Naanearü ügüchiga 27
27
Ichaá rü Acóbumaxã rü Echaúmaxã mexü̃ naxuegu
1Rü Ichaá rü marü nayaxüchi rü nangexetü. Rü wüxi ga ngunexü̃gu rü nane ga rüyamaecü ga Echaúca̱x naca. Rü ñanagürü nüxü̃: —Pa Chaunex —ñanagürü. Rü Echaú nanangãxü̃ rü: —¿Ñuxũ ñacuxü̃, Pa Papax? —ñanagürü.
2Rü yexguma ga Ichaá rü ñanagürü: —Cuma choxü̃ cudau nax marü chayaxüchixü̃ rü ngexü̃rüüxü̃ i ñaa ngunexü̃gügu rü tá chayu.
3Rü ngẽmaca̱x chanaxwa̱xe i cunayaxu ya curü würa rü naixnecüwa cuxũ rü cuyamaxnee rü naeü̃ta quima̱x.
4¡Rü ñu̱xũchi cha̱u̱xca̱x naxü i õna i dexechitanüxü̃ i cha̱u̱a̱xwa chíxü̃! ¡Rü nua nange nax chanangṍxü̃ca̱x! Rü ñu̱xũchi tá Tupanaégagu mexü̃ cumaxã chaxuegu naxü̃pa nax chayuxü̃ —ñanagürü.
5-6Natürü yexguma nane ga Echaúmaxã yadexa̱xgu ga Ichaá, rü Rebéca rü bexma yéma irüxĩnü. Rü yemaca̱x, yexguma Echaú nanatüca̱x dauxchitawa maxneewa naxũyane, rü ngĩma ga Rebéca rü naxca̱x ica ga Acóbu ga gumá ngĩne ga rübumaecü. Rü ngĩgürügü nüxü̃: —Dücax, tüxü̃ chaxĩnü ya cunatü nax cuenexẽ ya Echaúmaxã nax ítidexaxü̃. Rü ñatagürü nüxü̃:
7“¡Maxneewa naxũ rü cha̱u̱xca̱x naeü̃ta ima̱x! ¡Rü naxü i õna i dexechitanüxü̃ i cha̱u̱a̱xwa chíxü̃! ¡Rü nua nange nax chanangṍxü̃ca̱x! Rü ñu̱xũchi tá Tupanaégagu mexü̃ cumaxã chaxuegu naxü̃pa nax chayuxü̃”, ñatagürü nüxü̃.
8¡Rü dücax, Pa Chaunex, choxü̃́ irüxĩnü i ñaa cumaxã nüxü̃ chixuxü̃!
9¡Rü yea cabrapǘü̃wa naxũ rü ngẽma rümemaexü̃tanüwa nayaxu i taxre i cabraxacügü! Rü choma rü ngẽmawa tá tümaca̱x chanamexẽxẽ i õna i dexechitanüxü̃ i tümaa̱xwa chíxü̃.
10Rü cuma tá nixĩ i tümaca̱x ngéma cungexü̃ nax tachibüxü̃ca̱x, rü ngẽmaãcü tá Tupanaégagu mexü̃ cumaxã taxuegu naxü̃pa nax tayuxü̃ —ngĩgürügü.
11Natürü nüma ga Acóbu rü naéü̃ nangãxü̃ rü ñanagürü: —Chauenexẽ rü naxãxta̱xaxü̃ne, natürü choma rü tama ngẽxgumarüxü̃ chixĩ.
12Rü ngẽxguma papa choxü̃ ingógügu rü choxü̃ tacua̱xgu, rü nagu tá tarüxĩnü nax tümagu chidauxcüraxü̃xü̃. Rü ngẽxguma rü taxũtáma mexü̃ chomaxã taxuegu, rü chixexü̃ tá chomaxã taxuegu —ñanagürü.
13Natürü ga ngĩma ga naé rü inangãxü̃ rü ngĩgürügü: —Pa Chaunex, rü ngẽxguma chixexü̃ cumaxã taxuegu̱xgu ¡rü chaugu tá nangu! Natürü i cumax, rü chanaxwa̱xe i cunaxü i ngẽma cumaxã nüxü̃ chixuxü̃. ¡Rü paxa nawa naxũ i ngẽma cabraxacügü! —ngĩgürügü.
14Rü yexguma ga Acóbu rü nawa naxũ ga yema cabraxacügü rü naéca̱x yéma nanagagü. Rü ngĩma ga naé rü inamexẽxẽ ga õna ga idexechitanüxü̃ ga Ichaáa̱xwa chíxü̃.
15Rü yemawena inayaxu ga rümemaexü̃ ga Echaúchiru ga ĩpatagu namaxã nanguxü̃xü̃. Rü yemagu iyacu̱xẽxẽ ga gumá ngĩne ga rübumaecü ga Acóbu.
16Rü ñu̱xũchi yema cabraxacücha̱xmüxü̃maxã inaxüxchiü̃chacüxü ga Acóbu. Rü ínangexta̱xaremüxü̃wa rü ta inaxǘ ga yema naxcha̱xmü.
17Rü nüxna inaxã ga yema idexechitanüxü̃ ga õna rü paũ ga namexẽẽxü̃.
18Rü nüma ga Acóbu rü tümaxü̃tagu naxücu ga nanatü ga ítayexmaxü̃wa, rü ñanagürü tüxü̃: —Pa Papax, marü íchangu —ñanagürü. Rü tüma rü ítaca, rü ñatagürü: —¿Ngexcürüücü ya chaune quixĩxü̃? —ñatagürü.
19Rü yexguma ga Acóbu rü: —Choma rü cune ya yacü ya Echaú chixĩ. Rü marü chanaxü i ngẽma chomaxã nüxü̃ quixuxü̃. ¡Rü írüda rü írüto nax cunangṍxü̃ca̱x i ñaa naeü̃machi i cuxca̱x chimáxü̃, rü ñu̱xũchi mexü̃ chomaxã naxuegu! —ñanagürü.
20Rü yexguma ga Ichaá rü nüxna taca, rü ñatagürü: —¿Ñuxãcü paxa cuxãéxü̃, Pa Chaunex? —ñatagürü. Rü nüma ga Acóbu rü tüxü̃ nangãxü̃, rü ñanagürü: —Nüma ya Cori ya curü Tupana choxü̃ narüngü̃xẽxẽ rü ngẽmaca̱x paxãma nüxü̃ ichayangau —ñanagürü.
21Natürü ga nüma ga Ichaá rü ñanagürü nüxü̃: —¡Ẽcü nua naxũ! Rü cuxü̃ chingõgüchaü̃ rü aixcüma chaune ya Echaú quixĩ —ñanagürü.
22Rü Acóbu rü nanatüxü̃tawa naxũ nax nüxü̃ tingõgüxü̃ca̱x. Rü yexguma ga Ichaá rü ñanagürü: —Cuga rü Acóbuga nixĩ natürü cuchacüxü rü Echaúchacüxü nixĩ —ñanagürü.
23-24Rü yemaacü tama Acóbuxü̃ tacua̱x, yerü poraãcü naxãxta̱xachacüxü naenexẽ ga Echaúrüxü̃. Natürü yexguma marü tá mexü̃ namaxã taxueguchaü̃gu rü wenaxarü nüxna taca, rü ñatagürü nüxü̃: —¿Aixcüma yixĩxü̃ i chaune ya Echaú quixĩxü̃? —ñatagürü. Rü nüma ga Acóbu rü tüxü̃ nangãxü̃, rü: —Ngü̃, Echaú chixĩ —ñanagürü.
25Rü yexguma ga nanatü rü ñatarügü nüxü̃: —Cü ¡choxü̃ nachibüxẽxẽ, Pa Chaunex, nax chanangṍxü̃ca̱x i ngẽma cuexü̃! Rü ngẽmawena tá mexü̃ cumaxã chaxuegu —ñatarügü. Rü nüma ga Acóbu tüxü̃ nachibüxẽxẽ ga nanatü rü bínu rü ta tüxna nanaxã. Rü nüma ga Ichaá rü nachibü rü naxaxe.
26Rü yexguma ga Ichaá rü ñanagürü nüxü̃: —¡Chorü ngaicamánaxüra naxũ, Pa Chaunex, rü choxü̃ nachúxu! —ñanagürü.
27Rü yexguma Acóbu nanatüna nangaicamagu nax nachúxãxü̃ca̱x, rü nüma ga Ichaá rü nanechirugu nawĩxĩ. Rü yexguma ga Ichaá rü mexü̃ namaxã naxuegu, rü ñanagürü:
—Ñaa nixĩ i naema ya chaune ya Echaú.
Rü ngẽma naema rü ñoma wüxi i naane i chi̱xemaxü̃ i Tupana mexü̃ namaxã ueguxü̃rüxü̃ nixĩ.
28¡Rü Tupana cuxna naxã ya pucü rü mea naxügü i cunetügü nax namuxü̃ca̱x i curü trigu rü curü bínu!
¡Rü muxũchixü̃ i duü̃xü̃gü cuxü̃́ puracüe!
29¡Rü cuxme̱xwa nangẽxmagü i muxü̃ i nachixü̃anegü!
¡Rü cuenexẽgümaxã inacua̱x rü cupe̱xegu nacaxã́pü̱xügü!
Rü yíxema chixexü̃ cumaxã uegugüxe, rü Tupana rü tá chixexü̃ tümamaxã naxuegu.
Rü yíxema mexü̃ cumaxã uegugüxe rü Tupana rü tá mexü̃ tümamaxã naxuegu
—ñanagürü.
30Rü yexguma Ichaá nüxü̃ rüchauxgu ga Acóbumaxã nax mexü̃ naxueguxü̃, rü ínaxũxũ ga Acóbu. Rü nawe ínanguama ga Echaú ga maxneewa ne naxũxü̃.
31Rü nüma rü ta ga Echaú rü nanatüca̱x nanaxü ga õna ga idexechitanüxü̃ ga chianexü̃. Rü nanatüxü̃tawa nanange. Rü ñanagürü tüxü̃: —Pa Papax ¡írüda rü nangõ̱x i ñaa naeü̃machi i choma cuxca̱x chimáxü̃, rü ñu̱xũchi mexü̃ chomaxã naxuegu! —ñanagürü.
32Rü nüma ga Ichaá rü nüxna naca rü ñanagürü: —¿Texé quixĩ? —ñanagürü. Rü nüma ga Echaú rü tüxü̃ nangãxü̃ rü ñanagürü: —Choma nixĩ i cune ya yacü ya Echaú chixĩxü̃ —ñanagürü.
33Rü nüma ga Ichaá rü poraãcü naba̱i̱xãchiãxẽ, rü nidu̱xruga, rü ñanagürü: —¿Ẽ̱xna texé tixĩ ya yíxema maxneewa ũxẽ rü cha̱u̱xca̱x nua nangexe i ngẽma õna i idexechitanüxü̃? Choma rü marü chanangõ̱x i guxü̃ma i norü õna cuxü̃pa nax ícunguxü̃. Rü marü mexü̃ namaxã chaxuegu, rü ñu̱xma i nüma rü marü nanayaxu i ngẽma mexü̃ —ñanagürü.
34Rü yexguma ga Echaú yema nanatü namaxã nüxü̃ ixuxü̃xü̃ naxĩnügu, rü poraãcü naxaxu, rü aita naxüãcüma ñanagürü: —Pa Papax ¡chomaxã rü ta mexü̃ naxuegu! —ñanagürü.
35Natürü nüma ga Ichaá rü nanangãxü̃ rü ñanagürü: —Marü nua naxũ ya cuenexẽ rü choxü̃ nawomüxẽxẽ, rü ngẽmaca̱x mexü̃ namaxã chaxuegu, rü nüma nanayaxu i ngẽma mexü̃ i cuxca̱xchire̱x ixĩxü̃ —ñanagürü.
36Rü yexguma ga Echaú rü tüxü̃ nangãxü̃, rü ñanagürü: —Yemaca̱x yixĩxü̃ ga Acóbugu naxüégagüãxü̃. Rü marü norü taxre nixĩ nax yadoraxü̃ rü choxü̃ nawomüxẽẽxü̃. Rü noxri rü marü choxna nayapu i ngẽma nax charüyamaexü̃ca̱x choxna üxü̃. Rü ñu̱xma rü choxna nayapu i ngẽma mexü̃ i chomaxã cuxueguchaü̃chiréxü̃. ¿Rü nataxuxü̃ma i to i mexü̃ i choxü̃́ ícuyaxǘxẽxẽxü̃? —ñanagürü.
37Rü yexguma ga Ichaá rü nanangãxü̃, rü ñanagürü: —Dücax, choma rü marü Acóbumaxã chanaxuegu nax naxme̱xwa cungexmaxü̃ rü namaxã nüxü̃ chixu nax guxü̃ma i natanüxü̃ rü ta naxme̱xwa nangẽxmagüxü̃. Rü ngẽxgumarüxü̃ ta namaxã chanaxuegu nax namuxü̃ i norü trigu rü norü bínuchíü. Rü ñu̱xmax, Pa Chaunex ¿rü ta̱xacü tá cuxca̱x chaxüxü̃? —ñanagürü.
38Rü nüma ga Echaú rü nanatüxü̃ naca̱a̱xü̃ama, rü ñanagürü: —¿Ẽ̱xna wüxixicatama i mexü̃ nixĩ i cuxueguxü̃? ¡Rü chomaxã rü ta mexü̃ naxuegu! —ñanagürü. Rü aita naxüãcüma naxaxu.
39Rü yexguma ga nanatü ya Ichaá, rü ñatagürü nüxü̃: —Cuma rü ngẽma naane i mexü̃arü yáxü̃wa tá cumaxü̃ i ngextá taguma ínapuxü̃wa.
40Rü curü taramaxã tá cugü ícupoxü̃, rü cuenexẽarü duü̃xü̃ tá quixĩ. Natürü ngẽxguma cumuarü duü̃xü̃ã̱xgu, rü tá cuenexẽna ícunguxuchi —ñatagürü.
Acóbu rü Echaúcha̱xwa nixũ
41Rü yexgumacürüwa ga Echaú rü Acóbuchi naxai naxca̱x ga yema mexü̃ ga Acóbumaxã taxueguxü̃ ga nanatü. Rü nüma ga Echaú rü ñaxü̃gu narüxĩnü: —Papa rü paxa tá tayu, rü tümawena rü tá chayama̱x ya chauenexẽ ya Acóbu —ñaxü̃gu narüxĩnü.
42Rü yexguma yema Echaú nagu rüxĩnüxü̃xü̃ nacua̱xgu ga Rebéca, rü Acóbuca̱x ingema, rü ngĩgürügü nüxü̃: —Dücax, cuenexẽ ya Echaú rü nanu rü cuxü̃ nimáxchaü̃ naxca̱x i ngẽma mexü̃ i cunatü cumaxã ueguxü̃.
43Rü ngẽmaca̱x, Pa Chaunex ¡rü choxü̃́ irüxĩnü, rü ñu̱xmatama Aráü̃anewa naxũ i chauenexẽ ya Labáü̃xü̃tawa!
44-45¡Rü ngéma nangẽxma i ñuxre ya taunecü ñu̱xmatáta nangüxmü ya cuenexẽ rü nüxü̃ iyanangüma ga yema namaxã cuxüxü̃! Rü ngẽxguma marü nüxü̃ iyanangümagu, rü cuxca̱x tá ngéma chamuga nax cutaeguxü̃ca̱x. Erü tama chanaxwa̱xe i wüxitama i ngunexü̃gu nax choxü̃́ peyuexü̃ i pema i taxre i chaunegü —ngĩgürügü.
46Rü yemawena ga Rebéca rü Ichaámaxã iyadexa, rü ngĩgürügü: —Düxwa nüxü̃ charüchau i nacüma i ngẽma taxre i Itítanüxü̃ i Echaú namaxã ãmaxü̃. Rü ngẽxguma chi Acóbu rü wüxi i ngẽma númacüã̱x i Itítanüxü̃maxã naxãxma̱xgu, rü narümemae nixĩ i noxtacüma chayuxü̃ —ngĩgürügü.
© 2022, Wycliffe Bible Translators, Inc. All rights reserved.
