiau khapie puo dzürieu tsüwa moketuo la. 10Mu Jihova puo mhatho süu puo nei mo; süla puoe puo rei pesiawa. 11Sitse Judae puo miepfü Tamar ki, “No n puo kinu sami balie, a nuou Shela phichülie kemochie,” puoe puo rei puo dzürienie tuoi di siaketa keprei la. Süla Tamar vo di puo puo ki lhou tuota.

12Si keba teiu nu Juda kimia Shua nuopfü siata, mu Juda thekrü chü tseikewa sie, Timna nu puo kuomie kebeko ki kho, Adulammia puo zeu Hira unie. 13Sitse mia Tamar ki, “N meiu puo kuomie betuo üdi Timna nu khozhie ho.” 14Sitse puo puo geinu puo sami pfheneiko rhuowa, mu puo tsüdzeu pie puo yapfülie, di Enaim kharuu nu balie, süusü Timna nu kevo chau nu ba; puoe Shela phichülieta zorei puo bu puo ki nyi kemo ngu batacü la. 15Siro Juda puo ngu tse, süpfüü thethenumia ücü leta, süpfüe puo zie dzepfülieketa la. 16Sitse puo tuo cha khie hapfü ki vo di sie puo ki, “Vor di, a bu n ki vocie,” ishü. Puo hapfü üse puo miepfü ücü si kemo la. Sitse süpfü puo ki, “N bu a ki lelieketuo la, no kedipuo se a tsü ta?” 17Sitse puoe süpfü die kela di “A temvü kro nunu temvünuo yopuo ketseshütuo,” sitse süpfüe sie, “No süu ketseshü kemo ki, mhapuo a ki phrashülietuo nyü?” 18Sitse puoe sie, “A bu mha kikecüpuo phrashü n tsü ta?” ru süpfüe sie, “N zasi mu n ro-u, tsiu n dzie nu ketuo n theu liecie.” Süla puo süko khapie süpfü tsüwa, di puo ki lewa, mu süpfü puo geinu nuonipfülieta. 19Süsie süpfü sielie di tuota, di puo geinu puo zie keyau biewa, di puo sami pfheneiko se lalie.

20Siro Judae thenupfü dzie nunu puo phrakeshüko lie lalietuo üdi puo zeu Adulam-u dzie nunu temvü yopuo ketseshü, derei süu süpfü pfhü pejüta. 21Süla puo thechü sünu themiako ketso di sie, “Enaim nu kevo cha khieki keba rüsuoki thethenupfü kirapuo ba ga?” Sitse uko sie, “Hanu thethenumiapfü puorei ba vor mo.” 22Sitse puo Juda ki la vo di, “A puo ngulie mote, mu sünu keba themiako rei, ‘Thethenumia puorei hanu baya mo,’ itelie.” 23Sitse Judae sie, “Süpfü thuo süko se batalie, moro avu mia krenyü chütatie ru, a temvüyo ketseshü derei puo ngulie mote.”

24Thekhrü se mese sie nu mia Juda ki, “N miepfü Tamar we thetheliewate; sizomonyü puoe thethe lie di nuonipfü tuote,” idi pushü. Sitse Juda sü sie, “Puo ze vorlie, di puo thewalie.” 25Mu mia puo ze vorkezhü ki puo die ketsepie puo meiu ki shü di pucü, “Mha hako niepuu geinu, a nuonipfü ba ücü siliecie,” sidi süpfüe sie, “A n ki chaya, hako supuo vie shi mehoshücie, zasiu, kero-u mu ketheu.” 26Sitse Judae süko silie di sie, “Hapfüe a ki miathokuo, ae a nuou Shela pie puo tsü kemo la eru.” Sidi puoe süpfü zezhü sa mota. 27Siro süpfü nuoze tei vorlie tse, nuobi puo va nu tuo di ngulie. 28Siro puo nuonuovachü chü vor tse, puo nuo yopuo puo dzie se par; sitse nuoze kethekepfüe sü pielie di kelo kemerie puo pie sügei phashü di sie, “Hau par rie.” 29Derei puoe puo dzie teshü la leta, harie, puo dzürieu parte; süla süpfüe sie, “No n thuo hai di mha pfüpha parta ze?” Sidi puo za thopie Perez#38:29 Puoca Varhuokewa puo. chülie. 30Süsienu puo siezeu par, mu puo dzie nu kelo kemerie puo tuo; mu puo za thopie Zera#38:30 Puoca Ziekruoicü; puo dzie nu kelo kemerieu la mecie. chülie.

選択箇所:

Keriekitho 38: ANBRBSI

ハイライト

コピー