LUKASI 23

Yeso dzə̌ Pilato

(Mt 27.1-2,11-14; Mk 15.1-5; Yhn 18.28-38)

1Guŋ yap awɛ lə lusi cwəlɔ dɑ e gɔ dzə Pilato. 2Wáp lə pɑ bútə e bɑ gɔm gɑ: Pyə yɔ tambɛ yəŋ gɑ e pɑwə ma' paknyə nthʉm gùŋ, ŋkhəŋnyə gɑ pu kɑ ma' shwɔp, biŋ bɑwə gɔm gɑ e bɑ Mesia, bɑ fo. 3Pilato həŋtə e gɑ: O bɑ fo pɑ Yudea a? Yeso pa' bi e gɑ: Wə nə gɔm. 4Pilato ghɔm bi mkamsi gwyəgwyə, ba bi lǎ' gɑ: Ŋ kha yɔ ywə yə bi a pɑ pu nyəŋ shɛ thə bɛ yəŋ nə a. 5Wap piŋ shəŋtə gɔm gɑ: E bɑwə nthənyə pɔmnəŋ nə va' pu a nwə yə e bɑwə ji'tə wap Yudea a, tə ntho' fɑ Galilea ŋkhəm tsɔ'ɔ.

Yeso dzə̌ Herode

6Pilato lə yu' po'o həŋtə bi a bɛ bɔ lə bɑ yə Galilea. 7E lə yu' gɑ Yeso nthəm nə guŋ yə́ Herode nə sa'a, gɔm gɑ pu lɑ e nə gɔ jɔ Herode, nə pa' e lə bɑ Yerusalɛm nə tyɛ'dzʉ bɔ. 8Herode lə nə yɔ Yeso nwə puŋ é, nə pa' a lə bɑ e yu' pa' pu gɔm nwə nə Yeso a, bɑwə shəŋ nə yɔ e tə fɑ tə́ tyɛ̌', bɑwə ŋkwɛ gɑ e gɔ yɔ pa' e gə msya a. 9E lə həŋtə e mnwə jɔmyɔm da' gɑ la' Yeso pa' sɔm nwə bi e. 10Mkamsi gwyəgwyə pu a pɑ zhyə́ mco' pyə wap lə bɑ tsʉ'u a lə bɑwə shwɔp nthinthi mnwə nə Yeso. 11Herode pu a msəŋwi pyə́ lə yəmtə́ é, biŋ shap e, ŋkwa dzə dəŋnyə ləŋnyə nə e, ba' e bi Pilato. 12Tyɛ'dzʉ bɔ, Herode pu Pilato pyə wap lə bɔnyə a pʉɔ shʉ' msó.

Pu ya' shɛ Yeso gɑ́ pu zhwə e

(Mt 27.15-26; Mk 15.6-15; Yhn 18.39—19.16)

13Pilato lə ke mkamsi gwyəgwyə, ba mfomfo, ba pɔmnəŋ 14gɔm bi pu gɑ: Po lɑ bɛ yəŋ sɔ' jɔ a, gɔm gɑ e bɑwə fɛ pɔmnəŋ gɑ wap kɑ ghiŋ nə məjyə dəŋdəŋ; da' gɑ́ gɑ̌ təŋtə e nwə dzə po, la' jɔ ywə yə e hɔ nə́ mnwə myə po gɔm nə e a, tə bi a pɑ pu nyəŋ shɛ thə e a pɑ. 15Ba Herode ka yɔ sɔmywə yə e hɔ a, a ywə yə a gə tə e pa' e bi pɑ a. E ka ghə sɔmywə tə a pɑ́ pɑ nwə vʉ́. 16Gɑ gɔ ghə pu cwɔ e nthak e nə́ŋ. 17A lə bɑ mà gɑ e tak ta' gɛ cɛ̌ nəŋ nə tyɛ'dzʉ ŋwɛnyə. 18Wap lə cwé guŋ yap awɛ gɑ: Zhwə e, hɑ Barabas bi pyə. 19Barabas bɔ lə bɑ e lə zhwə̌ mo biŋ ma' paknyə tisuŋ, pu ghəm e nyəŋ cɛ́. 20Pilato lə kwi' gɔm nwə bi pu nə nə tak Yeso nəŋ. 21Da' gɑ wap cu' gɑ: Kwě, kwé é thə bɛnyəpɛnyə. 22E lə kwi' gɔm bi pu batə m cʉ̌m ntha gɑ: Bɛ yəŋ gɑ bɑ e hɔ kɑ? Ŋ khɑ yɔ sɔmywə yə e ghə tə a pɑ pɑ́ nwə vʉ a. Gɑ gɔ ghə pu cwɔ e, nthak e nəŋ. 23Tə wap kwi' nthegʉ' gɔm pɑ gɑ, pu kwe e thə bɛnyəpɛnyə, gɔm po'o bɑ nə gɔ pɑ́ m dzə. 24A pɑ́ po'o Pilato yap gɑ ywə yə wap wə həŋtə a gɔ pəmtə. 25E lə tak mo yə pu lə nyəŋ e cɛ́ nə paknyə, ba nə zhwə mo a, yə wap lə bɑwə həŋtə́ á nə́ŋ; tə sɔ' m nə Yeso e hɑ e bi pu pa' wap lə bɑwə həŋtə́ á gɑ́ wap ghə nə é pa' wap yɔ a.

Yeso thə́ bɛnyəpɛnyə

(Mt 27.32-44; Mk 15.21-32; Yhn 19.17-27)

26Wap lə pɑ dɑ e gɔ, gəm mu' Simon yə Kirena, e pɑ fɑ m gǒ jap bɛnyəpɛnyə Yeso dəm e gɑ e kwa nə jap jʉm e.

27Pɔmnəŋ lə bɑ jʉm é tə jɔm té' o ba pɑjwǐ, wap lə ghiŋ bɑ dzɔp kəkɔp yap, bɑ dɔ̌ nə e. 28Yeso fɛ nɑ e gɔm bi pu gɑ: Gogo Yerusalɛm ka po lɔ m nə́ m̀. Po lɔ m nə po, bɑ m nə́ pó pɔ́. 29Nə pa' mtyɛ'dzʉ wə sɔ̌' yə pu gɔ ghɔm gɑ: Mpuŋtsé bɑ mkíŋ pɑ jwǐ, ba pyə wap ka tsə, wap lə nə́ŋ núŋ pó a. 30Pu gɔ la' pɑ ghɔm bi m kǔŋgo gɑ, po vʉtə nə pyə. Piŋ ghɔm bi pǒ mkuŋgo gɑ: Po tʉ̌m wɔk. 31Nə pa' a bɑ bi a a pɑ po'o nə ta' thə hwǐ, bɑ a gɔ sɔ' pɑ nə ta' thə yə̌mtə m gɑ kɑ?

32Pu lə lɑ̌ shɑ mghɛ ghə nwə cwəpuŋ pɑpʉə, nə gɔ nə zhwə wap pu a pu. 33Wap lə ko nə tsʉ' yə pu ŋkhe gɑ kəlo' thə mo a. Wap kam e thə bɛnyəpɛnyə ba mghɛ ghə nwə cwəpuŋ pɑpʉə. Mu' ghəŋ pu tʉɔ, mu' ghəŋ pu kwyap. 34Yeso lə ghɔm gɑ: Ta lɑ mhɔ map shwyɛ' wap nə pa' wap ka zhyə́ ywə yə wap bɑwə gə a. Wap lə ghɔ m̌ nə ghaptə mdzə́ myə́, nə nthamnthuŋ. 35Pɔmnəŋ lə tiŋnyə bɑ jɔ: Mtadyə pɑ gwi é bɑ gɔm gɑ: E lě bvɔk shɑ pɔ, e vɔk nɑ e, a pɑ yə e bɑ Mesia, Si a, bɑ Si ci e a. 36Msəŋwi lə yəmtə́ é yap, dɑ cɔk mlu' sɔ' bəŋ é hɑ bi é gɔm gɑ: 37O pɑ fo pɑ Yudea o vɔk thə́ nɑ o. 38Mu' ywə́ bvə və́ lə bɑ thə é bɑ pu və gɑ: E bɑ fo pɑ Yudea.

39Mu' gə nwə cwəpuŋ yə pu lə kamtə wap pu a pu a lə yəmtə é yə́ gɑ: O tə bɑ Mesia a lə? Vɔk thə́ nɑ o, bɑ wɔk yɔk. 40Da' gɑ yə mu' cɔk e gɔm gɑ: O tə bwɔk Si a, wə yə o bɑwə jɔgo' pɑ pa' yʉ́ a? 41Yɔk pu gǒ' bɑ ǎ ku' nə pu. Pu bɑwə ŋkwi pɑ mcwɔ'fa' mɔk pu. Tə sɔ' m nə é, a bɑ e ka hɔ sɔmywə. 42E lə ghɔm bi Yeso gɑ: La' ŋkhamtə a nə tyɛ'dzʉ yə o gɔ sɔ' sɔ' pa' fo a. 43Yeso pa' bi e gɑ: Kwa' nyənyɔ gɑ siŋ o gɑ tyɛ' ɔ, pu gɔ pɑ nthʉm Paradisi.

Yeso pfʉ́

(Mt 27.45-56; Mk 15.33-41; Yhn 19.28-30)

44Mɔkcʉ́ lə kǔ' dzʉ̌ so nə guŋ mtsʉ' awɛ dəmcǎ' tə gɔ ŋkhəm nə m nam tá. 45Nam lə pǐ. A pɑ po'o dzə́ nə sam Dyə Si sɔnyə dəŋdəŋ. 46Yeso cwé tə thə́ gɔm gɑ: Tá a, gɑ̌ yap zhwenyə a nə bu mǔ. E lə ghɔm po'o pfʉ́. 47Tadyə msəŋwi ŋkhə lə nə yɔ ywə yə a shyə a, gu'tə Si gɔm gɑ: kwa' nyənyɔ bɛ yəŋ kɑ bɑ mo dəŋdəŋ. 48Guŋ pɔ awɛ pyə wap lə cu'tə bɑwə jɔ yəŋ nwə a, lə yɔ pa' a shyə a, bɑnyə bɑ dzɔp pu kəkɔp pu. 49Guŋ pɔ pyə wap lə bɑ wap zhyə́ Yeso a lə tiŋnyə gʉə sʉəsʉə ba pɑjwǐ pyə wap lə bɑ jʉm é tə fɑ Galilea bɑ de.

Thəsì Yeso

(Mt 27.57-61; Mk 15.42-47; Yhn 19.38-42)

50A lə pɑ po'o mu' mo tso tsyə pɑ Yosɛp, bɑ mo cəcɑ̌ mghətso, bɑ mo pɑpuŋ, mo dəŋdəŋ sɔ́': 51Bɑ e la tə piŋ nwə mso pyə ba mfa' map. E lə bɑ yə Arimatea, tisuŋ pɑ Yudea. E lə bɑwə byap Nəfo Si. 52Bɛ bɔ lə ghɔ jɔ Pilato həŋtə gɑ é hɑ pfə Yeso bi e. 53E lə fi' é thə bɛnyəpɛnyə, dɑ mkam dzə dzʉmtə e jap e nthʉm sì bɑ pú təŋ yá nə wǔ gwɔ', bɑ pu la m nyəŋ sɔmmo nthʉm o. 54Sabat lə bɑwə sɔ̌', a pɑ tyɛ'dzʉ nə nyaptə.

55Pɑjwǐ pyə wap pu a Yeso lə bɑ tə fɑ Galilea lə yap jʉm Yosɛp; wap lə yɔ thəsì biŋ jɔ pa' pu lə yap pfə Yeso nthʉm o a. 56Wap lə pɑnyə cwəlɔ, nyaptə mwɑ́ damnyəlamnyə; a pɑ Sabat, wap hwitə pa' mco' lə yap a.

Attualmente Selezionati:

LUKASI 23: NTGomala

Evidenziazioni

Copia