यूहन्ना 15
15
सच्ची बेल
1“सच्ची अंगुरें दी बेल आऊँ आं, ते मेरा पिता करसान ऐ। 2जेड़ी डाली मेरे च ऐ ते नेई फलदी, उसी ओ कटी ओड़दा ऐ; ते जेड़ी डाली फलदी ऐ, उसी ओ छांटदा ऐ के ओर फलै। 3तोस तां ओस वचन दे कारन जेड़े मैं तुसेंगी बोले न, शोद्ध ओ। 4तोस मेरे च बने रवो, ते आऊँ थुआड़े च। जियां डाली जेकर अंगुरें दी बेल च बनी नेई रवै, तां अपने आप च फली नेई सकदी, इयां गै तोस बी जेकर मेरे च नेई बने रौगे तां फली नेई सकदे। 5आऊँ अंगुरें दी बेल आं, तोस डालियाँ ओ। जेड़ा मेरे च बना रौंदा ऐ, ते आऊँ ओदे च, ओ बड़ा फल फलदा ऐ, किके मेरे कोलां लग्ग ओईयै तोस केछ बी नेई करी सकदे। 6जे कोई मेरे च बना नेई रवै, तां ओ डाली आला लेखा सुटया जंदा ऐ, ते सुकी जंदा ऐ; ते लोग उनेंगी किट्ठा करियै अग्गी च सुट्टी दिन्दे न, ते ओ फ्कोई जदीं ऐ। 7जेकर तोस मेरे च बने रवो ते मेरे वचन थुआड़े च बने रौन, तां जेड़ा चाओ मंगो तां ओ थुआड़े लेईं ओई जाग। 8मेरे पिता दी मैमा एदे छा गै ओंदी ऐ, कि तोस मता सारा फल लेई आओ, तैलूं गै तोस मेरे चेलें अख्खे जागे। 9जियां पिता ने मेरे कन्ने प्यार कित्ता, इयां गै आऊँ बी थुआड़े कन्ने प्यार करगा; मेरे प्यार च बने रवो। 10जेकर तोस मेरे उक्में दा पालन करगे, तां मेरे प्यार च बने रौगे, जियां के मैं अपने पिता दे उक्में पालन कित्ता ऐ, ते ओदे प्यार च बना रौना ऐं। 11मैं ए गल्लां थुआड़े कन्ने एसकरी कित्तियां न, के मेरी खुशी थुआड़े च बनी रवै, ते थुआड़ी खुशी पूरी ओई जा।”
चेलें दा एक दुए कन्ने रिश्ता
12“मेरा उक्म ए ऐ के जियां मैं थुआड़े कन्ने प्यार कित्ता, इयां गै तोस बी एक दुए कन्ने प्यार करो। 13एदे छा बड़ा प्यार कुसे दा नेई, के कोई अपने दोस्तें लेई प्राण दे। 14जेड़े उक्म आऊँ तुसेंगी दिना ऐं, जेकर उसी मनंगे तां तोस मेरे मित्र ओ। 15उनै थमां आऊँ तुसेंगी दास नेई आखगा, किके दास नेई जानदा के ओदा मालक के करदा ऐ, लेकन मैं तुसेंगी मित्र गलाया ऐ, किके मैं जेड़ीयां गल्लां अपने पिता थमां सुनाया न, ओ सब तुसेंगी दसी ओड़ीयां। 16तुसें मिगी नेई चुनयां, लेकन मैं तुसेंगी चुने दा ऐ ते तुसेंगी रखया के तोस जाईयै फल लेई आओ; ते थुआड़ा फल बना रवै, के तोस मेरे नां च जे केछ पिता कोलां मंगो, ओ तुसेंगी दे। 17इनें गल्लें दा उक्म आऊँ तुसेंगी एसकरी दिना ऐं, के तोस एक दुए कन्ने प्यार करो।”
संसार कोलां सतावा
18जेकर दुनिया थुआड़े कन्ने बैर करदी ऐ, तां तोस जांनदे ओ, के ओनें थुआड़े थमां पैलैं मेरे कन्ने बैर कित्ती। 19जेकर तोस दुनिया दे ओदे, तां दुनिया अपने कन्ने प्यार करदी; लेकन एस कारन तोस दुनिया दे नेई, आलां के मैं तुसेंगी दुनिया बिचा चुनी लेता ऐ, एसकरी दुनिया थुआड़े कन्ने बैर करदी ऐ। 20जेड़ीयां गल्लां मैं थुआड़े कन्ने कित्तियां हां, दास अपने मालक कोलां बड़ा नेई ओंदा, इसी याद रखो। जेकर उनै मिगी सताया, तां तुसेंबी सतागन; जेकर उनै मेरी गल्ल मनी, तां थुआड़ी बी मनगन। 21लेकन ए सब केछ ओ मेरे नां दे कारन थुआड़े कन्ने करगन, किके ओ मेरे पेजने आले गी नेई जांनदे। 22जेकर आऊँ नेई ओंदा ते उंदे कन्ने गल्लां नेई करदा, तां ओ पापी नेई खवाँदे, लेकन ऊन उनै उन्दे पाप लेई कोई बहाना नेई। 23जेड़ा मेरे कन्ने बैर करदा ऐ ओ मेरे पिता कन्ने बी बैर करदा ऐ। 24जेकर आऊँ उंदे च ओ कम नेई करदा, जेड़े ओर कुसे ने नेई कित्ते, तां ओ पापी नेई खवाँदे, लेकन ऊन तां उनै मिगी ते मेरे पिता गी दौनी गी दिखया, ते दौनी कन्ने बैर कित्ती। 25ते ए एसकरी ओया के ओ वचन पूरा उवै, जेड़ा उन्दे कनून च लिखा हा, “उनै मेरे कन्ने बिना मतलब दा बैर कित्ता।” 26लेकन जेसलै ओ मददगार औग, जिसी आऊँ थुआड़े कोल पिता थमां पेजगा, मतलब सच्च दा आत्मा जेड़ा पिता थमां निकलदा ऐ, तां ओ मेरी गवाही देग। 27ते तोस बी गवाह ओ किके तोस शुरू थमां मेरे कन्ने रे ओ।
This work is licensed under Creative Commons Attribution-ShareAlike 4.0 License.
