Éxodo 2
2
Moisespa nacesqanmanta
1Leví ayllumanta kaq qarim, hina Leví castanmanta kaq warmiwan casarakurqa. 2#Hch 7.20; Heb 11.23.Chay warmim wiksayakuruspan qari wawata wachakururqa, chaymi kuyayllapaq kasqanta qawaykuspan kimsa killata pakarurqa. 3Ichaqa unayta manaña pakayta atispanmi, totoramanta canastillata ruwaruspan yaku mana yaykurunanpaq suma-sumaqta breawan llusirurqa, hinaspam chay canastaman wawata churaykuspan Nilo mayupa patanpi totorakunapa chawpinpi saqeykurqa. 4Wawapa paninñataqmi karullamanta wateqarqa, wawata imam pasasqanta qawananpaq.
5Faraonpa warmi churinmi mayuta bañakuq rirqa, chaymi criadankunawan mayu patanpi purichkaptinku Faraonpa churinqa totorakunapa chawpinpi huk canastillata rikururqa, hinaspam huknin criadanwan apachimurqa. 6Kichaykuspa qawaykuptinmi huk wawa waqachkasqa, chaymi Faraonpa churin llakirikuspan nirqa:
Hebreo casta wawacham kayqa, nispa.
7Wawapa paninñataqmi Faraonpa warmi churinta nirqa:
¿Munankichu kay wawata ñuñupusunaykipaq hebreo castamanta warmita qayarapamunayta? nispa.
8Faraonpa warmi churinñataqmi nirqa:
Arí, qayaramuy, nispa.
Hinaptinmi chay sipas pasaspan wawapa mamallanta qayaramurqa.
9Paytam Faraonpa warmi churin nirqa:
Kay wawata apaspa uywapamuway, pagapusqaykim, nispa.
Chaymi wawata apaspan uywamurqa. 10#Hch 7.21.Wawa wiñaruptinmi Faraonpa warmi churinman qoykapurqa, hinaptinmi wawanta hina uywaspan #2.10 Hebreo simipi Moisés ninanqa “hurqosqa” ninanmi.Moiseswan suticharqa: “Yakumanta hurqomusqaymi”, nispan.
Moisespa lluptikusqanmanta
11 #
Heb 11.24. #
Hch 7.23-28. Huk punchawmi Moisesqa yuyayniyuqña kachkaspan, castankuna watukuq lloqsispan sasa llamkaykunawan ñakarisqankuta qawarqa, qawarqataqmi hebreomasin runata Egipto runa maqasqantapas. 12Chaymi kaylawta-waklawta qawakacharikuspa mana pitapas rikuspan, chay Egipto runata wañurachirqa, hinaspam aqopi pamparurqa. 13Paqarinnintinpas lloqsispanmi hebreo casta iskay runakunata maqanakuchkaqta rikururqa, hinaspam maqaq kaq runata nirqa:
¿Imanasqataq castaykita maqanki? nispa.
14Chaymi payñataq nirqa:
¿Pitaq qamta ñoqaykupa kamachiqniyku hinaspa juezniyku kanaykipaq churasurqanki? ¿Egipto runata wañurachispachu ñoqatapas wañurachiwayta munachkanki? nispa.
Hinaptinmi sonqonpi mancharikuruspan Moisés nirqa: “Cheqaptapunipas kay ruwasqaytaqa yacharunkum”, nispa. 15#Hch 7.29; Heb 11.27.Faraonmi Moisespa imam ruwarusqanta yacharuspan wañurachiypi rirqa. Chaymi Moisesqa Madián lawman Faraonmanta lluptikururqa. Chayman chayaruspanmi pozopa patanpi tiyaykurqa.
16Madián lawpi sacerdotepam qanchis warmi churinkuna karqa, paykunam taytanpa ovejankunaman tomachinanpaq artesakunaman yaku hurqoq hamurqaku. 17Ichaqa michiqkuna hamuruspanmi paykunata qarqorurqa. Chaymi Moisés hatarispan sipaskunata amachakurqa, hinaspam ovejankunamanpas yakuta tomachirqa. 18Maypacham sipaskuna taytankupaman kutiruptinkum, pay tapurqa:
¿Imanasqataq kunanqa chaylla kutiramunkichik? nispa.
19Paykunañataqmi nirqaku:
Egipto runam michiqkunamanta amachawarqaku, hinaspam yakuta hurqopuwaspanku ovejakunamanpas tomachirqa, nispa.
20Chaymi taytanku tapurqa:
¿Maypitaq chay runa kachkan? ¿Ima-nasqataq saqeramunkichik? Mikunanpaq qayamuychik, nispa.
21Chaynapim Moisesqa Reuelpa wasinpi yachananpaq arí nirqa. Chaymantam Reuelqa churin Seforawan Moisesta casarachirqa. 22Warmin Séfora qari wawata wachakuruptinmi Moisés chay wawata Gersonwan suticharqa: “Ñoqaqa huklaw llaqtayuqmi kani runapa llaqtanpi”, nispa.
23Watakuna pasaruptinmi Egipto nacionpi rey wañururqa. Israelpa mirayninkunañataqmi esclavo kasqankurayku llumpay ñakariypi karqaku, chaymi waqaspanku Diosta mañakurqaku. 24#Gn 15.13-14.Ñakarispa waqasqankuta Dios uyarispanmi Abrahamwan, Isaacwan hinaspa Jacobwan pacto ruwasqanta mana qonqarqachu. 25Chaymi Israelpa mirayninkuna imaynam tarikusqankuta Dios qawaykurqa.
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
