Lia Uluk Fohon 7
7
Motasaꞌe boot
1Hotu, MAROMAK katak baa Noh naꞌak, “Haꞌu karee ema iha fatin hotu-hotu tiꞌan, mais o mesan dei mak loos! Tan lia nia, o mo okaan uma isin sia tama baa roo ona! 2-3Osa no lotuk oi-oik mak bele haa, no mak bele sera baa Haꞌu, modi inan no aman hitu-hitu, tama baa roo. Manu oi-oik moos, modi inan no aman hitu-hitu. Mais, osa no lotuk seluk sia, modi inan no aman ida-idak dei. Hodi nunia, sia dadi baa fini, nebee bea bei-beik.
4Rona diꞌa-diꞌak! Hela loron hitu dei, Haꞌu atu katuun udan mak la nanawa, toꞌo kalan haat nulu, loron haat nulu! Kodi nunia, Haꞌu koꞌo mohu hotu-hotu mak moris iha rai maran, mak Haꞌu kaseꞌi tiꞌan.”
5Hotu Noh nalo tuir MAROMAK harukan hotu-hotu. 6Oras motasaꞌe nia, Noh otas tinan atus neen. 7Nia tama baa roo no feen, no oan, no oan feen sia, nebee sori aan nosi motasaꞌe boot nia. 8-9Oras nia moos, manu oi-oik no osa no lotuk seluk sia mai baa Noh. Osa no lotuk nia sia, inan no aman ida-idak, nosi mak ema bele naa no ema la bele naa. Sia tama bele-bele baa roo namutuk no Noh, tuir MAROMAK harukan. 10Loron hitu liu, motasaꞌe moos nakfakar mai, toꞌo nahuu taka nola raiklaran neꞌe.
11Kona baa Noh otas tinan atus neen, liu fulan rua no loron sanulu resin hitu, motasaꞌe nia toꞌo mai. Udan nakfakar tuun hanesan laleꞌan odamatan nakloke. Wee matan hotu-hotu iha rai kidun moos taba no nakduar sai. 12Udan moos la nanawa kois loron-kalan, toꞌo loron haat nulu.
13Mais loron nia, Noh tama baa roo laran no feen, oan naꞌin tolu, mak Sem, Yafet no Ham, no oan feen hotu-hotu. 14Sia tama bele-bele no osa no lotuk mak hakiak, mak fuik, mak maneꞌek, no manu ai leten, no osa no lotuk seluk mahoo liras sia. 15-16Osa no lotuk inan no aman ida-idak nosi hotu-hotu mak moris, tama baa roo namutuk no Noh, tuir Maromak harukan nia.
Sia hotu-hotu tama tiꞌan, MAROMAK moos kusa roo odamatan.
17-19Udan boot tuun bei-beik, toꞌo loron haat nulu. Motasaꞌe nia moos hetak aas tuꞌan, toꞌo roo naklele. Wee saꞌe bei-beik, toꞌo taka nola foho aas sia. 20Wee nia saꞌe la nanawa kois, toꞌo aas roꞌa hitu iha foho leten.
21-23Hodi nunia, hotu-hotu mak moris iha rai maran, mate fasi. Neꞌe mak: ema, osa no lotuk mak hakiak, mak fuik, mak maneꞌek no manu ai leten. Hela mesan Noh no hotu-hotu iha roo laran nia, mak moris. 24Wee nia la moti kois, toꞌo loron atus ida lima nulu.
© 2013, Wycliffe Bible Translators, Inc. All rights reserved.
