Naanearü ügüchiga 28
28
1Rü yexguma ga Ichaá, rü nane ga Acóbuca̱x naca rü mexü̃ namaxã naxuegu. Rü ñu̱xũchi nanaxucu̱xẽ, rü ñanagürü nüxü̃: —Tama chanaxwa̱xe i núma Canaáü̃cüã̱x i ngexü̃maxã cuxãxma̱x.
2¡Rü yea Padáü̃-aráü̃anewa naxũ i nachiü̃wa ya curü o̱xi ya Betué, rü ngẽxma yaxãxma̱x wüxi i naxacümaxã ya cuta ya Labáü̃!
3¡Rü Tupana ya Guxãétüwa Ngẽxmacü rü cuxü̃ rüngü̃xẽxẽ rü yamuxẽxẽã i cutaagü nax ngẽmaãcü muxü̃ma i nachixü̃ane cuwa ngóxü̃ca̱x!
4¡Tupana rü cuxü̃ rü cutaagüxü̃ nangü̃xẽẽxü̃, yema curü o̱xi ga Abraáü̃maxã naxueguxü̃rüxü̃, nax ngẽmaãcü norü yora pixĩgüxü̃ca̱x i ñaa naane i ñu̱xmax nawa imaxẽxü̃ ñoma duü̃xü̃gü i to i nachixü̃anewa ne ĩxü̃rüxü̃! —ñanagürü.
5Rü yemaacü ga Ichaá rü nane ga Acóbuxü̃ Padáü̃-aráü̃wa namu. Rü nüma ga Acóbu rü yéma naxũ, rü nata ga Labáü̃xü̃tawa nangu. Rü nüma ga Labáü̃ rü Betué ga Araméutanüxü̃ nane nixĩ. Rü Rebéca ga Acóbu rü Echaú naé rü Labáü̃eya̱x iyixĩ.
Naxãxma̱x ga Echaú
6Rü nüma ga Echaú rü nüxü̃ nacua̱x ga yexguma nanatü ga Ichaá rü Acóbuxü̃ Padáü̃-aráü̃wa naxũxẽẽgu nax yexma yaxãmaxü̃ca̱x ga Acóbu. Rü ñu̱xũchi nüxü̃ naxĩnü ta ga Acóbumaxã mexü̃ naxueguxü̃, rü namaxã nüxü̃ yaxuxü̃ nax tama nanaxwa̱xexü̃ nax wüxi ga ngexü̃ ga Canaáü̃cüã̱xmaxã naxãmaxü̃.
7Rü yexgumarüxü̃ ta nüxü̃ nacua̱x nax Acóbu rü Padáü̃-aráü̃wa naxũxü̃, yema nanatü rü naé namaxã nüxü̃ ixuxü̃ãcüma.
8Rü nüma ga Echaú rü yemawa nüxü̃ nicua̱xãchi nax tama nanatüarü me yixĩxü̃ ga yema ngexü̃gü ga Canaáü̃cüã̱xgü.
9Rü yemaca̱x nüma ga Echaú rü woo ga nax marü Canaáü̃cüã̱x ga ngexü̃gümaxã naxãxma̱xchiréxü̃, rü Ismaé ga Abraáü̃ nanexü̃tawa naxũ, rü yexma nayaxãxma̱x ngĩmaxã ga Maaráx ga Nebaióxeya̱x.
Tupana rü Acóbuca̱x nango̱x ga Betéwa
10Rü nüma ga Acóbu rü inaxũãchi ga Bechébawa. Rü Aráü̃anewa daxü̃ ga namawa naxũ.
11Rü yexguma wüxi ga nachicawa nanguxgu, rü yexma nape yerü nachüta. Rü wüxi ga nuta nanayaxu, norü cüxeruxü̃. Rü ínaca rü nape.
12Rü yéma naxãnegü. Rü yema nanegüwa rü nüxü̃ nadau ga wüxi ga toxṍõne ga ñaa naanegu caxüne rü daxũguxü̃ ga naanewa nguxü̃ne. Rü gumáwa ínarüxĩgüxü̃, rü ñu̱xũchi naxĩgü ga Tupanaarü orearü ngeruxü̃ i daxũcüã̱x.
13Rü yexgumarüxü̃ ta nüxü̃ nadau ga Cori ya Tupana ga naxü̃tagu chicü. Rü nüma ga Tupana rü ñanagürü nüxü̃: —Choma nixĩ i curü o̱xi ya Abraáü̃arü Tupana, rü cunatü ya Ichaáarü Tupana chixĩxü̃. Rü tá cuxna chanaxã i ñaa naane i nawa cupexü̃ nax cuxrü rü cutaagüarü yixĩxü̃ca̱x.
14Rü nümagü i cutaagü rü tá namuxũchi ñoma waixü̃müchicute̱xerüxü̃, rü guxü̃ i naanewa tá nangugü ñu̱xmatáta nórtewa rü súrwa rü éstewa rü oéstewa nangugü. Rü cugagu rü cutaagügagu tá nüxü̃ charüngü̃xẽxẽxü̃ i guxü̃táma i duü̃xü̃gü i ñoma i naanecüã̱x.
15Rü choma rü cumaxã changexma. Rü ngextá ícuxũxü̃wa tá cuxna chadau. Rü ñaa naaneca̱x tá wena cuxü̃ chataeguxẽxẽ. Rü tagutáma cuxna chixũgachi, rü aixcüma tá chayanguxẽxẽ i guxü̃ma i ngẽma cumaxã chaxueguxü̃ —ñanagürü.
16Rü yexguma yema nanegüwa naba̱i̱xãchigu ga Acóbu, rü ñaxü̃gu narüxĩnü: “Aixcümaxü̃chi Cori ya Tupana nanuxma i ñaa nachicawa, rü choma rü tama nüxü̃ chacua̱x”, ñaxü̃gu narüxĩnü.
17Rü poraãcü namuü̃. Rü ñaxü̃gu narüxĩnü: “Rü ñaa nachica rü naxüünexü̃chi. Rü daa nixĩ ya Tupanachiü̃. Rü daxũguxü̃ i naanearü ĩã̱x nixĩ i ñaa nachica”, ñaxü̃gu narüxĩnü.
18Rü moxü̃ãcü pa̱xmamaxü̃chi ínarüda ga Acóbu. Rü nanayaxu ga gumá nuta ga namaxã nacüxerucü. Rü ínanatoxẽxẽ nax wüxi ga cua̱xruxü̃ yixĩxü̃ca̱x, rü chíxü̃ naétü naba yerü naxüüne ga yema nachica.
19Rü yema nachicawa rü nũxcüma rü nayexma ga wüxi ga ĩane ga Lúxgu ãégane. Natürü nüma ga Acóbu rü nanaxüchicüxü ga naéga ga yema nachica, rü Betégu nanaxüéga.
20-21Rü yema nachicawa rü Acóbu inaxuneta rü ñanagürü: —Ngẽxguma Tupana choxü̃ íixümücügu, rü choxna nada̱u̱xgu i chorü namawa, rü choxna naxãã̱xgu i chorü õna rü chauxchiru, rü wena mea chaunatüca̱x choxü̃ natáeguxẽẽgu, rü aixcümaxü̃chi chorü Cori ya Tupana tá nixĩ.
22Rü daa nuta ya cua̱xruü̃xü̃ nua chatoxẽẽcü, rü Tupanapata tá nixĩ. Rü dücax, Pa Tupanax, rü guxü̃ma i chorü ngẽmaxü̃gü i choxna cuxãxü̃wa rü guxü̃gutáma cuxna chanaxã i ngẽma diésmu i cuxna üxü̃ —ñanagürü.
© 2022, Wycliffe Bible Translators, Inc. All rights reserved.
