Naanearü ügüchiga 26
26
Ichaá rü Gueráxwa naxũ
1Rü yexgumaü̃cüxü rü wüxi ga taxü̃ ga ngebüane ínangu ga guxü̃ma ga yema naanewa, yexguma Abraáü̃ maxü̃gurüxü̃. Rü yemaca̱x ga Ichaá rü Gueráxwa naxũ ga Firitéutanüxü̃arü ãẽ̱xgacü ga Abimeréx íyexmaxü̃wa.
2-3Rü yéma ga Tupana rü Ichaáca̱x nango̱x rü ñanagürü nüxü̃: —¡Taxṹ i Equítuanewa cuxũxü̃! ¡Rü ngẽma choma cumaxã nüxü̃ ichixuxü̃gutama rüxã̱ũ̱x, rü ñaa nachixü̃anewatama nangẽxma! Choma rü tá cumaxã changexma, rü tá cuxü̃ charüngü̃xẽxẽ, erü cuxna rü cutaagüna tá chanaxã i guxü̃ma i ñaa naane. Rü ngẽmaãcü tá chayanguxẽxẽ ga yema uneta ga cunatü ga Abraáü̃maxã chaxueguxü̃.
4-5Rü tá chayamuxẽxẽ i cutaagü, rü ñoma ẽxtagü ya daxũwa mucürüxü̃ tá nixĩ nax namuxũchixü̃. Rü tá nüxna chanaxã i guxü̃táma i ñaa naane. Rü naétü tá cutaagügagu nüxü̃ charüngü̃xẽxẽxü̃ i guxü̃ma i nachixü̃anegü i ñoma i naanewa ngẽxmagüxü̃. Erü cunatü ga Abraáü̃ rü chauga naxĩnü rü nayanguxẽxẽ ga yema namaxã nüxü̃ chixuxü̃, rü chorü mugü, rü chorü ucu̱xẽgü, rü chorü ngu̱xẽẽtaegü —ñanagürü.
6Rü yemaacü ga Ichaá rü Gueráxgutama narüxã̱ũ̱x.
7Rü yexguma yémacüã̱x ga duü̃xü̃gü nüxna cagügu ngĩchiga ga Rebéca, rü nüma ga Ichaá rü namuü̃ nax ngĩxü̃ yaxuxü̃ nax naxma̱xchire̱x yixĩxü̃. Rü yemaca̱x namaxã nüxü̃ nixu nax naeya̱xmare yixĩxü̃, yerü imechametüxüchi ga Rebéca, rü yemaca̱x Ichaá nagu narüxĩnü nax ngĩxca̱x chi yama̱xgüãxü̃.
8Rü ñuxre ga ngunexü̃ nangupetü nax yéma nayexmaxü̃ ga Ichaá. Natürü wüxi ga ngunexü̃gu ga Abimeréx rü norü beü̃tánawa inadawenü, rü Ichaáxü̃ nadau nax naxma̱x ga Rebécaxü̃ ínameãẽxü̃.
9Rü yemaca̱x ga Abimeréx rü norü duü̃xü̃güxü̃ namu nax Ichaáca̱x yacagüxü̃ca̱x, rü ñanagürü nüxü̃: —Rü aixcüma nixĩ nax cuxma̱x iyixĩxü̃ i ngĩmax. ¿Rü tü̱xcüü̃ nüxü̃ quixu nax cueya̱x yixĩxü̃? —ñanagürü. Ichaá nanangãxü̃ rü ñanagürü nüxü̃: —Choma nagu charüxĩnügu rü ngürüãchi ngĩxca̱x choxü̃ nima̱xgü —ñanagürü.
10Natürü ga Abimeréx rü nüxü̃ ñanagürü: —¿Ta̱xacüca̱x ngẽma cuxü tomaxã? Rü ngẽxguma chi ngexü̃rüüxü̃ i chorü duü̃xü̃ ngĩmaxã ipexgux rü cugagu chi nixĩ i pecadugu tanguxü̃ —ñanagürü.
11Rü yexguma ga Abimeréx rü guxü̃ma ga norü duü̃xü̃güxü̃ ñanagürü: —Rü ngẽxguma texé ñaa yatüxü̃ chixewegu rüe̱xna naxma̱xü̃ chixewegu rü tá noxtacüma tayu —ñanagürü.
12Rü gumá taunecügu ga Ichaá rü yema naanegu natoe. Rü namu ga norü o yerü Cori ya Tupana nüxü̃ narüngü̃xẽxẽ.
13Rü yemaca̱x namuarü diẽruã̱x rü nawa nangu nax namuarü yemaxü̃ã́xü̃.
14Rü namuxũchi ga norü carnérugü, rü wocagü, rü puracütanüxü̃. Rü yemaca̱x ga Firitéutanüxü̃ rü nixãũxãchie.
15Rü yexguma nanatü ga Abraáü̃ maxü̃gu, rü yema Abraáü̃arü puracütanüxü̃ rü puchu ne nicaxmaxü̃gü. Natürü yexguma Abraáü̃ yuxguwena rü nüma ga Firitéutanüxü̃ rü nanapoxtagü rü waixü̃mümaxã nanagütagü.
16Rü düxwa nüma ga Abimeréx rü Ichaáxü̃ ñanagürü: —¡Ínaxũxũ i nua, erü torü yexera marü cumuarü diẽruã̱x! —ñanagürü.
17Rü yexguma ga Ichaá rü ínaxũxũ ga Firitéugütanüwa, rü ĩane ga Gueráx nawa yexmane ga doonexü̃gu nayaxüpata, rü yéma namaxü̃.
18Rü nüma ga Ichaá rü wenaxarü ínanacagachigü ga gumá puchugü ga nanatü maxü̱̃xgu yacaxmaü̃gücü, natürü yexguma nanatü yuxguwena Firitéugü rügütagücü. Rü nüma ga Ichaá rü yema naéga ga nanatü nagu yaxüégaxü̃gutama nayaxügüéga.
19Rü wüxi ga ngunexü̃gu ga yema Ichaáarü puracütanüxü̃ rü yexguma puchune yacaxmaü̃gügu ga yema, rü namaxã inayarüxĩ ga wüxi ga dexá ga ichuxchuxü̃.
20Natürü yema carnérugüarü dauruü̃gü ga Gueráxcüã̱x, rü yema Ichaáarü carnérugüarü dauruü̃gümaxã nügü nadai, yerü nüma nüxü̃ yaxugügu rü noxrü nixĩ ga gumá puchu. Rü yemaca̱x ga Ichaá rü ñaxü̃gu nanaxüéga ga gumá puchu: “Dai” ñaxü̃gu, yerü gumá puchuca̱x nügü nadai.
21Rü yemawena ga yema norü puracütanüxü̃ rü nai ga puchu ne nicaxmaxü̃gü. Rü gumáca̱x rü ta nügü nadai, rü yemaca̱x ga Ichaá rü ñaxü̃gu nanaxüéga: —Nügümaxã narüxuanügü —ñaxü̃gu nanaxüéga.
22Rü yexguma ga nüma ga Ichaá rü yema nachicaarü yáxü̃wama naxũ. Rü yéma nai ga puchu nanaxü. Rü gumáca̱x tama nügü nadai. Rü yemaca̱x ñaxü̃gu nanaxüéga: Ínguxü̃xü̃, ñaxü̃gu nanaxüéga. Rü ñanagürü: —Ñu̱xma ya Cori ya Tupana rü marü tüxü̃́ nanatauxchaxẽxẽ nax ngẽmaãcü mea tüxü̃́ iyaxũxü̃ca̱x i ngẽma ixüxü̃ i ñaa naanewa —ñanagürü.
23Rü yemawena ga Ichaá rü Bechébawa naxũ.
24Rü yema chütaxü̃gu rü nüma ga Cori ya Tupana rü Ichaáca̱x nango̱x, rü ñanagürü nüxü̃: —Choma nixĩ i cunatü ya Abraáü̃arü Tupana. ¡Taxṹ i cumuü̃xü̃! Choma rü cumaxã changexma. Rü yimá chorü duü̃ ga Abraáü̃gagu rü tá cuxü̃ charüngü̃xẽxẽxü̃, rü poraãcü tá chayamuxẽxẽ i ngẽma cutaagü —ñanagürü.
25Rü yexguma ga Ichaá rü wüxi ga ãmarearü guruxü̃ yexma naxü, rü yéma Cori ya Tupanaxü̃ nicua̱xüxü̃. Rü yema naanegu nayaxüpata. Rü norü puracütanüxü̃ rü wüxi ga puchu yéma nicaxmaxü̃gü.
Ichaá rü Abimeréx rü wüxi ga uneta nügümaxã naxügü
26Rü wüxi ga ngunexü̃ rü nüma ga Abimeréx rü Gueráxwa ne naxũ nax Ichaámaxã yanadexaxü̃ca̱x. Rü ínayaxümücügü ga namücü ga Auchá rü norü churaragüeru ga Picóx.
27Rü nüma ga Ichaá rü ñanagürü nüxü̃: —Ñu̱xmax nax tama pechoxwa̱xexü̃ rü perü naanewa nax choxü̃ ípeta̱xüchixü̃ rü ¿ta̱xacüca̱x nua choxü̃ ípeyadau? —ñanagürü.
28-29Rü nümagü nanangãxü̃ rü ñanagürügü: —Toma rü marü nüxü̃ tadau nax Cori ya Tupana cumaxã ngẽxmaxü̃. Rü ngẽmaca̱x nagu tarüxĩnüe nax wüxi i uneta cumaxã taxüxü̃. Ngẽma uneta rü ñaa tá nixĩ: Rü cuma rü taxuxü̃táma ta̱xacürü chixexü̃ tomaxã cuxüxü̃, erü toma rü tama cuxü̃ tachixewe. Rü guxü̃guma mea cumaxã tixĩgü, rü yexguma cuxü̃ ítamuxũchigu rü meamare cuxü̃ ítaxũxũxẽxẽ. Rü ñu̱xma rü nüma ya Cori ya Tupana rü poraãcü cuxü̃ ínarüngü̃xẽxẽ —ñanagürügü.
30Rü yexguma ga Ichaá rü wüxi ga õna ga taxü̃ naxca̱x naxü. Rü meama nachibüe rü naxaxegü.
31Rü moxü̃ãcü ẽxü̃wa pewa ínadagügu rü nüma ga Abimeréx rü Ichaá rü wüxi ga uneta nügümaxã naxügü. Rü ñu̱xũchi nüma ga Ichaá rü nüxü̃ narümoxẽ. Rü nümagü rü ta rü Ichaáxü̃ narümoxẽgü rü taãẽãcü nüxna nawoegu.
32Rü yematama ngunexü̃gu ga yema Ichaáarü puracütanüxü̃ rü namaxã nüxü̃ nayarüxugüe nax dexáxü̃ yangauxgüxü̃ nawa ga gumá puchu ga yéma yacaxmaü̃güãcü.
33Rü gumá puchu rü Chebágu nanaxüéga ga Ichaá. Rü woo ñu̱xmatama ya yima ĩane ya daa puchu nawa ngẽxmane rü Bechébamaxã nanaxugü.#26.33 Yema naéga i Chebá rü Uneta, ñaxü̃chiga nixĩ.
Echaú naxma̱xgüchiga
34Echaú rü 40 ga taunecü nüxü̃́ nayexma ga yexguma ngĩmaxã naxãxma̱xgu ga Yudí ga Itítanüxü̃ ga Beeríxacü. Rü yexgumarüxü̃ ta ngĩmaxã naxãxma̱x ga Bachemáx ga nai ga Itítanüxü̃ ga Eróü̃xacü.
35Natürü ga Ichaá rü Rebéca rü taguma yema naneã̱xgümaxã nataãẽgü.
© 2022, Wycliffe Bible Translators, Inc. All rights reserved.
