PIENCILNA 9
9
Noah tawh Thuciemna
1Pasien in Noah le a tapate thupha pie a, amate kungah, “Cipha-in pung unlen, leitung luodim un.#Pien 1:28 2Leitung ganhing namcin teng, vana leng va namcin teng, lei-a a bawhva cinteng le tuipi sunga a om zosie in hing giingin ang zatah ding uhi; na khut sung vuah tuate ang kipie hi. 3A pia thei a nungta ganhing zosie na an uh hi ding hi. Keima in ante lohing note kang pieh bangin na vannuoi zong note kang pie hi. 4Ahi vangin hinna ahi sisan pen a sa tawh na ne ton sih beh ding uhi.#Siem 7:26-27; 17:10-14; 19:26; Thkna 12:16, 23; 15:23 5Na hinna uh ahi sisan tangin sisan ma ka kal valon ding hi: Ganhing zosie tung le mihingte tungah ka kal ding a, mi khat ciet’ sisan tangin midang khat ciet’ sisan ka kal ding a, mihing hinna tangin mihing sisan ma ka kal ding hi.
6Mihing sisan suo poma,
mihing ma in tua mipa
sisan a suo ding hi.
Azieh pen Pasien in
ama’ lim bangin mi a bawl hi.#Pien 1:26; Pei 20:13
7Tuale cipha-in pung unlen, leitung luodimin a sungah pung un,” a ci hi.#Pien 1:28
8Tua ciengin Pasien in Noah le a ompi a tapate kungah, 9Kei ka hile nangma le na nua-a na suonlehlahte le, 10no tawh a omton hinna nei zosie, vate, innsate, le note tawh a omton leitung gamsa zosie, tembaw sung pana a pusuoh zaza tawh ka thuciemna ka kipsah hi.#9:10 Gk: Heb in “leitunga ganhing zosie” belap hi. 11Hinna a nei zosie, tuizin tawh sumaimangkia ngai nawn loin, leitung susie dingin tuizin ka tunsahkia ngai nawn lo nadingin note tawh ka thuciemna ka kipsah hi,” a ci hi. 12Pasien in, “Tam pen keima, note le no tawh ang omton hinna nei zosie kikala ka bawl, mai lama ang pieng ding na suonlehlahte dinga lim ahi hi. 13Meii lahah ka sakhi-guihlung ka kaisah zo a, tua pen kei le leitung kikalah thuciemna lim hi ding hi. 14Leitungah meiilum kaisahin meiilum lahah sakhi-guihlung a kimu leh, 15keima, nohaw le hinna a nei zosie tawh ka thuciemna ka phawh ding a, hinna a nei zosie susie dingin tuizin tung ngai nawn lo ding hi,” a ci hi. 16Meiilum lahah sakhi-guihlung a op ciengin keima in ka en ding a, Pasien le leitunga om hinna nei zosie kikalah tawntung thuciemna ka phawh ding hi,” a ci hi. 17Pasien in Noah kungah, “Tam pen kei le leitunga om hinna nei zosiete kikalah ka kipsahsa thuciemna lim ahi hi,” a ci hi.
Noah le a Tapate
18Tembaw pana pusuoh Noah’ tapate pen Shem, Ham, le Japheth-te ahi uhi. Ham pen Canaan’ pa ahi hi. 19Tam mihing thum teng pen Noah’ tapate ahi vua, tam teng panin leitung buppi mi tawh a kidim hi.
20Noah pen lohlo mi ahi a, lengga um bawl masa pa ahi hi. 21Ama in lenggazu themkhat dawnin a kham a, tuale puonbuh sungah puon sil loin a lum hi. 22Canaan’ pa Ham in a pa a guohtanga a lup a mu bepin, a pulama om a sanggam ni tegel kungah a ko hi. 23Tua ciengin Shem le Japheth in puon khat la-in, a liengko tuoh vuah a baang vua, nuatawnsa-in pei-in a pa uh’ guohtang opna a khupieh uhi; ama ni in a lengat zieh gelin a pa uh’ guohtanga a opna a mu sih uhi. 24A zukhamna panin Noah a khuophaw ciengin ama tungah a tapa tumpen gamtat dan teng thei a, 25ama in,
“Canaan in samsiet thuoh hinlen,
a sanggamte adingin
sila ngiempen hi taheh.
26Ama in zong, “
Topa ka Pasien in
Shem thupha pie hinlen,
Canaan, ama’ sila hisah heh.
27Pasien in Japheth adingin#9:27 Heb ah “yapht”, “Japheth” tungah a metdawh a cina ahi hi.
mun bawlpieh hinlen,
Shem’ puonbuhte sungah
ama tengsah heh.
Tuale Canaan pen
ama’ sila hisah heh,”
a ci hi.
28Tuizin tunzaw ciengin Noah kum zathum le kum sawmnga sung hing lai hi. 29Noah’ khan sung teng pen kum zakuo le kum sawmnga ahi hi; tuale ama a si hi.
Zo Bible © Bible Society of Myanmar, 2018.
