Yọọn 5
5
Ukọk udọñọ ke ibiok
1Etək ini amaakeboiyo, Yisọs amaaka Yerusedem ke ntak usọrọ mme Yuu. 2Ndin ke Yerusedem aba ñkpọdiọghọ mmọọñ keed, e-ekoodo ke usem Arameik Betesda, a-mme abai ition enyʌññọ edudak ekanna anye ekʌk, akpere Inuaatop Edọñ. 3Mi ke ata uwak mme mbon ñkpọnnam ekesidunam, mme nnan, mbʌñọ ye mme akpaubeñ. 4Ke ini ke ini, enyere Abọọñ amaasidi adibəkko mmọọñ ami. Awo keed ake adodo a-atooho adʌk mmọọñ ami, emaebəkko ntom, amaasibọ nsọñidem akpekọm se udọñọ ikidọñ anye. 5Amaaba awo keed do a-akedọñọke ke isua edịp mme itiaita. 6Ke ini Yisọs akekịtte anye nte ana do anyʌñ adiọọñọ ke anye abọ ufen ado akpeene eti-eti, anye amaabịp anye ate, “Nte afo ameyem idem usọñ?”
7Awo udọñọ ami abọọrọ ate, “Ete, ami nnieeghe awo se imben miin isịn ke ñkpọdiọghọ ami, ke emaebəkko mmọọñ amọ. Ke ini ami ndomoke adidʌk, awo mfen ambebem iso adʌk.”
8Ndin Yisọs amaabo anye, “Dakka da! Ben aya mfo nyʌñ saña.” 9Ini keed-ini keed, idem amaasọñ awo ami, anye anyʌñ aben aya amọ asaña.
Usen a-ñkpọ ami aketịppeke akedo usen Sabad. 10Do ndin mme Yuu emaebo awo e-ekekọkkọ udọñọ ete, “Sabad ado ami; ibed ukpan fiin afo adiben aya mfo.”
11Ado anye amaabọọrọ, “Awo a-akenamma idem ansọñ akembo, ‘Ben aya mfo nyʌñ saña.’ ”
12Do ndin ammọ ebịp anye, “Anie awo ido awo a-akubooho yak aben aya mfo asana?”
13Awo e-ekekọkkọ udọñọ ikinieeghe ifiọk ndomokeed mme anye akedo anie awo, sia Yisọs amaasop ke atu mme awo e-ekebaaha do.
14Akem Yisọs adikịt anye ke tembịd anyʌñ abo anye, “Sese, idem amaana usọñ. Kuunam idiọọkñkpọ aba, mmiidooho ntodo ñkpọ adiọọhọ akan ado akeme aditịppe unọ.” 15Awo ami amaanyọñ anyʌñ akedọkkọ mme mbọọñ Yuu ate ke akedo Yisọs akenam nọ idem isọñ imọ.
Adudu Ayịn anieeghe
16Sia Yisọs akenañña mme ñkpọ ami ke Sabad, mbọọñ mme Yuu emaetọọñọ adikọbọ anye. 17Ke adifak idem Yisọs abo ammọ ate, “Ete mmi asʌk ananam utom afịd ini tutu mfịn ami, ndin ami ñko, nsʌk nnam utom.” 18Ado ñkpọ ntom akeneenekke anam nọ enekke eyem adiwot anye sia anye ikiyʌkkọke ke adibiad Sabad ikpọọñ, ado amaana akood Abasi Ete amọ, anam idem amọ ñka-ñka mme Abasi.
19Yisọs amaabọọrọ, “Ke ata akpanikọ ami ntañ inọ ndufo, Ayịn ikemeke inam ñkpọ ndomokeed ke idem amọ; anye akeme inam ukwueeñe se anye akịd nte Ete anam ndin ñkpọ keed ake adodo Ete anamma, Ayịn anam kpa ado. 20Sia Ete ama Ayịn, anyʌñ awọd anye afịd ñkpọ se anye anam ke Idem amọ, ayaanyʌñ awọd anye kpa mme ñkpọ se ikpoon ikan mme mbon ami, mme utom e-ediikpa ndufo idem. 21Ke ntom, kpa naña Ete anam mme akpañkpa eset anyʌñ anọ ammọ uwem, kpa ntodo ke Ayịn anọ awo ake adodo anye amekke uwem. 22Sia Ete ibiireke ikpe awo ndomokeed. Ado anye akappa afịd ubiire ikpe anọ Ayịn, 23ma afịd awo ekpono Ayịn naña ammọ ekpono Ete. Awo ake adodo a-asịnne adikpono Ayịn asịn ñko adikpono Ete a-akendọññọ anye adi.
24 “Ke ata akpanikọ ami ntañ inọ ndufo, awo keed ake adodo a-akpaña utọñ anọ ikọ mmi anyʌñ anịm awo a-akendọññọ ke akpanikọ anie nsi-nsi uwem, awo idiinyʌññọ ibiom anye ikpe ado anye awuọ ke ñkpa adʌk uwem. 25Ke ata akpanikọ ami ntañ inọ ndufo, ini asʌk adi, ke aditʌm ntañ adidi, a-mme akpaññañkpa ediikop uyo Ayịn Abasi ndin afịd awo e-ekoppo uyo ami eyaedu uwem. 26Sia kpa naña Ete anie uwem ke idem amọ anye ñko anọ Ayịn ukeme adinie uwem ke idem amọ. 27Ñko anye anọ Ayịn Awo adudu adibieere ikpe, sia anye ado Ayịn Awo.
28 “Ikiiyak ami ikpa ndufo idem, sia ini asʌk adi, ke ini mme akpaññañkpa ediikop uyo amọ, 29ewuọ ke udi ammọ mbon e-ekenaññake nti ñkpọ eyaedaaña eda edu uwem, ndin mbon e-ekenaññake ndiọiñkpọ eyaedaaña eda ke ubiom ikpe. 30Ami ñkemekke adinam ñkpọ ndomokeed ke idem mmi; ami mbiire ikpe ñkeene se ñkop ndin ubiire ikpe mmi ado unen, sia ami ñyemme adinem idem mmi esịd ado anye a-akendọññọ utom.
Mme ikọ ntiense abañake Yisọs
31 “Adieke ñkpetieeghe ntiense mbaña idem mmi, ntiense mmi idooho akpanikọ. 32Ado aba awo mfen atieeghe ntiense ambaña miin, ndin ami mmediọọñọ mbo ke ntiense amọ ado akpanikọ.
33 “Ndufo emenọ mme isʌñutom ebịne Yọọn ndin anye amaatie ntiense anọ akpanikọ. 34Idooho nte ke ami mmeyịmme ntiense awo, ado ntañ ami nọ ndufo ebọ adinyaaña. 35Yọọn akedo utuenikañ a-akesakka anyʌñ anọ unwana ndin ndufo emek adikop inem ikañ anye akenọọhọ.
36 “Ado ntiense mmi akpon akan ake Yọọn. Sia kpa utom e-Ete annọọhọ abo nnam mma, a-adooho anye ke nsʌk nam, ado ntiense awọttọ ke Ete akendọñ. 37Ñko, Ete a-akendọññọ atie ntiense annọ ke idem amọ. Akenaanam ndufo ikoppo uyo amọ, inyʌññọ ikịt naña anye aba, 38mme ikọ amọ inyʌññọ idʌñ ke esịd ndufo, sia ndufo inịmme anye a-anye a-akendọññọ ke akpanikọ. 39Ndufo etọọtʌm ekpeeb ikọ Abasi, sia ndufo ekere ebo ke iminie nsi-nsi uwem ito ammọ. Kpa mme ikọ Abasi ami etie ntiense embaña miin, 40ado ndufo esịn adimbịne miin idibọ uwem!
41 “Ami ñyemme itooro nto awo, 42ado ami mmidiọọñọ ndufo. Ami mmediọọñọ ke inieeghe ima Abasi ke esịd ndufo. 43Ami mmedi ke anyịñ Ete mmi, ado ndufo inyịmmeke miin; ado awo mfen akpedi ke anyịñ idem amọ, ndufo eyaenyịmme anye ado. 44Ndufo ekeme die inịm ke akpanikọ ke ini ndufo edubọiyọke itooro eto keed aken, ado inamma ñkpọ adibọ itooro a-atooho ukwueeñe-ukwueeñe Abasi?
45 “Ado ikiikere ibo ke ñyaidot ndufo uyo ke iso Ete. Andidot ndufo uyo ado Moses awo a-ndufo edotto anyen. 46Edieke ndufo ekenịmme Moses ke akpanikọ, ekpaennịm miin ñko ke akpanikọ sia anye amaawet ambaña miin. 47Ado sia ndufo miinịmme se anye akewet ke akpanikọ, ekeme die adinịm se ami ntañ?”
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
