Mattaios 26
26
26 Ik.
1Orowa, Yesu tan itak obitta ye okere chiki, koro koikara utara otta ene itak-hi :— 2Tut ko okaketa kama-kush marapto an kusu ne-hi echi eraman, orowa, Ainu Poho anak ne utasa chikuni otta araige gusu aekoshi ruwe ne. 3Nei pakibita Kamui kora kenru esapane utara newa utara koro ekashi utara anak ne Kaiapa ari an reihei ani areikore Kamui kora kenru iyotta pase esapane guru koro tumbu ta uwekarapa wa okai ruwe ne, 4awa, arorokishne no Yesu kishima wa raige kuni ukoramkon nisa ruwe ne. 5Koroka, ene itak-hi :— Marapto toho ta shomo, ikineipeka utara tumugeta sakayo hopuni kusu ne na, ari itak.
6Orosama, Yesu anak ne Betania kotan un munin tashum ki Simon ani aye guru koto chisei ta an ita, 7shine shiwentep shi no oro an no an shum o sei shintoko shinep koro wa ek hine, Shinuma a wa ibe rapoketa, koro sapa kashiketa ota nisa ruwe ne na. 8Koroka, koikara utara nei ambe nukara chiki irushka hine ene itak-hi :— Nep gusu tap akoisamka ambe an a? 9Tan shum ataye rui no aeihok wa irapokkari utara otta aeungeraite aeashkaibe ne ruwe ne gusu ne na, ari itak. 10Koroka, Yesu tambe eraman wa otta ene itak-hi :— Nep gusu, shiwentep echi ramusarakka ya? Shinuma En orun pirikap iki nisa ruwe ne gusu ne na. 11Irapokkari utara anak ne ramma-kane echi tura no okai, koroka, Kuani anak ramina pakno shomo echi tura no an ruwe ne. 12Tan slriwentep Ku netobake kashiketa tan shum ota ambe anak ne iyurui orota a en omare kuni gusu etokooikire kusu nep ne. 13Son no echi otta Ku ye, ingi-moshiri ta tan pirika shongo aeupaskuma ita, nei ita anak tan shiwentep iki ikip shomo aoira kuni ne tan orushpe aye kusu ne na.
14Tun ikashima wa niu tumugeta an Kariot kotan un Yudas ani an reihei ani areikore shine ainu anak ne Kamui kora kenru esapane utara orota oman wa ene itak-hi :— 15Kuani Shinuma echi otta ekoshi yakun, nei pakno echi en kore kuni aramu ya? ari itak. Orowa no nei utara shirokani wanbe e tu hot pakno pakari wa kore nisa ruwe ne. 16Nei orowa no nei guru anak ne Shinuma ekoshi kuni i hunara shiri an ruwe ne. 17Orosama, pandane sak pan marapto atpake an toho ta koikara utara anak ne Yesu otta araki wa ene itak-hi :— Kama-kush marapto E ibe gusu neita etokochioiki kuni E ramu ya? sekoro itak. 18Shinuma ene itak-hi :— Machiya orun paye wa nei an guru otta ene ye yan :— Epakashnu guru ene itak-hi :— Ku pakihi ehange no an; Kuani Ku koikara utara tura e kotʼchisei ta Kama-kush marapto Ku iki kusu ne, ari an itak ani ye yan. 19Orowa, Yesu kashpaotte korachi nei koikara utara kara wa Kama-kush marapto etokooiki nisa ruwe ne. 20Orosama, onuman an koro Shinuma nei tun ikashima wan koikara utara tura no a wa ibe shiri an ruwe ne; awa, ibe rapoketa Shinuma ene itak-hi :— 21Son no echi otta Ku ye, echi utara tumuge an shinen anak ne En ekoshi kusu ne. 22Orowa, nei utara shiri ramu oknatara hine pishno 23pishno ene hawe heashiri ki :— Utarapa, kuani ne ruwe? Orowa Shinuma ese wa ene itak-hi :— En tura no tekehe nima otta omare gurʼanak ne, nei guru En ekoshi kusu ne. 24Gusu chieshinnuye wa an korachi Ainu Poho oman ruwe ne: koroka, ani Ainu Poho ekoshi gurʼanak ne yaisambepokash humi! Nei guru shiko a shomo ki a yak ne shinuma gusu pirika a ambe ne. 25Orowa, Shinuma ekoshi Yudas anak ne ese wa ene itak-hi :— Rabbi, kuani ne ruwe he an? Otta Shinuma ene itak-hi :— E ye okere ruwe ne, ari itak. 26Orowa, ibe rapoketa Yesu pan-tak uk, aige, nunuke hine meshpa; orowa, koikara utara otta koropare wa ene itak-hi :— Uk wa ibe; tambe anak ne Ku 27netobake ne ruwe ne. Orowa, Shinuma itangi uk, aige, yaiiraige ki wa nei utara otta koropare hine ene itak-hi :— 28Echi utara obitta tambe iku yan; tambe anak ne inne utara koro chikokatpak atusare kuni ne aohetu aeuitaknu gusu an Ku kemihi ne ruwe ne. 29Koroka, echi otta Ku ye :— Ku Michi koro moshirʼotta echi tura no ashiripe Ku iku pakno, tande orowa no hat pungara nikaop Ku iku shomoki kusu ne na.
30Orowa, shine shinotcha ki okere chiki soyumba wa Kanran-ush nupuri orota paye nisa ruwe ne na.
31Nei ita Yesu nei utara otta ene itak-hi :— Echi utara obitta tan ukuran En gusu aepetchiure kusu ne: inambe gusu ne yakun, hitsuji pungi Ku shirikik, orowa hitsuji anak ne oyakta achatchari kusu ne sekorʼambe anuye wa an ruwe ne gusu ne na. 32Koroka, Kuani hetopo a skiknure imakake echi kotchaot Gariraya kotan otta Ku oman kusu ne. 33Koroka, Petros ese wa Shinuma otta ene itak-hi :— Ainu obitta Aokai gusu aepetchiure yakka, kuani ramma pakno ne yakka shomo, ari itak. 34Shinuma otta Yesu ene itak-hi :— Son no e otta Ku ye, tan ukuran, niwatori chikap hau-koro shomoki pakno, eani re shui En eshina kusu ne. 35Petros Shinuma otta ene itak-hi :— E tura no ku rai yakka E eshina shomoki kusu ne, ari ye. Moshima okai koikara utara ne yakka obitta nei no ye nisa ruwe ne na.
36Orowa, Yesu anak ne nei utara tura Getsemane ari aye ushike ta ek, awa, koro koikara utara orota ene itak-hi :— Inonno-itak Ku ki gusu toani un Ku oman rapoketa, teda echi rok yan, ari itak. 37Orowa, Shinuma Petros newa Zebedee koro tu poho tura wa oman, aige, ok wa shi no ramu-oknatara beashiri. 38Nei ita Shinuma nei utara otta ene itak-hi :— Ku ru rai pakno Ku keutum shiri yairamkoiki ruwe ne: teda echi tere wa En tura no shiruwande yan. 39Orowa, Shinuma pon no hoshiki no oman wa nanuhu koshirikata pakno hachiri wa inonno-itak hine ene itak-hi :— Aa Ku Michi, aeashkaibe ne yak anak ne, tan itangi En orowa no shimaka aoraye kuni ne ki wa En kore: koroka, Ku rengai ne korachi shomo ne, E rengai ne korachi ki wa En kore, ari itak. 40Orowa, Shinuma koikara utara otta ek hine mokoro wa okai-i nukara, orowa Petros otta ene itak-hi :— Hemanda, shine pakihi pakno En tura no shiruwande eashkai shomoki ya? 41Iteki akoramnukara kuni ne shiruwande wa inonno-itak ki yan: ramat anak ne ki rusuibe ne, koroka kam anak katchakbe ne ruwe ne. 42Shui, Shinuma kanna oman, aige, inonno-itak hine ene itak-hi :— Aa Ku Michi, tambe Ku iku shomoki chiki shi maka aoraye eaikap yakun E korʼirenga aki kusu ne, ari itak. 43Orowa, shui Shinuma ek wa nei utara mokoro wa okai-i nukara, shikihi pase ruwe ne gusu ne ruwe ne na. 44Orowa, shui, Shinuma nei utara ande wa oman, awa, re ikinne inonno-itak hine uhunak aye-hi korachi kanna-shui ye nisa ruwe ne. 45Orowa, Shinuma anak ne koro koikara utara otta ek wa orota ene itak-hi :— Tane mokoro wa echi shini yan: ingarʼan, pakihi ehange no an ruwe ne, Ainu Poho anak ne katpak koro utara tekehe, otta aekoshi wa an ruwe ne. 46Hopumba wa paye anro: ingarʼan, En ekoshi guru ehange no an ruwe ne.
47Orowa, Shinuma itak rapoketa tun ikashima wa niu tumugeta an shinen ne Yudas anak ne, shirikik kuwa hemhem emush hemhem koro inne topaha tura, Kamui kora kenru esapane utara newa utara koro ekashi utara orowa no ek nisa ruwe ne. 48Shinuma ekoshi guru anak ne utara otta shine shirosh kore wa ene itak-hi :— Nen ne yakka ku chopchopsekara guru anak ne Shinuma ne, kishima yan. 49Orowa, nani nei guru Yesu otta ek wa ene itak-hi :— Rabbi he, irangarapte; orowa, Shinuma chopchopsekan nisa ruwe ne. 50Orota Yesu ene itak-hi :— Katairotke guru, gusu e ek ambe ki yan, ari itak. Orowa no utara araki wa Yesu kishima nisa ruwe ne na. 51Orowa, ingarʼan, Yesu tura no okai utara tumuge un shinen anak ne, teke turi wa emush etaye hine Kamui kora kenru esapane guru koro usshiune guru ko kik wa oat-kisaraha oattuye ruwe ne. 52Orota Yesu ene itak-hi :— E koro emush shirika eushi yan: inambe gusu ne yakun, emush koro utara anak ne obitta emush tura no aisamka gusu ne. 53Ku Michi otta Ku koramkoro yakun, tane Shinuma En otta tu ikashima wan Regeon pakno an hauturunbe ette shomoki kuni echi ramu ya? 54Koroka, nei no Ku ki yakun auweomare kuni gusu an Kamui itak nekon a aiki eashkai ya? ari itak. 55Nei ita utara topaha otta Yesu ene itak-hi :— Emush hemhem shirikik kuwa hemhem koro wa ikka guru kishima kuni korachi En orota echi araki ruwe he an? Kuani kesto epakashnu gusu Kamui kora kenru ta Ku a, 56awa, nei ita echi En kishima shomoki. Koroka, tap okaibe hetuku ambe anak ne, Uweingara utara nuye ambe auweomare kuni gusu an ap ne ruwe ne, ari itak. Nei ita anak ne koikara utara obitta Yesu ekohopi wa shaot nisa ruwe ne na.
57Orowa, Yesu kishima utara anak ne kambi-nuye utara newa ekashi utara uwekarapa wa okai Kamui kora kenru esapane guru Kaiapa otta Shinuma tura nisa ruwe ne. 58Koroka, Petros tuima no Shinuma oshi ek, aine, nei okese ambe nukara kuni gusu, Kamui kora kenru esapane guru koro ipishi tumbu orota ahun wa tono utara tura a nisa ruwe ne. 59Awa, Kamui kora kenru esapane utara obitta no ukoramkoro utara tura Yesu raige kuni shunge paweteshu ambe hunara ruwe ne; 60aine, inne shunge paweteshu ki utara araki yakka, nei ambe pa eaikap ruwe ne. Koroka, okaketa tun araki wa ene itak-hi :— 61Tan guru yep anak ne, — Kamui kora kenru Ku isamka wa rereko uturuta eashiri kara eashkai ruwe ne, ari itak nisa. 62Orowa, Kamui kora kenru esapane guru ash wa Shinuma otta :— Eani nep ne yakka ese shomoki ruwe he an? E epeka no tan okai utara paweteshu ki ambe nep ta an? ari itak. 63Koroka, Yesu nep poka ye ka shomoki ruwe ne. Otta Kamui kora kenru esapane guru ese wa ene itak-hi :— Eani Kamui Poho ne Kiristo E ne ruwe he an? Shomo ruwe he an? ari an ambe En otta E ye kuni ne, Ishu Kamui koye wa E ikashpaotte ash ruwe ne, ari itak. 64Orota Yesu ene itak-hi :— E ye okere ruwe ne: yakka e otta Ku ye, tap imakake Ainu Poho mondum koro shimon-tek samta a hine kando nishkuru kashiketa an wa ek shiri e nukara kusu ne ruwe ne, sekoro itak. 65Orowa. Kamui kora kenru esapane guru anak ne yaikota mi anrip yaspa wa ene itak-hi :— Shinuma Kamui koatcha itak ye nisa ruwe ne: Nep gusu moshima an paweteshu ambe chi kon rusui ya? Ingarʼan, echi utara tane nei Kamui koatcha itak ambe echi nu okere ruwe ne: Nekon a echi yainu ya? ari itak. 66Nei utara ese wa ene itak-hi :— Araige kuni gusu ne a guru ne ruwe ne, sekoro itak. 67Orowa, nei utara Shinuma nanuhu kashi topse-topse kara wa shiriki, samta, paratek ani kokik utara okai wa ene itak-hi :— 68Kiristo, e shirikik guru anak inan guru ne ya uweingara wa un nure yan, ari itak.
69Orowa, Petros anak ne nei ipishi tumbu soige wa an ushike ta a wa an ruwe ne: awa, otta shine matkachi ek wa ene itak-hi :— Eani ne yakka Gariraya un Yesu tura no an gun ne, sekoro itak. 70Koroka, shinuma anak ne okai utara obitta kotchaketa eshina hine ene itak-hi :— E ye ambe ku eramushkare. 71Orowa, soine wa shem otta an ita, shui, shine matkachi shinuma nukara wa samaketa okai utara otta ene itak-hi :— Tan guru ne yakka Nazaret un 72Yesu tura no an gun ne, ari itak. Orowa, shui shinuma toiko ye wa eshina hine kuani nei ainu eamkiri shomoki, ari itak. 73Naa pon no shiran ko samaketa roshki wa okai utara Petros otta araki wa ene itak-hi :— Soon no poka eani nei utara tumuge an shinen e ne; e ki itak gusu e pashte an ruwe ne gusu ne na, ari itak. 74Orowa no Petros iyoitakushi wa toiko ye heashiri hine kuani nei ainu eamkiri shomoki, ari itak. Orowa nani niwatori chikap hau-kon ruwe ne. 75Orowa, Petros anak ne niwatori chikap hau koro shomoki pakno, eani re shui ne En eshina kusu ne, sekoro Yesu ye itak an a-i eshkarun nisa ruwe ne. Aige, shinuma soine wa shi no chish nisa ruwe ne na.
© British and Foreign Bible Society 1897, 2018
