MATIO 4

Pa' Sata lə ləŋtə Yeso a

(Mk 1.12-13; Lk 4.1-13)

1A lə pɑ po'o Zhwenyə lɑ Yeso gɔ ghakgo gɑ Sata ləŋtə e. 2E lə cwə tsʉ'u mtyɛ'dzʉ mghappfʉə ba mnthyatə mghappfʉə tə tsʉ̌ ywə, jikǔ' yɛ́ e. 3Gɛ ləŋtə sɔ' bəŋ e gɔm bi e gɑ: O pɑ́ Mu Si, o ghɔm gɑ mwɔ' mɔ gɑ cʉ' msɛ. 4Da' gɑ Yeso ghɔm bi e gɑ: A bɑ pu və gɑ́ mo tɑ́ bvɔk da' nə msɛ̌ pɑ, mo bvɔk m nə ghɔm tsyə a təm shwə̌ Si a.

5A lə pɑ́ po'o Sata lɑ e gɔ nthʉm tisuŋ Dɔlɔ̌ jap e do Dyə Si, 6biŋ gɔm bi e gɑ: O pɑ mu Si, o cʉ́msi, nə pa' a bɑ pu və gɑ. Si gɔ pa ghɔm bi pɑ aŋgəle pyə wap pɑ ŋkwa o nə bu map po'o gɑ o kɑ cwɔ' kwə o nə gwɔ'. 7Yeso ghɔm bi e gɑ: A bɑ pu piŋ bvə ba m gɑ o tɑ gɔ ləŋtə Cyəpɔ Si o pɑ.

8Sata piŋ dɑ e gɔ dəm mu' sʉəsʉə kuŋ gǒ; da'tə é guŋ nəfo dzʉ awɛ ba mghu' myə́, 9gɔm bi e gɑ: O kam mkwi'tə mu dzə m gamtə a bɑ gɑ̌ gɔ hɑ guŋ e awɛ bu. 10A pɑ po'o Yeso ghɔm bi é gɑ: Sata lǔ! Nə pa' a bɑ pu və gɑ o gɔ pɑ ghamtə pɑ da' Cyəpɔ Si o piŋ pɑ fa' da' bi e. 11Sata lə tak e nəŋ cwəlɔ pɑ aŋgəle sɔ' bəŋ e, bɑ fa' bi e.

Yeso to' fa' Galilea

(Mk 1.14-15; Lk 4.14-15)

12Yeso lə nə yu' gɑ pu ghəm Yohane nthəm dɑ m Galilea, 13dú Nazarɛt, gɔ shwə Kapɛrnaum kəŋ shyə lɑpʉə guŋ Zabulon pu Nɛftali, 14po'o gɑ́ ghɔm tsyə gɔm ghɔm Si Esaya lə ghɔm a, a pəmtə gɑ́:

15Guŋ Zabulon, guŋ Nɛftali,

jyə shyə́ lɑpʉə,

guŋ nə yə mu' jʉɔ Yurdɛŋ,

Galilea mgùŋ!

16Pɔ pyə wap lə́ bɑ́ nthʉm jʉ́m á,

yɔ ŋkha' gwyə;

pɔ pyə wap lə́ bɑ́ nthʉm sə́sə́ guŋ vʉ́ a,

ŋkha' sɔ' bi pu.

17Tə fɑ cwə o bɔ Yeso to' bɑ siŋ gɑ:

Po kwyəpnyə:

Nəfo kɛbəŋ ghɔptə.

Dzə pɑkhʉ Yeso

(Mk 1.16-20; Lk 5.1-11)

18Yeso lə pɑ́ giŋ giŋnyə shyə́ lɑpʉə Galilea jɔ shɑ mghəm bapgu pɑpʉə, wap pɑ mfɑ̌. Simon yə pu ŋkhe e gɑ Pɛtrɔ a, pu Andreya fɑ e, wap pɑ́wə ma' nthənthɔm nthʉm shyə́ lɑpʉə. 19Yeso ghɔm bi pú gɑ: Po yap jʉ̌m m̀, gɑ gɔ sɔ' lɑ wɔ ghə pɑ ghəm pɔmnəŋ. 20Wap lə wuŋ nthak mnthənthɔm map nə́ŋ Ntham jʉ̀m e. 21Yeso lə ghɔ tə ŋkho dzə, jɔ shɑ mfɑ pɑpʉə Yakop mu Zebede pu Yohane fɑ e, nthʉm kənu' pu a tá yap Zebede wap pɑwə nyaptə nthənthɔm yap, Yeso ke wap. 22Wap lə wuŋ nthak kənu' pú tà yap jap jʉ̌m Yeso.

Yeso pu a du pɔ

23Yeso lə́ kǎ nə gùŋ Galilea awɛ bɑ ji'tə pɔmnəŋ ywə sinagogə pú, biŋ bɑ siŋ Cuŋ pɑpuŋ nə́ Nəfo, biŋ bɑ jɛ́ mgho pu a mkho'tə cəcɑ́ pɔmnəŋ. 24Pu lə cyanyə tso tsyə́ nə gúŋ pɑ Siria awɛ, pù piŋ bɑ dɑ gùŋ pɑ yɔgo' awɛ, mghɛ gho, kɑ kɑ́ nthi gho mɛnyə lɑ́: Mghɛ ghə zhwenyə cwəpùŋ, pɑ vʉwa', mghɛ po'tə nɑ̀ sɔ' bi é. E pɑ jɛ wáp. 25Vəŋ du pɔ lə biŋ bɑ́ giŋ jʉ̌m Yeso: Pɔ pyə wap lɑ fɑ Galilea bɑ m Dekapoli, bɑ m Yerusalɛm, bɑ m Yudea, bɑ m nə yə mu' jʉɔ Yurdɛŋ.

Attualmente Selezionati:

MATIO 4: NTGomala

Evidenziazioni

Copia