Matthew 7
7
Sa Mipanggob Atta Anḵuwis Atta Udum
(Luk. 6:37-42)
1Pun ḵanan os Jesus, “Adiyu ḵuwison da asintataguyu ta adin os Apudyus diḵayu ḵuwison. 2Te sa inon ni anḵuḵuwisyu'tta udum, siya bos inon ni anḵuḵuwis Apudyus ḵan diḵayu. Nu umamdan inonyu we anguwis atta udum, umamdan os inon Apudyus we anguwis ḵan diḵayu. 3Ngaipam ay siya itotollong buḻaw si atan ni sunudnu ya adimpun maila setap si atam? 4Ngaipam ḵamman ḵanan atte sunudnu, ‘Ḵaanoḵ ud buḻaw si atam,’ ya annat setap si atam? 5Ḵapappailaḵa! Umuna oḵyane ḵaanom setap si atam ta pumataḵ ilam ya lamognu ḵaanon buḻaw si atan ni sunudnu.”
6Pinagatupan Jesus we nangipani mipanggob si adiyu ituttudu Ugud Apudyus atta tagu we angam-amsew ḵan adipun andongoḻ woḵ ḵanana, “Diḵayu ḵad, adiyu itton da ngaimane ampatog atta ngumoḻngoḻe asu te amo ḵumtobda. Ḵad adiyu bos itton ampatoge bongoḻ atta boḻoḵ te gudagudonda.”
Sa Ḵodaw Ḵan Apudyus
(Luk. 11:9-13)
7Ḵanan os Jesus, “Anḵodaḵodaw ḵayu oḵyan ḵan Apudyus woḵ ittona ḵan diḵayu. Singsingtonyu oḵyan woḵ odasanyu ya iggaiggayu oḵyane anḵugḵug woḵ mabuḵtan onob para ḵan diḵayu. 8Te ngaimane anḵodaw ḵan Apudyus maittan ya ngaimane ansingit, maḵaodas. Ḵad ngaiman ose anḵugḵug, mabuḵtan onob para ḵan siya. 9Awatna, diḵayu we an-ama, nu anḵodaw abengyu'ḵ tinapay, ittonyu ḵad ain batu? Naid adipun maḵwa. 10Ḵad nu anḵodaw aḵ ugadiw, ittonyu ḵad ain uḻog? Naid. 11Pun diḵayu we ḵabasbassuḻan, igammuyu we angitod si ambaḻu'tta abengyu, maguḻaman aḵ Amayu'd langit adina itton ambaḻu'tta anḵodaw ḵan siya. Sana mungimung ni tuttudun Jesus mipanggob atte luwaḻu.
12“Pun ḵoonyu'tta udum da pionyu we ḵoonda ḵan diḵayu te sana mungimung ni lintog Moses ya da intuttudun da profeta.”
Sa Ansuḻpite Lewangan
(Luk. 13:24)
13Pinagatupan Jesus woḵ ḵanana, “Angoy ḵayu'tte ansuḻpite lewangan. Te aḻwa lewangan ḵan allasu daḻane umoy ad infiernu, ḵad gapu ta aḻwa ya allasu annae lewangan, adu da angoy. 14Yaḵon gapu ta ansuḻpit lewangan ya ansigab daḻane umoy si biyag aḵ inggana ḵan Apudyus, aḵit da maḵaodas.”
Sa Ḵayu Ya Sa Bungana
(Luk. 6:43-45)
15Ḵanan os Jesus we nangipani, “Ummanyu'tta sinan profeta we dumatong ḵan diḵayu. Te sa ḵatollonganda an-ammaydae isun di karnero yaḵon sa ḵatuttuwaan, isudan tanane asu we ḵuman. 16Maḵwa imatunanyu da tagu we ḵaḵnat atte anggugunayda. Isuda ḵayu we mimatunan si kalasin ni bungana. Daḵampun aḵ buḻasan taḵu bayabat atte ḵawayan ya daḵampun os aḵ buḻasan taḵu de fig atte laslasi. 17Sa anggabae ḵayu ambaḻu ambubungana, sa dagele ḵad ose ḵayu lawweng ambubungana. 18Sa anggaba ḵade ḵayu adipun amunga'ḵ lawweng ya sa dagele ḵad ose ḵayu adipun amunga'ḵ ambaḻu. 19Ngaimane ḵayu we lawweng ambubungana, mapoḵpoḵ ya miballu si apuy. 20Pun sinsadi, lamog taḵu we angimatun atta sinan profeta'tte anggugunayda.”
Da Adipun Midoga Si Ampangatan Apudyus
(Luk. 13:25-27)
21Pinagatupan Jesus woḵ ḵanana, “Daḵampun aḵ losane angibaga ḵan saḵone ḵanana, ‘Apu, Apu,’ maḵaḻnoḵ si ampangatan Apudyus. Yaḵon da maḵaḻnoḵ, abus da angwa'tta pinion Amaḵ ad langit. 22Ḵad nu dumatong anguwisan Apudyus atta losane tagu, adu da ḵananda ḵan saḵone, ‘Apu, Apu, inusarni ḵaḻabbongam atta nangwaanni'tta sanae banag. Imbagani da paibagan Apudyus ya pinaḻyawni da aḻan ya ḵingwani da nakaskasdaaw.’ 23Yaḵon sa ibagaḵ ḵan dida, ‘Ippun paat igammuḵ ḵan diḵayu! Inḵayun, diḵayu we adipun tumuttuwa'tta pinion Apudyus!’ ”
Da Duwae Antaḵad Aḵ Boḻoy
(Luk. 6:46-49)
24Pun ḵanan Jesus we nangipani, “Losane andongoḻ ya tuttuwaona ḵoon da annae ibagaḵ, mipani si nalainge tagu we nantaḵad aḵ boḻoyna woḵ insaadna si labaw ni batu. 25Ummudan ḵad aḵ amod, lummitap woḵ bummibbid aḵ ampigsa, losan da sana tinupaḵan boḻoyna, adipun paat nagitot te nagagaaman nisaadanae batu. 26Sa andongoḻ ya adinapun tuttuwaon ḵoon, isuna nadong-oge tagu we nantaḵad aḵ boḻoyna si galgallis. 27Inniggana ḵad ummamdane udan, lummitap ḵan tinupaḵan ḵad ni ampigsae bali boḻoy, ḵawagase niwaḵas sadi ye boḻoy.”
28Naabus ḵade inugud Jesus ḵaḵna, sintataag da nadagupe tagu si inonae nantuttudu. 29Te nantuttudu ḵan didae isun ni osae anna ḵaḻabbongana ya daḵampun aḵ isun da mimistulun ni lintog.
© 2019 Translators Association of the Philippines (TAP), All rights reserved.
