Uumama 14
14
1Bara suni hayyooti afuri, Amrafeli ka lafa Shinari, Arioko ka lafa Elasari, Kedor-Laoma ka lafa Elamu, Tidali ka lafa Goimu, 2hayyoota shani d'ibiti duulte. Hayyooti shanani suni Bera ka lafa Sodoma, Birsha ka lafa Gomora, Shinabu ka lafa Adma, Shemeberi ka lafa Seboimu, ammalle hayyu ka lafa Bela yokhaani Zoari jed'ani. 3Hayyooti shanani tuni wolti d'ufte wold'ageete laga Sidimu keesati, ka amma galaana Sooda jed'ani. 4Qara haga ganna kud'ani lama Kedor-Laomaani worra mohate, ammo ganna kud'ani sadeeso mohanno isaa didani. 5Ganna kud'ani afreeso Kedor-Laomafi hayyooti golli isaa d'ufani, gosa Refai ta lafa Ashteroth-Karnaimu, gosa Zuzi ta lafa Hamu, gosa Emi ta lafa Shawe-Kiryathaimu, 6gosa Hori ta gaara Seiri dabsatani, haga Elparani moga lafa alooti gussani artini baasani. 7Jennaani dachaani lafa Kadeshi d'ufani (ta gaafasi Enmisfati jed'ani). Lafa Amalekitifi gosa Amori ta lafa Hasason-Tamari ke teetu had'ani dabsatani.
8Jennaani hayyooti Sodomafi Gomorafi Admafi Seboimufi Bela (yokhaani Soari) askarti ufii ta lola kurfefate, Bale Sidimu keesa 9hayyoota lafa Elamufi Goimufi Shinarifi Elasari wolhad'ani. Jari wolhad'e suni gami toko hayyoota shani, kaanileeni afuri. 10Baleeni suni boola waan aka laami qabdu heddu qabdi, duuba hayyooti Sodomafi Gomora, ato baqachu jirtu, boola laami suni keesa duudde; ammo taani sadeeni gaarati baqatte. 11Hayyooti afraani taani waan Sodomafi Gomora ke jira ch'ufa, horifi sagalele fud'atte itiini d'aabatte. 12Lutule, ilma oboleesa Abramu, ka Sodoma ke tau isaafi hori isaale boojiani.
13Ammo namichi toko baqate waan kana ch'ufa Abramu ka gosa Ebraniati hime; inni gaafasi fulla mukeeni woyyu, ta namicha Mamre gosa Amori jed'ani, d'aatu jira. Mamrefi oboleyaani isaa Eshkolifi Aneriini golli Abramuti. 14Abramuuni aka ilma oboleesa isaa qabani d'ageennaani nama olla isaa ch'ufa ka had'i dandau, nama d'ibba saditiifi kud'ani saddeeti, wolti yaame hayyoota afraani taani haga lafa Dani reebani. 15Achi geennaani inni jara isaa fullaa fullaa qoode, halkaniini nyaapa suni lole dabsate, haga Hoba, ka dira Damaski mirgaa, had'e 16waan qara fud'atani iraa buuse. Ammalle Lutu, ilma oboleesa isaa ka boojiani, isaafi hori isaa ch'ufafi nad'eenifi worra qara boojianile deebise.
Aka Melkizedekiini Abramu eebise
17Abramuuni Kedor-Laomafi hayyoota taani dabsate gale, jennaani hayyuuni Sodoma Bale Shawe, ta Bale Hayyule jed'ani, keesati yoyo fuula ke deeme. 18#Ebr 7.1-10Jennaani Melkizedekiini, ka hayyu Salemu, ka ammalle qaallu Waaqa Guddaa, qit'afi daad'i Abramuu geese 19eebiseefi waan jed'e, Waaqi Guddaani, ka lafafi gubba uume, Abramu eeba kenninna! 20Waaqa gudda ka nyaapa kanke ch'ufa si dabsachiise ha faarsani! Abramuuni hori nyaapa iraa deebise Melkizedeki qoode.
21Hayyuuni Sodoma waan Abramuuni jed'e, Hori galfatte kanaani tai, ammo nama kiyya ch'ufa naa deebisi. 22Abramuuni harka olfud'ate kakhate waan jed'eeni, Anini Waaqa AABBO Gudda, ka lafafi gubba uume durati kakhad'a, 23aka waan kanke tokoleeni inteenne, waan d'ibi lakisi liilanafi limele, aka ati dandeete, Anati Abramu duroomse deebite injenne. 24Anini ufi woma tokole imfud'ad'u, waan jari kiyya qara nyaate male. Ammo golliini tiyya, Anerifi Eshkolifi Mamreeni, qooda ufii ha fud'atani.
Aka Waaqafi Abramuuni wold'aqani
Borana Bible © Bible Society of Kenya, 2019.
