Sen 37
37
Natin Siekob keil asalem en tue Siosep mai vi slev tai
Senesis 37:1-35
1 Siekob ro nges en atan ten out Kenan, out koa tata onen ro ien mulamu. 2Koanek tunien usil Siekob ral min onen keil:
En avong vasi, natnali Siekob keil amul alei kat sipsip ka nani keil esen. Tai en keil, isen Siosep, koa sua onen teindan oulu (17) mul kataun tunali keil koa mama one Bilah ka Silpah. Ka en avong tai, kur longlongien koa rotahostei usil sakien onen tunali keil min tata one koa Siekob ka avuroh kati.
3 Siekob, envatien onen mul en Siosep suli natnali sav keil veni kei matu navong avasi.#37:3 Siekob en vat Siosep mulin tunali sav keil veni kei vi moeite onen Resel, ahin onen Siekob koa en vati mok mulin ahin sav keitel onen. Siekob mumon eisin taveah omon Siosep koa moreite mok ka musin eni en kei. 4Ka navong tunali keil ales envatien onen tata one mul en Siosep suli keil, mete tisa kati ka arselustei vatahos mini.
5En vongien tai, Siosep matil vovoi, ka navong vit usili min tunali keil, tine kati houlu mok. 6Kei vit, “Mihelong matil vovoien onak. 7Romum out tas en ah ten uit ka romul ropar ruain uit keil. Evus, koa napar ruaini mulomal ka koa onami akarahiti ka uva netan mini.”
8Ka tunali keil avisi avit, “?Keik komundemi kovit kihi asuv houlu hesulin komai?” Ka tine kati mok ven matil vovoien onen ka ven asa kei vit usili.
9Evus, Siosep matil vovoi eris ka viteni min tunali keil vit, “Namatil vovoi eris, ka nales meteiai, avati ka hitu teindan tai (11) uva netan minau.”
10Kei vit usil matil vovoien onen emun min tata onen ka tata onen vul kati vit, “?Matil vovoien sa ke? ?Keik komundemi kovit tumali keil, mama onom, ral min inau mun mehemai meheha netan minuk?” 11Tunali keil avi elu kati mok ka tata mules mundem usil tounah koa Siosep viteni.#Umen 7:9
12Avong tai, tunali Siosep keil amulamun sipsip esen tata one uva en out koa oumunai ae tahos vesesal en taon ten out Sekem. 13Avong vahis muli, ka Siekob vise Siosep ka viteni mini vit, “Ek vati keik kovaha en out Sekem, kovasao en tumali keil koa amul alei kat sipsip keil oseratel.”
Ka Siosep vit, “Tahos, maha.”
14Tata onen viteni mini vit, “Keik kiha kilei vis tumali keil. ?Aro tahosis? ?Ka sipsip emun keil, tounah tovuol vakula keil? Evus, kimai ris kihiteni minau.” Sakini, Siosep musil ren tata onen ka mea ran vatihou keil ten out Hibron, va Sekem.
Navong Siosep rokol out Sekem, 15mules karahit out vasi, ka meatin tai lesi ka visi vit, “?Komul kolekat etai tounah?”
16Kei vit, “Namul nalekat tuak keil koa amul alei kat sipsip keil. ?Kokilea kovahiteni minau out kave amul ien?”
17Meatin enek vit, “Uva tuai. Naraengoni avit avaha en taon ten out Dotan.” Sakini Siosep mual valekat keil, ka votin keil en out Dotan.
18Navong tunali keil alesi mul soutin veah, arun lekat sise koa avouasi vamat. 19Aviteni min keil eris avit, “Meatin ten matil vovoien enek mul mai. 20Almai rovaha rovouasi vamat ka rovason teiai onen vaha en vulvul tai koa mul en out enek. Hevus, rokilea rovahiteni keke tirendan tai rali vahasi ka kani. Hesakini, reheles asa varei hekistal en matil vovoien keilu onen.”
21Navong Ruben raengon rendemien one, mundemi vit hekur koe tunali. Sakini, viteni min keil vit, “Ronouastei. 22En out volvol en out enek, rehesoni hehita en vulvul ten oai keisom koa memes, ronasontei her napoen.” Viteni mukok veni mundemi keke hekulati ran he ka hesila risi heha ven tata one. 23Navong Siosep mai vesesal ven keil, asakit lat eisin koa moreite koa musin eni. 24Evus, avuli kati ka asoni vita en vulvul tai koa memes.
25Evus, uva akanian. Ka navong amul semau akanian, amusil en vange meatin keil ten out Ismael amul umai ral min kamel keil ese. Aka en out Kilead avaha en out Isip. Amul akur ouai ka toeai koa vite tahos keke meatin keil avahul lati ran keil. 26Sudah viteni min tunali keil vit, “Munak rehou suain tuak orer, rosakras rovakur etai tounah koa tahos. 27Ka munak rehesani min me-Ismael keil ekek, akilea avahul lati ran ir. Hesakini, ir rehermuastei veni kei vi tuak orer, rokistal en ara tas.” Ka tunali sav keil amaeni. 28Ka navong tei en keil umai vesesal, tunali keil aleh lat Siosep ran vulvul ka amaen lati ven keil. Me-Mid keil enek avul lati en mani koa silva vi hanumau (20),#37:28 Koanek suval 10,000 vatu. ka akuri uva en out Isip.#Umen 7:9
29Navong tunali savsav keil amumoni, Ruben mul en out sav. Ka navong Ruben mai ris, sao en avul enek ka votini keke Siosep vuol tuai en out enek. Sakini, rali vas eisin omon veni longe tisa houlu mok. 30Kei va ris ven tunali keil ka vit, “!Siosep vuol! ?!Numon sa li varei!?”
31Evus, amuas nani tai ka akur more eisin omon Siosep ka alelini en ran. 32Ka keil akur eisin omon va ven tata one ka avit, “Meles tounah ekek. ?Rovitei onen natmali?”
33Kei lesi, lei kilea ka viteni vit, “!Anatin eli, onen varei! !Tirendan tai rali vahas natkuli, ka kani li varei vus!” 34Siekob longe tisa ka rali vas eisin omon ka musin en musi eisin tatangien. Kei rangis natnali avong taveah. 35Natnali keil ka natnahin keil umai veni avit avakatauni, ka kei seseini. Viteni min keil vit, “Nitos nitangisi hetokol keite ten moulien onak, hetokol avong koa nihita en out ten matien.” Sakini mules rangis Siosep.
© Wycliffe Bible Translators, Inc. All rights reserved.
