Markusna Enjil 12
12
Bag. 12.
1Tirgi ugudi wetidirsum meteliged: „Zol wer karum wekki terossum. Wide hazaz wekked howishesum. Wide tenna tur hod wekki golossum asaragir. Wide gela wekkon teddo goyos torbarigi tidiros safrossum. 2Karjarna wattigi torbarinai nugud wekki ishinsum, tinnaiton mahsulloton aredtar an. 3Tiri tekki arrigi jomdigos wide sudtir ishinsan. 4Owittiged tirg abidi nugud echel wekki ishinsum. Ingon nalijos abergi didtiged ishinsan. 5Widegon echel wekki ishinsum. Ingon berossan. Widegon echeli werigi digrigir. Ingurton werigi beirsan, werigon tukirsan. 6Tennai dasum ogicchod habitodder, dolidatodder. Kemallo ingi tirgi ishintidirsum, anna todti hibekrangon an. 7Ama man torbari tinnewertichir wesan: ‚In biwirtel teran. Tawe. 8Tekki berosrun. Wirtagon ban̄danin.’ Tekki arrigi beros karumna bochir lufesan. 9Mingi karumna tirti bawin? Targi in torbarigi berosir wide tenna karumgi echeli werigi bitidirin. 10In bajbulgi ir geryekomnu?: Kulu benachi monossangi, ter katrena ur teranossingi. 11In artina awid teran, awid ajebdi anna misichir.“
12Birigsan tekki morograrki. Ama jemagi sarkossan, tindogochir metelgi wesingi iyiros. Tekki mugosirgi nogsan.
13Terin aharro Farisichirton werigi wide Hirudusdichirton werigi tekk abidi ishinirsan, tekki, were werro atrekin, morogirw an. 14Bidargi tekki wetirsan: „Wo arif, ar iyirrun er aley engi, wide zol wekki abalemeningi, wala zolina koyigi aürumeningi, ama artina darubki aleged akurkidingi. Eleken juzena gaisarki haracchi tirar? Wala ila? Tirrua? Wala tirmendu?“ 15Ter tinna ergir dalgi iyiros wetidirsum: „Ir ma aigi ajeriberun? Dinar wekki aigi denwe, nallinna joro.“ 16Attatirrangad wetidirsum: „Nindire in suragon wide bacchigon?“ 17Tekki wetirsan: „Gaisardum an.“ Yesu rude wetidirsum: „Gaisardigi gaisarki tirwe. Artindanilgon artigi tirwe!“ Tekked ajibesan.
18Terin aharro Sadugichi, diarroton imbelarki agubili, talin targi tekki isig wetirsan: 19„Wo arif, ahan Muse argi bajdecchirsingi: Werna timbes on dios, wide en wekki affikiyir tenn aharro mugkin, timbesdogor dan tenna engi jamegrar, timbes dielgi diriye wekki waharetir an. 20Timbes kolod dasum. Koyaldi en wekki edsum. Wide diossum diriyekiyir. 21Timbes owitti man engi jamegirsum. Tekkon diossum diriyekiyir. Toskittigon ikke kolodittir junbokon. 22Kolodingari diriyekiyir disan. Wide malen kemallo engon diossum. 23Imbelarna ugroski imbellanna kello binindanin? Mine kolodingarina en esinged.“ 24Yesu rude tirgi wetidirsum: „Eleken iri jehlebumnu, kitabki aïyirmendungad wala artina gudragi? 25Mine diarroton imbellanna kello la bedkirminan wala bedminan. Ama bimalaikarigalgandan simen tur. Ama dielig ankrun, bimbelkandan. 26Iri ebeden geryekomnu; Musena kitabir man ikadi tenna turton; ajugelna gisagi, mine iarti tekkodon bain wesingi: ‚Ai Ebrehinna arti terrim. Wide Isaagna arti terrim. Wide Yagubna arti terrim? 27Ter dielina artimnum. Ama aïbulina artim. Iri desen tuheburun.“
28Wide abajilirton wer tatirsum tekkodon ajadlerangi gijred. Ter uru nalsum tirgi gandurkir widegirtidirsingi. Wide Yesugi isigsum: „Sheria edi saï malen owol terre?“ 29Yesu rudetirsum: „Sheriachina edi owol in teran: ‚Gijir, wo Israel. Arti, annā tir, werum. 30Wide arti enna tirki dolu enna a malerton, wide enna newerti malerton, wide enna jilatti malerton, wide enna gudra maleged.’ In teran sheria owoldi. 31Wide owittigon ter galgum, Tekkon awen: ‚Enn awtindigi ennewerti nawre dol an.’ Sheria wer damnum in owin dogor dul.“
32Abajil tekki wetirsum: „Adelum, wo arif. Er aleged wesum, mine arti wer engad, wala tenna masir dal damnum. 33Tenna dolegon a malerton wide erig malerton, wide newerti malerton, wide gudra maleged, wide awtindigi dolar tennewerti nawre, in genum bahurigon wide gojrigondogor.“ 34Yesu tekki erigked widegirtirsingi nalos wetirsum: „Er artina mulkirton warimnum.“ Manin aharro wekkon eskergi tekki isigkomnum.
35Widegon Yesu rude wesum, ter jamar akurkidingon: „Won mine abajili eskergi aweran: ‚Komisbul Dawudna todm an?’ 36Dawud tennewertir wekosum newerti gadisebulged eyebungon: ‚Tir anna tirki wetirsum: Anna iyinneged tegos, ai enna aduwichigi enn osichin togor uskurirrinbokon.’ 37Dawud tenna kidir tekki aüwen tirm an. Won mine tenna todanin?“ Wide jema digri wer tekki gurattiged agijirsum.
38Wide wetidirsum tenna kurkidarro: „Innewertichigi harsewe abajilirton, kadechi fegirindichiged agirideligi, wide ichina dogarki sugir awersiligi, 39wide agari owoldichir jamachir tegarki awersiligi, widegon azumachir.“
40„Ingu teran ecchi azabachina kachigi akalili. Wide tinna ila werna joro salagi anosogirran. Ingu dinad dulgi barkandan.“
41Yesu wide tegsum duguna dadina gebello, aündurrangi ururi an. Berbuli digrigir aündursan. 42En azaba fegir wer targi bariz owigi luf undursum. 43Yesu tenna hiranigi uwedtargi wetidirsum: „Aleged irgi wetidirrin, in en fegir malen dogor digrigi undursum dadir. 44Mine male tinna bererton undursan. Ama in en ahajesin malegi luf undurossum.“
Published by the British and Foreign Bible Society in 1912.
