Yọọn 4
4
Yisọs aneme nneme ye awonwaan Sameria
1Yisọs amaadidiọọñọ ke mme Farisi emaekop ete ke mbed Yisọs emaewak ndin anyʌñ aduọk mme awo mmọọñ akan Yọọn Aduọkmmọọñ, 2akpesʌk ado ke aditʌm ntañ, ikidooho Yisọs aduọkmmọọñ, akekap ado mbed amọ. 3Ado anam anye akpọñ Yudia, amaana atịmme aka Kadidi.
4Idahami, akena anye asana aboyo ke Sameria. 5Ndin anye adisịm abio keed ke Sameria a-akereke Saika a-akpereke isọñ a-Yekọb akenọọhọ ayịn amọ Yosef. 6Ube mmọọñ Yekọb akeba do, ndin sia idem amaakemem Yisọs ato anyan isañ, anye amaasuuk atie akpere ube mmọọñ ami. Akedo ñkpọ nte ñkanika duop ye iba uweeme.
7Ke ini awonwaan Sameria keed adieeghe adikoi mmọọñ, Yisọs ate anye, “Mbọk ayaannọ mmọọñ ñwọñ?” 8(Mme mbed amọ emaekaiya abio adidep ndidia.)
9Awonwaan Sameria amaabo anye, “Afo ado Yuu ndin ami ndo awonwaan Sameria. Akpesaña die ambeeñe mmọọñ adinwọñ?” (Sia mme Yuu isinieghe ewana ye mme mbon Sameria.)
10Yisọs abọọrọ anye ate, “Akpedo amaadiọọñọ enọ Abasi mme awo u-ubịppe fiin mmọọñ ami, afo akpaabịp anye ndin anye akpaunọ fiin mmọọñ uwem.”
11Ndin awonwaan ado amaabo, “Ete, Afo unieeghe ñkpọ se akama akoi mmọọñ, ñko ube mmọọñ ami atəñọ. Ke mmọ-ọ ke afo adibọ mmọọñ uwem ami? 12Nte afo amekpon akan ete ñnyịn Yekọb a-akinọọho ñnyịn ube mmọọñ ami, a-anye ke idem amọ akesinyʌññọ añwọñ mmọọñ ato mi, anye kpa ye nditọ ideen mme ufene amọ?”
13Yisọs amaabọọrọ anye ate, “Awo keed ake adodo añwọññọ mmọọñ ami, mmọọñ ayaamaana awʌt anye, 14ado awo keed ake adodo añwọññọ mmọọñ a-ami ndiinọ anye, itọñ idiisatta anye aba. Ke akpanikọ mmọọñ a-ami ndiinọ anye ayaakappa idịm ke esịd idem amọ afeghe akesịm uwem nsi-nsi.”
15Ndin awonwaan ami, abo anye, “Ete, nnọ miin mmọọñ ami mbaak itọñ idinsat aba, ami ñko ñkuusutịmme ndikoi mmọọñ mi aba.”
16Yisọs abọọrọ anye ate, “Ka ke kood ebe mfo di.”
17Anye abọọrọ ate, “Ami nnieghe ebe.”
Yisọs abo anye, “Amenen ke ini abooho ke imọ inieeghe ebe. 18Akpanikọ ado afo amaanenie ebe ition ndin awodeen a-afo anieeghe idahami idooho ebe mfo. Se afo asʌk atañ idahado ado ata akpanikọ.”
19Awonwaan ado abo ate, “Ete, mmekịt ndin ke afo ado brọfed. 20Mme ete ñnyịn ekesikpono Abasi ke anyọñ abod ami, ado ndufo, mme Yuu ebo ke Yerusedem ado itie anaaha ate ñnyịn ikpono Abasi.”
21Yisọs abo anye, “Nnịm miin ke akpanikọ, awonwaan, ini asʌk adi a-ndufo miidiikponoke Abasi Ete aba ke abod ami, me ke Yerusedem. 22Ndufo mbon Sameria ekpono se ndufo miidiidiọọñọke; ado ñnyịn ikpono se idiọọñọ, sia adinyaaña ato mme Yuu. 23Ado ini asʌk adi, ndin adidi ama, a-mme ata akpono a-Abasi ediikpono Ete ke Sịbidịd ye akpanikọ, sia ammọ edoñño utọ mme akpono Abasi e-Ete ayemme. 24Abasi ado sịbidịd ndin mbon e-ekponoke anye ana ekpono anye ke sịbidịd ye ke akpanikọ.”
25Akem awonwaan ado amaabo, “Mmediọọñọ ke Mesaya” (e-ekootto Krais) “asʌk adi. Anye amaadi, anye ayaanam afịd ñkpọ iñwaña ñnyịn.”
26Ndin Yisọs abo, “Ami a-nsʌkkọ ntañ ikọ ye afo mi, ami ndo anye.”
Mbed etịmme edibịne Yisọs
27Kpa ke ini ado mbed amọ enyọñ edi, idem anyʌñ akpa ammọ adikịt nte anye atañ ikọ mme awonwaan. Ado awo ndomokeed ikibịppe ibo. “Nso-o ke afo ayem?” me “Ntak a-afo atañña ikọ ye anye-e?”
28Ndin awonwaan ado amaakpọñ abañ mmọọñ amọ atịmme anyọñ aka abio aketañ anọ mme awo ate, 29“Idi idise awo a-atañña afịd ñkpọ se ñkenanam annọ. Mme anye akap ado Krais?” 30Ammọ emaewuọọñọ ekpọñ abio ekaiya edikịt anye.
31Ke ini ami, mbed amọ ekesʌk efịna anye ete, “Andikpeeb, dia ñkpọ.”
32Ado anye abo ammọ, “Ami mmenie ndidia adidia a-ndufo miidiọọñọke ñkpọ ibaña.”
33Ndin mme mbed amọ emaedubiime idem ammọ ete, “Me awo amaadat ndidia isọk anye?”
34Yisọs abo, “Ndidia mmi ado adinam uduak anye a-akendọññọ miin ñnyʌñ ñkweeñe utom amọ. 35Nte ndufo isibooho, ‘Ayak afiọñ inaañ mfen ndin idọk?’ Ami ntañ inọ ndufo, itat anyen ndufo, iseed mme inwañ! Ini idọk a-akem. 36Etọtọọñọ adikpe adọkidọk akʌkutom amọ, ndin anye ñko akoono mfịd anọ nsi-nsi uwem ma anditọtọ ye andidọdọk edaara keed. 37Ado asịn ñke ami, ‘Awo keed atọtọ, mfen adọọdọk’ ado akpanikọ. 38Ami ñkidọñ ndufo ekedọk se ndufo miikinamma inịm. Mbio mfen ekenam akpọsọñ utom ado ndufo emedibọ ufọn utom ammọ.”
Uwak mbon Sameria enịm
39Uwak mbon Sameria e-eketooho abio ado emaenịm anye ke akpanikọ ke ntak ikọ ntiense awonwaan ado a-akekaaha ntom, “Anye amaatañ afịd ñkpọ se ñkenanam annọ.” 40Ndin ke ini mbon Sameria ado edikịtte anye, ammọ emaekpeiye anye ete yak anye atie mme mmimọ. Anye amaatie usen iba mme ammọ. 41Ke ntak ikọ amọ, uwak mbon mfen emaekappa esịd enyʌñ enịm ke akpanikọ.
42Ammọ emaebo awonwaan ado, “Ñnyịn inịmme ke akpanikọ ke ntak se afo aketañ ikpọọñ, idahami ñnyịn imikop ke idem ñnyịn, inyʌñ idiọọñọ ite ke awo ami anekke ado Andinyaaña ederimbod.”
Yisọs akọk ayịn awuọiso abọọñ udọñọ
43Usen iba amaakeboiyo, anye amaakpọñ aka Kadidi. 44(Yisọs ke idem amọ amaasio atañ ke brọfed inieeghe ukpono ke abio amọ.) 45Ke ini anye asịmme Kadidi, mbon Kadidi emaedaara anye. Ammọ emaekịt afịd ñkpọ se anye akenam ke Yerusedem ke usọrọ Basofa, sia ammọ emaeba do.
46Anye amaana aka Kena ke Kadidi, itie a-anye akenamma mmọọñ akappa ukọd. Ndin amaaba akọnsid a-aketooho ufọk ekandịk abọọñ ke Kapanọm i-idem akebiakka ayịn amọ. 47Ke ini awo ami akekop ate ke Yisọs amaato Yudia adisịm Kadidi, anye amaabịne anye anyʌñ akekpeiye anye adi adikọk ayịn awodeen imọ udọñọ, sia amaakpere ñkpa.
48Yisọs amaabo, “Ibọhọke ndufo ekịt mme idiọọñọ utịbe ñkpọ ye ñkpọ ñkpaidem, ndufo idiinịmme ke akpanikọ.”
49Ekandịk abọọñ awo ami abo, “Ete, di mbemiso ayịn mmi akpa.”
50Yisọs abọọrọ ate, “Kaa, ayịn mfo ayaadu uwem.”
Awo ami amaanịm se Yisọs aketañ anyʌñ anyọñ. 51Ke ini anye asʌkkọ asaña ke usʌñ unyọñọ, mme nditọufọk edikịt anye enyʌñ edọkkọ ke ayịn amọ adu uwem. 52Ke ini anye abịppe adidiọọñọ ini i-idem akesọññọ ayịn amọ, ammọ ebo anye, “Ufiop idem ado akekpọñ anye ñkpọñ ke ñkanika keed uwueeme.”
53Ndin ete ayịn ami adiọọñọ ate ke ami akedo ukem ini a-Yisọs akeboogho anye, “Ayịn mfo ayaadu uwem.” Do ndin anye ye afịd ufọk amọ emaenịm Yisọs ke akpanikọ.
54Anye ami akedo ayọhọ idiọọñọ utịbe ñkpọ iba a-Yisọs akenamma, amaaketo Yudia idiwuọ Kadidi.
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
