Markusna Enjil 11
11
Bag. 11
1Urushalimgon Betanigon wide Betfajigongir awtansan kello, zetunna gunan kello tebilinai, Yesu hiran owigi ishinirsum. 2Wide wetidirsum: „Man neja inn owollo dallo jukrun, teddo ir toburungon bellun hanuna farah wekki, digbungon. Tendogor elgon zol egirkomnum. Kusedtawe. 3Zol wer on irgi wetidirkin: ‚Ir ma akusru?’ an, wetirwe: ‚Arif abirign an. Tekkon shutte innegir biwidegirin.“ 4Jurgon elsan hanu farah digbungi babnai, bochiged, darubdogor. Suriye kussanna wattigi 5mando agilirton weri wesan: „Ir ma hanun farahki akusrun?“ 6Tiri wetidirsan Yesu weseirsin nawre. Tirgon mugosirsan. Hanu farahked Yesunai tesan. 7Wide tinna kadechigi tendogor awidisan. Yesu tendogor egirsum. 8Wide digrichi weri tinna kadechigi darubdogor awidisan. Echeli werigon jeridigi mered wide darubdogor awidisan. 9Zoli owolged daligon wide aharked tebaedaligon aüwesan: „Wosana! Barkebun artin eriged tabul! 10Barkebun abo Dawudna mulki tabul! Wosana dogochir!“
11Yesu Urushalimir torgi wide jamar tosum. Wide talin dajingon tenna misi haja malen dogor esum. Gu shareyanosingad diminde owiged talossum Betanigir. 12Tenna asalgi Betanirton belburangon ter orugsum. 13Warirton uru nalsum tinna jowi wekki, waragked gudanbun. Tennai tasum, tedder kallan wekki elkingon an. Targon waragna masir elsin damnum. Mine tinna watti mensinged. 14Yesu tinna jowigi wetirsum: „Indoton agabkir eddoton wer kalmeninged, dimenbokon.“ Hirani in weregi gijirsan.
15Urushalimir bidarangad Yesu jamar tosum. Wide ugudisum turarki ajanosiligon wide ajaniligongi. Dugugi asarfelina tarabezachigon obrossidirsum. Wide minechigi ajanosilina kursichigi togijtidirossum. 16Wala wekkongi mugkomnum, haja wekki janosiry an kagingon, jamaged nogarki. 17Ingon ter akurkidisin ter esum: „Ikke bajbumnu?: ‚Anna ka salana kam an webun gebila malerton.’ Won irgon magasina magaragrossun.“
18Abajiligon wide fegirina samli duligon gijred birigsan tekki dabrosarki. Ama tekki sarkossan jemana joro, tenna kurkidarked desen artakkibusanged.
19Sharegi medinena bochigir abelsan.
20Fejirki nogburangon tinna jowigi nalsan sowibungi bundo junbokon. 21Butrus jile targi wide wetirsum: „Wo rabi, uru! Tinna jowi, er nālekosin, sowossum.“ 22Yesu rude wide wetidirsum: „Idder iman daranwe artiged. 23Ai irgi aleged wetidirri, zol in jebelgi wetiril: ‚Indoton kujtakkos wide essir ju teb’ an, tenn ar shikemeningon ter wesin nawre bawtakkitiringi, ter birgin male tekki bitimetakkitirin. 24Inin joro irgi wetidirri, iri birigrun malegi salirunna wattigi, amnewe ir tekki barrungi. 25Irgi bawtakkitidirkanin. Kute teb salirunna wattigi ir on zol werdogor haja wekki haryekrun, gafretirwe, intimbab simer dal irgi gafretidirinna joro inna zelachigi. 26Won ir on gafretidirmenkrun, intimbab simer dal irgi tekkon bigafretidirmunum inna zelachigi.“
27Wide owittiged Urushalimir tasan. Ter jamar talin dajingon tekk abidi fegirina samli duligon abajiligon wide samligon 28wide tekki wetirsan: „Gudra saïdiged er ingi aawin? Wide ni ekki in gudragi tirum, ingi aw an?“ 29Yesu rude wetidirsum: „Aigon irgi were habbekki bisigirrin. Aigi rudedenkrun, aigon irgi biwetidirrin gudra saïdiged ingi aawringi: Hanana kidirar simerton ema? 30Wala zolinaitone? Rudedenwe.“ 31Tinnewertichir metile wesan: „Ar on wekrun: ‚Simertonm’ an, biwen: ‚Won ir ma tekked amnemensure?’ 32Won wekrun: ‚Zolirtonm’ an“ — gebilagi sarkossan. Mine Hana malenai nebi alend esum. 33Tiri rude Yesugi wetirsan: „Ari aïyirmunu.“ Yesu rude wide wetidirsum: „Aigon irgi awetidirminim gudra saïdiged ingi aawringi.“
Published by the British and Foreign Bible Society in 1912.
