Lia Uluk Fohon 6
6
Ema siakaan aꞌaat
1Oras nia, ema hetak bea tuꞌan. Sia moris keke lema rai tiꞌan. Sia moos nahoris oan feto kabaas. 2Hotu, Maromak oan mane sia naree feto oan nia sia. Sia moos nola sia, tuir siakaan beer. 3Loron ikus, MAROMAK katak naꞌak, “Haꞌu kole resik tiꞌan, tan ema raiklaran moris la loos! Haꞌukaan Kmalar mak foo moris baa sia. Mais oras neꞌe, Haꞌu la koꞌuk sia moris nohuun.#6:3Lia isin Ibrani iha neꞌe, la malorek. Nahuu baa oras neꞌe, sia la bele moris otas naruk ona, mais sia musti mate. Sia bele moris toꞌo otas tinan atus ida rua nulu dei.”
4Baa oras nia no otas ikus tenik, ema bei balera#6:4Iha lia Ibrani, ema bei balera nia naꞌak ‘ema Nefil’. Mais lia nia isin la malorek. moris iha raiklaran. Maromak oan mane sia nola ema oan feto sia, hotu sia nahoris ema balera nia sia. Sia dadi meo ulun mak ema hotu-hotu natene tuir lia uluk.
5Oras nia, MAROMAK naree ema raiklaran hahalok aat liu resik. Sia natene loos nanoin aat dei. 6MAROMAK laran moras, tan naseꞌi tiꞌan ema raiklaran. 7Etuk, MAROMAK katak naꞌak, “Tan siakaan aꞌaat nia, Haꞌu atu kabeꞌo dodok ema raiklaran mak kaseꞌi tiꞌan nia. Haꞌu moos kabeꞌo dodok manu no osa no lotuk hotu-hotu. Haꞌu laran moras kaseꞌi sia tiꞌan!” 8Baa oras nia, Noh mesan mak nalo MAROMAK neon diꞌak.
Lia Noh
9-10Lia nosi Noh niakaan dalan moris nuneꞌe. Noh oan mane naꞌin tolu, naran Sem, Yafet no Ham. Noh moris loos, la nalo aat. Nia mesan dei mak diꞌak, tan nia moris kreꞌis baa Maromak.
11-12Mais Maromak naree ema seluk sia, aat hotu. Iha nabee dei, sia moris aat liu resik, toꞌo Maromak naree aꞌaat dei iha raiklaran. 13Naree nunia, Maromak katak baa Noh naꞌak, “Iha fatin hotu-hotu, Haꞌu karee aꞌaat dei. Dadi, Haꞌu kakotu tiꞌan atu kabeꞌo dodok raiklaran neꞌe no sasoin hotu-hotu. 14Mais nuneꞌe, Noh! O musti malo roo boot ida modi ai monas! Malo keꞌan iha laran. Hotu, tukir roo molin modi hanit. 15Roo nia naruk musti roꞌa atus ida tolu nulu resin tolu, belar roꞌa rua nulu resin rua, aas roꞌa sanulu resin tolu. 16Soor roo nia. Malo soor no leet nosi kadidin leten, takseer roꞌa baluk ida. Faꞌe roo nia malo baa tetu tetek tolu. Hotu, malo odamatan ida baa roo sorin!
17Manoin diꞌa-diꞌak, tan Haꞌu atu katuun motasaꞌe boot, kodi koꞌo hotu-hotu mak moris iha raiklaran neꞌe. Toꞌo la hela sa-saa! 18Mais, Haꞌu atu kamate menon ko o, Noh. O musti mola o feen, o oan, no o oan feen sia, tama baa roo nia.
19-20Mola tenik osa no lotuk hotu-hotu, inan no aman ida-idak. Mola mak hakiak, mak maneꞌek, no manu ai leten sia. Matama sia baa roo, nebee moris namutuk no o. Hodi nunia, sia bele moris. 21O moos musti loi matama haan oi-oik bodik emi ho osa no lotuk nia sia.”
22Rona nola nunia, Noh moos nalaꞌok tuir Maromak harukan hotu-hotu.
© 2013, Wycliffe Bible Translators, Inc. All rights reserved.
