Sen 39
39
Navong Siosep vi slev en kantri ten out Isip, ling rendemien onen keke vousil kat Ahi
Senesis 39:1-23; 40:1-23
1Ka me-Ismael keil akur Siosep uva en out Isip keke hemai hehi slev. Ka meatin tai vuli, isen Potifar. Kei vi avat onen meatin taleikokoeien keil koa alosil kat mari eim omon Asuv Houlu ten out Isip. 2Ka avong Siosep ro teim onen Potifar en out Isip, Iahova katauni en tounah vasi koa mumoni#Umen 7:9 3ka sakin hetamen onen lei kilea keke Iahova mumon umen vasi koa mumoni tahos imok. 4Potifar si houlu veni ka lingi vi avat en teim onen, lei kat tounah vasi keil onen. 5Ka en hen Siosep, Iahova rokol kat teim ka ah keil onen koan Isip enek. 6Sakini, veni Siosep mul lei kat revi tounah vasi onen, Potifar romundem etai mun tounah. Mundem anien enges koa kei vani.
Siosep, aven tahos ka veinan malikuh imok, 7ka avong vahis muli, ahin onen Potifar ling rendemien onen mul ien ka visi vit vamatil vatal mini. 8Ka Siosep seseini ka viteni mini vit, “Ei, asuv onak mundesinau ka ling tounah vasi onen en hek keke nilei kati. Kei romundem etai mun tounah en teim onen. 9Kei san keihoen minau keke rek suval ren, ka, en teim onen, maen tounah vasi minau. Ka keik enges, koa kovi ahin onen, kei mututi vit nirrokoltei. Sakini, nasakras moumon asa koa koviteni, koanek romaltei en meten Ahi.” 10Avong vasi varei mul keih kat Siosep vahi keilu, ka kei seseini.
11Ka avong tai, Siosep va neim voumon umen onen, ka meatin sav keil atovuol neim. 12Ka navong ahin onen Potifar lesi, vuli kat eisin onen ka vit, “!Amai, matil vatal minau!” Ka kei seseini, mul lohosai rani, ka ling eisin tai omon mules en hen. 13Navong ahin enek les Siosep mul lohosai rani ka eisin omon mules, 14kei visohiso keih min meatin toumien onen keil vit, “Alles eisin ekek, omon koan Hibru koa meatin onak kuri ka lingi ro teim. Kei vit voum vatisa min ir. Mai en out namatil ien, vit vasak tisa enau, ka inau, navisohiso keih. 15Ka navong raengoni navisohiso keih mukok, ling eisin omon mules venau, muloh va hae.”
16Kei vuli kat eisin omon Siosep mules veni rokol avong Potifar muris mai teim. 17Navong meatin onen mai veni, vit usil tunien enek mini vit, “Koan Hibru koa kolingi mum en teim vit vasak tisa enau. 18Ka navong raengoni navisohiso keih, ling eisin omon mules venau, muloh va hae.”
19Navong Potifar raengon tunien enek, tin tisa houlu ka vuroh kat Siosep. 20Sakini viteni min meatin taleikokoeien keil onen avuli kati ka alingi va en eim takeih, out koa asuv houlu ten out Isip mul ling meatin keil koa amum tisa ien. Ka kei ro kat en out enek. 21Ka en eim takeih enek, Iahova ro ven Siosep ka rokol kati mun. Kei sakin meatin koa lei kat eim takeih lele tahos eni.#Umen 7:9 22Avong vahis muli, kei ling Siosep vi houlu en eim takeih. Kei mul lei kat meatin sav keil koa aro eni ka umen keil amumoni. 23Sakini, meatin koa lei kat eim takeih romundem etai mun tounah koa lingi en hen Siosep. Lei kilea tounah vasi koa kei mumoni tahos imok, veni Iahova mul katauni.
© Wycliffe Bible Translators, Inc. All rights reserved.
